Read Malay, Manado Markus 12 Bible Online

Markus 12 - Malay, Manado bible

Markus 12

¹Yesus mulai babicara pake prumpamaan pa tu imam-imam kapala, ahli-ahli Taurat deng tu tua-tua. Dia bilang, “Ada satu orang buka kobong anggor kong dia beking pagar kase ron tu kobong. Dia gale lobang for beking bak, tu tampa mo peras akang anggor. Dia lei beking sabua for tu orang yang mo bajaga kobong. Klar samua itu, dia baku ator deng orang-orang yang ja bakarja kobong. Abis itu, dia pigi ka daera laeng.

²Serta so de pe oras bapete anggor, dia suru de pe budak pigi pa tu orang-orang yang da bakarja di kobong anggor itu for ambe tu de pe bagean.

³Mar dorang cuma da tangka tu budak itu kong bage pa dia, kong suru pulang deng nyanda bawa apa-apa.

⁴Abis itu, yang punya kobong suru lei de pe budak laeng pigi pa dorang. Tu budak itu lei dorang bage de pe kapala, deng dorang beking malo pa dia.

⁵Dia suru lei budak laeng pigi pa tu orang-orang karja kobong, kong dorang bunung pa dia. Trus dia suru lei banya budak pigi pa dorang, mar ada tu dorang da bage deng ada lei tu dorang da bunung.

⁶Skarang tu da tatinggal kurang satu orang, tu dia pe anak laki-laki yang dia sayang. De pe laste, yang punya kobong suru de pe anak pigi pa dorang, dia bilang, ‘Tantu katu kalu kita suru pigi tu kita pe anak, pasti dorang mo hormat.’

⁷Mar tu orang-orang karja baku skongkol bagini, ‘Napa dia tu nanti mo dapa warisan kobong ini. So itu lebe bae torang bunung jo pa dia, supaya tu warisan kobong ini mo jadi torang punya.’

⁸Jadi dorang tangka kong bunung pa dia, trus dorang kase lego pa dia kaluar dari tu kobong anggor itu.”

⁹Kong Yesus batanya pa dorang, “Kira-kira tu tuang kobong mo beking apa? Pasti dia mo datang bunung abis tu orang-orang yang bakarja di kobong itu, kong dia kase ofor tu kobong pa orang laeng.

¹⁰Ngoni tantu so baca di Kitab Suci yang da tulis bagini, ‘Batu yang tukang-tukang bangunan da buang, batu itu so jadi batu fondasi yang paling penting.

¹¹Tuhan tu da beking itu, kong torang lia yang Dia da beking itu luar biasa.’ ”

¹²Pe dengar itu, tu pemimpin-pemimpin agama Yahudi iko jadi mangarti kalu Yesus pe maksut deng tu orang-orang karja di prumpamaan itu dorang. So itu dorang brusaha mo tangka pa Yesus, mar dorang tako pa tu orang banya, so itu dorang pigi se tinggal pa Dia.

¹³Abis itu, pemimpin-pemimpin agama Yahudi suru bebrapa orang dari golongan Farisi deng orang-orang Yahudi yang ja iko pa raja Herodes pigi for jebak pa Yesus deng pertanyaan.

¹⁴Dorang datang kong bilang pa Yesus, “Guru, torang tau kalu Guru itu orang jujur. Guru nyanda tako pa sapa-sapa lantaran Guru nyanda ja bacari muka, malatare deng trang-trangan Guru kase ajar tu cara yang butul for iko pa Tuhan Allah. So itu torang mo tanya, kalu mo iko tu atoran agama, bole ato nyanda torang babayar pajak pa raja yang paling tinggi di krajaan Romawi? Musti so torang mo babayar pajak ato nyanda?”

¹⁵Mar Yesus tau kalu dorang sebenarnya munafik. Kong Dia bilang pa dorang, “Kiapa ngoni mo jebak pa Kita? Co kase kamari satu doi perak for Kita mo lia!”

¹⁶Dorang kase pa Dia doi perak, kong Dia batanya pa dorang, “Sapa pe gambar deng nama ini?” Dorang manyao, “Itu gambar deng nama dari raja yang paling tinggi di krajaan Romawi.”

¹⁷Kong Yesus bilang pa dorang, “No kalu bagitu, kase jo pa raja yang paling tinggi di krajaan Romawi apa tu ngoni musti kase pa dia, kong kase jo pa Tuhan Allah apa tu ngoni musti kase pa Tuhan Allah!” Pe dengar itu, dorang taheran-heran.

¹⁸Abis itu, bebrapa orang dari golongan Saduki datang pa Yesus. Tu golongan itu nyanda percaya kalu orang yang so mati mo hidop ulang. Dorang batanya pa Yesus,

¹⁹“Guru, dulu nabi Musa da tulis for torang bagini: kalu satu laki-laki yang so kaweng kong mati mar nyanda dapa anak, de pe kaka ato ade laki-laki musti kaweng deng tu laki-laki itu pe bini, supaya de pe kaka ato ade itu kase akang keturunan for dia.

²⁰No skarang bagini, umpama ada tuju kaka ade laki-laki. Tu paling tua kaweng deng satu parampuang, mar nyanda lama dia mati deng dia ini nyanda dapa anak.

²¹Kong yang kadua kaweng deng tu parampuang itu. Dia lei mati deng nyanda dapa anak. Bagitu lei deng tu katiga.

²²Tu da jadi babagitu trus pa tu tuju kaka ade itu, samua mati kong nyanda dapa anak. Kong de pe laste, tu parampuang itu lei mati.

²³Jadi nanti waktu Tuhan se hidop ulang pa orang-orang, sapa yang mo jadi tu parampuang itu pe laki? Soalnya tu tuju kaka ade itu so perna kaweng deng dia.”

²⁴Yesus manyao pa dorang, “Ngoni ini so sala skali lantaran ngoni nyanda mangarti tu Kitab Suci, deng ngoni lei nintau tu Tuhan Allah pe kuasa.

²⁵Sebenarnya kwa bagini, kalu orang mati kong hidop ulang, dorang so nyanda mo kaweng deng so nyanda mo kase kaweng, mar samua mo hidop sama deng malaekat-malaekat di sorga.

²⁶Kong tentang orang mati yang mo hidop ulang, ngoni tantu so baca yang Musa da tulis tentang rumpu baduri yang da tabakar mar nyanda angus. Waktu itu, Tuhan Allah da bilang pa Musa bagini, ‘Kita ini Tuhan Allah, tu Abraham, Ishak deng Yakub ja semba.’

²⁷Waktu itu, tu Abraham, Ishak deng Yakub so mati mar da hidop ulang deng Tuhan Allah. Jadi Tuhan Allah itu bukang orang mati pe Tuhan mar orang yang hidop pe Tuhan. Ngoni komang memang butul-butul sala.”

²⁸Waktu itu, ada tu satu ahli Taurat da dengar Yesus deng tu orang-orang dari golongan Saduki da baku ambe pendapat. Dia dengar tu Yesus pe jawaban pe bagus pa tu orang-orang itu. So itu dia batanya pa Yesus, “Dari samua tu Tuhan Allah pe atoran-atoran di Kitab Taurat, atoran mana tu paling penting?”

²⁹Yesus manyao, “Bagini tu Tuhan Allah pe atoran yang paling penting: ‘Hei orang Israel, dengar jo bae-bae. Tuhan Allah itu torang pe Tuhan, Dia itu cuma satu.

³⁰Ngoni musti butul-butul sayang pa Tuhan Allah yang ngoni ja semba, ngoni nimbole badua hati. Ngoni sayang jo pa Dia deng samua yang ada pa ngoni pe diri, deng lei sayang jo pa Dia deng cara slalu pikir apa tu bole mo beking snang pa Dia, kong beking yang Dia da suru.’

³¹Kong tu atoran yang kadua, ‘Ngoni sayang jo pa orang laeng sama deng ngoni sayang pa ngoni pe diri sandiri.’ Nyanda ada atoran laeng yang lebe penting dari tu dua atoran ini.”

³²Abis itu, tu ahli Taurat bilang pa Yesus, “Butul skali, tu Guru da bilang itu memang butul. Tuhan Allah itu memang cuma satu, nyanda ada laeng kacuali Dia.

³³Torang musti butul-butul sayang pa Tuhan Allah, nimbole badua hati. Torang pake jo tu torang pe pande for sayang pa Dia, torang beking jo yang Dia da suru, deng lei torang sayang jo pa orang laeng sama deng torang sayang pa torang pe diri sandiri. Tu samua itu lebe penting dari samua korban bakaran deng persembahan laeng for Tuhan Allah.”

³⁴Yesus lia tu orang itu da bajawab deng bijaksana, kong Dia bilang, “Sadiki lei ngana mo jadi Tuhan Allah pe orang.” Abis itu, so nyanda ada lei yang brani batanya pa Yesus.

³⁵Waktu Yesus samantara da mangajar di kintal kompleks Ruma Ibada Pusat, Dia bilang, “Kiapa ahli-ahli Taurat da bilang kalu tu Mesias tu Raja yang mo se slamat pa manusia itu raja Daud pe keturunan?

³⁶Soalnya waktu Roh Kudus da kuasai pa raja Daud, raja Daud sandiri da bilang bagini, Tuhan Allah da bilang pa kita pe Tuhan bagini, ‘Dudu jo di tampa terhormat di sabla kanan pa Kita, sampe Ngana pe musu-musu Kita taru di bawa Ngana pe kaki.’

³⁷Jadi kalu raja Daud sandiri da bilang Kristus itu dia pe Tuhan, no bagimana lei torang mo bilang kalu Kristus itu raja Daud pe keturunan?” Tu orang banya itu suka skali badengar tu Yesus da bilang.

³⁸Yesus mangajar lei pa dorang, Dia bilang, “Ngoni musti hati-hati pa tu ahli-ahli Taurat! Dorang suka bajalang pake juba panjang deng suka orang ja hormat di tampa banya orang.

³⁹Di ruma-ruma ibada agama Yahudi deng di pesta-pesta, dorang suka ja dudu di tampa paling muka tu tampa yang terhormat.

⁴⁰Dorang lei ja batipu tu janda-janda for ambe tu janda-janda itu pe ruma, deng dorang ja basombayang panjang-panjang supaya orang anggap kalu dorang itu orang bae-bae. So dorang itu tu mo trima hukuman yang lebe brat.”

⁴¹Abis itu, Yesus dudu da mangada tu kotak persembahan di Ruma Ibada Pusat, Dia da tarukira tu orang banya ja baisi doi di kotak itu. Banya orang kaya da bakase doi banya.

⁴²Kong datang satu janda miskin. Dia bakase dua doi logam di kotak itu, tu doi itu de pe nilai paling kacili.

⁴³Trus Yesus pangge tu De pe murit-murit kong bilang, “Kita bilang pa ngoni, tu janda miskin da kase lebe banya dari samua orang yang da bakase di kotak persembahan.

⁴⁴Soalnya tu orang-orang kaya itu da bakase dari dorang pe kepunyaan yang talebe-lebe, mar tu janda ini da bakase dari de pe kekurangan tu samua dia pe doi for de pe hidop.”