Read Malay, Manado Matius 12 Bible Online

Matius 12 - Malay, Manado bible

Matius 12

¹Satu hari pas hari Sabat, tu hari yang orang nimbole bakarja, Yesus deng De pe murit-murit bajalang lewat di kobong gandum. Samantara bajalang di situ, Dia pe murit-murit so lapar, so itu dorang mulai bapete gandum kong dorang makang.

²Waktu itu, ada orang-orang dari golongan Farisi yang da lia itu, kong dorang babilang pa Yesus, “Bapak, co lia tu Bapak pe murit-murit! Sebenarnya kalu iko atoran agama, dorang nimbole bakarja di hari Sabat, mar dorang da langgar tu atoran itu.”

³Mar Yesus manyao pa dorang, “Tantu ngoni so perna baca di Kitab Suci tu cirita tentang Raja Daud waktu dia deng de pe orang-orang so lapar.

⁴Dia maso ka dalam Tuhan Allah pe tenda ibada kong makang tu roti yang da kase persembahan for Tuhan Allah, trus dia kase berbage tu roti itu pa de pe orang-orang, padahal dia ato de pe orang-orang nimbole makang tu roti, cuma tu imam-imam yang bole makang itu.

⁵Ngoni lei pasti so baca tu atoran-atoran yang ada di kitab Taurat kalu tiap hari Sabat tu imam-imam bertugas di Ruma Ibada Pusat. Deng beking bagitu dorang lei so langgar tu hari Sabat pe atoran. Mar nyanda sala to tu dorang da beking itu?

⁶Kita bilang pa ngoni, tu Ruma Ibada Pusat penting skali, mar di sini ada yang lebe penting dari itu.

⁷Di Kitab Suci, Tuhan Allah da bilang bagini, ‘Kita suka orang-orang se tunjung dong pe rasa kasiang pa orang laeng, daripada dorang kase korban persembahan mar nyanda ada rasa kasiang.’ Kalu ngoni mangarti tu Tuhan da bilang itu, pasti ngoni nyanda mo kase sala pa Kita pe murit-murit yang nyanda beking sala apa-apa.

⁸Soalnya tu Anak Manusia ada kuasa for ator apa tu manusia bole mo beking di hari Sabat.”

⁹Yesus se tinggal tu tampa itu kong pigi pa dorang pe ruma ibada agama Yahudi.

¹⁰Di situ ada tu satu orang yang dia pe tangan sabla cacat, deng ada lei orang-orang dari golongan Farisi. Tu orang-orang dari golongan Farisi batanya pa Yesus, “Bole ato nyanda se bae orang saki di hari Sabat, tu hari orang nimbole bakarja?” Dorang da lia-lia trus pa Yesus mo cari tau kalu Dia mo kase bae orang saki di hari Sabat tu hari orang Yahudi nimbole bakarja, supaya kalu Dia beking bagitu, dorang bole ada alasan for se sala pa Dia.

¹¹Kong Yesus bilang pa dorang, “Kalu dari pa ngoni ada yang punya satu ekor domba kong tu domba itu taisi di lobang pas di hari Sabat, pasti dia mo pi kase kaluar tu domba itu dari lobang.

¹²No, tu manusia lebe berharga dari domba, kong so lantaran itu torang bole beking tu bae di hari Sabat.”

¹³Trus Yesus bilang pa tu orang yang de pe tangan sabla cacat, “Co se kamuka kamari tu ngana pe tangan!” Tu orang itu se kamuka de pe tangan, kong dia pe tangan itu jadi bae sama deng de pe tangan sabla yang nyanda cacat.

¹⁴Mar tu orang-orang dari golongan Farisi kaluar dari tu ruma ibada itu kong baku skongkol for bunung pa Yesus.

¹⁵Yesus tau kalu tu orang-orang dari golongan Farisi da barencana mo bunung pa Dia, so itu Dia pigi dari situ. Waktu Dia pigi, banya orang da iko pa Dia kong Dia kase bae samua orang yang da saki.

¹⁶Mar Dia larang deng kras pa dorang kase tau sapa Dia.

¹⁷Deng bagitu so gnap apa tu Tuhan Allah da bilang dulu pa nabi Yesaya, bagini tu Dia da bilang,

¹⁸“Ini tu Kita pe Playan yang Kita so pili. Kita sayang pa Dia, Dia itu beking snang Kita pe hati. Kita mo kase pa Dia tu Kita pe Roh, kong Dia mo kase tau pa bangsa-bangsa kalu Kita nanti mo adili samua orang deng cara yang adil.

¹⁹Dia nyanda mo baku ambe deng sapa-sapa deng nyanda mo bataria akang, orang-orang lei nyanda mo dengar Dia babicara di muka banya orang di jalang-jalang.

²⁰Dia mo bae-bae akang tu orang yang lemah, itu sama deng Dia nyanda mo kase putus tu buluh yang so pata, sama lei deng Dia nyanda mo se mati tu pelita yang de pe manyala so kacili. Dia mo pimpin sampe tu adil menang dari tu nyanda adil.

²¹Samua bangsa mo baharap deng yakin pa Dia.”

²²Satu kali, ada bebrapa orang pigi pa Yesus, kong dorang da bawa satu laki-laki yang da kemasukan akang setang. Tu laki-laki itu buta deng wowo. Yesus se bae pa dia, kong dia so bole balia deng babicara.

²³Pe lia bagitu, tu orang-orang di situ jadi taheran-heran, kong dorang baku bilang, “Dia stou kang tu raja Daud pe keturunan yang Tuhan da janji mo datang?”

²⁴Mar waktu tu orang-orang dari golongan Farisi dapa dengar itu, dorang babilang, “Dia da bauser setang-setang pake Beelzebul pe kuasa, tu setang-setang pe bos.”

²⁵Mar Yesus tau tu dorang pe pikiran, kong Dia bilang pa dorang, “Kalu rakyat di satu krajaan baku malawang kong tapisa-pisa, tu krajaan so pasti mo ancor, deng lei kalu satu kota ato satu ruma tangga baku malawang kong tapisa-pisa, so pasti mo ancor.

²⁶Bagitu lei kalu setang user setang, dorang itu so tapisa-pisa lantaran da baku musu, so pasti dong pe krajaan mo ancor.

²⁷No kalu butul Kita da bauser setang pake Beelzebul pe kuasa, ngoni pe murit-murit dang da bauser setang pake sapa pe kuasa? Tantu katu pake Tuhan Allah pe kuasa to? Jadi dari apa tu ngoni pe murit-murit da beking itu, itu se tunjung kalu tu ngoni da tudu pa Kita itu sala.

²⁸Mar kalu Kita da bauser setang pake kuasa dari Tuhan Allah pe Roh, itu de pe arti Tuhan Allah so Berkuasa sbagai Raja di tenga-tenga pa ngoni.

²⁹Kalu ada satu orang mo maso ambe barang pa orang kuat pe ruma, dia musti ika dulu tu orang kuat itu baru dia bole ambe tu barang-barang di ruma itu.[15]

³⁰Sapa yang nimau sama-sama deng Kita, dia itu sebenarnya malawang pa Kita. Kong sapa yang nyanda tolong pa Kita for se kumpul tu orang-orang supaya dorang sama-sama deng Kita, dia itu yang beking orang-orang tafiaro jao dari pa Kita.

³¹So itu Kita bilang pa ngoni, samua tu dosa yang orang da beking masi bole mo dapa ampung, bagitu lei deng bahojat. Mar kalu orang bahojat pa Roh Kudus, dia nyanda mo dapa ampung.

³²Kalu orang bilang sesuatu yang malawang pa Anak Manusia, dia masi bole mo dapa ampung. Mar kalu orang bilang sesuatu yang malawang pa Roh Kudus, dia so nyanda mo dapa ampung, skarang ato sampe slama-lamanya.”

³³Yesus bilang lei, “Kalu ada pohong yang bagus, tantu lei de pe bua bagus. Kalu ada pohong yang nyanda bagus, tantu lei de pe bua nyanda bagus. Torang bole mo dapa tau kalu tu pohong bagus ato nyanda, cuma dari de pe bua.

³⁴Ngoni itu orang jaha, tu bole mo se sama deng tu ular babisa. Nyanda mungkin ngoni bole mo bilang tu hal-hal yang bae lantaran ngoni sandiri jaha. Soalnya apa yang ada pa orang pe dalam hati, itu yang mo kaluar dari dia pe mulu.

³⁵Orang yang bae-bae ja bilang tu bae, lantaran samua yang ada pa dia pe dalam hati bae. Mar tu orang jaha ja bilang tu jaha, lantaran samua yang ada pa dia pe dalam hati jaha.

³⁶Kita bilang pa ngoni, nanti di hari kiamat tu hari Tuhan mo adili pa samua orang, tiap orang musti tanggong jawab pa Tuhan tu samua kata-kata yang dia da bilang, biar tu kata-kata yang da tabilang nyanda bapikir dulu.

³⁷Soalnya Tuhan mo tentukan kalu ngoni itu orang yang butul ato orang yang mo dapa hukum lewat tu ngoni pe kata-kata.”

³⁸Kong bebrapa ahli Taurat deng orang dari golongan Farisi bilang pa Yesus, “Guru, torang suka Guru se tunjung satu mujisat.”

³⁹Mar Yesus bilang pa dorang, “Ngoni tu orang-orang skarang ini, ngoni ini jaha deng nyanda setia pa Tuhan Allah. Ngoni minta pa Kita beking mujisat for se bukti kalu Kita dari pa Tuhan Allah. Mar Kita nyanda mo kase bukti apa-apa pa ngoni, kacuali Kita mo se inga pa ngoni apa tu da jadi pa nabi Yunus dulu.

⁴⁰Dulu nabi Yunus ada di dalam ikang basar pe puru slama tiga hari tiga malam, bagitu lei deng Anak Manusia, Dia mo ada di dalam kubur slama tiga hari tiga malam.

⁴¹Kong nanti di hari kiamat tu hari Tuhan mo adili pa samua orang, tu orang-orang yang dulu da tinggal di kota Niniwe mo hidop ulang sama-sama deng ngoni tu orang-orang skarang ini, kong dorang mo kase tunjung tu ngoni pe sala trus ngoni mo dapa hukuman. Soalnya tu orang-orang Niniwe itu bertobat serta dorang dengar tu Tuhan pe pesan yang Yunus da kase tau. Kong tarukira jo bae-bae, skarang ini ada Orang yang lebe berkuasa dari nabi Yunus di tenga-tenga pa ngoni, ngoni so dengar tu Tuhan pe pesan mar ngoni nimau bertobat.

⁴²Deng lei nanti di hari kiamat tu hari Tuhan mo adili pa samua orang, tu ratu Syeba yang dulu da kuasai negri di bagean Slatan mo hidop ulang sama-sama deng ngoni tu orang-orang skarang ini, trus dia mo se tunjung tu ngoni pe sala kong ngoni mo dapa hukuman. Soalnya dulu dia itu da datang dari jao skali pigi pa raja Salomo for dengar tu raja Salomo pe hikmat. Mar ngoni tarukira jo bae-bae, skarang di sini ada Orang yang lebe berkuasa dari raja Salomo, mar ngoni tetap nyanda mo badengar pa Dia.”

⁴³Yesus bilang lei, “Kalu setang kaluar dari satu orang, tu setang itu pi babaron lewat tu tampa-tampa tandus for cari tampa mo tinggal akang. Mar lantaran dia nyanda dapa tampa mo baistirahat akang,

⁴⁴dia bapikir bagini, ‘Lebe bae kita babale jo di tampa tinggal dulu, tu orang yang kita so perna tinggal akang.’ Waktu dia bale kong maso ulang pa tu orang itu, dia lia tu orang itu sama deng ruma yang so sosapu akang bersi deng so taator rapi.

⁴⁵Abis itu, tu setang pi pangge tuju setang laeng yang lebe jaha dari dia, kong dorang maso pa tu orang itu trus tinggal di situ. De pe laste, tu orang itu pe keadaan so lebe soe dari tu pertama. Itu no yang mo jadi pa ngoni tu orang-orang yang tinggal di jaman ini.”

⁴⁶Waktu Yesus masi babicara deng tu orang banya itu, Dia pe mama deng De pe sudara-sudara da badiri di luar, dorang da brusaha mo babicara deng Dia.

⁴⁷Kong ada satu orang kase tau pa Yesus, “Bapak, co lia tu Bapak pe mama deng Bapak pe sudara-sudara ada di luar, kong dorang brusaha mo baku dapa deng Bapak.”

⁴⁸Kong Yesus bilang pa tu orang yang kase tau itu pa Dia, “Sebenarnya sapa so tu Kita pe mama deng Kita pe sudara-sudara?”

⁴⁹Kong Yesus tunjung tu De pe murit-murit trus babilang, “Co lia, dorang ini no tu Kita pe mama deng Kita pe sudara-sudara.

⁵⁰Soalnya sapa yang beking tu Kita pe Bapa di sorga pe mau, so dia tu Kita pe sudara laki-laki, so dia tu Kita pe sudara parampuang deng so dia tu Kita pe mama.”