Read Malay, Manado Matius 11 Bible Online

Matius 11 - Malay, Manado bible

Matius 11

¹Serta Yesus so klar mangajar pa Dia pe dua blas murit, Dia pigi kong mangajar deng kase tau tu Tuhan pe firman pa orang-orang yang ada di kota-kota di daera Galilea.

²Waktu itu, Yohanes Pembaptis ada di dalam bui. Kong waktu Yohanes dengar tentang samua tu Yesus Kristus da beking, dia suru de pe murit-murit pigi pa Yesus for batanya.

³Kong tu Yohanes pe murit-murit pi batanya pa Yesus bagini, “Apa Bapak tu Tuhan Allah da janji mo datang itu? Ato torang musti tunggu orang laeng lei?”

⁴Kong Yesus manyao pa dorang, “Ngoni babale jo pa Yohanes kong bilang pa dia apa tu ngoni da dengar deng ngoni da lia:

⁵tu orang buta so bole balia, orang yang lumpu so bole bajalang, orang yang saki kusta so bae, orang yang pongo so bole badengar, orang mati so hidop ulang, kong orang miskin so dengar tu Kabar Bae dari Tuhan Allah.

⁶Kong orang yang nyanda tolak for percaya pa Kita, dia itu yang paling snang.”

⁷Serta tu Yohanes pe murit-murit itu pigi, Yesus mulai babicara pa orang banya yang ada di situ tentang Yohanes. Dia tanya pa dorang, “Apa ngoni pe tujuan pi lia pa Yohanes di padang gurun? Apa ngoni ka sana supaya ngoni mo pi lia tu orang yang ni hari bicara laeng kong eso laeng, sama deng kusu-kusu yang tagoyang kasana-kamari lantaran angin da tiop? Tantu bukang bagitu to?

⁸No kalu bagitu dang, for apa ngoni ka padang gurun? Apa ngoni ka sana supaya ngoni mo pi lia tu orang yang da pake baju mewa? Tantu bukang bagitu lei to? Soalnya tu orang yang ja pake baju mewa, de pe tampa tinggal pa raja pe istana.

⁹Jadi for apa ngoni ka sana? Apa ngoni ka sana for lia pa nabi? Itu butul. Mar Kita bilang pa ngoni kalu Yohanes itu lebe dari nabi.

¹⁰Soalnya di Kitab Suci da tulis tu Tuhan Allah da bilang tentang Yohanes, ‘Tarukira jo bae-bae, Kita suru tu Kita pe utusan lebe dulu dari Ngana, dia itu yang mo buka akang jalang for Ngana, supaya orang pe hati siap trima pa Ngana.’

¹¹Kita bilang pa ngoni, dari antara orang-orang yang parampuang da se lahir di dunia ini, nyanda perna ada tu lebe penting dari Yohanes Pembaptis. Mar tu orang yang orang ja anggap nyanda penting dari antara orang-orang yang Tuhan Allah da Berkuasa sbagai Raja, so tu orang itu yang lebe penting dari Yohanes Pembaptis.

¹²Mulai dari waktu Yohanes Pembaptis muncul sampe skarang, ada orang-orang jaha malawang tu orang-orang dari Tuhan Allah yang Berkuasa sbagai Raja, tu orang-orang jaha itu brusaha deng kekrasan mo kuasai pa dorang.

¹³Soalnya seblum Yohanes muncul, di samua kitab tu nabi-nabi da tulis deng lei di atoran-atoran yang ada di kitab Taurat, so bilang tentang tu mo jadi skarang ini.

¹⁴Nabi-nabi dulu so kase tau kalu nabi Elia mo datang ulang. Jadi kalu ngoni suka mo trima tu nabi-nabi da bilang dulu tentang Yohanes ini, so dia ini no tu nabi-nabi ja bilang Elia yang mo datang ulang itu.

¹⁵Jadi sapa tu ada talinga, badengar jo bae-bae.

¹⁶Kita mo se banding deng apa tu orang-orang yang nyanda percaya di jaman ini? Dorang ini Kita mo se sama deng anak-anak yang da dudu bermain di pasar kong bataria pa dong pe tamang-tamang bagini,

¹⁷‘Torang da tiop suling for ngoni, mar ngoni nyanda manari. Torang da manyanyi lagu duka, mar ngoni nyanda manangis.’

¹⁸Itu sama deng ngoni nyanda trima Yohanes deng Kita. Waktu Yohanes datang ja bapuasa deng nyanda minum anggor, mar orang-orang bilang, ‘Dia itu da kemasukan setang!’

¹⁹Kong skarang tu Anak Manusia so datang. Dia nyanda bapuasa deng Dia lei ja minum anggor, kong orang-orang bilang, ‘Co lia, tu orang ini pe rakus deng pangmabo. Dia lei ja batamang deng tu petugas-petugas pajak deng tu orang-orang berdosa.’ Mar biar ngoni bilang bagitu, torang bole lia Tuhan pe hikmat dari tu kalakuan yang bagus dari tu orang-orang yang da iko Tuhan pe ajaran.”

²⁰Abis itu, Yesus mulai togor deng kras pa tu orang-orang yang ada di kota-kota tu Dia da beking akang mujisat paling banya, lantaran dorang nimau mo bertobat.

²¹Yesus bilang, “Hei ngoni tu orang-orang di Khorazim deng Betsaida, cilaka jo ngoni! Soalnya Kita so beking mujisat-mujisat di tenga-tenga pa ngoni mar ngoni nimau mo percaya kong bertobat. Padahal kalu tu orang-orang di Tirus deng Sidon waktu dulu da lia tu mujisat-mujisat yang Kita da beking pa ngoni, pasti so dari dulu dorang da bertobat kong pake baju karong deng taru abu pa dong pe kapala tanda dorang manyasal da beking dosa.

²²Mar Kita bilang pa ngoni, nanti waktu di hari kiamat tu hari Tuhan mo adili samua orang, tu ngoni pe hukuman mo lebe brat dari tu orang-orang dulu di Tirus deng Sidon pe hukuman.

²³Kong ngoni orang-orang di Kapernaum, ngoni kira Tuhan mo angka pa ngoni sampe ka sorga? Nyanda kasiang, malatare Dia mo buang pa ngoni ka neraka. Soalnya Kita so beking mujisat-mujisat di tenga-tenga pa ngoni mar ngoni nimau bertobat. Padahal kalu tu mujisat-mujisat yang Kita da beking pa ngoni da jadi lei jaman dulu di Sodom, pasti tu Sodom itu masi ada sampe skarang.

²⁴Kita bilang pa ngoni, nanti di hari kiamat tu hari Tuhan mo adili samua orang, tu ngoni pe hukuman mo lebe brat dari tu orang-orang dulu di Sodom pe hukuman.”

²⁵Abis itu Yesus basombayang, “Kita bilang makase pa Bapa, Tuhan yang berkuasa di langit deng bumi, lantaran Bapa nyanda kase tunjung samua hal itu pa tu orang-orang yang tau banya hal deng pa orang-orang pande for mangarti tu samua itu. Mar Bapa beking jelas samua itu pa tu orang-orang biasa yang dong pe hati polos sama deng anak kacili.

²⁶Iyo Bapa, itu yang beking snang Bapa pe hati.”

²⁷Abis itu Yesus bilang, “Kita pe Bapa so kase samua pa Kita. Nyanda ada satu orang yang tau sapa tu Bapa pe Anak, kacuali Bapa sandiri. Kong nyanda ada satu orang yang tau sapa tu Bapa kacuali Dia pe Anak, deng sapa jo tu Anak da pili for tau tentang Bapa.

²⁸Mari jo datang pa Kita, samua ngoni yang lala deng yang banya beban, kong Kita mo beking ngoni pe hati jadi lega.

²⁹Ngoni iko jo tu prenta yang Kita da kase pa ngoni, sama deng tu sapi yang da se pake akang kuk for iko de pe tuang pe mau. Ngoni blajar jo dari pa Kita lantaran Kita ini bae-bae deng nyanda sombong. Kalu ngoni beking bagitu, ngoni pe hati mo jadi lega.

³⁰Soalnya tu prenta yang Kita da kase itu nyanda susa, kong tu beban yang Kita da kase pa ngoni nyanda brat.”