Read Malay, Manado Markus 16 Bible Online

Markus 16 - Malay, Manado bible

Markus 16

¹Pe Sabtu malam, tu hari Sabat so lewat. So itu Maria orang Magdala, Maria tu Yakobus pe mama deng Salome pi babli minya wangi for kase sirang pa Yesus pe mayat.

²Kong de pe hari Minggu tu hari pertama di minggu itu, waktu matahari baru kaluar, dorang pigi ka kubur.

³Di jalang dorang da baku tanya, “Eh, kira-kira sapa kang yang mo se guling tu batu yang basar yang da se tutu pintu kubur itu?”

⁴Mar waktu dorang so lebe dekat di kubur, dorang lia tu batu pe pai itu so taguling dari pa de pe tampa.

⁵Waktu dorang maso ka dalam kubur, dorang takage skali lantaran dorang lia di sabla kanan ada satu nyong da pake juba puti da dudu di situ.

⁶Kong tu nyong itu bilang pa dorang, “Ngoni jang tako! Kita tau ngoni da cari pa Yesus, tu orang Nazaret yang dong da se salib itu. Dia so hidop ulang. Dia so nyanda ada di sini. Co ngoni lia, ini tu tampa yang da taru akang Dia pe mayat.

⁷Jadi skarang, pigi jo se tau pa Dia pe murit-murit, deng pa Petrus bagini, ‘Yesus so hidop ulang kong Dia so pigi lebe dulu ka daera Galilea. Di sana ngoni mo lia pa Dia sama deng tu Dia so perna bilang pa ngoni.’ ”

⁸Pe klar itu, dorang iko kaluar dari kubur kong lari lantaran so bingo deng tako skali sampe totofore. Kong dorang nyanda bilang apa-apa pa orang-orang lantaran dorang pe tako.

⁹Hari Minggu pagi, waktu Yesus so hidop ulang, Yesus pigi batunjung De pe diri lebe dulu pa Maria orang Magdala. Dari tu Maria itu Yesus perna da kase kaluar tuju setang.

¹⁰Kong Maria pigi pa orang-orang yang ja iko pa Yesus. Dorang samantara berduka deng bamanangis. Di situ Maria se cirita apa tu dia da lia.

¹¹Mar waktu dorang dengar dari dia kalu Yesus so hidop ulang deng kalu Maria so lia pa Dia, dorang nyanda percaya.

¹²Abis itu, Yesus batunjung De pe diri pa De pe dua murit. Dorang dua ini da bajalang ka kampung. Pertama dorang nyanda dapa kanal pa Yesus lantaran Dia dapa lia laeng nyanda sama deng dulu. Mar serta so lama-lama, dorang dapa kanal pa Dia.

¹³Kong dorang dua babale pi kase tau pa dong pe tamang-tamang laeng kalu dorang da baku dapa deng Yesus, mar dorang pe tamang-tamang itu nyanda percaya.

¹⁴De pe laste, Yesus batunjung De pe diri pa Dia pe seblas murit. Waktu itu dorang samantara bamakang. Dia togor pa dorang lantaran dorang pe kras hati deng nyanda percaya pa tu orang-orang yang so lia pa Dia da hidop ulang.

¹⁵Kong Dia bilang pa dorang, “Pigi jo ngoni ka sluru dunia, kong kase tau tu Kabar Bae dari Tuhan Allah pa samua orang.

¹⁶Sapa yang percaya kong dapa baptis, dia mo slamat dari hukuman dosa. Mar sapa yang nyanda percaya, dia mo dapa hukuman.

¹⁷Orang yang percaya mo beking tanda-tanda rupa ini: mo user setang-setang pake Kita pe nama, mo babicara pake bahasa yang dorang blum tau,

¹⁸mo pegang ular babisa deng dong pe tangan, deng mo minum racun mar dorang nyanda mo apa-apa. Dorang mo taru dong pe tangan pa orang-orang saki kong tu orang saki mo jadi bae.”

¹⁹Pe klar Tuhan Yesus babicara pa De pe murit-murit, Dia taangka ka sorga kong dudu di tampa terhormat di sabla kanan pa Tuhan Allah.

²⁰Abis itu, Yesus pe murit-murit pigi kamana-mana kong kase tau tu Kabar Bae tentang Yesus pa orang-orang. Samantara itu, Tuhan bakarja sama-sama deng dorang deng Tuhan bantu pa dorang beking mujisat-mujisat, kong deng cara bagitu orang-orang bole tau kalu tu firman itu memang butul dari Tuhan.