Read Malay, Manado Markus 13 Bible Online

Markus 13 - Malay, Manado bible

Markus 13

¹Waktu Yesus bajalang kaluar dari tu kompleks Ruma Ibada Pusat, Dia pe satu murit babilang pa Dia tentang tu Ruma Ibada Pusat, “Guru, co lia kwa! Pe gaga kang tu gedung-gedung itu? Dorang da susung pake batu-batu pe basar.”

²Kong Yesus bilang pa dia, “Butul, tu gedung-gedung itu pe gaga. Mar nanti ada de pe waktu, nyanda ada satu batu lei yang mo tasusung pa de pe tampa, samua itu mo dapa kase rubu.”

³Abis itu, Yesus pigi ka bukit Zaitun kong dudu di situ mangada ka Ruma Ibada Pusat. Waktu itu Petrus, Yakobus, Yohanes deng Andreas pi badekat pa Dia supaya dorang bole basandiri deng Dia, kong dorang batanya,

⁴“Guru, kase tau akang pa torang, tempo apa dang tu Guru da bilang tadi itu mo jadi? Kong apa dang tu de pe tanda-tanda kalu samua itu so mo jadi?”

⁵Yesus bilang pa dorang, “Hati-hati jo ngoni, jang sampe ada orang yang beking sesat pa ngoni.

⁶Soalnya banya orang mo datang kong mo pake Kita pe nama. Dorang mo bilang, ‘So kita ini tu Kristus tu Raja yang se slamat pa manusia’ kong dorang itu mo beking sesat banya orang.

⁷Kong kalu ngoni dengar ada prang di satu daera, ato kalu ngoni dengar kabar ada lei prang di tampa laeng, ngoni jang tako. Samua itu musti jadi lebe dulu, mar itu blum de pe waktu mo kiamat.

⁸Soalnya nanti satu suku bangsa mo baprang deng suku bangsa laeng, satu krajaan baprang deng krajaan laeng. Kong mo ada lei tana goyang di mana-mana deng mo ada lei kelaparan. Samua itu baru de pe awal pendritaan seblum kiamat, sama deng tu pendritaan yang parampuang da rasa waktu mo melahirkan.

⁹Jadi hati-hati jo ngoni! Soalnya orang-orang mo tangka pa ngoni kong mo srahkan ka pengadilan agama, ngoni lei mo dapa pukul di ruma ibada agama Yahudi. Dorang mo kase mangada ngoni pa penguasa-penguasa deng raja-raja lantaran ngoni da iko pa Kita, kong itu justru jadi kesempatan for ngoni kase tau pa dorang tentang tu Kabar Bae dari Tuhan Allah.

¹⁰Soalnya tu Kabar Bae itu musti kase tau dulu ka samua suku bangsa baru kiamat.

¹¹Kong waktu ngoni dapa tangka trus dorang bawa ka pengadilan, ngoni nyanda usa tako tentang apa tu ngoni mo bilang. Mar ngoni bilang jo tu kata-kata yang Tuhan mo kase pa ngoni waktu itu, soalnya apa tu ngoni mo bilang waktu itu, itu bukang ngoni pe kata-kata mar itu dari Roh Kudus.

¹²Nanti ada de pe waktu, kalu tu orang yang nyanda percaya pa Kita mo srahkan dia pe sudara sandiri yang percaya pa Kita for dapa bunung, bagitu lei deng tu papa-papa mo beking pa dong pe anak-anak. Ada lei tu anak-anak mo malawang pa dorang pe orang tua, kong srahkan tu dorang pe orang tua for dapa bunung.

¹³Kong samua orang mo binci pa ngoni lantaran ngoni da iko pa Kita. Mar tu orang yang tetap iko pa Kita sampe akhir, Tuhan mo kase slamat pa dia.”

¹⁴Yesus bilang lei, “Ngoni mo lia satu orang yang paling jaha tu tukang beking ancor samua, kong dia mo badiri di tampa[6] yang nyanda cocok for dia. (Sapa yang da babaca ini tarukira jo bae-bae!) Kalu tu orang paling jaha itu so badiri di Yerusalem, lebe bae tu orang-orang yang ada di daera Yudea lari pi manyingkir jo ka gunung-gunung.

¹⁵Tu orang yang ada di atas ruma jang turung pi ambe tu barang-barang pa de pe ruma, mar turung kong lari jo.

¹⁶Bagitu lei deng tu orang yang ada di kobong, jang babale for pi ambe dia pe baju, mar pi lari jo!

¹⁷Waktu itu yang paling cilaka tu ibu-ibu yang hamil deng tu masi ja se batoto ade.

¹⁸Basombayang jo, supaya itu samua nyanda mo jadi pas oras dingin,

¹⁹lantaran tu hari-hari itu de pe siksa pe hebat skali, mulai dari pertama Tuhan Allah da beking ni dunia sampe skarang, nyanda perna ada tu siksa yang sama deng itu, kong nyanda perna mo ada lei.

²⁰Kong kalu Tuhan nyanda beking pende tu hari-hari yang pe siksa itu, nyanda ada satu orang yang mo slamat. Mar lantaran Dia sayang pa orang-orang yang Dia so pili, Dia beking pende tu hari-hari itu.

²¹Waktu itu, kalu ada orang bilang pa ngoni bagini, ‘Co lia, Kristus ada di sini!’ ato ‘Co lia, Kristus di sana!’, ngoni jang percaya itu.

²²Soalnya kristus-kristus palsu deng nabi-nabi palsu mo muncul. Dorang mo beking mujisat-mujisat deng hal-hal luar biasa, deng maksut kalu bole tu orang-orang yang Tuhan so pili jadi sesat.

²³Jadi hati-hati jo ngoni, samua ini Kita so bilang lebe dulu pa ngoni!”

²⁴Yesus bilang, “Pe klar tu hari-hari siksa itu, ‘Matahari so nyanda mo basinar deng tu bulan mo jadi glap.

²⁵Tu bintang-bintang mo ciri dari langit, deng samua kuasa di langit mo tabongkar-bongkar.’

²⁶Kong waktu itu no orang-orang mo lia tu Anak Manusia datang di atas awan-awan deng Dia pe kuasa deng Dia pe luar biasa.

²⁷Waktu itu jo, Dia mo suru tu De pe malaekat-malaekat kaluar for pi kumpul tu orang-orang yang Dia so pili dari sluru tampa di bumi ini.”

²⁸Yesus bilang lei, “Co ngoni blajar dari tu pohong ara. Kalu de pe cabang-cabang kacili so baijo deng mulai batunas, ngoni tau kalu oras panas so dekat.

²⁹Bagitu lei kalu ngoni lia tu Kita da bilang tadi so mulai jadi, so nyanda lama tu Anak Manusia mo datang, so dekat skali.

³⁰Kita bilang pa ngoni, tu orang-orang yang hidop jaman ini ada yang blum mo mati sampe samua itu jadi.

³¹Langit deng bumi mo ancor, mar tu Kita pe firman mo ada trus.”

³²Yesus bilang lei, “Nyanda ada satu orang yang tau tempo apa ato jam brapa tu Anak Manusia mo datang ulang. Malaekat-malaekat di sorga nintau, enter Anak Manusia sandiri lei nintau, cuma Bapa sandiri yang tau.

³³So itu ngoni musti hati-hati deng bajaga-jaga! Soalnya ngoni nintau tempo apa itu mo jadi.

³⁴Itu sama deng satu orang laki-laki mo se tinggal dia pe ruma lantaran mo pasiar ka tampa jao. Seblum dia brangkat, dia kase tanggong jawab pa de pe pembantu-pembantu for urus tu de pe ruma deng lei dia se tau tu dorang pe karja masing-masing. Dia lei suru penjaga supaya bajaga-jaga trus, kong dorang lei nintau tempo apa tu tuang ruma mo pulang.

³⁵Bagitu lei deng ngoni, ngoni musti bajaga-jaga trus lantaran ngoni nintau tempo apa tu tuang ruma mo pulang. Dia mo pulang sore stou, tenga malam, so amper siang ato pagi-pagi.

³⁶Jang sampe waktu dia datang kage-kage, kong ngoni da tasono.

³⁷Apa tu Kita da bilang pa ngoni, Kita bilang lei pa samua orang: bajaga-jaga jo!”