Read Malay, Manado Matius 10 Bible Online

Matius 10 - Malay, Manado bible

Matius 10

¹Yesus pangge pa Dia pe dua blas murit, kong Dia kase kuasa pa dorang for user setang-setang deng for kase bae macam-macam panyaki deng cacat.

²Tu dua blas rasul tu Yesus pe utusan-utusan itu, dorang pe nama-nama ini: yang pertama Simon tu ja pangge lei Petrus, Andreas tu Petrus pe ade, Yakobus deng Yohanes tu Zebedeus pe anak-anak,

³Filipus, Bartolomeus, Tomas, Matius tu petugas pajak, Yakobus tu Alfeus pe anak, Tadeus,

⁴Simon tu dari Gerakan Yahudi Merdeka, deng Yudas Iskariot yang mo bahianat pa Yesus.

⁵Yesus utus tu Dia pe dua blas murit itu deng kase pesan pa dorang, “Ngoni jang pigi di tampa tinggal dari tu orang-orang yang bukang Yahudi ato jang lei maso ka kota-kota tu tampa tinggal orang Samaria,

⁶malatare ngoni pigi jo pa ngoni pe orang-orang Israel yang so sesat tu sama deng domba yang so ilang jalang.

⁷Ngoni pi kase tau pa dorang bagini, ‘So dekat de pe waktu for Tuhan Allah Berkuasa sbagai Raja.’

⁸Kong kase bae jo tu orang-orang saki, kase hidop ulang tu orang-orang yang so mati, kase bae tu orang-orang yang da saki kusta deng user tu setang-setang dari pa orang-orang. Ngoni so trima samua itu deng cuma-cuma, jadi ngoni musti pake samua itu for tolong orang laeng deng cuma-cuma lei.

⁹Waktu ngoni pigi, ngoni jang bawa doi mas, doi perak ato doi tembaga pa ngoni pe tampa doi.

¹⁰Ngoni lei jang bawa tas bekal, baju for baganti, deng jang bawa lei slop ato tongkat, lantaran tu orang yang da beking de pe karja, dia itu pantas mo dapa tu de pe upah.

¹¹Kalu ngoni maso di satu kota ato kampung, ngoni cari satu orang yang suka mo trima pa ngoni kong manumpang jo pa dia pe ruma sampe ngoni kaluar dari situ.

¹²Waktu ngoni maso ka satu ruma, ngoni musti kase salam pa orang-orang yang da tinggal di situ.

¹³Kalu dorang trima pa ngoni, tu berkat yang ngoni da kase lewat salam itu mo tetap tinggal di situ, mar kalu dorang nyanda trima pa ngoni, tu ngoni pe salam itu mo bale ulang pa ngoni.

¹⁴Kong kalu ada orang di satu ruma ato kota yang nyanda mo trima pa ngoni ato nyanda mo dengar ngoni pe ajaran, ngoni kaluar jo dari situ, ngoni paka jo tu abu pa ngoni pe kaki itu jadi tanda kalu Tuhan mo hukum pa dorang.

¹⁵Kita bilang pa ngoni, nanti di hari kiamat tu hari Tuhan mo adili samua orang, tu hukuman yang orang-orang di kota itu dapa mo lebe brat dari tu hukuman orang-orang yang dulu hidop di Sodom deng Gomora.”

¹⁶Yesus bilang lei, “Inga bae-bae, Kita utus pa ngoni pigi ka tenga-tenga orang-orang yang jaha, itu sama deng domba yang pigi ka tenga-tenga srigala yang ganas. Jadi ngoni musti banya akal sama deng ular yang cerdik deng ngoni pe hati lei musti tulus sama deng burung pombo yang bae-bae.

¹⁷Ngoni musti hati-hati, lantaran ada orang-orang yang mo bawa pa ngoni ka pengadilan agama deng ngoni mo dapa cambok di ruma-ruma ibada agama Yahudi.

¹⁸Dorang lei mo bawa pa ngoni mangada pa penguasa-penguasa deng raja-raja lantaran ngoni da iko pa Kita, kong itu justru jadi kesempatan for ngoni kase tau tu Kabar Bae dari Tuhan Allah pa dorang deng lei pa orang-orang yang nyanda kanal pa Tuhan Allah.

¹⁹Kalu dorang tangka pa ngoni, ngoni nyanda usa tako tentang apa tu ngoni mo bilang ato bagimana ngoni mo bicara pa dorang, lantaran Tuhan mo kase pa ngoni tu kata-kata yang musti ngoni bilang waktu itu.

²⁰Soalnya apa tu ngoni mo bilang waktu itu, itu bukang ngoni pe kata-kata mar ngoni pe Bapa pe Roh pe kata-kata, Dia tu mo babilang lewat ngoni.

²¹Nanti ada de pe waktu, kalu tu orang yang nyanda percaya pa Kita mo srahkan dia pe sudara sandiri yang percaya pa Kita for dapa bunung, bagitu lei deng tu papa-papa mo beking pa dong pe anak-anak. Ada lei tu anak-anak mo malawang pa dorang pe orang tua, kong srahkan tu dorang pe orang tua for dapa bunung.

²²Kong samua orang mo binci pa ngoni lantaran ngoni da iko pa Kita. Mar tu orang yang tetap iko pa Kita sampe ni dunia ini abis, so dia itu yang Tuhan mo se slamat.

²³Kalu orang siksa pa ngoni di satu kota, ngoni lari jo ka kota laeng. Kita bilang pa ngoni, ngoni blum sempat pigi ka samua kota di Israel, kong tu Anak Manusia so datang.

²⁴Nyanda ada murit yang lebe dari de pe guru, kong nyanda ada budak yang lebe dari de pe tuang.

²⁵So cukup kalu ada murit jadi sama rupa de pe guru, kong cukup kalu ada budak jadi sama rupa de pe tuang. Kita ini sama deng satu tuang ruma, kong kalu orang-orang bilang Kita ini Beelzebul tu setang-setang pe bos, lebe soe lei ngoni dang tu ja iko pa Kita, dorang mo bilang yang lebe soe tentang ngoni. Jadi hati-hati jo ngoni.

²⁶Mar ngoni nyanda usa tako pa dorang yang mo siksa pa ngoni. Soalnya apa yang jaha tu skarang ini tasambunyi, nanti orang mo dapa tau, deng apa yang skarang ini masi jadi rahasia, nanti orang mo tau.

²⁷Apa yang Kita da bilang pa ngoni yang masi rahasia for orang laeng, ngoni musti kase tau itu di muka banya orang. Apa tu Kita da se bise pa ngoni pe talinga, ngoni musti pi kase tau di muka banya orang sama deng babicara dari atas ruma.

²⁸Ngoni lei jang tako pa orang yang cuma mampu bunung ngoni pe badan mar nyanda ada kuasa bunung ngoni pe jiwa. Mar ngoni tako jo pa Tuhan Allah yang ada kuasa for se binasa tu ngoni pe badan deng lei ngoni pe jiwa di neraka.

²⁹Co ngoni pikir kalu dua ekor burung pipit ja jual deng harga yang mura skali[14]. Mar biar dorang nyanda ada harga, nyanda ada satu ekor yang mo jatung sampe ka tana kalu bukang Bapa pe mau.

³⁰Bagitu lei deng ngoni, sampe ngoni pe rambu di kapala Tuhan tau de pe jumla.

³¹Jadi ngoni nyanda usa tako lantaran ngoni itu lebe berharga di mata pa Tuhan dari banya burung pipit.

³²Sapa yang mangaku di muka pa orang-orang kalu dia iko pa Kita, Kita lei mo mangaku di muka pa Kita pe Bapa di sorga kalu Kita kanal pa dia.

³³Mar sapa yang manyangkal di muka orang-orang kalu dia iko pa Kita, Kita lei mo manyangkal di muka pa Kita pe Bapa di sorga kalu Kita kanal pa dia”.

³⁴Yesus bilang lei, “Ngoni jang bapikir kalu Kita datang di dunia ini for mo beking orang-orang hidop damai. Kita datang bukang for mo beking orang-orang hidop damai, malatare Kita datang beking orang-orang baku malawang.

³⁵Soalnya Kita datang beking tu orang percaya deng nyanda percaya baku malawang: anak laki-laki malawang pa de pe papa, anak parampuang malawang pa de pe mama, deng anak mantu parampuang malawang pa de pe mama mantu.

³⁶Tu orang pe kluarga sandiri yang jadi dia pe musu.

³⁷Sapa yang sayang de pe papa ato de pe mama lebe dari sayang pa Kita, dia itu nyanda pantas iko pa Kita. Kong sapa yang sayang de pe anak laki-laki ato parampuang lebe dari sayang pa Kita, dia itu lei nyanda pantas iko pa Kita.

³⁸Sapa yang nyanda pikul de pe salib, tu de pe arti dia nyanda siap mendrita sampe mati kong iko pa Kita, tu orang itu nyanda pantas mo iko pa Kita.

³⁹Sapa yang mo hidop cuma for de pe diri sandiri, so dia tu nyanda mo dapa hidop kekal. Mar komang, sapa yang mo kase de pe hidop lantaran iko pa Kita, so dia tu mo dapa hidop kekal.”

⁴⁰Yesus bilang lei, “Sapa jo yang trima pa ngoni, dia so trima pa Kita. Kong sapa jo yang trima pa Kita, dia so trima pa Tuhan Allah yang da utus pa Kita.

⁴¹Sapa jo yang trima pa satu nabi lantaran dia itu nabi, tu orang itu mo dapa upah dari pa Tuhan yang sama deng tu nabi mo dapa. Kong sapa jo yang trima pa orang yang ja beking tu butul di muka pa Tuhan lantaran tu orang itu memang ja beking tu butul, tu orang yang trima tu orang yang ja beking tu butul itu mo dapa upah dari Tuhan sama deng tu upah yang Tuhan mo kase pa samua orang yang ja beking tu butul di muka pa Dia.

⁴²Sapa jo yang kase minum, biar lei cuma satu glas aer puti pa satu orang yang nyanda penting lantaran dia itu orang yang ja iko pa Kita, Kita bilang pa ngoni kalu tu orang yang beking itu pasti mo dapa de pe upah dari Tuhan.”