Read Malay, Manado Markus 8 Bible Online

Markus 8 - Malay, Manado bible

Markus 8

¹Waktu itu, ada banya orang lei da bakumpul pa Yesus. Dorang nyanda ada makanan, so itu Yesus pangge De pe murit-murit kong babilang,

²“Kita rasa kasiang pa tu orang banya ini. Soalnya dorang so tiga hari da iko pa Kita kong dorang so nyanda ada makanan.

³Kalu Kita suru pulang pa dorang deng puru kosong, kage dorang flao di jalang lantaran ada yang datang dari jao.”

⁴Kong Yesus pe murit-murit manyao, “Guru, ini tampa so jao dari kampung, so nyanda mungkin torang mo kase makang pa dorang.”

⁵Kong Yesus batanya pa dorang, “Ada brapa ngoni pe roti?” Dorang manyao, “Ada tuju roti.”

⁶Kong Yesus suru tu orang banya itu dudu di tana. Abis itu Dia ambe tu tuju roti kong Dia bilang makase pa Tuhan. Klar itu, Yesus pela-pela tu roti kong kase pa Dia pe murit-murit, trus dorang kase berbage pa tu orang banya.

⁷Dorang lei ada bebrapa ikang kacili. Yesus ambe tu ikang itu kong Dia bilang makase pa Tuhan, abis itu Dia suru pa De pe murit-murit kase berbage tu ikang pa orang banya.

⁸Kong dorang samua makang sampe kanyang. Klar itu, Yesus pe murit-murit kumpul tu makanan yang da talebe, de pe banya tuju kranjang fol.

⁹Tu orang-orang yang da makang waktu itu, de pe banya kira-kira ampa ribu orang. Abis itu Yesus suru pulang pa dorang samua.

¹⁰Kong Yesus deng De pe murit-murit iko nae ka prao kong pigi ka satu daera tu de pe nama Dalmanuta.

¹¹Orang-orang dari golongan Farisi datang pa Yesus kong mulai baku ambe deng Dia. Dorang mo coba jebak pa Dia, jadi dorang minta pa Dia supaya beking mujisat for se bukti kalu Dia memang dari Tuhan Allah.

¹²Pe dengar itu, Yesus bahela nafas panjang kong bilang, “Kiapa ni orang-orang skarang baminta mujisat? Kita bilang pa ngoni, Kita sama skali nyanda mo kase mujisat for orang-orang skarang ini.”

¹³Klar itu, Yesus kase tinggal pa dorang. Dia nae ulang ka prao sama-sama deng Dia pe murit-murit kong pigi ka sabla danau.

¹⁴Yesus pe murit-murit lupa bawa roti, kacuali tu satu roti yang ada pa dorang di prao.

¹⁵Kong Yesus kase inga pa dorang, “Ngoni musti bajaga-jaga deng hati-hati deng tu ragi dari orang-orang golongan Farisi deng raja Herodes.”

¹⁶Pe dengar itu, Dia pe murit-murit baku bilang, “Guru da bilang bagitu, lantaran torang nyanda ada roti.”

¹⁷Mar Yesus tau apa tu dorang da cirita, so itu Dia bilang pa dorang, “Kiapa ngoni bacirita soal nyanda bawa roti? Apa ngoni blum mangarti tu Kita pe maksut? Ngoni memang kras hati.

¹⁸Soalnya, ngoni so lia deng ngoni pe mata sandiri mar ngoni nyanda mangarti. Ngoni so dengar deng ngoni pe talinga sandiri mar ngoni lei nyanda mangarti. Ngoni pasti masi inga

¹⁹waktu Kita da pela-pela tu lima roti yang kase makang for lima ribu orang. Ada brapa kranjang tu roti yang da talebe tu ngoni da kumpul?” Kong dorang manyao, “Dua blas kranjang.”

²⁰Yesus batanya ulang, “Waktu kita da kase makang ampa ribu orang cuma deng tuju roti, ada brapa kranjang roti yang da talebe tu ngoni da kumpul?” Dorang manyao, “Tuju kranjang.”

²¹Kong Dia bilang pa dorang, “No skarang, blum mangarti lei ngoni?”

²²Abis itu Yesus deng De pe murit-murit sampe di Betsaida. Di situ orang-orang bawa satu orang buta pa Yesus kong dorang bamohon pa Dia supaya Dia taru De pe tangan pa tu orang buta itu.

²³Kong Yesus pegang tu orang buta itu pe tangan, trus bawa tu orang itu kaluar dari kampung. Abis itu, Yesus luda akang tu orang itu pe mata kong taru Dia pe tangan pa tu orang itu pe mata, trus Yesus batanya pa dia, “Bagimana, ngana so bole balia?”

²⁴Tu orang itu balia ka muka, kong dia bilang, “Kita da lia orang-orang, mar tu orang-orang itu sama deng pohong-pohong yang da babajalang.”

²⁵Yesus taru ulang Dia pe tangan pa tu orang itu pe mata, kong tu orang itu butul-butul so bole balia, dia so jadi bae. Dia so bole lia samua deng jelas.

²⁶Abis itu Yesus bilang pa tu orang itu, “Pulang jo, ngana jang babale ka Betsaida.”

²⁷Abis itu, Yesus deng Dia pe murit-murit pigi ka kampung-kampung di dekat Kaisarea Filipi. Di tenga jalang, Dia batanya pa Dia pe murit-murit, “Kalu menurut orang-orang, sapa dang Kita ini?”

²⁸Kong dorang manyao, “Ada tu ja bilang kalu Guru tu Yohanes Pembaptis, tu laeng ja bilang kalu Guru tu nabi Elia, kong ada lei ja bilang kalu Guru tu satu dari tu nabi-nabi laeng.”

²⁹Trus Yesus batanya pa dorang, “Mar kalu menurut ngoni, sapa dang Kita?” Petrus manyao, “Guru itu Kristus tu Raja yang se slamat pa manusia!”

³⁰Kong Yesus larang deng kras pa Dia pe murit-murit supaya jang kase tau pa sapa-sapa tentang Dia.

³¹Waktu itu Yesus mulai mangajar pa Dia pe murit-murit kalu tu Anak Manusia musti mo mangada banya siksa, deng lei tu tua-tua, imam-imam kapala deng ahli-ahli Taurat mo tolak pa Dia. Kong Dia mo dapa bunung, mar di hari katiga Dia mo hidop ulang.

³²Samua ini Yesus bilang deng trang-trangan. Mar Petrus hela pa Dia ka sei kong togor, “Guru, jang bilang bagitu.”

³³Yesus trus haga pa Dia pe murit-murit kong bale togor pa Petrus deng kras, “Ka sana jo ngana! Ngana pe bicara itu kurang sama deng setang pe bos. Ngana cuma pikir apa tu manusia ja pikir, bukang apa tu Tuhan Allah ja pikir.”

³⁴Yesus pangge tu orang banya deng Dia pe murit-murit kong bilang pa dorang, “Sapa tu mo iko pa Kita, dia so nimbole iko tu de pe mau, dia musti pikul de pe salib tu de pe arti dia siap mendrita sampe mati, kong iko pa Kita.

³⁵Sapa yang mo hidop cuma for de pe diri sandiri, so dia tu nyanda mo dapa hidop kekal. Mar komang, sapa yang mo kase de pe hidop lantaran iko pa Kita deng lantaran tu Kabar Bae, so dia tu mo dapa hidop kekal.

³⁶Apa so de pe untung kalu satu orang dapa samua tu harta dunia, mar dia nyanda dapa tu hidop kekal?

³⁷Soalnya ada so yang dia bole mo kase for se tukar supaya dia bole dapa tu hidop kekal? Nyanda ada to?

³⁸Sapa yang malo mo mangaku kalu dia ja iko pa Kita deng tu Kita pe ajaran di muka orang-orang skarang yang jaha deng nyanda suka iko pa Tuhan Allah, tu Anak Manusia lei mo malo mangaku kalu tu orang itu ja iko pa Dia deng tu Dia pe ajaran waktu Dia mo datang ulang. Waktu Dia mo datang itu, Dia mo datang deng Dia pe Bapa pe kuasa yang luar biasa deng lei mo datang sama-sama deng tu malaekat-malaekat yang kudus.”