Read Malay, Manado Matius 7 Bible Online

Matius 7 - Malay, Manado bible

Matius 7

¹Yesus bilang lei, “Ngoni jang hakimi orang laeng, supaya Tuhan lei nyanda hakimi pa ngoni.

²Soalnya tu cara yang ngoni da pake for hakimi orang, tu cara itu jo tu Tuhan mo pake for hakimi pa ngoni. Kong tu ukuran yang ngoni da pake for ukur pa orang laeng, tu ukuran itu lei tu Tuhan mo pake for se ukur pa ngoni.

³Ngoni pe capat ja tarukira tu orang laeng pe sala yang pe kacili, mar tu ngoni pe sala yang pe basar, ngoni se biar. Ngoni itu bole mo se sama deng tu orang yang da lia tu serbuk kayu pa de pe sudara pe mata, padahal tu balak yang ada pa dia pe mata, dia nyanda dapa lia.

⁴Bagimana lei ngoni bole babilang pa ngoni pe sudara bagini, ‘Mari jo kita se kaluar tu serbuk kayu pa ngana pe mata,’ padahal pa ngoni pe mata sandiri ada balak.

⁵Hei orang munafik! Ngoni musti se kaluar dulu tu balak dari pa ngoni pe mata baru ngoni bole mo balia deng jelas for se kaluar tu serbuk kayu dari pa ngoni pe sudara pe mata.

⁶Ngoni jang kase tau tu Tuhan pe firman pa orang-orang yang nyanda mo trima, kalu ngoni kase tau itu bole mo se sama deng ngoni se lempar barang yang kudus pa anjing trus tu anjing cuma bale gigi pa ngoni. Itu lei sama deng ngoni da se lempar mutiara pa boke trus tu boke cuma injang-injang akang tu mutiara.”

⁷Yesus bilang lei, “Minta jo pa Tuhan apa tu ngoni pe perlu, nanti Dia mo kase apa tu ngoni da minta. Cari jo pa Dia apa tu ngoni pe perlu, nanti ngoni mo dapa itu dari pa Dia. Batoki jo pa Dia pe pintu for baminta, nanti Dia mo buka akang tu pintu for kase apa tu ngoni da minta.

⁸Soalnya tiap orang yang baminta pa Tuhan, dia mo trima apa tu dia da minta. Kong tiap orang yang cari apa tu de pe perlu pa Tuhan, dia mo dapa itu. Trus tiap orang yang batoki Tuhan pe pintu for baminta, Tuhan mo buka akang pintu kong kase tu dia da minta.

⁹Apa ada di antara pa ngoni, kalu ngoni pe anak minta roti, ngoni mo kase akang batu pa dia? Nyanda ada to?

¹⁰Kong nyanda mungkin lei to kalu ngoni pe anak minta ikang pa ngoni, ngoni mo kase akang ular pa dia?

¹¹Jadi biar ngoni pe hati jaha, ngoni tau bakase tu bae pa ngoni pe anak-anak. No apa lei tu ngoni pe Bapa di sorga, Dia pasti mo kase tu bae pa orang-orang yang baminta pa Dia.

¹²Jadi samua tu ngoni suka orang beking pa ngoni, ngoni musti beking bagitu lei pa orang laeng. Soalnya itu no tu de pe isi dari tu atoran-atoran yang ada di kitab Taurat deng tu nabi-nabi pe ajaran.”

¹³Yesus bilang lei, “Ngoni maso jo lewat tu pintu yang sempit. Soalnya tu pintu yang lebar mo pigi di tampa for binasa, de pe jalang lebar kong banya orang yang iko di situ.

¹⁴Mar tu pintu for dapa tu hidop kekal itu sempit deng de pe jalang lei susa mo iko akang, cuma sadiki tu orang yang iko di situ.”

¹⁵Yesus bilang lei, “Ngoni musti hati-hati pa tu nabi-nabi palsu yang datang pa ngoni! Dorang bilang kalu dorang itu nabi, tu orang-orang yang ja kase tau tu Tuhan Allah pe pesan pa orang-orang padahal bukang. Dorang itu pura-pura pangbae sama deng domba, mar sebenarnya dorang itu jaha sama deng tu srigala yang ganas.

¹⁶Ngoni bole mo dapa tau kalu dorang itu butul-butul nabi ato nabi palsu dari apa tu dorang da beking, sama deng dapa tau pohong dari de pe bua. Nyanda mungkin to tu rumpu baduri mo babua anggor ato mo babua ara.

¹⁷Samua pohong yang bagus de pe bua lei bagus, mar pohong yang nyanda bagus de pe bua lei nyanda bagus.

¹⁸Nyanda mungkin tu pohong yang bagus kong de pe bua nyanda bagus, ato nyanda mungkin tu pohong yang nyanda bagus kong de pe bua bagus.

¹⁹Tu pohong yang babua nyanda bagus, mo dapa potong kong bakar.

²⁰Jadi, torang bole dapa tau kalu dorang itu butul-butul nabi ato nabi palsu dari apa tu dorang da beking.”

²¹Yesus bilang lei, “Bukang samua orang yang pangge pa Kita, ‘Tuhan, Tuhan’ tu mo jadi orang-orang dari Tuhan Allah yang Berkuasa sbagai Raja, cuma tu orang-orang yang ja beking tu Kita pe Bapa di sorga pe mau.

²²Nanti waktu hari kiamat, banya orang mo bilang pa Kita bagini, ‘Tuhan, Tuhan, torang ini tu ja kase tau Tuhan pe pesan pake Tuhan pe nama. Torang ja user setang-setang dari pa orang-orang pake Tuhan pe kuasa, kong torang lei da beking banya hal yang luar biasa pake Tuhan pe kuasa.’

²³Mar waktu itu jo, Kita mo bilang pa dorang, ‘Kita nyanda perna kanal pa ngoni, bajao jo dari pa Kita ngoni yang ja beking tu jaha!’ ”

²⁴Yesus bilang lei, “Sapa yang da dengar apa tu Kita da se ajar ini kong ja beking, dia itu sama deng tu orang bijaksana yang da se badiri ruma di atas fondasi batu.

²⁵Waktu ujang kras kong banjer datang, trus angin kras lei bage tu ruma, tu ruma nyanda mo rubu. Soalnya tu ruma da se badiri di atas fondasi batu.

²⁶Mar sapa tu da dengar apa tu Kita da se ajar ini kong nyanda ja beking, dia itu sama deng tu orang biongo yang da se badiri ruma di atas fondasi paser.

²⁷Waktu ujang kras kong banjer datang, deng angin kras lei bage tu ruma itu, tu ruma iko rubu kong ancor skali.”

²⁸Serta Yesus so klar babicara, tu orang banya itu jadi taheran-heran da dengar tu Dia pe ajaran itu.

²⁹Soalnya Dia da mangajar pa dorang punung deng kuasa, nyanda sama deng dorang pe ahli-ahli Taurat pe mangajar.