Read Malay, Manado Matius 19 Bible Online

Matius 19 - Malay, Manado bible

Matius 19

¹Serta Yesus so klar se ajar samua itu, Dia kase tinggal tu daera Galilea kong pigi ka daera Yudea di sabla kuala Yordan.

²Di situ ada banya orang tu da iko-iko pa Dia, kong Dia kase bae tu orang-orang yang da saki.

³Ada bebrapa orang dari golongan Farisi yang datang mo jebak pa Yesus, dorang batanya, “Kalu mo iko torang pe atoran agama, bole so tu laki-laki yang so kaweng se cere tu dia pe bini deng macam-macam alasan?”

⁴Mar Yesus manyao pa dorang, “Ngoni pasti so baca di Kitab Suci kalu dari pertama waktu Tuhan beking pa manusia, Dia tu da beking laki-laki deng parampuang.

⁵Kong Tuhan Allah da bilang bagini, ‘So itu, tu laki-laki mo se tinggal tu de pe papa deng mama, kong dia hidop sama-sama deng de pe bini, kong dorang dua itu jadi satu.’

⁶Jadi dorang dua so nyanda hidop sandiri-sandiri, mar so jadi satu. So lantaran itu, tu laki-laki deng parampuang yang Tuhan Allah so beking jadi satu, nimbole manusia mo kase cere.”

⁷Pe dengar itu, tu orang dari golongan Farisi batanya lei pa Yesus, “Kalu bagitu, kiapa dang Musa suru orang kase surat cere for laki-laki yang mo kase cere de pe bini?”

⁸Kong Yesus manyao pa dorang, “So lantaran ngoni pe kapala batu sampe Musa kase isin pa ngoni for kase cere ngoni pe bini, mar sebenarnya dari dulu Tuhan nyanda kase bagitu.

⁹Mar Kita bilang pa ngoni, kalu ada laki-laki yang kase cere de pe bini padahal de pe bini itu nyanda bersina, kong tu laki-laki itu kaweng ulang deng parampuang laeng, tu laki-laki itu so bersina.”

¹⁰Pe dengar itu, Yesus pe murit-murit bilang pa Dia, “Kalu rupa itu tu laki-bini pe hubungan, lebe bae nyanda usa kaweng.”

¹¹Mar Yesus bilang pa dorang, “Nyanda samua orang yang mampu trima tu hal itu. Tu orang yang mampu trima itu, cuma tu orang-orang yang Tuhan so kase kemampuan.

¹²Soalnya ada laki-laki yang nyanda kaweng lantaran dari lahir dorang memang so bagitu, kong ada lei laki-laki yang nyanda kaweng lantaran orang laeng da beking sampe jadi bagitu. Ada lei yang nyanda kaweng lantaran dorang pe mau sandiri, supaya dorang bole pake tu dong pe waktu for layani pa Tuhan yang Berkuasa sbagai Raja. Sapa jo yang mampu trima tu Kita pe ajaran ini, bagus dia trima itu.”

¹³Satu kali ada orang-orang bawa anak-anak kacili pa Yesus supaya Dia taru De pe tangan pa tu anak-anak itu kong basombayang akang pa dorang. Mar Dia pe murit-murit cuma da mara akang pa tu orang-orang yang da bawa anak-anak kacili itu.

¹⁴Mar Yesus bilang pa De pe murit-murit, “Kase biar jo tu anak-anak itu datang pa Kita! Ngoni jang larang pa dorang lantaran tu orang-orang sama deng ini yang mo jadi orang-orang dari Tuhan Allah yang Berkuasa sbagai Raja.”

¹⁵Abis itu, Yesus taru Dia pe tangan pa tu anak-anak itu kong se berkat pa dorang. Klar itu Dia pigi dari situ.

¹⁶Satu hari, ada satu orang laki-laki datang pa Yesus, kong dia batanya, “Guru, hal bae apa yang kita musti beking supaya kita bole mo dapa tu hidop kekal?”

¹⁷Yesus manyao pa dia, “Kiapa so ngana batanya pa Kita tentang apa yang bae? Yang bae cuma ada Satu. Kalu ngana suka mo dapa hidop kekal, ngana musti iko tu Tuhan Allah pe prenta-prenta.”

¹⁸Kong tu orang itu batanya lei, “Prenta-prenta mana tu kita musti iko akang?” Yesus manyao pa dia, “Jang babunung, jang bersina, jang bapancuri, jang basaksi dusta,

¹⁹hormat tu ngana pe papa deng mama, deng sayang pa orang laeng sama deng ngana sayang pa ngana pe diri sandiri.”

²⁰Kong tu orang muda itu bilang pa Yesus, “Samua tu prenta itu kita so beking. Apa lei tu kita blum beking?”

²¹Yesus bilang pa dia, “Kalu ngana suka mo iko pa Tuhan deng sempurna, ngana pigi jo kong jual samua tu ngana pe harta, kong tu doi ngana kase berbage pa orang-orang miskin. Kalu ngana beking bagitu, Tuhan mo kase pa ngana harta di sorga. Abis itu ngana datang jo kamari kong iko pa Kita.”

²²Waktu tu orang muda dengar tu Yesus da bilang itu, dia pigi deng hati sedi lantaran dia itu pe kaya skali.

²³Abis itu Yesus bilang pa De pe murit-murit, “Kita bilang pa ngoni, pe susa skali for orang kaya mo jadi orang dari Tuhan Allah yang Berkuasa sbagai Raja.

²⁴Kong Kita bilang lei pa ngoni, masi lebe gampang satu ekor onta maso ka lobang jarum, daripada orang kaya mo trima tu Tuhan Allah for mo Berkuasa sbagai Raja pa dia.”

²⁵Pe dengar itu, Yesus pe murit-murit jadi taheran-heran, kong dorang bilang, “No kalu bagitu, sapa dang tu bole mo slamat dari hukuman dosa?”

²⁶Yesus haga pa dorang kong babilang, “For manusia nyanda mungkin mo se slamat tu de pe diri sandiri, mar for Tuhan Allah, Tuhan Allah bole se slamat pa manusia lantaran samua Dia bole beking.”

²⁷Kong Petrus babilang pa Yesus, “Guru, torang ini so kase tinggal samua tu tong pe kepunyaan for iko pa Guru. Jadi apa dang tu torang mo dapa?”

²⁸Yesus bilang pa dorang, “Kita mo bilang pa ngoni, nanti kalu Tuhan so beking samua jadi baru, tu Anak Manusia mo dudu di atas Dia pe tahta yang luar biasa. Waktu itu, ngoni samua tu ja iko pa Kita mo dudu di atas dua blas tahta kong adili tu dua blas suku bangsa Israel.

²⁹Kong sapa jo yang so se tinggal de pe ruma, de pe kaka ade laki-laki ato parampuang, de pe papa ato de pe mama, de pe anak-anak ato de pe kobong lantaran dia da iko pa Kita, dia itu mo trima ulang sratus kali lipa tu samua itu deng lei dia mo dapa tu hidop kekal.

³⁰Mar banya orang yang orang ja bilang orang penting, dorang itu nyanda mo jadi apa-apa, kong tu orang yang orang ja bilang nyanda penting, dorang itu tu mo dapa hormat.”