Read Malay, Manado Markus 6 Bible Online

Markus 6 - Malay, Manado bible

Markus 6

¹Abis itu Yesus deng Dia pe murit-murit se tinggal tu tampa itu kong pigi pa Yesus pe kampung.

²Pas hari Sabat Yesus mulai mangajar di ruma ibada agama Yahudi. Waktu itu banya orang badengar pa Dia kong dorang sampe taheran-heran, kong dorang deng dorang baku tanya, “Dia tau dari mana stou kang tu ajaran ini? Kiapa Dia jadi pande bagitu kang? Kong bagimana sampe Dia bole beking tu mujisat-mujisat rupa itu?

³Padahal Dia itu cuma tukang kayu. Dia pe mama tu Maria, kong tu Dia pe sudara-sudara laki-laki tu Yakobus, Yoses, Yudas deng Simon. Tu Dia pe sudara-sudara parampuang lei da tinggal sama-sama deng torang di sini.” Kong tu orang-orang nyanda trima pa Dia.

⁴Kong Yesus bilang pa dorang, “Di mana-mana orang ja hormat pa nabi, kacuali pa tu nabi pe kampung sandiri, pa de pe kluarga, deng pa de pe ruma.”

⁵So itu Yesus nyanda dapa beking banya mujisat di sana, Dia cuma kase bae bebrapa orang saki deng cara taru Dia pe tangan pa dorang.

⁶Dia heran lantaran dorang nyanda percaya. Abis itu Yesus pigi mangajar di kampung-kampung.

⁷Dia pangge pa Dia pe dua blas murit kong utus pa dorang pigi dua-dua orang. Dia kase kuasa pa dorang for user setang-setang.

⁸Dia prenta pa dorang supaya jang bawa apa-apa di perjalanan. Dorang jang bawa makanan, tas bekal ato doi pa dong pe tampa kacuali tongkat.

⁹Bole pake slop, mar jang bawa baju for baganti.

¹⁰Kong Yesus bilang pa dorang, “Kalu di satu tampa ada orang trima pa ngoni pa dong pe ruma, tinggal jo di situ sampe ngoni kase tinggal tu tampa itu.

¹¹Mar kalu orang-orang di satu tampa nimau mo trima deng nimau mo dengar pa ngoni, kalu ngoni kaluar dari situ, ngoni paka jo tu abu dari pa ngoni pe kaki itu jadi tanda kalu Tuhan mo hukum pa dorang.”

¹²Abis itu dorang pi kase tau pa orang-orang kalu dorang musti bertobat kong iko pa Tuhan.

¹³Dorang lei user banya setang dari pa orang-orang deng goso pake minya banya orang saki for kase bae pa dorang.

¹⁴Raja Herodes lei dapa dengar tentang Yesus lantaran Yesus pe nama so top, kong ada orang bilang tentang Yesus, “Tu Orang ini Yohanes Pembaptis yang so mati mar skarang so hidop ulang, so itu Dia ada kuasa for beking tu mujisat-mujisat.”

¹⁵Tu laeng bilang, “Dia tu nabi Elia!” Kong ada lei tu laeng da bilang, “Dia tu nabi laeng, sama deng tu nabi-nabi tempo dulu.”

¹⁶Waktu Herodes dapa dengar tu orang-orang da cirita, dia bilang, “Dia itu tu Yohanes Pembaptis yang kita so potong de pe kapala, Dia so hidop ulang.”

¹⁷Herodes bilang bagitu, lantaran tempo hari dia yang da suru tangka pa Yohanes kong suru ika deng rante trus kase maso ka bui. Dia da suru beking bagitu pa Yohanes lantaran tu masala Herodias. Dia da ambe pa Herodias jadi de pe bini, padahal waktu itu Herodias so kaweng deng Filipus tu dia pe sudara sandiri.

¹⁸Trus Yohanes tu da togor ulang-ulang pa Herodes, dia bilang, “Bapak, bapak so langgar tu atoran agama, lantaran bapak so ambe bapak pe sudara pe bini kong beking jadi bapak pe bini.”

¹⁹So itu Herodias dendam pa Yohanes deng barencana mo bunung pa Yohanes, mar dia blum dapa beking itu.

²⁰Soalnya Herodes da suru jaga bae-bae tu Yohanes di bui, lantaran dia segan pa Yohanes. Dia tau Yohanes itu ja beking tu butul di muka pa Tuhan deng Yohanes itu Tuhan pe orang. Memang tiap kali dia dengar Yohanes ja babicara, dia pe hati rasa nyanda sadap, mar dia lei rasa snang badengar pa Yohanes.

²¹Satu kali, Herodias dapa kesempatan yang pas for balas dendam pa Yohanes. Waktu itu Herodes pe hari jadi, kong Herodes da beking pesta basar. Dia undang samua tu orang-orang basar, kapala-kapala perwira Romawi deng orang-orang yang punya pengaru di Galilea.

²²Samantara pesta, Herodias pe anak parampuang maso kong manari. Dia pe manari gaga skali, sampe beking Herodes deng de pe tamu-tamu snang skali. Pe klar manari, Herodes pangge pa dia kong bilang, “Bilang kamari apa jo tu ngana mo minta, nanti kita kase!”

²³Trus Herodes basumpa pa dia, “Apa jo tu ngana mo minta kita kase, biar lei ngana mo minta kita pe stenga krajaan, itu kita mo kase!”

²⁴Pe dengar itu, tu anak parampuang itu pi batanya pa de pe mama, “Ma, apa kang tu kita mo minta?” Dia pe mama manyao, “Kita minta tu Yohanes Pembaptis pe kapala!”

²⁵Trus capat-capat dia babale pa Herodes kong baminta bagini, “Kita minta supaya skarang ini jo kase pa kita tu Yohanes Pembaptis pe kapala yang da taru di baki!”

²⁶Pe dengar itu, Herodes jadi sedi skali. Mar lantaran dia so basumpa di muka pa de pe tamu-tamu, dia nimbole mo tolak tu anak parampuang da minta.

²⁷So itu dia iko prenta de pe anak bua for pi potong tu Yohanes pe kapala. Tu orang pigi kong potong Yohanes pe kapala di dalam bui.

²⁸Tu orang itu bawa Yohanes pe kapala di baki kong kase pa tu anak parampuang. Trus tu anak parampuang kase itu lei pa de pe mama.

²⁹Kong waktu Yohanes pe murit-murit dapa dengar Herodes so potong Yohanes pe kapala, dorang datang ambe tu de pe mayat kong pi kubur.

³⁰Yesus pe murit-murit yang Dia da utus babale pa Dia, kong dorang kase tau pa Dia samua tu dorang da beking deng tu dorang da kase ajar.

³¹Waktu itu, pe banya orang yang datang deng pigi, sampe Yesus deng De pe murit-murit so nyanda sempat mo makang. So itu Yesus bilang pa de pe murit-murit, “Mari jo, torang pigi ka tampa yang jao dari kampung supaya torang kurang sandiri kong torang baistirahat sadiki!”

³²Jadi dorang nae prao kong brangkat ka tampa yang jao dari kampung, supaya dorang bole basandiri di situ.

³³Mar waktu dorang brangkat, banya orang tu da lia trus dapa tau dorang mo kamana. Jadi orang-orang kaluar dari kampung-kampung sekitar situ, trus dorang capat-capat iko jalang darat kong sampe lebe dulu di tampa tu Yesus deng Dia pe murit-murit mo pigi akang.

³⁴Waktu Yesus pe sampe di darat, Dia lia pe banya skali orang da bakumpul di situ. Dia rasa kasiang pa dorang lantaran nyanda ada orang yang tolong kase tunjung jalang yang butul pa dorang sama deng domba yang nyanda ada gembala, kong Yesus mulai kase ajar banya hal pa dorang.

³⁵Serta so mo malam, Yesus pe murit-murit datang pa Dia kong babilang, “Guru, ni tampa so jao dari kampung, kong sadiki lei so mo malam.

³⁶Suru jo pa dorang pigi dari sini, supaya dorang bole mo babli makanan di kampung-kampung dekat sini.”

³⁷Mar Yesus manyao, “Ngoni yang kase makang pa dorang!” Dorang manyao pa Dia, “Apa torang mo pi babli makanan yang de pe harga 200 doi perak for dorang mo makang? Tu doi itu pe banya skali kasiang.”

³⁸Kong Yesus bilang pa dorang, “Co ngoni priksa. Ada brapa banya tu ngoni pe roti?” Abis dorang priksa kong dorang bilang, “Lima roti deng dua ikang.”

³⁹Abis itu, Yesus suru supaya tu orang-orang dudu baklompo-klompo di atas rumpu.

⁴⁰Kong tu orang-orang itu dudu baklompo-klompo, ada tu sratus deng ada tu lima pulu orang.

⁴¹Abis itu Yesus ambe tu lima roti deng dua ikang, Dia mangada ka langit kong bilang makase pa Tuhan Allah. Trus Dia pela-pela tu roti kong kase pa De pe murit-murit, supaya dorang kase berbage pa orang-orang itu. Bagitu lei deng tu dua ikang, Dia kase berbage pa dorang samua.

⁴²Kong dorang samua makang sampe kanyang.

⁴³Abis itu, Yesus pe murit-murit kumpul tu roti deng tu ikang yang da talebe, samua ada dua blas loto fol.

⁴⁴Waktu itu yang da iko makang ada kira-kira lima ribu orang laki-laki.

⁴⁵Abis itu, Yesus iko suru Dia pe murit-murit nae ka prao kong pigi lebe dulu ka sabla danau, di kampung Betsaida. Trus Dia suru tu orang banya pulang.

⁴⁶Abis Yesus baku pisa deng tu orang banya, Dia pigi ka satu bukit for basombayang.

⁴⁷Serta so malam, tu prao yang Dia pe murit-murit da nae akang so di tenga danau, samantara itu Yesus kurang tinggal sandiri di darat.

⁴⁸Kong Yesus lia De pe murit-murit so nyanda kuat bapanggayung lantaran da malawang angin. Waktu so amper siang, Yesus datang pa dorang deng cara bajalang di atas aer. Dia rencana mo balewat pa dorang.

⁴⁹Mar waktu dorang lia Dia bajalang di atas aer, dorang kira Dia setang, kong dorang babataria

⁵⁰lantaran dorang samua tako skali da lia pa Dia. Mar Dia iko bilang pa dorang, “Tenang jo, nyanda usa tako! Ini Kita.”

⁵¹Abis itu Yesus nae ka prao sama-sama deng dorang, kong tu angin jadi tedo. Dorang samua taheran-heran skali.

⁵²Soalnya biar lei dorang so lia Yesus kase makang banya orang pake roti deng ikang, dorang masi blum mangarti tu Yesus pe kuasa lantaran dorang masi kras hati.

⁵³Yesus deng De pe murit-murit sampe di sabla danau di daera Genesaret, kong dorang berlabu di situ.

⁵⁴Waktu dorang turung dari prao, orang-orang di situ iko dapa kanal pa Yesus.

⁵⁵Kong tu orang-orang itu lari ka samua tampa di daera itu trus dorang bawa orang-orang saki pake tandu, di mana jo dorang dapa dengar Yesus ada.

⁵⁶Ka mana jo Yesus pigi, dari kampung-kampung sampe ka kota-kota dorang taru tu orang-orang saki di pasar kong bamohon pa Yesus, supaya tu orang-orang saki itu mo pegang pa Dia biar lei cuma tu De pe ujung juba. Kong samua orang saki yang da bapegang pa Dia jadi bae.