Read Malay, Manado Matius 15 Bible Online

Matius 15 - Malay, Manado bible

Matius 15

¹Satu kali, ada bebrapa orang dari golongan Farisi deng ahli Taurat dari Yerusalem datang pa Yesus, kong dorang batanya pa Dia,

²“Bapak, kiapa Bapak pe murit-murit langgar tu torang pe nene moyang pe adat? Soalnya kwa waktu dorang mo makang, dorang nyanda bacuci tangan iko tu torang pe adat.”

³Mar Yesus manyao, “Kiapa ngoni da langgar Tuhan Allah pe prenta supaya bole mo iko tu ngoni pe nene moyang pe adat?

⁴Soalnya Tuhan Allah da prenta bagini, ‘Ngoni musti hormat tu ngoni pe papa deng mama’, deng ‘Sapa tu bakutuk pa de pe papa ato de pe mama, dia musti dapa hukuman mati.’

⁵Mar ngoni da kase ajar laeng. Ngoni kase ajar pa orang-orang supaya dorang bole babilang pa dong pe papa deng mama bagini, ‘Kita so nyanda mo kase apa-apa for bantu pa papa deng mama, lantaran tu kita mo kase pa papa deng mama, kita so kase persembahan for Tuhan.’

⁶Kong ngoni bilang pa tu orang-orang itu kalu dorang so nyanda perlu lei mo hormat tu dong pe papa deng mama deng cara bantu pa dong pe papa deng mama. Deng ngoni se ajar bagitu, ngoni so nyanda pake tu Tuhan Allah pe prenta, ngoni cuma da pake tu ngoni pe adat sandiri.

⁷Hei ngoni orang-orang munafik! So butul no tu Tuhan Allah da bilang dulu pa nabi Yesaya tentang ngoni. Tuhan Allah da bilang bagini,

⁸‘Bangsa ini puji pa Kita deng dorang pe mulu, mar dorang pe hati jao dari pa Kita.

⁹Nyanda ada guna dorang ja semba pa Kita. Soalnya tu ajaran yang dorang ja kase ajar pa orang-orang, itu cuma iko manusia pe adat.’ ”

¹⁰Abis itu, Yesus pangge tu orang banya kong babilang pa dorang,

¹¹“Ngoni dengar deng tarukira jo bae-bae tu Kita mo bilang ini: apa tu da maso pa orang pe mulu, itu nyanda mo beking tu orang jadi berdosa pa Tuhan. Mar apa yang da kaluar dari orang pe mulu, itu yang beking tu orang jadi berdosa pa Tuhan.”

¹²Abis itu, Yesus pe murit-murit datang pa Dia. Dorang batanya pa Dia, “Guru, apa Guru sadar kalu tu Guru pe kata-kata tadi itu so beking tersinggung pa orang-orang dari golongan Farisi?”

¹³Mar Yesus manyao pa dorang, “Tu orang-orang yang se ajar tu nyanda iko Bapa di Sorga pe mau bole mo se sama deng tanaman yang Dia nyanda tanang, kong samua tu tanaman yang Dia nyanda tanang itu Dia mo cabu sampe de pe akar-akar.

¹⁴Dorang itu sama deng orang buta yang da tuntun orang buta yang laeng. Kalu orang buta tuntun pa orang buta, dorang dua itu pasti mo sama-sama taisi ka lobang. Jadi ngoni se biar jo pa dorang.”

¹⁵Abis itu Petrus babilang pa Yesus, “Co Guru kase tau akang pa torang apa dang tu prumpamaan itu pe arti.”

¹⁶Kong Yesus manyao pa dorang, “Ngoni lei masi blum mangarti apa tu prumpamaan itu pe arti?

¹⁷Ngoni pasti so tau kalu apa tu orang da se maso di mulu, itu turung pa de pe puru kong kaluar.

¹⁸Mar tu kata-kata yang kaluar dari orang pe mulu, itu samua de pe asal dari de pe hati, so kata-kata itu no yang beking orang jadi berdosa pa Tuhan.

¹⁹Soalnya dari hati timbul samua yang jaha: pikiran jaha, babunung, bersina, beking tu cabul, bapancuri, basaksi dusta deng lei bicara besae tentang orang laeng.

²⁰Itu samua tu beking orang jadi berdosa pa Tuhan. Mar kalu orang makang deng tangan yang nyanda da cuci iko tu adat, itu nyanda mo beking tu orang jadi berdosa pa Tuhan.”

²¹Yesus deng Dia pe murit-murit se tinggal tu tampa itu kong pigi ka daera di dekat kota Tirus deng Sidon.

²²Di situ ada tu satu ibu tu de pe asal dari daera itu. Dia bukang orang Yahudi, dia orang Kanaan. Tu ibu itu datang pa Yesus kong minta pa Dia deng suara kuat, “Hei Bapak, tu raja Daud pe keturunan, kasiang akang dang pa kita! Kita pe anak parampuang da kemasukan setang kong dia so mendrita skali.”

²³Mar Yesus nyanda bilang apa-apa pa tu ibu itu. Kong Dia pe murit-murit datang trus bamohon pa Dia, “Guru, lebe bae Guru suru pigi jo pa dia lantaran dia babataria trus di blakang pa torang.”

²⁴Kong Yesus bilang, “Tuhan Allah da utus pa Kita skarang ini for tolong tu torang pe bangsa Israel yang so sala jalang. Orang-orang Israel yang sala jalang itu sama deng domba yang so tailang dari dorang pe gembala.”

²⁵Mar tu ibu itu badekat pa Yesus kong berlutut di muka pa Yesus, trus babilang, “Bapak, tolong akang kwa pa kita.”

²⁶Yesus bilang pa dia, “Nyanda bagus ambe tu makanan yang da se sadia for anak-anak kong kase lempar pa anjing.”[18]

²⁷Tu ibu itu manyao, “Butul Bapak, mar tu anjing lei makang tu sisa-sisa makanan yang da taciri dari de pe tuang pe meja.”

²⁸Pe dengar itu, Yesus bilang pa dia, “Hei ibu, pe basar skali ibu pe iman. Jadi jo pa ibu sama deng tu ibu da minta.” Waktu itu jo, tu ibu itu pe anak parampuang yang da kemasukan setang itu jadi bae.

²⁹Abis itu, Yesus deng De pe murit-murit kase tinggal tu tampa itu kong pi bajalang di pinggir danau Galilea. Dorang nae ka atas bukit kong Dia dudu di situ.

³⁰Waktu itu banya orang datang pa Yesus. Dorang da bawa orang lumpu, orang buta, orang kento, orang wowo deng orang yang saki laeng lei. Tu orang-orang saki itu dorang taru di muka pa Yesus, kong Yesus se bae pa tu orang-orang saki itu.

³¹Tu orang banya yang ada di situ jadi taheran-heran, lantaran dorang da lia tu orang wowo so bole babicara, tu kento so bae, tu lumpu so bole bajalang deng tu orang buta so bole balia. So itu dorang samua puji deng hormat pa Tuhan Allah, tu Tuhan yang orang Israel ja semba.

³²Trus Yesus pangge De pe murit-murit kong babilang, “Kita rasa kasiang pa tu orang banya ini. Soalnya dorang so tiga hari da iko pa Kita kong dorang so nyanda ada makanan. Kita nimau mo suru pulang pa dorang deng puru kosong, nanti dorang mo flao di jalang.”

³³Kong Yesus pe murit-murit bilang pa Dia, “Guru, ini tampa so jao dari kampung, bagimana lei torang bole mo se makang pa dorang yang pe banya skali ini?”

³⁴Mar Yesus cuma bale batanya pa dorang, “Ada brapa ngoni pe roti?” Dorang manyao, “Pa torang ada tuju roti deng ada lei bebrapa ikang kacili.”

³⁵Kong Yesus suru tu orang banya itu dudu di tana.

³⁶Abis itu Yesus ambe tu tuju roti deng tu bebrapa ikang kong Dia bilang makase pa Tuhan. Klar itu, Dia pela-pela tu roti deng tu bebrapa ikang kong kase pa Dia pe murit-murit, trus dorang kase berbage pa tu orang banya itu.

³⁷Kong dorang samua makang sampe kanyang. Klar itu, Yesus pe murit-murit kumpul tu makanan yang da talebe, de pe banya tuju kranjang fol.

³⁸Tu orang-orang yang da makang waktu itu, de pe banya ampa ribu orang laki-laki, blum tamaso tu parampuang deng anak-anak.

³⁹Kong Yesus suru pulang tu orang banya itu. Abis itu Dia deng De pe murit-murit nae ka prao kong pigi ka satu daera tu de pe nama Magadan.