Read Malay, Manado Matius 20 Bible Online

Matius 20 - Malay, Manado bible

Matius 20

¹Yesus bilang lei, “Tuhan Allah Berkuasa sbagai Raja sama deng tu prumpamaan ini: ada tu satu tuang tana yang punya kobong anggor. Masi amper siang, dia so kaluar for pi cari orang karja for bakarja pa dia pe kobong anggor.

²Waktu dia dapa bebrapa orang karja, dia baku ator deng dorang mo bayar satu doi perak for satu hari karja. Abis itu, dia suru pa dorang pi bakarja pa dia pe kobong.

³Kira-kira jam sambilan pagi, dia kaluar ulang kong pigi ka pasar. Di sana dia lia ada bebrapa orang yang nyanda beking apa-apa.

⁴Kong dia bilang pa dorang, ‘Ngoni pigi jo bakarja pa kita pe kobong anggor. Nanti kita mo kase akang gaji yang pantas for ngoni.’ Pe dengar itu, dorang pigi bakarja di kobong.

⁵Kong kira-kira jam dua blas deng lei jam tiga sore, dia kaluar ulang kong pi cari orang karja di pasar.

⁶Kira-kira jam lima sore dia kaluar ulang lei kong dia lia masi ada orang di pasar yang nyanda beking apa-apa, trus dia tanya pa dorang, ‘Kiapa ngoni satu hari ini cuma da badiri di sini kong nyanda beking apa-apa?’

⁷Dorang manyao pa dia, ‘Soalnya kwa blum ada orang yang kase karja pa torang.’ Kong dia bilang pa dorang, ‘Kalu bagitu, ngoni pigi jo bakarja pa kita pe kobong anggor!’

⁸Waktu so mo malam, yang punya kobong anggor itu babilang pa de pe mandor, ‘Pangge kamari samua tu orang karja kong bayar akang dong pe gaji. Ngana bayar pa dorang mulai dari tu da maso paling terakhir sampe tu pertama.’

⁹Kong waktu tu orang-orang karja yang da bakarja mulai dari jam lima sore datang ambe dorang pe gaji, dorang masing-masing trima tu gaji satu doi perak.

¹⁰Trus tu orang-orang yang da bakarja dari pertama datang for ambe dorang pe gaji, dorang kira kalu dorang masing-masing mo dapa lebe banya gaji dari tu orang yang da bakarja terakhir, mar dorang masing-masing cuma da trima lei satu doi perak.

¹¹Waktu dorang trima tu doi itu, dorang bafeto pa tu tuang tana.

¹²Dorang bilang, ‘Tuang, tu orang-orang yang da datang karja terakhir kong cuma da bakarja satu jam, masa dorang pe gaji sama deng torang, padahal torang tu da bakarja satu hari fol kong da rasa tu matahari pe panas.’

¹³Mar tu tuang kobong bilang pa tu sala satu dari pa dorang itu, ‘Tamang, kita to nyanda beking sala pa ngana. Soalnya dari pertama torang dua so baku ator kalu kita mo bayar pa ngana satu doi perak for satu hari.

¹⁴Jadi ngana ambe jo tu ngana pe gaji kong pulang. Kita suka mo kase gaji yang sama pa tu orang yang da maso terakhir deng lei pa ngana.

¹⁵Kita bebas for pake tu kita pe doi iko kita pe mau sandiri. Ato ngana mangiri pa kita lantaran kita bae-bae pa tu orang-orang yang karja terakhir itu?’ ”

¹⁶Yesus bilang lei, “Jadi bagitu lei nanti di hari kiamat tu orang yang orang anggap nyanda penting, dia itu mo dapa hormat, kong tu orang yang orang bilang orang penting, dia itu nyanda mo jadi apa-apa.”

¹⁷Yesus deng Dia pe murit-murit da pigi ka kota Yerusalem. Di tenga jalang Dia pangge Dia pe murit-murit for basandiri, kong Dia bilang pa dorang,

¹⁸“Torang skarang da bapigi ka Yerusalem. Di sana orang mo srahkan tu Anak Manusia pa imam-imam kapala deng ahli-ahli Taurat, kong dorang mo ambe keputusan for kase hukum mati pa Dia.

¹⁹Dorang mo srahkan Dia pa orang-orang bukang Yahudi, kong dorang mo sosere akang pa Dia, mo cambok deng mo se salib pa Dia, mar di hari katiga Dia mo hidop ulang.”

²⁰Kong Zebedeus pe bini datang pa Yesus sama-sama deng dia pe dua anak, tu Yakobus deng Yohanes. Dia berlutut di muka pa Yesus for minta sesuatu.

²¹Yesus batanya pa dia, “Apa dang tu ibu suka mo minta?” Dia bilang pa Yesus, “Bapak, nanti kalu Bapak so jadi Raja yang Berkuasa, Bapa suru jo supaya kita pe dua anak ini bole dudu di sabla pa Bapak, tu satu di sabla kanan kong tu satu lei di sabla kiri.”

²²Pe dengar itu, Yesus babilang, “Ngoni nyanda mangarti deng apa tu ngoni da minta. Kita nanti mo dapa banya siksa, kong apa ngoni mampu mo pikul tu siksa sama deng tu Kita mo pikul, sama deng mo minum tu cawan pendritaan yang Kita musti minum?” Kong dorang manyao, “Torang mampu.”

²³Trus Yesus bilang pa dorang, “Memang ngoni mo pikul tu siksa sama deng tu Kita mo trima, mar sapa tu mo dudu di sabla kanan deng kiri pa Kita, itu bukang Kita pe hak for ator. Tu tampa itu Kita pe Bapa so se sadia for orang-orang yang Dia so tentukan.”

²⁴Waktu Yesus pe spulu murit dengar tu dorang dua da minta, dorang jadi mara pa tu dua basudara itu.

²⁵Jadi Yesus pangge De pe murit-murit kong Dia bilang, “Ngoni tau kalu tu pemimpin-pemimpin dari bangsa-bangsa yang nyanda kanal pa Tuhan, dorang itu da kuasai deng ja beking siksa dong pe rakyat, kong tu dorang pe penguasa-penguasa lei ja tekan tu rakyat for beking tu dorang pe mau.

²⁶Mar ngoni jang sama deng dorang! Sapa tu suka jadi orang basar di antara pa ngoni, dia musti jadi orang yang ja layani pa ngoni.

²⁷Kong sapa yang suka jadi paling penting di antara ngoni, dia musti ja layani pa ngoni sama deng budak.

²⁸Itu sama deng tu Anak Manusia. Dia datang ka dunia bukang for orang mo layani, mar Dia datang for layani banya orang deng datang for srahkan Dia pe diri for tubus banya orang pe dosa.”

²⁹Waktu Yesus deng Dia pe murit-murit kase tinggal tu kota Yerikho, ada banya orang yang da iko pa Yesus.

³⁰Kong ada dua orang buta da dudu di pinggir jalang. Waktu dorang dengar kalu Yesus da balewat, dorang babilang deng suara kuat, “Bapak, raja Daud pe keturunan, kasiang akang dang pa torang!”

³¹Pe dengar itu, tu orang banya togor pa dorang dua supaya badiam. Mar dorang dua babilang lebe kuat, “Bapak, Raja Daud pe keturunan, kasiang akang dang pa torang!”

³²Kong Yesus brenti trus pangge pa dorang dua. Dia batanya pa dorang, “Apa dang tu ngoni suka Kita mo beking pa ngoni?”

³³Dorang manyao, “Bapak, torang suka supaya torang bole mo balia.”

³⁴Pe dengar itu, Yesus jadi rasa kasiang pa dorang. Dia raba dorang pe mata kong waktu itu jo dorang so bole balia. Abis itu, dorang iko pa Yesus.