Read Malay, Manado Matius 18 Bible Online

Matius 18 - Malay, Manado bible

Matius 18

¹Waktu itu, Yesus pe murit-murit datang pa Dia, kong batanya, “Guru, sapa kang tu paling basar dari tu orang-orang yang Tuhan Allah berkuasa sbagai Raja?”

²Yesus pangge satu anak kacili, kong kase badiri tu anak di tenga-tenga pa dorang,

³trus Dia bilang, “Kita bilang pa ngoni, sapa jo yang mo jadi orang-orang dari Tuhan Allah yang berkuasa sbagai Raja, ngoni musti bertobat deng jadi sama deng anak kacili yang dong pe hati polos.

⁴Jadi sapa yang de pe hati polos sama deng tu anak kacili, so dia tu mo jadi paling basar di antara orang-orang dari Tuhan Allah yang Berkuasa sbagai Raja.

⁵Kong sapa jo yang trima satu anak kacili rupa ini lantaran tu orang itu percaya pa Kita, itu sama deng tu orang itu so trima pa Kita.”

⁶Yesus bilang lei, “Sapa jo yang beking sesat satu dari anak-anak kacili rupa ini yang percaya pa Kita, lebe bae tu orang itu pe leher kase ika akang deng batu basar kong kase tengglam ka dalam laut yang dolong.

⁷Cilaka jo ni dunia ini lantaran pe banya skali hal yang bole mo beking orang-orang tagoda beking dosa sampe jadi sesat. Memang tu hal-hal itu pasti mo ada, mar cilaka jo tu orang yang beking orang laeng jadi bagitu!

⁸Kalu satu dari ngana pe tangan ato kaki beking ngana berdosa sampe jadi sesat, potong jo kong buang tu tangan ato tu kaki! Lebe bae ngana maso sorga cuma deng satu tangan ato satu kaki, daripada ada dua tangan deng dua kaki mar ngana maso neraka. Tu tampa itu de pe api nyanda mo mati for slama-lamanya.

⁹Kalu satu dari ngana pe mata beking ngana berdosa sampe ngana jadi sesat, cungkel jo kong buang tu mata! Lebe bae ngana maso sorga cuma deng satu mata, daripada ngana ada dua mata mar ngana dapa lempar ka dalam api di neraka.”

¹⁰Yesus bilang lei, “Ngoni inga bae-bae, ngoni jang pandang enteng tu anak-anak kacili ini biar lei cuma satu dari pa dorang. Soalnya Kita bilang pa ngoni, dorang itu ada malaekat-malaekat di sorga yang slalu ada di muka pa Kita pe Bapa di sorga. [

¹¹Soalnya Anak Manusia datang ka dunia ini for se slamat tu orang-orang sesat.”]

¹²Yesus bilang lei, “Ngoni pikir bae-bae ni prumpamaan ini. Kalu ada satu orang yang punya sratus ekor domba kong satu ekor dari tu domba-domba itu tailang akang jalang, apa dia mo kase tinggal tu sambilan pulu sambilan ekor domba di tampa yang bagunung kong pi cari tu satu ekor domba yang da tailang akang jalang? Iyo to?

¹³Kong kalu dia dapa tu domba itu, Kita bilang pa ngoni, dia pasti snang skali da dapa tu domba itu lebe dari de pe snang lantaran tu sambilan pulu sambilan ekor domba yang nyanda ilang.

¹⁴Bagitu lei deng ngoni pe Bapa di sorga, Dia nimau kalu satu dari tu anak-anak kacili rupa ini ilang dari pa Dia.”

¹⁵Yesus bilang lei, “Kalu ada ngoni pe sudara yang percaya beking sala pa satu dari antara pa ngoni, bagus ngoni pigi jo sandiri pa tu sudara itu, kong kase tau pa dia apa tu dia pe sala. Kalu tu ngoni pe sudara itu mangaku so beking sala, ngoni deng dia itu so baku bae, ngoni so berhasil dapa ulang pa dia.

¹⁶Mar kalu dia nimau mo trima tu ngoni da bilang, ngoni bawa jo satu ato dua orang sama-sama deng ngoni, kong ngoni pi bilang pa dia kalu dia da beking sala. Itu sama deng tu da bilang di Kitab Suci bagini, ‘Kalu ada orang dapa tudu beking sala, musti ada dua ato tiga orang yang jadi saksi for bilang kalu tu orang itu sala ato nyanda.’

¹⁷Mar kalu tu sudara itu lei nimau mo trima lei tu ngoni da bilang, pi kase tau jo tu masala itu pa jemaat. Kalu jemaat so togor, trus dia lei nimau mo dengar pa jemaat, anggap jo dia itu orang yang nyanda kanal pa Tuhan ato anggap jo dia itu petugas pajak yang ja tipu orang.

¹⁸Kita bilang pa ngoni, apa jo tu ngoni larang orang beking di bumi, itu lei mo dapa larang beking di sorga. Bagitu lei deng apa tu ngoni kase for orang beking di bumi, itu lei mo dapa kase beking di sorga.

¹⁹Kita bilang lei pa ngoni, kalu di dunia ada dua orang dari ngoni sama-sama spakat mo minta apa-apa kong ngoni basombayang minta itu, Kita pe Bapa di sorga mo kase tu ngoni da minta.

²⁰Soalnya kalu ada dua ato tiga orang yang da bakumpul lantaran dorang percaya pa Kita, di situ Kita ada sama-sama deng dorang.”

²¹Abis itu Petrus datang pa Yesus kong dia batanya, “Guru, kalu kita pe sudara yang percaya beking sala trus pa kita, kita musti se ampung pa dia sampe brapa kali? Sampe tuju kali?”

²²Kong Yesus manyao pa dia, “Nyanda. Kita bilang pa ngana, bukang cuma sampe tuju kali, mar ngana musti kase ampung pa dia sampe tuju pulu kali tuju kali.

²³Ngana musti beking bagitu, lantaran Tuhan Allah yang Berkuasa sbagai Raja pe cara bapimpin sama deng tu prumpamaan ini: ada tu satu raja mo urus tu de pe budak-budak pe masala utang pa dia.

²⁴Waktu dia mulai urus tu masala utang itu, ada yang bawa di muka pa dia satu budak yang da bautang sampe juta-juta pa dia.

²⁵Mar tu budak itu nyanda mampu mo bayar de pe utang. So itu tu raja suru jual tu budak itu, tu budak pe bini deng anak-anak, deng samua tu budak pe kepunyaan supaya tu budak pe utang bole mo tabayar.

²⁶Pe dengar itu, tu budak iko berlutut di muka pa raja kong bamohon bagini, ‘Tuang raja, tolong basabar akang kwa pa kita supaya kita bole mo bayar tu kita pe utang-utang.’

²⁷Pe dengar tu budak da bilang, tu raja jadi rasa kasiang pa dia so itu dia se lapas deng hapus samua de pe utang.

²⁸Mar waktu budak itu kaluar dari situ, dia baku dapa deng de pe tamang tu budak lei. Tu de pe tamang itu da bautang pa dia sratus doi perak, tu jumla yang jao lebe sadiki dari tu de pe utang pa raja. Mar dia pegang tu de pe tamang itu trus ramas di leher, dia bilang pa de pe tamang bagini, ‘Bayar jo tu ngana pe utang pa kita!’

²⁹Pe dengar itu, de pe tamang berlutut kong bamohon pa dia bagini, ‘Tamang, tolong basabar akang kwa pa kita supaya kita bole mo bayar tu kita pe utang.’

³⁰Mar dia tolak tu de pe tamang da minta itu. Abis itu dia kase maso tu de pe tamang itu ka bui sampe de pe tamang itu bayar samua tu utang.

³¹Waktu tu de pe tamang-tamang budak yang laeng lia apa tu da jadi, dorang jadi sedi skali kong dorang lapor samua itu pa raja.

³²Pe dengar itu, raja suru pangge tu budak itu kong raja babilang pa dia, ‘Hei budak yang jaha! Samua ngana pe utang pa kita, kita so se hapus lantaran ngana da bamohon pa kita.

³³Ngana mustinya rasa kasiang lei pa ngana pe tamang, sama deng kita da rasa kasiang pa ngana.’

³⁴Tu raja itu jadi mara skali pa tu budak itu, kong raja srahkan dia pa tu algojo-algojo di bui supaya dorang siksa pa dia sampe dia bole kase lunas tu utang.

³⁵Bagitu lei no deng Kita pe Bapa di sorga, Dia mo hukum pa ngoni kalu ngoni nyanda butul-butul kase ampung tu ngoni pe sudara yang percaya.”