Read Malay, Manado Lukas 1 Bible Online

Lukas 1 - Malay, Manado bible

Lukas 1

¹Bapak Teofilus yang kita hormat. Banya orang so brusaha tulis tu brita tentang Yesus waktu Dia ada di tenga-tenga pa torang.

²Dorang da tulis tu samua itu sama deng tu dorang da dengar langsung dari pa orang-orang yang da lia tu samua itu deng dong pe mata kapala sandiri. Tu orang-orang itu no yang dari pertama da lia waktu samua itu da jadi, dorang itu yang da pi kase tau tu brita itu pa orang-orang.

³Bapak Teofilus yang bae, kita so priksa bae-bae tu samua itu mulai dari pertama. Abis itu kita ambe keputusan for tulis pa bapak samua tu da jadi waktu itu iko de pe urutan.

⁴Deng bagitu, bapak bole tau persis kalu apa tu orang da se tau pa bapak memang butul.

⁵Waktu Herodes jadi raja di negri Yudea, di situ ada tu satu orang de pe nama Zakharia. Dia itu imam dari klompo imam Abia. Dia pe bini pe nama Elisabet. Dorang dua itu dari keturunan imam Harun.

⁶Dorang dua ja beking tu butul di muka pa Tuhan, deng dorang ja beking samua tu Tuhan Allah pe prenta deng tu atoran-atoran.

⁷Dorang dua nyanda ada anak lantaran tu Elisabet nimbole mo dapa anak, kong dorang dua lei so tua.

⁸Satu kali, Zakharia beking dia pe tugas di muka pa Tuhan Allah di Ruma Ibada Pusat. Dia beking de pe tugas itu lantaran waktu itu klompo imam Abia dapa giliran bertugas di situ.

⁹Waktu itu tu klompo imam Abia da cabu lot sama deng tu biasa imam-imam ja beking, kong Zakharia yang da tapili for maso ka dalam Ruma Ibada Pusat for bakar kemenyan.

¹⁰Serta so de pe waktu for bakar kemenyan, dia maso ka dalam Ruang Mahasuci. Samantara itu orang banya yang ada di luar Ruang Mahasuci basombayang.

¹¹Kage-kage Tuhan pe malaekat batunjung pa Zakharia. Malaekat itu da badiri di sabla kanan meja, tu tampa ja bakar akang kemenyan.

¹²Pe lia tu malaekat itu, Zakharia takage kong jadi tako skali.

¹³Mar tu malaekat bilang pa dia, “Zakharia, ngana jang tako! Tuhan Allah so dengar ngana pe sombayang. Elisabet tu ngana pe bini nanti mo se lahir satu anak laki-laki, kong ngana musti kase nama Yohanes pa tu anak itu.

¹⁴Tu anak nanti mo beking ngana pe hati jadi snang skali, kong banya orang lei mo iko snang lantaran dia da lahir.

¹⁵Dia mo jadi orang basar di mata pa Tuhan. Dia nimbole minum anggor ato minum tu minuman laeng yang beking mabo. Kong dari lei dia masi pa de pe mama pe puru, Roh Kudus so kuasai pa dia.

¹⁶Nanti dia mo bimbing banya orang Israel babale iko pa Tuhan Allah, tu Tuhan yang dorang ja semba.

¹⁷Tu sifat deng kuasa yang dulu ada pa nabi Elia mo ada pa dia. Kong dia mo datang lebe dulu seblum Tuhan for se siap tu orang-orang for Tuhan mo datang. Dia mo beking tu papa-papa mo jadi sayang pa dorang pe anak-anak. Dia lei mo beking tu orang yang pangmalawang pa Tuhan mo babale ja beking tu butul di muka pa Tuhan Allah.”

¹⁸Kong Zakharia bale batanya pa tu malaekat itu, “Bagimana dang kita bole tau kalu kita deng kita pe bini mo dapa anak? Soalnya torang so tua.”

¹⁹Kong tu malaekat manyao pa dia, “Kita ini Gabriel, kita yang slalu ada di muka pa Tuhan Allah for beking tu Dia da suru. Dia da suru pa kita for bilang tu kabar bagus ini pa ngana.

²⁰Mar ngana nyanda percaya deng tu kita da bilang. So itu ngana mo jadi wowo sampe samua tu kita da bilang itu jadi.”

²¹Samantara itu, tu orang banya yang ada di luar da batunggu trus pa Zakharia. Dorang heran lantaran dia pe lama skali di dalam Ruang Mahasuci.

²²Waktu Zakharia kaluar, dia so nimbole bicara apa-apa pa dorang. Mar dia basein trus pa dorang lantaran dia tetap wowo. Pe lia bagitu, dorang iko dapa tau kalu dia da dapa penglihatan di dalam Ruang Mahasuci.

²³Kong serta Zakharia pe tugas so klar, dia pulang pa de pe ruma.

²⁴Serta so bebrapa lama, dia pe bini Elisabet hamil. Kong slama lima bulan Elisabet cuma da bakurung di ruma.

²⁵Elisabet bilang, “Tuhan so se tunjung Dia pe sayang pa kita lantaran kita so hamil, kong orang laeng so nyanda mo basosere lei pa kita.”

²⁶Waktu Elisabet so hamil anam bulan, Tuhan Allah suru lei tu malaekat Gabriel pigi ka Nazaret, tu satu kota di daera Galilea.

²⁷Gabriel dapa suru pigi pa satu nona yang masi prawan. Tu nona itu pe nama Maria. Dia so baku janji mo kaweng deng satu nyong, tu de pe nama Yusuf. Yusuf itu raja Daud pe keturunan.

²⁸Malaekat itu datang pa Maria kong bilang pa dia, “Salam hei Maria. Tuhan Allah sama-sama deng ngana, Dia mo kase tunjung Dia pe bae pa ngana.”

²⁹Maria takage skali da dengar tu malaekat da bilang, kong dia pikir-pikir dalam hati apa tu malaekat itu pe maksut.

³⁰Trus tu malaekat itu babilang lei pa dia, “Maria, ngana jang tako. Soalnya Tuhan Allah da se tunjung Dia pe bae pa ngana.

³¹So nyanda lama lei ngana mo hamil kong mo kase lahir satu anak laki-laki. Ngana se nama tu anak itu, ‘Yesus’.[1]

³²Dia itu mo jadi orang basar, deng orang-orang mo bilang kalu Dia itu Anak Allah Yang Mahatinggi. Tuhan Allah mo beking Dia berkuasa sama deng Dia pe nene moyang tu raja Daud yang da berkuasa dulu.

³³Dia mo jadi raja yang berkuasa for slama-lamanya pa bangsa Israel, tu Yakub pe keturunan. Kong Dia pe krajaan mo ada trus sampe slama-lamanya.”

³⁴Mar Maria bilang pa tu malaekat itu, “Bagimana lei itu bole mo jadi? Soalnya kita blum perna tidor deng laki-laki.”

³⁵Tu malaekat itu manyao pa dia, “Roh Kudus mo turung pa ngana, kong Tuhan Allah Yang Mahatinggi mo kuasai pa ngana. So itu tu Anak yang ngana mo se lahir itu, orang mo bilang kudus, tu Anak Allah.

³⁶Tarukira jo, tu ngana pe sudara Elisabet, dia itu orang bilang so nimbole mo dapa anak, deng lei dia so tua. Mar skarang ini dia so hamil anam bulan.

³⁷Samua jadi bagitu, lantaran for Tuhan Allah samua Dia mampu mo beking.”

³⁸Kong Maria bilang pa tu malaekat, “Kita ini cuma orang yang ja beking tu Tuhan da suru. Biar jo jadi pa kita samua tu da bilang tadi.” Abis itu, tu malaekat se tinggal pa Maria.

³⁹Nyanda brapa lama, Maria capat-capat pigi ka satu kota di daera pegunungan di tana Yehuda.

⁴⁰Dia pigi pa Zakharia pe ruma. Pe sampe di sana, dia maso ka ruma kong kase salam pa Elisabet.

⁴¹Waktu Elisabet dengar tu Maria pe salam, tu anak yang ada pa Elisabet pe puru iko bagra, kong Roh Kudus kuasai pa Elisabet.

⁴²Trus Elisabet bilang deng suara kuat, “Maria, Tuhan Allah so kase berkat pa ngana lebe dari samua parampuang! Tuhan kase lei berkat pa tu Anak yang ngana mo kase lahir.

⁴³Kita rasa taangka skali lantaran kita bukang sapa-sapa mar Tuhan pe mama datang pa kita.

⁴⁴Co ngana tarukira, waktu kita dengar tu ngana pe salam tadi, kita pe anak dalam puru iko bagra lantaran snang.

⁴⁵Ngana percaya tu Tuhan Allah da bilang pa ngana mo jadi, so itu ngana yang paling snang.”

⁴⁶Abis itu, Maria bilang, “Kita pe jiwa puji deng hormat pa Tuhan Allah.

⁴⁷Kita pe hati lei snang lantaran Tuhan Allah tu kita pe Juruslamat.

⁴⁸Soalnya Dia so tarukira akang pa kita, tu orang yang nyanda ada arti apa-apa, yang cuma ja beking tu Dia da suru. Kong mulai dari skarang samua orang mo bilang kalu kita ini parampuang yang paling snang,

⁴⁹lantaran Tuhan Allah Yang Mahakuasa so beking hal-hal yang luar biasa pa kita. Dia itu memang suci.

⁵⁰Tuhan Allah se tunjung tu Dia pe sayang pa orang yang hidop punung hormat pa Dia, dari satu keturunan ka keturunan laeng.

⁵¹Kong deng Dia pe kuasa, Dia beking hal-hal yang luar biasa. Dia lei beking kacau tu orang-orang yang sombong sampe dong pe rencana nyanda jadi.

⁵²Dia kase turung tu orang-orang yang berkuasa dari pa dorang pe kedudukan, kong Dia angka tu orang-orang yang nyanda penting.

⁵³Dia kase samua yang bae pa tu orang-orang miskin sampe dorang jadi puas, kong pa tu orang-orang kaya Dia suru pigi deng nyanda dapa apa-apa.

⁵⁴Dia tolong pa Dia pe hamba tu orang-orang Israel, Dia da inga tu Dia pe janji for se tunjung tu De pe rasa kasiang

⁵⁵pa torang pe nene moyang, tu Abraham deng Abraham pe keturunan. Tu janji itu memang Dia so bilang dari dulu kong berlaku sampe slama-lamanya.”

⁵⁶Kong Maria tinggal deng Elisabet kira-kira tiga bulan, abis itu dia pulang pa de pe ruma.

⁵⁷Tu waktu for Elisabet mo melahirkan so sampe, kong dia se lahir satu anak laki-laki.

⁵⁸Elisabet pe birman-birman deng de pe sudara-sudara dapa dengar kalu Tuhan Allah so kase tunjung tu Dia pe rasa kasiang pa Elisabet sampe Elisabet bole dapa anak, kong dorang samua iko snang sama-sama deng dia.

⁵⁹Waktu tu bayi so umur dlapan hari, dia mo dapa sunat iko tu dorang pe atoran agama Yahudi. Kong tu birman-birman deng sudara-sudara datang ka situ. Dorang mo se nama tu bayi itu Zakharia sama deng de pe papa pe nama.

⁶⁰Mar tu ade itu pe mama bilang pa dorang, “Nimbole! Dia itu pe nama Yohanes.”

⁶¹Kong dorang balas babilang pa dia, “Kiapa bagitu dang? Soalnya nyanda ada dari pa ngoni pe nene moyang tu da pake nama Yohanes.”

⁶²Trus dorang basein pa Zakharia for batanya kalu tu dia pe anak mo se nama apa.

⁶³Zakharia basein minta alat tulis, kong dia tulis tu kata-kata ini, “De pe nama Yohanes”. Kong samua orang yang ada di situ jadi heran.

⁶⁴Waktu itu jo, Zakharia bole babicara ulang, kong dia puji-puji pa Tuhan Allah.

⁶⁵Trus samua orang yang tinggal di dekat situ jadi heran deng tako. Kong samua tu da jadi itu tasiar pa orang-orang yang tinggal di daera pegunungan di Yudea.

⁶⁶Kong samua orang yang da dengar itu batanya dalam hati, “Mo jadi apa kang tu anak kalu so basar?” Dorang bapikir bagitu lantaran Tuhan Allah da sama-sama deng tu anak itu.

⁶⁷Abis itu, Roh Kudus kuasai pa Zakharia, tu Yohanes pe papa. Trus Zakharia kase tau tu Tuhan Allah da bilang pa dia,

⁶⁸“Puji pa Tuhan Allah, tu torang orang Israel pe Tuhan! Soalnya Dia so datang pa torang, tu Dia pe orang-orang for kase bebas pa torang.

⁶⁹Dia so angka satu Orang yang punya kuasa for mo kase slamat pa torang. Tu Orang itu dari raja Daud pe keturunan.

⁷⁰Samua itu Dia so janji dari dulu, kong tu janji itu Dia da se tau lewat tu De pe nabi-nabi yang Dia so pili.

⁷¹Tuhan pe Orang ini mo kase bebas pa torang dari tong pe musu-musu, deng dari kuasa orang-orang yang binci pa torang.

⁷²Tuhan beking bagitu for se tunjung tu Dia pe rasa kasiang pa torang pe nene moyang, deng lei lantaran Dia inga tu Dia pe janji yang kudus pa dorang.

⁷³Tu janji itu Tuhan da bilang deng sumpa pa torang pe nene moyang Abraham. Dia bajanji

⁷⁴kalu Dia mo se lapas pa torang dari tong pe musu-musu. Deng bagitu, torang nyanda rasa tako mo layani pa Dia.

⁷⁵Kong slama torang hidop, torang hidop kudus deng cuma beking tu butul di muka pa Dia.

⁷⁶Kong ngana Yohanes, ngana ini kita pe anak. Nanti orang mo bilang kalu ngana itu Tuhan Allah Yang Mahatinggi pe nabi, tu ja kase tau Dia pe pesan pa orang-orang. Dorang bilang bagitu, lantaran ngana mo datang lebe dulu dari Tuhan, for se siap orang-orang pe hati mo trima pa Dia.

⁷⁷Ngana mo kase tau pa Tuhan Allah pe orang-orang, kalu Dia mo kase slamat pa dorang deng cara kase ampung pa dorang dari dong pe dosa-dosa.

⁷⁸Soalnya torang pe Tuhan Allah itu butul-butul rasa kasiang pa torang. So itu Dia datang kase slamat pa torang sama deng tu matahari yang muncul

⁷⁹for kase sinar. Dia itu mo datang se trang pa orang-orang yang hidop dalam glap, yang blum kanal pa Tuhan deng tu orang-orang yang tako mati. Dia mo datang pa torang supaya torang tau tu jalang for torang hidop deng hati tenang.”

⁸⁰Yohanes lebe hari lebe tatamba basar, trus dia lebe kuat dalam hal-hal rohani. Kong dia tinggal di padang gurun sampe dia mulai beking de pe playanan di tenga-tenga orang Israel.