Read Malay, Manado Markus 5 Bible Online

Markus 5 - Malay, Manado bible

Markus 5

¹Abis itu, Yesus deng De pe murit-murit sampe di sabla danau Galilea, pa orang Gerasa pe daera.

²Bagitu Yesus turung dari prao, ada tu satu orang yang da kemasukan setang datang pa Yesus dari kuburan.

³Dia tinggal di situ kong nyanda ada orang yang mampu mo ika pa dia, biar lei pake rante.

⁴Soalnya so banya kali dia pe tangan deng kaki dapa ika pake rante, mar tu rante dia cuma ja beking putus. Memang nyanda ada orang yang kuat yang bole mo tangka pa dia.

⁵Siang malam dia cuma di kubur deng di bukit-bukit, dia babataria deng bage de pe badan pake batu sampe luka.

⁶Kong waktu dari jao dia lia pa Yesus, dia lari pigi pa Yesus kong berlutut di muka pa Dia.

⁷Trus tu orang itu babilang deng suara kuat, “Hei Yesus, Tuhan Allah Yang Mahatinggi pe Anak! Apa so Ngana pe urusan deng kita? Demi Tuhan, jang siksa pa kita!”

⁸Tu orang da bicara bagitu, lantaran Yesus so lebe dulu bilang, “Hei setang! Kaluar ngana dari pa dia.”

⁹Kong Yesus batanya pa tu setang yang ada pa tu orang itu, “Sapa ngana pe nama?” Kong tu setang manyao, “Legion, lantaran torang kwa da banya.”

¹⁰Trus tu setang-setang itu minta deng sangat pa Yesus supaya jang user pa dorang kaluar dari daera itu.

¹¹Di dekat situ, ada banya boke da bamakang di lereng bukit.

¹²Kong tu setang-setang itu bamohon pa Yesus, “Suru jo pa torang maso pa tu boke-boke di sana.”

¹³Kong Yesus iko akang tu dorang da minta. Trus tu setang-setang kaluar dari pa tu orang, kong maso pa boke-boke tu de pe banya kira-kira ada dua ribu ekor. Kong tu boke-boke itu balumpa dari pinggir jurang ka danau kong mati malamise di situ.

¹⁴Tu orang-orang yang bajaga boke itu lari kong pi cirita apa tu da jadi itu di kota deng kampung-kampung dekat situ. Kong orang-orang iko datang di tampa itu for lia apa tu da jadi di situ.

¹⁵Waktu dorang datang pa Yesus, dong lia tu orang da kemasukan setang-setang da dudu, dia so pake baju kong dia so bae. Pe lia itu dorang jadi tako.

¹⁶Tu orang-orang yang da lia sandiri waktu Yesus da user tu setang-setang, dorang se cirita apa tu da jadi pa tu orang-orang yang baru datang di situ. Dorang lei se cirita tentang apa tu da jadi pa tu boke-boke.

¹⁷Trus tu orang-orang yang tinggal di daera itu mulai minta deng sangat pa Yesus supaya Dia se tinggal tu dorang pe daera itu.

¹⁸Waktu Yesus samantara banae ulang ka prao, tu orang yang tadi da kemasukan setang bamohon pa Yesus supaya dia bole iko deng Yesus.

¹⁹Mar Yesus nyanda kase, Dia bilang pa tu orang itu, “Lebe bae, ngana pulang jo pa ngana pe ruma, kong se cirita pa orang-orang satu kampung deng ngana samua tu Tuhan da beking pa ngana, deng bilang bagimana Tuhan pe rasa kasiang pa ngana.”

²⁰Tu orang itu pigi kong mulai kase tau pa orang-orang di daera Spulu Kota. Dia kase tau samua tu Yesus da beking pa dia, kong dorang samua taheran-heran.

²¹Abis itu Yesus deng De pe murit-murit babale ulang deng prao ka sabla danau Galilea. Di pinggir danau, ada banya skali orang datang bakumpul pa Dia.

²²Kong datang satu orang kapala ruma ibada agama Yahudi, tu de pe nama Yairus. Waktu dia lia pa Yesus, dia iko berlutut di muka pa Yesus,

²³trus dia minta deng sangat pa Yesus deng sunggu-sunggu, dia bilang, “Guru, kita pe anak parampuang kasiang da saki brat, amper-amper mo mati. Tolong Guru datang kwa pa kita pe ruma, kong taru Guru pe tangan pa dia supaya dia bole bae deng tetap hidop.”

²⁴Pe dengar itu, Yesus iko pigi deng Yairus. Waktu dorang bajalang, pe banya skali orang tu da iko pa Yesus deng da baku-baku ruju di dekat pa Dia.

²⁵Di situ lei ada tu satu parampuang yang so dua blas taong da mendrita saki pendarahan.

²⁶Dia so pi brobat pa dokter-dokter sampe de pe doi so abis, mar dia nyanda bae-bae. Jadi biar dia so pigi pa dokter-dokter nyanda ada de pe guna, malatare de pe saki so lebe soe.

²⁷Tu parampuang itu so banya dengar tentang Yesus. Jadi biar lei banya orang, dia pi basosuru di tenga-tenga pa dorang trus badekat pa Yesus dari blakang kong dia sontong tu Yesus pe juba.

²⁸Dia beking bagitu lantaran dalam hati dia babilang, “Asal jo kita sontong tu Dia pe juba, kita mo bae!”

²⁹Waktu itu jo dia pe pendarahan iko brenti kong dia dapa rasa kalu dia so bae.

³⁰Waktu itu jo Yesus tau kalu ada kuasa yang da kaluar dari pa Dia, kong Dia balia ka blakang pa orang banya itu kong batanya, “Sapa kang tu da sontong Kita pe juba?”

³¹Yesus pe murit-murit manyao, “Guru, Guru da lia sandiri pe banya skali orang da baku-baku ruju di dekat pa Guru, masa Guru batanya, ‘Sapa kang tu da sontong pa Kita?’ ”

³²Mar biar lei bagitu, Yesus lia tu orang-orang di sekliling pa Dia, lantaran mo cari tau sapa tu da sontong pa Dia tadi.

³³Tu parampuang itu jadi tako skali sampe totofore, lantaran dia tau kalu dia tu da sontong Yesus pe juba kong jadi bae. So itu dia berlutut di muka pa Yesus, kong dia se cirita samua tu da jadi pa dia sampe dia jadi bae.

³⁴Kong Yesus bilang pa tu parampuang itu, “Ibu, skarang ibu so bae lantaran percaya pa Kita. Pigi jo deng hati tenang, ibu butul-butul so bae dari ibu pe panyaki.”

³⁵Waktu Yesus samantara babicara, datang bebrapa orang dari Yairus kapala ruma ibada itu pe ruma, kong babilang pa Yairus, “Bapak pe anak so mati, jadi for apa lei batrosol pa Guru?”

³⁶Mar Yesus nyanda farduli tu dorang da bilang. Dia bilang pa Yairus, “Jang tako, mar percaya jo.”

³⁷Kong Yesus pigi pa Yairus pe ruma, mar Dia nyanda kase isin for orang mo iko pa Dia, Dia cuma da bawa pa Petrus, deng tu dua kaka ade Yakobus deng Yohanes.

³⁸Bagitu dorang sampe pa Yairus pe ruma, Yesus lia tu orang-orang pe ribut deng manangis kras-kras.

³⁹Dia maso ka dalam kong batanya pa tu orang-orang itu, “Kiapa ngoni pe ribut deng manangis? Tu anak itu nyanda mati, dia cuma da tidor!”

⁴⁰Mar dorang tare cuma da tatawa akang pa Yesus. Kong Yesus suru tu orang-orang kaluar dari situ. Abis itu Dia bawa tu anak pe mama, papa deng tu Dia pe murit-murit yang da sama-sama deng Dia maso pa tu anak pe kamar.

⁴¹Yesus pegang tu anak pe tangan kong Dia babilang, “Talita kum”[3] de pe arti ‘Hei anak, bangong jo!’

⁴²Waktu itu jo tu anak itu badiri kong bajalang lantaran dia pe umur so dua blas taong. Samua orang yang da lia tu kejadian itu taheran-heran.

⁴³Kong Yesus larang pa dorang supaya jang kase tau apa tu da jadi di situ, kong Dia suru pa dorang kase akang makang pa tu anak itu.