Read Malay, Manado Matius 22 Bible Online

Matius 22 - Malay, Manado bible

Matius 22

¹Kong Yesus kase tau lei pake prumpamaan pa dorang. Yesus bilang,

²“Tuhan Allah Berkuasa sbagai Raja sama deng ini: ada tu satu raja yang beking pesta kaweng for de pe anak laki-laki.

³Waktu tu pesta so mo mulai, Dia suru de pe budak-budak for pangge tu orang-orang yang dia so undang supaya datang jo ka pesta kaweng itu. Mar tu orang-orang itu nimau mo datang.

⁴So itu tu raja suru lei tu de pe budak-budak laeng bagini, ‘Pigi jo kong bilang pa tu orang-orang yang kita da undang, kalu tu pesta for kita pe anak mo kaweng so siap. Tu kita pe sapi laki-laki deng sapi muda yang gumu so potong kong so momasa. Jadi samua so tasadia, so itu datang jo ka pesta kaweng ini.’

⁵Mar tu orang-orang yang da dapa undang itu, dorang nyanda farduli akang tu undangan itu. Dorang itu ada yang da pigi ka kobong, kong tu laeng da pi urus tu dong pe usaha.

⁶Malatare tu laeng da tangka pa tu budak-budak itu, trus dorang siksa kong bunung tu budak-budak itu.

⁷Pe dengar apa tu da jadi, raja jadi mara skali. Kong dia suru tu de pe tentara-tentara pigi ka sana for bunung tu orang-orang yang da babunung tu de pe budak-budak, deng lei suru bakar tu orang-orang itu pe kota.

⁸Abis itu, raja bilang pa dia pe budak-budak laeng bagini, ‘Pesta kaweng so siap, mar tu orang yang kita da undang nyanda pantas mo iko kita pe pesta.

⁹So itu ngoni pigi jo ka jalang-jalang, kong undang jo sapa-sapa yang ngoni da baku dapa akang di sana supaya dorang datang for iko tu pesta kaweng ini.’

¹⁰Pe dengar itu, tu budak-budak pigi ka jalang-jalang kong kase kumpul samua orang yang dorang da baku dapa akang di sana, biar itu orang jaha ato orang bae-bae. Dorang undang tu banya orang sampe tu ruangan pesta kaweng jadi punung deng tamu-tamu.

¹¹Mar waktu tu raja maso ka ruangan pesta for lia-lia tu tamu-tamu itu, dia lia ada satu tamu yang nyanda da pake baju pesta.

¹²Kong raja batanya pa tu tamu itu, ‘Hei tamang, bagimana ngana da maso kamari kong nyanda da pake baju pesta?’ Mar tu orang itu cuma da badiam.

¹³Trus tu raja itu babilang pa de pe orang-orang karja bagini, ‘Ngoni ika tu orang itu pe kaki deng tangan kong lego pa dia kaluar di tampa yang glap.[20] Di sana mo dapa dengar orang mo manangis deng dong pe gigi tabaku goso kong babunyi lantaran pe mendrita skali.’ ”

¹⁴Kong Yesus bilang lei, “Banya orang yang Tuhan da pangge, mar cuma sadiki yang da tapili.”

¹⁵Abis itu, orang-orang dari golongan Farisi pigi dari situ kong baku skongkol for jebak pa Yesus deng pertanyaan.

¹⁶Kong tu orang-orang dari golongan Farisi itu suru pa dong pe murit-murit deng bebrapa orang yang ja iko pa raja Herodes pigi for jebak pa Yesus deng pertanyaan. Tu orang-orang itu batanya pa Yesus, “Guru, torang tau kalu Guru itu orang jujur, deng trang-trangan Guru kase ajar tu cara yang butul for iko Tuhan Allah. Guru nyanda pandang muka lantaran Guru nyanda ja pili-pili orang.

¹⁷So itu Guru, tolong kase tau akang pa torang, menurut Guru kalu iko tu torang pe atoran agama, bole ato nyanda torang babayar pajak pa raja yang paling tinggi di krajaan Romawi?”

¹⁸Mar Yesus tau dorang pe maksut jaha, kong Dia bilang pa dorang, “Hei orang-orang munafik, kiapa ngoni mo jebak pa Kita?

¹⁹Co kase tunjung satu doi perak pa Kita tu ngoni ja pake for babayar pajak!” Kong dorang bawa akang pa Dia satu doi perak.

²⁰Trus Yesus batanya pa dorang, “Sapa pe gambar deng nama ini?”

²¹Dorang manyao, “Itu gambar deng nama dari raja yang paling tinggi di krajaan Romawi.” Kong Yesus bilang pa dorang, “No kalu bagitu, kase jo pa raja yang paling tinggi di krajaan Romawi apa tu ngoni musti kase pa dia, kong kase jo pa Tuhan Allah apa tu ngoni musti kase pa Tuhan Allah.”

²²Pe dengar itu, dorang taheran-heran kong dorang pigi kase tinggal pa Dia.

²³Hari itu jo, bebrapa orang dari golongan Saduki datang pa Yesus. Tu golongan itu nyanda percaya kalu orang yang so mati mo hidop ulang. Dorang batanya pa Yesus,

²⁴“Guru, dulu nabi Musa da kase tau kalu satu laki-laki yang so kaweng kong mati mar nyanda dapa anak, de pe kaka ato ade laki-laki musti kaweng deng tu laki-laki itu pe bini, supaya de pe kaka ato ade itu kase akang keturunan for dia.

²⁵No skarang bagini, umpama ada tuju kaka ade laki-laki di antara pa torang. Tu paling tua kaweng mar nyanda lama dia mati, kong dia ini nyanda dapa anak. Kong tu kadua kaweng deng tu parampuang itu.

²⁶Dia lei mati kong nyanda dapa anak. Trus tu hal yang sama itu jadi pa yang katiga sampe yang katuju.

²⁷De pe laste, abis dorang tuju laki-laki itu mati, tu parampuang itu lei mati.

²⁸No kalu so hari kiamat waktu Tuhan se hidop ulang samua orang, sapa dari tu tuju kaka ade itu yang mo jadi tu parampuang itu pe laki? Soalnya dorang samua da kaweng deng dia!”

²⁹Yesus manyao pa dorang, “Ngoni ini so sala skali. Soalnya ngoni nyanda mangarti tu Kitab Suci deng ngoni lei nintau tu Tuhan Allah pe kuasa.

³⁰Soalnya nanti waktu Tuhan so kase hidop ulang samua orang yang mati, tu laki-laki deng lei tu parampuang so nyanda mo kaweng deng so nyanda mo kase kaweng, mar samua mo hidop sama deng malaekat-malaekat di sorga.

³¹Kong tentang orang mati yang mo hidop ulang, ngoni tantu so baca apa tu Tuhan Allah da bilang dulu pa torang pe nene moyang, Dia da bilang bagini,

³²‘Kita ini Tuhan Allah, tu Abraham, Ishak deng Yakub ja semba.’ Waktu itu, tu Abraham, Ishak deng Yakub so mati mar da hidop ulang deng Tuhan Allah. Jadi Tuhan Allah itu bukang orang yang mati pe Tuhan, mar orang yang hidop pe Tuhan.”

³³Waktu tu orang banya da dengar tu Yesus da bilang, dorang taheran-heran lantaran suka skali deng Dia pe ajaran.

³⁴Waktu itu, tu orang-orang dari golongan Farisi dapa dengar tu Yesus pe jawaban yang luar biasa. Yesus pe jawaban itu beking sampe tu orang-orang dari golongan Saduki nyanda tabilang apa-apa. So itu, tu orang-orang Farisi bakumpul,

³⁵kong satu dari pa dorang, dia itu ahli hukum Taurat, dia coba jebak pa Yesus deng pertanyaan bagini,

³⁶“Guru, atoran mana tu paling penting dari antara tu atoran-atoran yang ada di kitab Taurat?”

³⁷Yesus bilang pa dia, “Ngoni musti butul-butul sayang pa Tuhan Allah yang ngoni ja semba, ngoni nimbole badua hati. Ngoni sayang jo pa Dia deng samua yang ada pa ngoni pe diri, deng lei sayang jo pa Dia deng cara slalu pikir apa tu bole mo beking snang pa Dia.

³⁸Itu no tu atoran yang penting deng yang pertama.

³⁹Kong tu atoran yang kadua tu sama deng itu, ‘Ngoni sayang jo pa orang laeng sama deng ngoni sayang pa ngoni pe diri sandiri.’

⁴⁰Dua atoran ini no tu jadi dasar dari samua atoran yang ada di kitab Taurat deng nabi-nabi pe ajaran.”

⁴¹Waktu tu orang-orang dari golongan Farisi masi da bakumpul di situ, Yesus batanya pa dorang,

⁴²“Co ngoni bilang pa Kita, apa ngoni pe pendapat tentang Kristus? Dari sapa pe keturunan Dia?” Kong dorang manyao pa Dia, “Dia itu raja Daud pe keturunan.”

⁴³Kong Yesus batanya lei pa dorang, “No kalu bagitu, kiapa dulu waktu Roh Kudus da kuasai pa raja Daud, raja Daud sandiri da bilang kalu Kristus itu dia pe Tuhan? Waktu itu, dia da bilang bagini,

⁴⁴‘Tuhan Allah da bilang pa kita pe Tuhan bagini, “Dudu jo di tampa terhormat di sabla kanan pa Kita, sampe Ngana pe musu-musu Kita taru di bawa Ngana pe kaki.” ’

⁴⁵Jadi kalu raja Daud da bilang Kristus itu dia pe Tuhan, no bagimana lei torang mo bilang kalu Kristus itu raja Daud pe keturunan?”

⁴⁶Dari samua orang yang ada di situ, nyanda ada yang dapa manyao apa-apa pa Yesus. Kong dari tu waktu itu jo, nyanda ada orang yang brani batanya pa Dia.