Read Malay, Manado Markus 1 Bible Online

Markus 1 - Malay, Manado bible

Markus 1

¹Ini tu Kabar Bae tentang Yesus Kristus, tu Anak Allah.

²Kabar Bae ini mulai deng tu da tulis di kitab nabi Yesaya bagini, “Tarukira jo bae-bae, Kita mo suru tu Kita pe utusan lebe dulu dari Ngana. Dia itu yang mo buka akang jalang for Ngana, supaya orang pe hati siap trima pa Ngana.

³Dia babicara deng suara kuat di padang gurun, dia babilang, ‘Buka jalang for trima pa Tuhan, kong kase tre tu jalang for sambut pa Dia.’ ”

⁴Tuhan pe utusan itu, de pe nama Yohanes Pembaptis. Dia datang di padang gurun kong ja babilang pa orang-orang yang datang pa dia, “Bertobat jo supaya Tuhan kase ampung tu ngoni pe dosa, kong kase jo ngoni pe diri for mo baptis, tanda ngoni so bertobat.”

⁵Banya orang dari sluru daera Yudea deng dari kota Yerusalem pigi pa Yohanes di kuala Yordan. Dorang mangaku dong pe dosa-dosa, kong Yohanes baptis pa dorang di situ.

⁶Yohanes ja pake baju panjang dari bulu onta deng da ika tu pinggang pake tali dari kuli binatang, trus dia pe makanan belalang deng madu utang.

⁷Kong ini tu dia ja kase tau pa orang-orang, “Abis kita, ada tu mo datang yang lebe berkuasa dari kita. Hele mo maruku for buka Dia pe tali capatu, kita nyanda pantas.

⁸Kita baptis pa ngoni deng aer, mar Dia mo baptis pa ngoni deng Roh Kudus.”

⁹Waktu itu, Yesus datang dari Nazaret di daera Galilea, kong Yohanes baptis pa Dia di kuala Yordan.

¹⁰Serta Yesus kaluar dari aer, Dia iko lia tu langit tabuka, trus tu Tuhan pe Roh yang rupa burung pombo turung di atas pa Dia.

¹¹Kong dapa dengar suara dari sorga, “Ngana ini Kita pe Anak, Kita sayang pa Ngana. Ngana ini beking Kita pe hati snang.”

¹²Pe klar itu, Tuhan pe Roh iko bawa pa Yesus ka padang gurun.

¹³Yesus ada di padang gurun itu slama ampa pulu hari, kong di situ setang pe bos goda pa Dia. Yesus tinggal di situ deng binatang-binatang liar, kong malaekat-malaekat ja layani pa Dia.

¹⁴Waktu Yohanes so dapa tangka kong kase maso ka bui, Yesus pigi ka daera Galilea kong kase tau tu Kabar Bae dari Tuhan Allah.

¹⁵Dia bilang, “Tu waktu yang Tuhan Allah da tentukan so sampe, Tuhan Allah so mo Berkuasa sbagai Raja. So itu, bertobat jo deng percaya tu Kabar Bae.”

¹⁶Satu kali Yesus da bajalang di pinggir danau Galilea, kong Dia dapa lia dua orang kaka ade, dong dua pe nama Simon deng Andreas. Dorang da balego jala di danau, lantaran dorang pe karja ja bacari ikang.

¹⁷Kong Yesus pangge pa dorang, “Mari jo iko pa Kita! Ngoni biasa bacari ikang, mar Kita mo kase ajar pa ngoni bagimana ja bacari orang for iko pa Kita.”

¹⁸Pe dengar itu, dorang iko kase tinggal dong pe jala kong iko pa Yesus.

¹⁹Abis itu, Yesus bajalang nyanda jao dari situ kong Yesus dapa lia pa Yakobus deng de pe sudara Yohanes, dorang dua itu Zebedeus pe anak-anak. Dorang da beking butul dorang pe jala di prao.

²⁰Dia iko pangge pa dorang dua, kong dong iko pa Dia. Dorang kase tinggal dong pe papa di prao sama-sama deng tu orang-orang karja.

²¹Yesus deng Dia pe murit-murit sampe di Kapernaum. Serta so hari Sabat, Yesus iko maso ka dalam ruma ibada agama Yahudi kong mangajar di situ.

²²Orang-orang yang badengar pa Dia taheran-heran da dengar tu Dia pe ajaran, lantaran Dia da mangajar pa dorang punung deng kuasa, nyanda sama deng dorang pe ahli-ahli Taurat pe mangajar.

²³Waktu itu, ada satu orang di ruma ibada itu yang da kemasukan setang. Tu orang itu bataria,

²⁴“Yesus, orang Nazaret! Apa so Ngana pe urusan deng torang? Ngana datang mo kase binasa pa torang kang? Kita tau sapa Ngana, so Ngana Yang Kudus dari Tuhan Allah.”

²⁵Mar Yesus togor deng kras pa tu setang itu, “Badiam, kaluar ngana dari pa dia!”

²⁶Tu setang beking sampe tu orang itu tagoyang kras, kong deng bataria kuat tu setang kaluar dari pa dia.

²⁷Samua orang di situ jadi taheran-heran, sampe dorang baku bilang, “Eh, co lia! So ajaran baru ini! Dia pe bicara punung deng kuasa. Dia user tu setang-setang kong tu setang-setang itu lei iko De pe prenta.”

²⁸Abis itu, tu brita tentang Yesus iko tasiar ka samua tampa di daera Galilea.

²⁹Pe kaluar dari ruma ibada agama Yahudi, Yesus, Yakobus deng Yohanes pigi pa Simon deng Andreas pe ruma.

³⁰Waktu itu Simon pe mama mantu da tidor-tidor lantaran saki panas, kong dorang iko kase tau pa Yesus kalu Simon pe mama mantu da saki.

³¹Abis itu, Yesus pi badekat pa Simon pe mama mantu, trus Yesus pegang de pe tangan kong bantu kase badiri pa dia. Waktu itu jo, tu Simon pe mama mantu pe panas ilang, kong dia mulai layani pa dorang.

³²Waktu so mo malam, orang-orang bawa pa Yesus samua orang da saki deng da kemasukan setang.

³³Kong samua orang di kota itu bakumpul di muka ruma.

³⁴Trus Yesus kase bae banya orang dari rupa-rupa panyaki, deng Dia lei user tu setang-setang yang da maso pa orang-orang. Yesus nyanda kase tu setang-setang mo babicara, lantaran dorang tau sapa Dia.

³⁵Waktu amper siang, Yesus bangong kong kaluar ruma. Dia pigi ka tampa yang jao dari kampung kong basombayang di situ.

³⁶Mar Simon deng de pe tamang-tamang pi cari pa Dia.

³⁷Pe baku dapa deng Dia, dorang bilang, “Guru, pe banya orang da bacari pa Guru.”

³⁸Kong Yesus bilang pa dorang, “Mari jo, torang pigi ka tampa laeng, di kota-kota dekat sini. Di situ lei Kita mo kase tau tu Kabar Bae dari Tuhan Allah, so lantaran itu Kita da datang.”

³⁹Abis itu Yesus pigi ka samua tampa di Galilea, kong Dia kase tau pa dorang tu Kabar Bae dari Tuhan Allah di ruma-ruma ibada agama Yahudi deng Dia user tu setang-setang yang da maso pa orang-orang.

⁴⁰Ada satu orang saki kusta datang pa Yesus. Tu orang itu berlutut di muka pa Dia kong minta tolong, “Kalu Bapak suka, Bapak bole kase bae pa kita.”

⁴¹Pe dengar itu, Yesus rasa kasiang, kong Dia pegang tu orang itu kong babilang pa dia, “Iyo Kita suka, jadi bae jo ngana!”

⁴²Waktu itu jo, tu orang itu pe panyaki kusta iko ilang, kong dia bae.

⁴³Abis itu Yesus iko suru pigi pa dia, kong deng tegas Yesus kase inga,

⁴⁴“Inga eh! Ngana jang se tau pa sapa-sapa tu Kita da beking pa ngana. Mar ngana pigi jo pa imam supaya dia bole lia kalu ngana so bae. Abis itu, ngana bawa korban persembahan sama deng tu Musa da prenta, itu tu bukti for mo se tunjung pa orang-orang kalu ngana memang butul-butul so bae.”

⁴⁵Mar tu orang itu cuma tare da pi bacirita kamana-mana apa tu da jadi pa dia. So itu Yesus so nimbole maso ka kota deng trang-trangan, Dia kurang da tinggal di tampa-tampa yang jao dari kampung di luar kota. Mar biar lei bagitu, dari mana-mana orang badatang trus pa Yesus.