Read Malay, Manado Matius 24 Bible Online

Matius 24 - Malay, Manado bible

Matius 24

¹Abis itu Yesus bajalang se tinggal tu Ruma Ibada Pusat. Waktu itu Dia pe murit-murit badekat pa Dia kong batunjung ka gedung-gedung yang ada di kompleks Ruma Ibada Pusat.

²Kong Yesus bilang pa dorang, “Ngoni lia to tu gedung-gedung itu? Kita bilang pa ngoni, nanti satu waktu nyanda mo ada satu batu lei yang tasusung pa de pe tampa, samua itu mo dapa kase rubu.”

³Abis itu, Yesus pigi ka bukit Zaitun kong dudu di situ. Waktu itu Dia pe murit-murit datang badekat for babicara sandiri deng Dia, dorang bilang, “Guru, kase tau akang pa torang, tempo apa dang tu Guru da bilang tadi mo jadi? Kong apa dang tu tanda-tanda waktu Guru mo datang ulang deng tu tanda waktu hari kiamat?”

⁴Yesus manyao pa dorang, “Hati-hati jo ngoni, jang sampe ada orang yang mo beking sesat pa ngoni.

⁵Soalnya banya orang mo datang kong mo pake Kita pe nama. Dorang mo bilang bagini, ‘So kita ini tu Kristus tu Raja yang se slamat pa manusia’ kong dorang itu mo beking sesat banya orang.

⁶Kong ngoni mo dengar ada prang di satu daera, ato ngoni mo dengar kabar-kabar tentang prang di tampa laeng. Mar biar bagitu, ngoni jang tako lantaran samua itu musti jadi lebe dulu, mar itu blum de pe waktu mo kiamat.

⁷Soalnya nanti satu suku bangsa mo baprang deng suku bangsa laeng, satu krajaan baprang deng krajaan laeng, kong mo ada lei kelaparan deng tana goyang di mana-mana.

⁸Mar samua itu baru de pe awal pendritaan seblum kiamat, sama deng tu pendritaan yang parampuang da rasa waktu mo melahirkan.

⁹Waktu itu, ada orang-orang yang tangka pa ngoni trus mo srahkan for siksa deng bunung pa ngoni. Kong orang-orang dari samua suku bangsa mo binci pa ngoni lantaran da iko pa Kita.

¹⁰Kong banya orang yang percaya so nyanda mo percaya lei pa Kita. Dorang mo baku binci deng mo baku hianat.

¹¹Ada banya nabi palsu mo muncul kong beking sesat banya orang.

¹²Kong tu kejahatan yang orang da beking mo lebe tatamba banya, so itu banya orang so nyanda mo basayang lei.

¹³Mar orang yang tetap batahang percaya pa Kita sampe akhir, Tuhan mo kase slamat pa dia.

¹⁴Kong tu Kabar Bae tentang Tuhan Allah Berkuasa sbagai Raja mo se siar dulu ka sluru dunia supaya samua suku bangsa bole tau itu, abis itu baru dunia mo kiamat.”

¹⁵Yesus bilang lei, “Ngoni mo lia satu orang yang paling jaha tu tukang beking ancor samua, kong dia mo badiri di tampa yang kudus di Ruma Ibada Pusat. Nabi Daniel so tulis firman tentang hal itu. (Sapa yang da babaca ini, tarukira jo bae-bae!)

¹⁶Kong kalu tu orang paling jaha itu so badiri di tampa yang kudus, lebe bae tu orang-orang yang ada di daera Yudea lari pi manyingkir jo ka gunung-gunung.

¹⁷Tu orang yang ada di atas ruma jang turung pi ambe tu barang-barang pa de pe ruma, mar turung kong lari jo.

¹⁸Bagitu lei deng tu orang yang ada di kobong, jang babale for ambe dia pe baju.

¹⁹Waktu itu yang paling cilaka tu ibu-ibu yang hamil deng tu masi ja se batoto ade.

²⁰Basombayang jo supaya waktu ngoni da lari pi manyingkir itu, nyanda pas oras dingin ato di hari Sabat.

²¹Soalnya tu hari-hari itu de pe siksa pe hebat skali, mulai dari pertama Tuhan Allah da beking ni dunia sampe skarang, nyanda perna ada tu siksa yang sama deng itu, kong nyanda perna mo ada lei.

²²Kong kalu Tuhan nyanda beking pende tu hari-hari yang pe siksa itu, nyanda ada satu orang yang mo slamat. Mar lantaran Dia sayang pa orang-orang yang Dia so pili, Dia beking pende tu hari-hari itu.

²³Waktu itu, kalu ada orang bilang pa ngoni bagini, ‘Co lia, Kristus ada di sini!’, ato ‘Kristus ada di sana!’, ngoni jang percaya itu.

²⁴Soalnya kristus-kristus palsu deng nabi-nabi palsu mo muncul. Dorang mo beking mujisat-mujisat deng hal-hal luar biasa, sampe kalu bole tu orang-orang yang Tuhan so pili jadi sesat.

²⁵Jadi tarukira jo bae-bae, samua ini Kita so bilang lebe dulu pa ngoni.

²⁶So itu kalu ada orang yang bilang pa ngoni bagini, ‘Co lia, Kristus ada di padang gurun,’ ngoni jang pigi ka situ. Ato kalu ada yang bilang pa ngoni, ‘Co lia, Kristus ada di ruang yang da tasambunyi,’, ngoni lei jang percaya itu.

²⁷Soalnya waktu Anak Manusia mo datang ulang, Dia pe kedatangan mo dapa lia ka sluru dunia, sama deng kilat pe cahaya yang muncul di timur trus sampe ka barat.

²⁸Kalu torang lia ada burung pangmakang bangkai bakumpul di satu tampa, itu de pe tanda kalu di tampa itu pasti ada bangkai, bagitu lei deng kalu tu Anak Manusia datang ulang ka dunia, orang pasti mo dapa tau itu lantaran lebe dulu ada tu de pe tanda-tanda.”

²⁹Yesus bilang, “Pe klar tu hari-hari siksa itu, matahari so nyanda mo basinar, tu bulan mo jadi glap, tu bintang-bintang mo ciri dari langit, deng samua kuasa di langit mo tabongkar-bongkar.

³⁰Waktu itu, mo ada tanda di langit kalu tu Anak Manusia datang ulang, kong samua suku bangsa di bumi mo sedi skali deng manangis. Dorang samua mo lia tu Anak Manusia datang di atas awan-awan dari sorga, Dia datang deng Dia pe kuasa deng Dia pe luar biasa.

³¹Dia mo suru tu De pe malaekat-malaekat kaluar, kong mo dapa dengar bunyi trompet pe kuat skali. Dorang itu mo se kumpul tu orang-orang yang tu Anak Manusia so pili dari samua tampa di bumi ini, dari ujung barat sampe ka ujung timur, deng dari ujung utara sampe ka ujung slatan.”

³²Yesus bilang lei, “Co ngoni blajar dari tu pohong ara. Kalu de pe cabang-cabang kacili so baijo deng mulai batunas, ngoni tau kalu tu oras panas so dekat.

³³Bagitu lei kalu ngoni lia tu hari-hari siksa yang Kita da bilang tadi so mulai jadi, so nyanda lama tu Anak Manusia mo datang, so dekat skali.

³⁴Kita bilang pa ngoni, tu orang-orang yang hidop jaman ini ada yang blum mo mati sampe samua ini jadi.

³⁵Langit deng bumi mo ancor, mar tu Kita pe firman mo ada trus.”

³⁶Yesus bilang lei, “Nyanda ada satu orang yang tau tempo apa deng jam brapa tu Anak Manusia mo datang ulang. Malaekat-malaekat di sorga nintau, enter Anak Manusia sandiri lei nintau, cuma Bapa sandiri yang tau.

³⁷Waktu tu Anak Manusia mo datang ulang, de pe keadaan sama deng keadaan dulu waktu jaman Nuh.

³⁸Dulu seblum Tuhan kase tu banjer basar skali, tu orang-orang pe hidop cuma makang minum, kaweng deng da se kaweng, dorang pe hidop cuma babagitu trus sampe di hari waktu Nuh maso ka kapal basar.

³⁹Tu orang-orang itu nyanda sadar kalu banjer basar mo datang. Dorang nanti sadar serta tu banjer so datang se abis pa dorang. No bagitu lei orang-orang nanti nyanda mo siap kalu kage-kage tu Anak Manusia so datang ulang.

⁴⁰Kong nanti waktu itu ada dua laki-laki da bakarja di kobong, tu satu laki-laki mo dapa angka ka sorga kong tu satu mo se tinggal.

⁴¹Kong waktu itu lei ada dua parampuang da sama-sama bagiling gandum, tu satu parampuang mo dapa angka ka sorga kong tu satu mo se tinggal.

⁴²So itu bajaga-jaga jo, lantaran ngoni nintau tempo apa ngoni pe Tuhan mo datang.

⁴³Mar tarukira jo ini bae-bae, kalu tuang ruma so tau tempo apa tu papancuri mo bapancuri pa de pe ruma, tantu katu dia nyanda mo tidor lantaran dia mo bajaga-jaga supaya tu papancuri nyanda mo maso pa de pe ruma.

⁴⁴Bagitu lei deng ngoni, ngoni musti slalu siap for batunggu tu Anak Manusia mo datang. Soalnya ngoni nintau tempo apa tu Anak Manusia mo datang ulang, Dia mo datang kage-kage.”

⁴⁵Yesus bilang lei, “Sapa tu budak yang setia deng bijaksana, yang de pe tuang da angka jadi kapala for budak-budak laeng, supaya bole kase makang pa dorang pas jam makang?

⁴⁶Tantu katu tu budak yang paling snang itu tu budak yang waktu de pe tuang pulang dia masi samantara da bakarja.

⁴⁷Kita bilang pa ngoni, pasti tu dia pe tuang itu mo angka pa dia kong kase percaya for awasi samua tu de pe tuang pe kepunyaan.

⁴⁸Mar kalu tu budak itu jaha, dia babilang pa de pe hati bagini,

⁴⁹‘Kita pe tuang masi lama baru mo pulang.’ Kong dia mulai pukul-pukul tu budak-budak laeng, trus dia pi makang deng minum sama-sama deng tu pangmabo-pangmabo.

⁵⁰Kong di hari yang dia nyanda sangka-sangka, kage-kage dia pe tuang pulang,

⁵¹kong tu dia pe tuang itu mo hukum pa dia sampe mati, trus dia pe nasib itu sama deng tu nasib dari orang-orang yang munafik. Di situ dorang mo manangis deng dong pe gigi tabaku goso kong babunyi lantaran pe mendrita skali.”