Read Malay, Manado Markus 3 Bible Online

Markus 3 - Malay, Manado bible

Markus 3

¹Yesus pigi ulang ka ruma ibada agama Yahudi. Di situ ada tu satu orang, dia pe tangan sabla cacat.

²Kong di situ lei ada bebrapa orang yang da lia-lia trus pa Yesus. Dorang mo cari tau kalu Dia mo kase bae tu orang itu di hari Sabat, tu hari orang Yahudi nimbole bakarja, supaya dorang bole se sala pa Dia.

³Yesus bilang pa tu orang yang de pe tangan sabla cacat, “Mari jo badiri di tenga-tenga sini.”

⁴Kong Dia batanya pa tu orang-orang di situ, “Mana tu bole mo beking di hari Sabat? Beking tu bae ato tu jaha? Mo se slamat orang ato mo bunung orang?” Mar dorang cuma babadiam.

⁵Dia sedi skali lantaran dorang pe kras hati. Dia haga pa dorang samua deng mara, kong Dia bilang pa tu orang yang de pe tangan sabla cacat, “Co se kamuka kamari tu ngana pe tangan!” Tu orang itu se kamuka de pe tangan kong de pe tangan itu jadi bae.

⁶Abis itu tu orang-orang dari golongan Farisi kaluar dari tu ruma ibada, kong dorang iko baku skongkol deng orang-orang Yahudi yang iko pa raja Herodes for mo bunung pa Yesus.

⁷Yesus deng De pe murit-murit manyingkir ka danau Galilea, kong banya orang da iko pa Dia. Ada tu dari Galilea, Yudea,

⁸Yerusalem, Idumea, dari sabla Yordan, dari Tirus deng Sidon. Dorang da datang pa Yesus lantaran dorang so dengar samua tu Dia da beking.

⁹Pe banya skali orang da datang pa Dia, so itu Yesus suru pa De pe murit-murit sadia prao for Dia mo nae akang, supaya orang-orang nyanda gepe pa Dia.

¹⁰Soalnya Dia so kase bae banya orang, jadi banya orang saki baku ruju badekat pa Dia for mo bapegang pa Dia.

¹¹Tiap kali tu orang da kemasukan setang dapa lia pa Yesus, dorang iko maruku sampe ka tana di muka pa Dia kong bataria, “So Ngana ini tu Anak Allah!”

¹²Mar Yesus larang deng kras pa dorang kase tau sapa Dia.

¹³Abis itu Yesus nae ka atas bukit. Di situ Dia pangge tu orang-orang yang Dia da pili, kong dorang datang pa Dia.

¹⁴Yesus tetapkan dua blas orang, tu ja bilang rasul-rasul, for sama-sama deng Dia, yang Dia mo utus for kase tau tu Kabar Bae dari Tuhan Allah,

¹⁵deng Dia lei da kase kuasa pa dorang for user setang.

¹⁶Tu dua blas orang yang Dia da tetapkan itu, dorang pe nama-nama: Simon (tu Dia ja pangge lei Petrus),

¹⁷Yakobus deng Yohanes tu dua kaka ade (dorang dua itu Zebedeus pe anak-anak, dorang itu lei Dia kase nama Boanerges lantaran dorang sama deng guntur),

¹⁸Andreas, Filipus, Bartolomeus, Matius, Tomas, Yakobus (tu Alfeus pe anak), Tadeus, Simon (tu dari Gerakan Yahudi Merdeka),

¹⁹deng Yudas Iskariot (yang nanti mo bahianat pa Yesus).

²⁰Abis itu, Yesus maso ka satu ruma. Di situ lei banya orang datang bakumpul pa Dia, sampe Dia deng Dia pe murit-murit so nyanda riki mo makang.

²¹Waktu Yesus pe kluarga dengar Dia ada di situ, dorang datang mo ambe pa Dia lantaran dorang bilang Dia so nyanda waras.

²²Ahli-ahli Taurat tu da datang dari Yerusalem babilang, “Beelzebul da maso pa Dia! Dia da bauser setang-setang pake tu setang-setang pe bos pe kuasa.”

²³Yesus pangge pa dorang, kong bicara akang pa dorang pake prumpamaan, “Bagimana lei kong setang mo user setang?

²⁴Kalu rakyat di satu krajaan baku malawang kong tapisa-pisa, tu krajaan so pasti mo ancor,

²⁵deng lei kalu satu ruma tangga baku malawang kong tapisa-pisa, so pasti lei mo ancor.

²⁶Bagitu lei kalu setang deng setang baku malawang kong tapisa-pisa, so pasti mo ancor kong abis.

²⁷Kalu ada satu orang yang mo maso ambe barang pa orang kuat pe ruma, dia musti ika dulu tu orang itu, baru dia bole ambe tu barang-barang di ruma itu.[2]

²⁸Kita bilang pa ngoni, samua dosa yang orang da beking masi bole mo dapa ampung, bagitu lei deng bahojat.

²⁹Mar sapa jo yang bilang sesuatu yang bahojat pa Roh Kudus, dia nyanda mo dapa ampung for slama-lamanya, lantaran dia so beking dosa for slama-lamanya.”

³⁰Yesus bilang bagitu lantaran dorang bilang kalu Dia da kemasukan setang, dorang nimau percaya kalu Dia da bauser setang pake kuasa Roh Kudus.

³¹Yesus pe mama deng Dia pe sudara-sudara datang di ruma tu Dia da mangajar akang. Samantara dorang badiri di luar, dorang suru orang pi pangge pa Dia.

³²Di tampa itu, pe banya skali orang da dudu baron pa Yesus, kong dorang bilang pa Dia, “Bapak, co lia tu Bapak pe mama deng Bapak pe sudara-sudara ada di luar, kong dorang brusaha mo baku dapa deng Bapak.”

³³Yesus manyao pa dorang, “Sebenarnya sapa so tu Kita pe mama deng Kita pe sudara-sudara?”

³⁴Yesus haga pa dorang yang da dudu baron pa Dia, kong babilang, “So ngoni samua ini no tu Kita pe mama deng Kita pe sudara-sudara.

³⁵Sapa yang beking tu Tuhan Allah pe mau, so dia tu Kita pe sudara laki-laki, sudara parampuang, deng Kita pe mama.”