Read Malay, Manado Lukas 10 Bible Online

Lukas 10 - Malay, Manado bible

Lukas 10

¹Abis itu, Yesus pili tuju pulu orang laeng tu ja iko pa Dia. Kong utus pa dorang pigi dua-dua orang for lebe dulu dari Dia ka kota-kota deng tampa yang Dia mo pigi akang.

²Kong Yesus bilang pa dorang, “Tu orang yang siap for trima tu Kabar Bae, dorang itu sama deng gandum di kobong yang siap mo panen. Tu gandum itu pe banya, mar tu orang-orang yang bakarja di situ cuma sadiki. So itu minta jo pa Yang Punya kobong itu supaya Dia tamba akang orang mo bapanen.

³Skarang ngoni pigi jo kong tarukira bae-bae: Kita utus pa ngoni pigi pa orang-orang jaha, itu sama deng domba yang pigi ka tenga-tenga srigala yang ganas.

⁴Waktu ngoni pigi, ngoni jang bawa tampa doi, tas bekal ato slop. Kong kalu baku dapa deng orang di jalang, ngoni jang batogor supaya ngoni bole bajalang trus.

⁵Kong kalu ngoni maso ka satu ruma, ngoni musti lebe dulu bilang bagini, ‘Damai sejahtra for ngoni samua.’

⁶Kong kalu di ruma itu ada orang yang suka damai, tu ngoni pe salam itu mo ada pa dia. Mar kalu nyanda ada orang yang suka damai, tu ngoni pe salam itu mo bale ulang pa ngoni.

⁷Trus kalu ada orang yang so trima pa ngoni, ngoni tinggal jo pa dia pe ruma jang bapinda-pinda. Kong ngoni makang deng minum jo apa tu dia da kase pa ngoni, lantaran tu orang yang da beking de pe karja, dia itu pantas mo dapa tu de pe upah.

⁸Kalu ngoni maso ka satu kota kong orang-orang di kota itu trima pa ngoni, ngoni makang jo apa tu dorang da kase.

⁹Kong ngoni kase bae tu orang-orang yang da saki di kota itu, deng kase tau pa orang-orang di situ, ‘So nyanda lama lei Tuhan Allah so mo Berkuasa sbagai Raja di tenga-tenga pa ngoni.’

¹⁰Mar kalu ngoni maso ka satu kota kong tu orang-orang di situ nyanda trima pa ngoni, ngoni pigi jo ka jalang-jalang raya di kota itu trus ngoni babilang deng suara kuat bagini,

¹¹‘Tu abu dari pa ngoni pe kota ini yang da malakat pa torang pe kaki, torang paka se kaluar itu jadi tanda kalu Tuhan mo hukum pa ngoni. Mar biar bagitu, ngoni inga tu hal ini: so nyanda lama lei Tuhan Allah so mo Berkuasa sbagai Raja pa Dia pe orang-orang.’

¹²Kita bilang pa ngoni, nanti di hari kiamat tu hari Tuhan mo adili samua orang, tu hukuman yang orang-orang di kota itu dapa mo lebe brat dari tu hukuman orang-orang yang dulu hidop di Sodom.”

¹³Yesus togor pa dorang, “Hei ngoni tu orang-orang di Khorazim deng Betsaida, cilaka jo ngoni! Soalnya Kita so beking mujisat-mujisat di tenga-tenga pa ngoni, mar ngoni nimau mo percaya kong bertobat. Padahal kalu tu orang-orang di Tirus deng Sidon waktu dulu da lia tu mujisat-mujisat yang Kita da beking pa ngoni, pasti so dari dulu dorang da bertobat kong pake baju karong deng taru abu pa dong pe kapala tanda dorang manyasal da beking dosa.

¹⁴Mar nanti waktu hari kiamat tu hari Tuhan mo adili samua orang, tu ngoni pe hukuman mo lebe brat dari tu hukuman orang-orang di kota Tirus deng Sidon.

¹⁵Kong ngoni orang-orang di Kapernaum, ngoni kira Tuhan mo angka pa ngoni sampe ka sorga? Nyanda kasiang. Malatare Dia mo buang pa ngoni ka neraka.”

¹⁶Kong Yesus babilang lei pa tu orang-orang yang ja iko pa Dia itu, “Sapa jo yang badengar pa ngoni, dia lei badengar pa Kita. Kong sapa jo yang tolak pa ngoni, dia lei tolak pa Kita, kong tu orang yang tolak pa Kita, dia itu lei tolak pa Tuhan Allah yang da utus pa Kita.”

¹⁷Tu tuju pulu orang yang Yesus da utus babale pa Dia. Dorang bale pa Dia deng rasa snang, kong dorang babilang pa Dia, “Guru, waktu ada orang yang da kemasukan setang, torang user tu setang pake Guru pe nama, trus tu setang-setang lei iko tu torang pe prenta.”

¹⁸Yesus bilang pa dorang, “Oh iyo. Kita so lia tu setang pe bos so ciri dari langit sama deng kilat.

¹⁹Tarukira jo bae-bae, Kita so kase kuasa pa ngoni supaya ngoni bole injang tu ular babisa deng kalajengking, deng supaya ngoni bole se kala samua tu setang pe bos pe kuasa, sampe nyanda ada yang bole beking cilaka pa ngoni.

²⁰Mar biar lei bagitu, ngoni jang snang lantaran tu setang-setang iko tu ngoni pe prenta, lebe bae tare ngoni snang jo lantaran tu ngoni pe nama-nama da tatulis di sorga.”

²¹Waktu itu jo, tu Roh Kudus kuasai pa Yesus kong De pe hati snang. Dia bilang, “Kita bilang makase pa Bapa, Tuhan yang berkuasa di langit deng bumi, lantaran Bapa nyanda kase tunjung samua hal itu pa tu orang-orang yang tau banya hal deng pa orang-orang pande for mangarti tu samua itu. Mar Bapa beking jelas samua itu pa tu orang-orang biasa yang dong pe hati polos sama deng anak kacili. Iyo Bapa, itu yang beking snang Bapa pe hati.”

²²Abis itu Yesus bilang, “Kita pe Bapa so kase samua pa Kita. Nyanda ada satu orang yang tau sapa tu Bapa pe Anak, kacuali Bapa sandiri. Kong nyanda ada satu orang yang tau sapa tu Bapa kacuali Dia pe Anak, deng sapa jo tu Anak da pili for tau tentang Bapa.”

²³Abis itu Yesus mangada pa Dia pe murit-murit, kong bicara sandiri deng dorang, Dia bilang pa dorang, “Samua yang ngoni da lia skarang ini, itu beking ngoni jadi orang yang paling snang.

²⁴Soalnya dulu banya nabi deng raja yang suka mo lia apa tu ngoni so lia, mar dorang nyanda dapa kesempatan for lia itu. Dorang lei suka mo dengar apa tu ngoni so dengar, mar dorang nyanda dapa kesempatan for dengar itu.”

²⁵Satu kali, ada satu ahli Taurat badiri for jebak pa Yesus. Dia batanya pa Yesus, “Guru, apa yang kita musti beking supaya kita bole dapa tu hidop kekal?”

²⁶Yesus bale batanya pa dia, “Apa tu da tatulis tentang itu di atoran-atoran yang ada di kitab Taurat? Apa tu ngana da baca di situ?”

²⁷Tu orang itu manyao, “Ngoni musti butul-butul sayang pa Tuhan Allah yang ngoni ja semba, ngoni nimbole badua hati. Ngoni sayang jo pa Dia deng samua yang ada pa ngoni pe diri, kong beking yang Dia da suru, deng lei sayang jo pa Dia deng cara slalu pikir apa tu bole mo beking snang pa Dia. Ngoni sayang jo pa orang laeng sama deng ngoni sayang pa ngoni pe diri sandiri.”

²⁸Yesus bilang pa tu ahli Taurat itu, “Butul tu bapak da bilang itu! Kalu bapak beking samua itu, bapak nanti mo hidop slama-lamanya deng Tuhan.”

²⁹Mar tu ahli Taurat itu mau supaya orang pikir kalu de pe diri itu butul, jadi dia batanya lei pa Yesus, “No sapa dang tu orang laeng yang musti kita sayang?”

³⁰Yesus manyao pake prumpamaan, “Ada tu satu laki-laki orang Yahudi yang turung dari Yerusalem ka Yerikho. Di tenga jalang, dia baku dapa deng prampok-prampok. Kong dorang pukul pa dia trus rampas samua tu ada pa dia. Abis itu, dorang kase tinggal pa dia amper mati di situ.

³¹Kong waktu itu di jalang itu pas-pas lewat satu orang imam agama Yahudi. Dia da lia tu orang yang da dapa rampok itu, mar dia tare cuma da lewat akang pa tu orang itu kong bajalang trus iko di pinggir jalang.

³²Kong waktu itu lei, lewat di jalang itu satu orang Yahudi dari suku Lewi yang biasa ja layani pa Tuhan Allah di Ruma Ibada Pusat. Dia dapa lia pa tu orang yang da dapa rampok itu, mar dia lei cuma da lewat akang tu orang itu kong bajalang trus iko di pinggir jalang.

³³Kong lewat lei di jalang itu satu orang Samaria[8]. Waktu dia lia tu orang yang da dapa rampok itu, dia rasa kasiang pa tu orang itu.

³⁴Dia pi badekat pa tu orang itu kong kase bersi tu luka-luka deng cara kase sirang anggor di luka trus dia pake minya for se obat tu luka itu, kong dia perban tu luka-luka itu. Abis itu dia kase nae tu orang itu pa de pe keledai, kong bawa ka tampa tu ja manginap akang. Di situ dia urus bae-bae tu orang itu.

³⁵Kong de pe eso, tu orang Samaria kase dua doi perak pa tu orang yang punya tampa ja manginap akang itu. Kong tu orang Samaria itu bilang, ‘Bapak, tolong urus akang dang pa dia. Trus kalu tu doi for urus pa dia masi kurang, nanti kita tamba akang kalu kita so babale.’ ”

³⁶Abis itu Yesus batanya pa tu ahli Taurat itu, “No skarang, kalu menurut bapak dang, dari tu tiga orang itu, mana tu orang yang da kase tunjung de pe sayang pa orang laeng yang da dapa rampok itu.”

³⁷Tu ahli Taurat itu manyao, “Tantu katu tu orang yang da se tunjung tu de pe rasa kasiang pa tu orang itu.” Kong Yesus bilang pa dia, “Jadi skarang bapak pigi jo, kong bapak beking sama deng itu.”

³⁸Waktu Yesus deng De pe murit-murit samantara bajalang, dorang sampe di satu kampung. Kong di situ ada satu parampuang tu de pe nama Marta, kong dia trima pa Yesus pa de pe ruma.

³⁹Tu Marta ada sudara parampuang tu de pe nama Maria. Kong waktu itu, Maria da dudu di dekat pa Tuhan Yesus pe kaki kong badengar trus tu Yesus pe ajaran.

⁴⁰Mar tu Marta komang cuma da sibuk se sadia tu makanan. Kong dia pi badekat pa Yesus trus babilang, “Guru, apa Guru nyanda farduli kalu tu kita pe ade Maria cuma da se biar pa kita bakarja sandiri? Tolong kwa Guru bilang akang pa dia for baku tulung deng kita.”

⁴¹Mar Tuhan Yesus cuma da manyao pa dia, “Marta, Marta, ngana cuma da kuatir deng beking sibuk tu ngana pe diri deng banya hal.

⁴²Padahal yang penting itu cuma satu, kong Maria so pili tu bagean yang bae itu. Tu bae itu nyanda mo dapa ambe dari pa dia.”