Read Malay, Manado Matius 6 Bible Online

Matius 6 - Malay, Manado bible

Matius 6

¹Yesus bilang lei, “Inga bae-bae, ngoni jang beking tu butul di muka pa orang-orang supaya dorang mo lia kong puji pa ngoni. Kalu ngoni beking bagitu, ngoni pe Bapa di sorga nyanda mo kase upah pa ngoni.

²Jadi kalu ada yang bakase apa-apa for bantu tu orang miskin, dia jang bilang-bilang pa orang tu dia da beking itu. Kalu dia bilang-bilang tu dia da beking itu, itu sama jo deng tu orang-orang munafik ja beking di ruma-ruma ibada agama Yahudi ato di jalang-jalang. Dorang ja tiop trompet di tampa-tampa itu for se hebo pa orang banya apa tu dorang da beking supaya orang-orang mo puji pa dorang. Kita bilang pa ngoni, tu pujian yang dorang da dapa itu, so itu no tu dong pe upah.

³Mar kalu ngoni mo kase apa-apa for bantu tu orang miskin, ngoni kase jo deng babadiam, itu sama deng apa tu ngana pe tangan kanan da beking, tu ngana pe tangan kiri nintau.

⁴Jadi biar jo tu orang laeng nintau kalu ngoni da bakase apa-apa for bantu tu orang miskin. Kalu ngoni beking bagitu, ngoni pe Bapa yang bole lia apa tu ngoni da beking di tampa yang tasambunyi, Dia mo balas apa tu ngoni da beking itu.”

⁵Yesus bilang lei, “Kalu ngoni basombayang, ngoni jang basombayang sama deng tu orang munafik. Soalnya dorang itu suka ja basombayang badiri di ruma-ruma ibada agama Yahudi deng lei di tampa umum supaya orang laeng mo lia. Kita bilang pa ngoni, waktu orang-orang puji pa dorang, so itu no tu dorang pe upah.

⁶Mar kalu ngoni basombayang, maso jo pa ngoni pe kamar kong tutu tu pintu, trus ngoni basombayang jo pa ngoni pe Bapa tu ada di tampa tasambunyi. Kalu ngoni beking bagitu, ngoni pe Bapa yang ja lia apa tu ngoni da beking di tampa yang tasambunyi, Dia mo balas apa tu ngoni da beking.

⁷Kong kalu basombayang, ngoni nyanda usa basombayang panjang-panjang tu nyanda ada de pe arti, sama deng tu orang-orang yang nyanda kanal pa Tuhan Allah biasa ja beking. Soalnya dorang pe kira kalu dorang basombayang bagitu, dorang mo dapa apa tu dong da minta, padahal nyanda.

⁸Jadi ngoni jang sama deng dorang, lantaran ngoni pe Bapa tau apa yang ngoni perlu seblum ngoni minta pa Dia.

⁹So itu, ngoni basombayang jo bagini, ‘Torang pe Bapa yang ada di sorga, torang minta supaya samua hormat tu Bapa pe nama lantaran Bapa itu kudus.

¹⁰Bapa, datang jo Berkuasa sbagai Raja pa torang. Torang minta supaya samua Bapa pe mau jadi di bumi sama deng tu da jadi di sorga.

¹¹Kase akang pa torang makanan yang cukup for ni hari.

¹²Tolong kase ampung akang tu torang pe sala, sama deng torang kase ampung tu orang yang da beking sala pa torang.

¹³Kong jang kase biar torang tagoda for beking tu jaha, mar kase lapas akang pa torang dari tu setang pe bos pe kuasa. [Soalnya Bapa tu Berkuasa sbagai Raja, Bapa yang punya tu kuasa, deng Bapa lei yang luar biasa sampe slama-lamanya. Amin.’]

¹⁴Kita bilang pa ngoni, kalu ngoni kase ampung tu orang yang beking sala pa ngoni, ngoni pe Bapa lei di sorga mo kase ampung pa ngoni.

¹⁵Mar kalu ngoni nyanda kase ampung tu orang yang da beking sala pa ngoni, ngoni pe Bapa lei di sorga nyanda mo kase ampung pa ngoni.”

¹⁶Yesus bilang lei, “Kalu ngoni bapuasa, ngoni pe muka jang dapa lia susa sama deng tu orang munafik ja beking. Soalnya dorang itu sengaja kase tunjung tu dong pe muka susa supaya orang laeng lia kalu dorang samantara bapuasa kong puji pa dorang. Kita bilang pa ngoni, waktu orang-orang puji pa dorang, so itu no tu dorang pe upah.

¹⁷Mar kalu ngoni da bapuasa, ngoni taru minya tu ngoni pe kapala supaya rapi deng cuci tu ngoni pe muka.

¹⁸Ngoni beking bagitu supaya orang laeng nintau kalu ngoni da bapuasa, yang tau itu cuma tu ngoni pe Bapa yang ada di tampa yang tasambunyi. Dia da lia samua tu orang da beking deng cara sambunyi-sambunyi, kong nanti Dia mo balas kase upah pa ngoni.”

¹⁹ Yesus bilang lei, “Ngoni jang kumpul harta di bumi. Soalnya di bumi ini, tu binatang rayap deng karat bole mo beking rusak tu harta itu, deng lei papancuri bole datang pancuri tu harta itu.

²⁰Mar lebe bae ngoni kumpul harta di sorga. Soalnya di sorga, nyanda ada binatang rayap deng karat yang mo se ancor tu harta itu, deng lei nyanda ada papancuri yang mo bongkar deng pancuri tu harta itu.

²¹Soalnya di mana jo tu ngoni pe harta ada, di situ lei ngoni pe hati.”

²²Yesus bilang lei, “Orang pe mata itu sama deng pelita. Tu mata itu yang kase trang pa orang pe hati. Kalu ngoni pe mata balia deng jelas, ngoni pe hati lei jadi trang.[6]

²³Mar kalu dia pe mata nyanda balia deng jelas, dia pe hati lei iko jadi glap. Kong kalu tu trang yang ada pa dia pe hati so jadi glap, tu glap itu mo jadi lebe glap.”

²⁴Yesus bilang lei, “Satu orang karja nimbole mo bakarja pa dua bos. Soalnya kalu dia ada dua bos, dia pasti mo binci tu bos yang satu kong sayang tu bos yang laeng, dia lei mo setia pa tu bos yang satu kong nyanda farduli deng tu bos laeng. Bagitu lei deng ngoni, nyanda mungkin ngoni mo layani pa Tuhan Allah kalu ngoni lei masi ja pikir-pikir tu kekayaan dunia.”

²⁵Yesus bilang lei, “So itu kita bilang pa ngoni, ngoni nyanda usa kuatir tu ngoni pe hidop, tentang apa tu ngoni mo makang ato minum, deng lei nyanda usa kuatir tentang baju tu ngoni mo pake. Soalnya ngoni pe hidop itu lebe penting dari apa tu ngoni mo makang, kong ngoni pe badan itu lebe penting dari tu baju yang ngoni mo pake.

²⁶Co ngoni lia tu burung-burung di udara! Burung-burung itu nyanda ja baambor bibit deng nyanda ja bapete apa-apa kong nyanda simpang makanan di lumbung, mar biar lei bagitu ngoni pe Bapa di sorga kase makang pa dorang. Ngoni tantu tau kalu for Tuhan Allah, ngoni itu jao lebe penting dari tu burung-burung itu.

²⁷Kalu ngoni kuatir deng tu hal-hal itu, apa ngoni pe kuatir itu bole mo se tamba panjang tu ngoni pe umur? Pasti nyanda to?

²⁸Jadi ngoni nyanda perlu kuatir tentang ngoni pe baju. Co ngoni lia tu bunga-bunga bakung tu da batumbu di padang, dorang itu pe bagus skali. Dorang nyanda bakarja deng nyanda ja beking benang for beking baju.

²⁹Mar Kita bilang pa ngoni, biar lei tu raja Salomo pe kaya deng pe hebat, mar dia pe baju nyanda ada apa-apa kalu se banding deng tu bunga itu pe bagus.

³⁰Tuhan Allah piara deng beking bagus tu rumpu yang batumbu di padang, tu rumpu yang ni hari ada trus eso dapa bakar. Kalu tu rumpu itu Tuhan piara deng beking bagus, lebe-lebe lei tu ngoni pe hidop tantu katu Tuhan mo piara deng beking bagus. Jadi kiapa so ngoni nyanda talalu percaya pa Dia?

³¹So itu ngoni nyanda usa kuatir deng batanya rupa ini, ‘Apa tu torang mo makang?’ ato ‘Apa tu torang mo minum?’ ato lei ‘Apa tu torang mo pake?’

³²Soalnya tu orang-orang yang nyanda kanal pa Tuhan Allah slalu kuatir tentang tu samua itu, mar ngoni pe Bapa di sorga tau kalu ngoni perlu samua itu.

³³Mar lebe dulu, cari jo pa Tuhan Allah supaya Dia Berkuasa sbagai Raja pa ngoni deng ngoni beking tu butul di muka pa Dia. Deng bagitu, samua tu ngoni pe perlu Dia mo kase pa ngoni.

³⁴Jadi, ngoni nyanda usa kuatir tentang apa tu mo jadi hari eso lantaran hari eso ada de pe susa sandiri. Tu susa ni hari cukup jo for ni hari, nyanda usa lei ngoni tamba.”