Read Malay, Manado Matius 23 Bible Online

Matius 23 - Malay, Manado bible

Matius 23

¹Abis itu, Yesus bilang pa tu orang banya deng pa De pe murit-murit,

²“Tu ahli-ahli Taurat deng tu orang-orang dari golongan Farisi, dorang itu sama deng da dudu pa Musa pe kursi for jelaskan tu atoran-atoran di kitab Taurat pa orang-orang.

³So itu, ngoni musti dengar kong iko jo samua tu dorang da se ajar pa ngoni, mar ngoni jang iko tu dorang pe kalakuan. Soalnya dorang ja se ajar pa ngoni mar dorang sandiri nyanda ja beking itu.

⁴Dorang da beking atoran pe banya kong tu atoran-atoran itu pe susa skali mo iko akang, itu sama deng dorang da ika beban-beban brat kong taru itu pa orang-orang pe bahu, mar dorang sandiri nimau mo tolong tu orang-orang itu for beking tu atoran itu.

⁵Samua tu dorang da beking de pe maksut cuma supaya orang lia pa dorang. De pe conto, tu kotak kacili yang da isi akang tulisan dari tu nabi-nabi dulu, kotak itu dorang beking jadi basar kong dong pasang pa dong pe tangan. Dorang lei da beking lebe panjang tu rumbai yang ada pa dong pe juba.

⁶Di pesta-pesta deng di ruma-ruma ibada, dorang suka ja dudu di tampa paling muka tu tampa yang terhormat.

⁷Dorang suka orang ja hormat pa dorang di tampa yang ja takumpul akang banya orang, kong dorang lei suka kalu orang ja pangge ‘guru’ pa dorang.

⁸Mar ngoni jang bagitu! Ngoni jang kase biar orang laeng pangge pa ngoni ‘guru’! Soalnya ngoni pe Guru cuma satu, kong ngoni samua itu basudara.

⁹Ngoni jang bapangge ‘bapa’ pa sapa-sapa di dunia ini, lantaran cuma satu tu ngoni pe Bapa, tu Bapa yang ada di sorga.

¹⁰Ngoni lei jang kase biar orang laeng pangge ‘pemimpin’ pa ngoni, lantaran ngoni pe Pemimpin cuma satu. Ngoni pe Pemimpin itu Kristus tu Raja yang se slamat pa manusia.

¹¹Sapa yang jadi orang penting di antara pa ngoni, dia musti ja layani pa ngoni.

¹²Soalnya sapa jo yang angka de pe diri sandiri, Tuhan mo beking tu orang itu nyanda ada arti apa-apa, kong sapa jo yang nyanda sombong, Tuhan mo angka pa dia jadi orang yang penting.”

¹³Yesus bilang lei, “Cilaka jo ngoni tu ahli-ahli Taurat deng orang-orang dari golongan Farisi! Ngoni itu orang-orang munafik. Soalnya ngoni beking susa tu orang-orang yang suka mo jadi orang-orang dari Tuhan Allah yang Berkuasa sbagai Raja, itu sama deng ngoni da tutu akang tu pintu for dorang. Ngoni sandiri nyanda jadi orang-orang dari Tuhan Allah yang berkuasa sbagai Raja, kong ngoni ja halangi tu orang-orang yang suka mo jadi orang-orang dari Tuhan Allah. [

¹⁴Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik, lantaran ngoni ja batipu tu janda-janda for ambe tu dorang pe ruma. Ngoni ja basombayang panjang-panjang supaya orang anggap ngoni itu orang bae-bae. So itu, ngoni pasti mo trima tu hukuman yang lebe brat.]

¹⁵Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik. Ngoni pigi kamana-mana lewat laut deng darat cuma for cari orang yang mo iko tu ngoni pe ajaran. Mar serta tu orang itu so jadi ngoni pe pengikut, ngoni beking dia jadi calon maso neraka yang dua kali lebe jaha dari ngoni.

¹⁶Cilaka jo ngoni! Ngoni ini pemimpin-pemimpin yang sama deng orang buta yang batuntun orang laeng. Ngoni ja kase ajar pa orang-orang bagini, ‘Kalu orang basumpa demi tu Ruma Ibada Pusat, tu orang itu so nyanda taika deng tu sumpa itu. Mar kalu dia basumpa demi tu mas yang ada di Ruma Ibada Pusat, dia musti beking tu de pe sumpa.’

¹⁷Ngoni itu pe biongo, ngoni itu orang-orang buta! Ngoni kira tu mas itu lebe penting dari tu Ruma Ibada Pusat? Nyanda kasiang. Soalnya tu Ruma Ibada Pusat itu yang beking tu mas jadi kudus.

¹⁸Ngoni lei da kase ajar bagini, ‘Sapa yang basumpa demi tu tampa korban persembahan, tu orang itu so nyanda taika deng tu sumpa itu. Mar kalu dia basumpa demi tu korban persembahan yang ada di tampa korban persembahan itu, dia taika deng tu sumpa itu.’

¹⁹Ngoni ini orang-orang buta! Ngoni kira tu korban persembahan itu lebe penting dari tu tampa korban persembahan? Nyanda kasiang. Soalnya tu tampa persembahan itu yang beking suci tu korban persembahan.

²⁰So itu sapa yang basumpa demi tu tampa korban persembahan, dia itu so basumpa demi tu tampa korban persembahan itu deng lei demi samua korban persembahan yang ada di atas tampa itu.

²¹Trus sapa yang basumpa demi Ruma Ibada Pusat, dia da basumpa demi tu Ruma Ibada Pusat itu deng lei demi Tuhan yang tinggal di situ.

²²Kong sapa yang basumpa demi sorga, dia da basumpa demi tu Tuhan Allah pe tahta deng lei demi Dia tu da dudu di tahta itu.[21]

²³Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik. Ngoni ja kase pa Tuhan tu spulu persen dari ngoni pe hasil bumbu-bumbu yang paling kacili rupa ini: selasi, adas manis deng jintan. Mar tu hal-hal yang lebe penting dari tu atoran-atoran di kitab Taurat ngoni nyanda farduli rupa tu bagini: beking tu adil pa orang, se tunjung tu rasa kasiang pa orang, deng jadi orang yang setia. Ngoni tetap musti kase tu ngoni pe spulu persen itu, mar ngoni lei jang lupa beking tu hal-hal yang lebe penting.

²⁴Ngoni itu pemimpin-pemimpin yang buta! Ngoni ja beking tu prenta yang kurang penting mar tu Tuhan pe prenta yang lebe penting ngoni nyanda beking, itu sama deng ngoni da saring kong buang tu gonone dari ngoni pe minuman, mar tu onta yang ada di dalam tu ngoni pe minuman, ngoni tare cuma da tlang.

²⁵Cilaka jo ngoni tu ahli-ahli Taurat deng orang-orang dari golongan Farisi! Ngoni itu orang-orang munafik. Ngoni dapa lia ja beking tu atoran agama, mar sebenarnya ngoni ja barampas orang laeng punya deng nyanda mampu kuasai ngoni pe diri, itu sama deng orang yang ja kase bersi tu cawan deng piring cuma de pe bagean luar, mar de pe bagian dalam pe kotor skali.

²⁶Hei ngoni tu orang-orang dari golongan Farisi, ngoni itu orang-orang buta! Kase bersi dulu tu ngoni pe pikiran dari pikiran yang jaha, baru apa tu ngoni mo beking deng bilang lei jadi bagus, itu sama deng kase bersi tu cawan deng piring pe bagean dalam kong tu bagean luar lei mo bersi.

²⁷Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik. Ngoni sama deng tu kubur-kubur yang da cet puti. Di luar dapa lia pe bagus, mar di dalam punung deng tulang orang mati deng samua yang busu-busu.

²⁸Bagitu lei deng ngoni, dari luar ngoni dapa lia sama deng orang yang ja beking tu butul di muka pa Tuhan, mar dari dalam ngoni itu butul-butul orang munafik deng nyanda ja beking tu Tuhan da suru.

²⁹Cilaka jo ngoni tu ahli-ahli Taurat deng orang-orang dari golongan Farisi! Ngoni orang-orang munafik. Ngoni da beking bagus tu nabi-nabi dulu pe kubur-kubur, deng ngoni lei ja hias tu tugu-tugu pringatan, tu tugu-tugu yang da beking for inga tu orang-orang yang ja beking tu Tuhan pe mau.

³⁰Trus ngoni bilang bagini, ‘Kalu torang da hidop di jaman tong pe nene moyang dulu, pasti torang nyanda mo iko deng dorang tu ja babunung nabi-nabi itu.’

³¹Mar deng ngoni bilang bagitu, ngoni mangaku sandiri kalu ngoni itu keturunan dari orang-orang yang babunung tu nabi-nabi itu.

³²Jadi lebe bae, ngoni kase lengkap jo tu kejahatan yang ngoni pe nene moyang da beking itu!

³³Hei ngoni orang-orang jaha, ngoni pe jaha sama deng tu ular babisa. Ngoni itu keturunan orang jaha, jadi ngoni itu sama deng ular babisa pe keturunan. Ngoni nyanda mo lolos dari Tuhan pe hukuman tu mo se maso pa ngoni ka neraka.

³⁴So lantaran itu, Kita mo utus pigi pa ngoni tu nabi-nabi, orang-orang yang tau banya hal deng ahli Taurat yang mangajar pa ngoni. Bebrapa dari antara pa dorang itu ngoni mo bunung deng tu laeng mo se salib. Ada lei laeng tu ngoni mo siksa pa ngoni pe ruma-ruma ibada kong ada lei yang ngoni mo dusu-dusu dari satu kota ka kota laeng for beking susa.

³⁵So itu Tuhan mo hukum pa ngoni lantaran samua orang yang ngoni deng ngoni pe nene moyang da bunung itu. Tu orang-orang yang ngoni da bunung itu, dorang yang ja beking tu butul di muka pa Tuhan. Tu ngoni pe nene moyang da bunung dulu itu mulai dari Habel sampe tu terakhir yang ngoni da bunung tu nabi Zakharia. Zakharia itu Berekhya pe anak yang da dapa bunung di antara tu Ruang Mahasuci deng meja tu tampa korban persembahan di Ruma Ibada Pusat.

³⁶Kita bilang pa ngoni, ngoni yang ada jaman ini nanti mo dapa hukum lantaran samua tu hal-hal jaha itu.”

³⁷Yesus bilang lei, “Hei ngoni tu orang-orang Yerusalem! Ngoni yang da bunung tu nabi-nabi, ngoni lempar deng batu tu orang-orang yang Tuhan da utus pa ngoni. Kita so ulang-ulang kase kumpul pa ngoni di dekat pa Kita, sama deng tu ayam mai da se kumpul de pe anak-anak for jaga di bawa de pe sayap, mar ngoni nimau Kita beking bagitu.

³⁸So itu nanti ngoni mo lia kalu Tuhan mo se tinggal tu ngoni pe tampa[22] ini, tu tampa ini mo jadi sunyi skali.

³⁹Kita bilang pa ngoni, mulai skarang ngoni so nyanda mo lia lei pa Kita, mar nanti pa de pe waktu, ngoni mo lia pa Kita kong mo bilang, ‘Puji jo pa Dia yang da datang dalam nama Tuhan.’ ”