Read Malay, Manado Markus 4 Bible Online

Markus 4 - Malay, Manado bible

Markus 4

¹Satu kali Yesus mangajar lei di pinggir danau Galilea. Di situ banya skali orang datang bakumpul pa Dia. So itu, Dia nae ka prao tu da berlabu di pinggir danau trus dudu di situ, kong tu orang banya ada di pinggir danau.

²Yesus kase ajar banya hal pa dorang pake prumpamaan. Dia kase ajar bagini pa dorang,

³“Dengar bae-bae, ada tu petani pigi baambor bibit.

⁴Samantara dia baambor di kobong, ada tu bibit yang da taciri di jalang, kong burung-burung datang teto tu bibit sampe abis.

⁵Ada lei bibit tu da taciri di tana babatu-batu, tu de pe tana cuma sadiki. Tu bibit di tampa itu capat batumbu, lantaran de pe tana sadiki.

⁶Mar serta matahari so kaluar, tu tanaman itu layu kong kring lantaran de pe akar nyanda tatanang butul di tana.

⁷Kong tu bibit laeng da taciri di tana yang ada rumpu baduri. Serta tu bibit mulai batumbu, tu rumpu baduri lei batumbu jadi lebe basar kong gepe tu tanaman sampe so nimbole mo babua.

⁸Mar tu bibit laeng komang da taciri di tana subur kong batumbu subur trus babua. Tiap pohong de pe hasil ada tu tiga pulu kali lipa, ada tu anam pulu kali lipa, deng ada lei tu sratus kali lipa.”

⁹Yesus bilang lei, “Sapa tu ada talinga, badengar jo bae-bae.”

¹⁰Serta Yesus so kurang sandiri, tu dua blas murit deng orang-orang tu da iko pa Dia batanya pa Dia tentang arti dari tu prumpamaan tadi.

¹¹Kong Yesus manyao, “Tuhan Allah beking ngoni bole tau tu rahasia tentang bagimana Tuhan Allah Berkuasa sbagai Raja. Mar pa orang laeng, tu hal itu da se tau pake prumpamaan,

¹²supaya apa tu da tulis di Kitab Suci mo jadi, ‘Biar dorang balia, mar dorang nyanda mangarti apa tu da lia. Biar lei dorang badengar, mar dorang nyanda mangarti. So lantaran dorang bagitu, dorang nyanda bertobat kong dapa ampung.’ ”

¹³Abis itu, Yesus bilang pa dorang, “Ngoni nyanda mangarti so tu prumpamaan tadi? Kong bagimana dang ngoni mo dapa mangarti tu prumpamaan laeng?

¹⁴De pe arti bagini: tu bibit yang petani da se ambor sama deng tu firman yang orang ja kase tau.

¹⁵Tu bibit yang da taciri di jalang sama deng orang-orang yang da dengar tu firman. Pe klar dorang dengar, setang pe bos datang ambe tu firman dari pa dorang.

¹⁶Tu bibit yang da taciri di tana babatu-batu, itu sama deng orang-orang yang da dengar tu firman kong iko trima deng hati snang.

¹⁷Mar tu firman nyanda baakar butul pa dorang pe hati, so itu nyanda lama da batahang. Kalu dapa siksa deng mendrita lantaran percaya tu firman itu, dorang iko jadi nyanda percaya lei pa Tuhan.

¹⁸Tu bibit yang da taciri di tana yang ada rumpu baduri sama deng orang-orang yang so dengar tu firman,

¹⁹mar dorang talalu kuatir deng tu dorang pe hidop deng dorang tagila-gila deng harta deng lei tu keinginan-keinginan laeng. Samua itu beking tu firman nyanda ada de pe arti pa dong pe hidop, itu sama deng tu firman nyanda babua pa dong pe hati.

²⁰Kong tu bibit yang da ciri di tana subur, itu sama deng tu orang-orang yang badengar tu firman kong trima itu. Dorang hidop iko tu Tuhan pe mau, sama deng tu bibit yang da batumbu sampe babua. Ada yang babua tiga pulu kali lipa, ada tu anam pulu kali lipa, deng ada lei tu sratus kali lipa.”

²¹Yesus bilang pa dorang, “Nyanda ada orang tu da pasang pelita kong tutu deng loto ato taru di kolong koi. Pasti dia taru pa de pe tampa supaya trang.

²²Bagitu lei, apa yang skarang ini tasambunyi, nanti orang mo dapa tau, deng apa yang skarang ini masi jadi rahasia, nanti orang mo tau.

²³So itu sapa tu ada talinga, badengar jo bae-bae!”

²⁴Kong Yesus bilang ulang, “Inga bae-bae apa tu ngoni da dengar. Kalu ngoni cari mangarti bae-bae, Tuhan Allah mo beking ngoni mangarti, kong Dia tamba lei sampe ngoni mo lebe mangarti.

²⁵Soalnya kalu ada orang yang mo trima tu Tuhan pe firman, Tuhan mo beking dia lebe mangarti. Mar kalu ada yang nimau mo trima tu Tuhan pe firman, apa yang dia so tau, Tuhan mo ambe lei dari pa dia.”

²⁶Yesus bilang lei, “Tuhan Allah Berkuasa sbagai Raja pa Dia pe orang-orang, itu bole mo se sama deng ni prumpamaan: ada tu satu petani da baambor bibit gandum di kobong.

²⁷Tiap malam dia tidor serta so siang dia bangong, kong dia so nyanda inga lei deng tu bibit itu. Tu bibit itu batunas, batumbu trus sampe jadi tinggi, mar dia nintau bagimana kong tu gandum sampe jadi bagitu.

²⁸Soalnya tu tana itu sandiri yang da kase kaluar tu de pe hasil. Pertama tu tana kase batumbu de pe tunas, de pe batang kong de pe gandum yang baisi.

²⁹Kalu tu gandum itu so masa, tu petani itu iko pi potong lantaran so de pe oras bapete.”

³⁰Yesus babilang lei, “Kita mo pake satu prumpamaan for se trangkan tu Tuhan Allah Berkuasa sbagai Raja.

³¹Tuhan Allah Berkuasa sbagai Raja bole mo se sama deng tu biji paling kacili yang da kase ambor di tana. Tu biji itu yang paling kacili dari samua biji yang ada di dunia.

³²Mar kalu tu biji itu se ambor di tana, dia batumbu kong jadi lebe basar dari samua tanaman di kobong sayor. De pe cabang-cabang basar sampe burung-burung bole mo basombar kong basarang di situ.”

³³Kong ada banya prumpamaan yang sama deng itu, tu Yesus ja pake for kase tau tu firman pa dorang. Dia ja mangajar pa dorang iko apa tu dorang mampu mo mangarti.

³⁴Dia cuma ja pake prumpamaan kalu mangajar pa tu orang banya. Mar kalu kurang Dia deng De pe murit-murit, Dia se tau deng jelas samua tu prumpamaan pe arti.

³⁵Di hari itu, serta so sore, Yesus bilang pa Dia pe murit-murit, “Mari jo torang pigi ka sabla danau.”

³⁶Kong dorang kase tinggal tu orang banya itu trus nae ka prao tu Yesus da nae akang. Yesus deng Dia pe murit-murit pigi deng prao, kong tu prao-prao laeng baku iko deng dorang.

³⁷Nyanda lama datang angin kancang, kong ada omba lei bapaka tu prao sampe tamaso akang aer kong tu prao mulai punung deng aer.

³⁸Waktu itu Yesus da tasono pake bantal di bagian blakang prao, kong Dia pe murit-murit se bangong pa Dia, dorang bilang, “Guru, Guru jang kase biar torang so mo mati.”

³⁹Yesus badiri kong togor deng kras tu angin, deng bilang pa tu danau itu, “Badiam! Tenang jo!” Trus tu angin badiam, kong tu danau jadi tedo skali.

⁴⁰Abis itu, Yesus bilang pa Dia pe murit-murit, “Kiapa ngoni tako? Kiapa ngoni nyanda percaya pa Kita?”

⁴¹Dorang so tako skali kong baku bilang, “Sapa so Dia sebenarnya sampe tu angin deng omba di danau iko Dia pe prenta?”