Read Malay, Manado Matius 14 Bible Online

Matius 14 - Malay, Manado bible

Matius 14

¹Waktu itu, Herodes yang da jadi raja di daera Galilea. Dia dapa dengar kabar tentang Yesus,

²kong dia bilang pa de pe pegawai-pegawai, “Tu Orang yang Dia pe nama Yesus, so Dia tu Yohanes Pembaptis yang so mati mar skarang so hidop ulang, so itu Dia ada kuasa for beking tu mujisat-mujisat.”

³Herodes bilang bagitu, lantaran tempo hari, dia yang da suru tangka pa Yohanes kong suru ika deng rante trus kase maso ka bui. Dia da suru beking bagitu pa Yohanes lantaran tu masala Herodias. Dia da ambe pa Herodias jadi dia pe bini, padahal waktu itu Herodias so kaweng deng Filipus tu dia pe sudara sandiri.

⁴Trus Yohanes da togor ulang-ulang pa Herodes, dia bilang, “Bapak, bapak so langgar tu atoran agama, lantaran bapak so ambe pa Herodias beking jadi bapak pe bini, padahal dia itu bapak pe sudara pe bini.”

⁵So lantaran itu no Herodes mo bunung pa Yohanes, mar dia tako pa orang banya lantaran dorang pikir kalu Yohanes itu nabi tu orang yang ja kase tau tu Tuhan pe pesan pa orang-orang.

⁶Mar satu kali, waktu Herodes pe hari jadi, tu Herodias pe anak parampuang da manari di muka pa Herodes deng de pe tamu-tamu. Dia da manari beking snang pa Herodes.

⁷So itu, Herodes basumpa for kase apa jo tu dia mo minta.

⁸Waktu itu, tu anak parampuang pe mama hasut pa dia. Jadi dia pigi pa Herodes kong bilang, “Kita suka kase pa kita skarang ini tu Yohanes Pembaptis pe kapala yang da taru di baki!”

⁹Pe dengar itu, Herodes jadi sedi skali. Mar lantaran dia so basumpa di muka pa de pe tamu-tamu, dia iyo akang jo tu anak parampuang da minta.

¹⁰Jadi dia suru de pe anak bua pi potong tu Yohanes pe kapala di dalam bui.

¹¹Tu Yohanes pe kapala da taru di baki kong bawa pa tu anak parampuang, trus tu anak parampuang bawa itu pa de pe mama.

¹²Kong Yohanes pe murit-murit datang ambe tu de pe mayat kong kase kubur. Abis itu, dorang pi kase tau tu kabar itu pa Yesus.

¹³Waktu Yesus dengar tu Yohanes Pembaptis so mati, Dia pigi dari situ. Dia nae prao kong pigi ka tampa yang jao dari kampung for mo basandiri. Mar waktu orang banya dapa tau itu, dorang kaluar dari dong pe kota-kota kong iko jalang darat for baku dapa deng Yesus.

¹⁴Waktu Yesus turung dari prao, Dia lia tu orang banya itu kong muncul De pe rasa kasiang pa dorang, trus Dia kase bae tu orang-orang saki.

¹⁵De pe sore jo, Yesus pe murit-murit datang pa Dia kong babilang, “Guru, ni tampa so jao dari kampung, kong sadiki lei so mo malam. Suru jo pa dorang pigi dari sini, supaya dorang bole mo babli makanan di kampung-kampung dekat sini.”

¹⁶Mar Yesus babilang pa Dia pe murit-murit, “Dorang nyanda perlu pigi dari sini, ngoni yang kase makang pa dorang.”

¹⁷Kong tu murit-murit bilang pa Dia, “Guru, yang ada pa torang di sini cuma lima roti deng dua ikang.”

¹⁸Yesus bilang pa dorang, “Bawa jo kamari tu roti deng ikang itu.”

¹⁹Abis itu Dia suru tu orang banya dudu di atas rumpu. Dia ambe tu lima roti deng tu dua ikang itu, Dia mangada ka langit kong bilang makase pa Tuhan. Abis itu Dia pela-pela tu roti kong kase pa De pe murit-murit, trus De pe murit-murit kase berbage pa tu orang banya.

²⁰Kong dorang samua makang sampe kanyang. Abis itu, Yesus pe murit-murit kase kumpul tu makanan yang da talebe, samua ada dua blas loto fol.

²¹Waktu itu yang da iko makang kira-kira lima ribu orang laki-laki, blum tamaso tu parampuang deng anak-anak.

²²Abis itu, Yesus iko suru Dia pe murit-murit nae ka prao kong pigi lebe dulu ka sabla danau, kong samantara itu Dia suru tu orang banya pulang.

²³Serta Yesus so suru tu orang banya pulang, Dia nae ka satu bukit for basombayang sandiri. Waktu so mo malam, Yesus masi ada di situ sandiri.

²⁴Samantara itu, tu prao yang Dia pe murit-murit da nae akang so jao ka tenga danau. Kong tu prao itu tagoyang kras kasana-kamari lantaran omba da paka. Soalnya tu angin da batiop baku malawang deng tu prao.

²⁵Kira-kira amper siang, Yesus datang pa dorang deng cara bajalang di atas aer.

²⁶Waktu De pe murit-murit lia Dia bajalang di atas aer, dorang takage kong bataria, “Setang!”

²⁷Mar Yesus iko bilang pa dorang, “Tenang jo, nyanda usa tako! Ini Kita.”

²⁸Kong Petrus bilang pa Dia, “Guru, kalu butul-butul itu Guru, suru jo pa kita datang pa Guru deng cara bajalang di atas aer.”

²⁹Yesus manyao, “Mari jo kamari!” Kong Petrus turung dari prao kong bajalang di atas aer pigi pa Yesus.

³⁰Mar waktu Petrus dapa rasa tu angin da batiop pe kuat, dia jadi tako kong dia mulai tengglam. Dia bataria pa Yesus, “Guru, tolong akang pa kita!”

³¹Kong Yesus iko pegang pa Petrus, trus bilang, “Hei, ngana orang yang kurang percaya. Kiapa ngana ragu-ragu percaya pa Kita?”

³²Abis itu dorang nae ka prao kong tu angin jadi tedo.

³³Pe lia samua itu, tu orang-orang yang ada di prao basemba pa Yesus, kong dorang babilang, “Guru, memang butul Guru itu Anak Allah.”

³⁴Yesus deng De pe murit-murit sampe di sabla danau, di daera Genesaret.[17]

³⁵Kong waktu tu orang-orang di situ dapa kanal pa Yesus, dorang iko se siar ka samua tampa di daera itu kalu Dia ada, kong orang-orang bawa samua orang saki pa Dia.

³⁶Trus dorang bamohon pa Yesus supaya tu orang-orang saki itu bole mo pegang pa Dia biar lei cuma tu De pe ujung juba, kong samua orang saki yang da bapegang pa Dia jadi bae.