Read Malay, Manado Matius 1 Bible Online

Matius 1 - Malay, Manado bible

Matius 1

¹Ini tu daftar keturunan nene moyang dari Yesus Kristus. Yesus ini tu raja Daud pe keturunan deng Abraham pe keturunan. Bagini tu daftar:

²Abraham dapa anak laki-laki, de pe nama Ishak. Ishak dapa anak laki-laki, de pe nama Yakub. Yakub dapa anak laki-laki, de pe nama Yehuda deng Yehuda pe sudara-sudara laki-laki.

³Yehuda dapa dua anak laki-laki dari de pe bini Tamar, dorang dua pe nama Peres deng Zerah. Peres dapa anak laki-laki, de pe nama Hezron. Hezron dapa anak laki-laki, de pe nama Ram.

⁴Ram dapa anak laki-laki, de pe nama Aminadab. Aminadab dapa anak laki-laki, de pe nama Nahason. Nahason dapa anak laki-laki, de pe nama Salmon.

⁵Salmon dapa anak laki-laki dari de pe bini Rahab, tu anak itu pe nama Boas. Boas dapa anak laki-laki dari Rut tu de pe bini, tu anak itu pe nama Obed. Obed dapa anak laki-laki, de pe nama Isai.

⁶Isai dapa anak laki-laki, de pe nama Daud, tu jadi bangsa Israel pe raja. Daud dapa anak laki-laki dari Batsyeba, tu Uria pe bini dulu, tu anak itu pe nama Salomo.

⁷Salomo dapa anak laki-laki, de pe nama Rehabeam. Rehabeam dapa anak laki-laki, de pe nama Abia. Abia dapa anak laki-laki, de pe nama Asa.

⁸Asa dapa anak laki-laki, de pe nama Yosafat. Yosafat dapa anak laki-laki, de pe nama Yoram. Yoram dapa anak laki-laki, de pe nama Uzia.

⁹Uzia dapa anak laki-laki, de pe nama Yotam. Yotam dapa anak laki-laki, de pe nama Ahas. Ahas dapa anak laki-laki, de pe nama Hizkia.

¹⁰Hizkia dapa anak laki-laki, de pe nama Manasye. Manasye dapa anak laki-laki, de pe nama Amon. Amon dapa anak laki-laki, de pe nama Yosia.

¹¹Waktu bangsa Israel dapa buang ka Babel, Yosia dapa anak laki-laki, de pe nama Yekhonya deng de pe sudara-sudara laki-laki.

¹²Abis bangsa Israel dapa buang ka Babel, Yekhonya dapa anak laki-laki, tu anak itu pe nama Sealtiel. Sealtiel dapa anak laki-laki, de pe nama Zerubabel.

¹³Zerubabel dapa anak laki-laki, de pe nama Abihud. Abihud dapa anak laki-laki, de pe nama Elyakim. Elyakim dapa anak laki-laki, de pe nama Azor.

¹⁴Azor dapa anak laki-laki, de pe nama Zadok. Zadok dapa anak laki-laki, de pe nama Akhim. Akhim dapa anak laki-laki, de pe nama Eliud.

¹⁵Eliud dapa anak laki-laki, de pe nama Eleazar. Eleazar dapa anak laki-laki, de pe nama Matan. Matan dapa anak laki-laki, de pe nama Yakub.

¹⁶Yakub dapa anak laki-laki, de pe nama Yusuf. Yusuf ini tu Maria pe laki. Maria kase lahir anak laki-laki, tu Anak itu pe nama Yesus, yang ja bilang Kristus tu Raja yang se slamat pa manusia.

¹⁷Jadi mulai dari Abraham sampe pa Daud, ada ampa blas keturunan. Kong dari Daud sampe waktu bangsa Israel dapa buang ka Babel, ada ampa blas keturunan lei. Abis itu, dari waktu bangsa Israel hidop di Babel sampe waktu Kristus, ada ampa blas keturunan lei.

¹⁸Bagini tu cirita tentang Yesus Kristus da lahir: Maria, tu Yesus pe mama so baku janji mo kaweng deng Yusuf. Waktu itu dorang dua blum perna tidor sama-sama, mar Maria so hamil. Maria da hamil lantaran Roh Kudus pe kuasa.

¹⁹Kong waktu Yusuf dapa tau Maria hamil, dia barencana mo se putus pa Maria deng babadiam. Soalnya Yusuf nimau mo beking malo pa Maria di muka banya orang. Yusuf nimau beking malo pa Maria lantaran dia itu orang yang ja beking tu butul di muka pa Tuhan.

²⁰Mar waktu Yusuf masi da pikir-pikir tu de pe rencana itu, Tuhan pe malaekat datang pa dia di mimpi. Malaekat itu bilang pa dia, “Yusuf, raja Daud pe keturunan, ngana nyanda usa tako mo ambe Maria jadi ngana pe bini. Soalnya tu bayi yang ada pa de pe puru itu dari Roh Kudus.

²¹Nanti Maria mo se lahir satu anak laki-laki. Ngana musti kase nama tu anak itu Yesus[1], lantaran Dia yang mo se slamat tu Dia pe orang-orang dari dorang pe dosa-dosa.”

²²Samua tu da jadi itu Tuhan so bilang dari dulu lewat Dia pe nabi, kong skarang samua itu so gnap. Bagini tu Tuhan da bilang,

²³“Tarukira jo bae-bae, nanti ada satu nona yang masi prawan mo hamil. Dia mo se lahir satu Anak laki-laki, kong orang-orang mo pangge pa tu Anak itu Imanuel.” (Imanuel dari kata Ibrani tu de pe arti: Tuhan Allah da sama-sama deng torang.)

²⁴Pe klar bamimpi, Yusuf tabangong kong beking samua tu Tuhan pe malaekat da bilang pa dia. Dia ambe pa Maria jadi de pe bini.

²⁵Mar slama Maria blum se lahir de pe Anak itu, Yusuf nyanda tidor sama-sama deng Maria. Kong waktu Anak laki-laki itu so lahir, Yusuf kase nama pa tu Anak itu, Yesus.