Read Malay, Manado Lukas 13 Bible Online

Lukas 13 - Malay, Manado bible

Lukas 13

¹Waktu itu ada bebrapa orang datang pa Yesus, kong kase tau pa Dia kalu ada orang-orang Galilea yang Gubernur Pilatus da bunung. Dorang itu dapa bunung waktu samantara bawa korban for persembahan pa Tuhan Allah di Yerusalem.

²Yesus bilang pa tu orang-orang yang datang pa Dia, “Kalu tu orang-orang Galilea dapa bunung rupa itu, apa ngoni pikir dorang da beking dosa lebe banya dari tu orang Galilea laeng?

³Nyanda kasiang! Mar Kita bilang pa ngoni, kalu ngoni nyanda bertobat dari ngoni pe dosa-dosa, ngoni samua lei mo binasa sama deng dorang.

⁴Ada lei dlapan blas orang tu da mati tatindis deng menara yang da rubu di dekat Siloam. Apa ngoni pikir lei dorang da beking dosa lebe banya dari tu orang-orang laeng yang tinggal di Yerusalem?

⁵Nyanda kasiang! Mar Kita bilang lei pa ngoni, kalu ngoni nyanda bertobat, ngoni samua lei mo binasa sama deng dorang.”

⁶Abis itu Yesus se tau satu prumpamaan, “Ada satu orang yang da tanang pohong ara pa de pe kobong anggor. Kong satu kali dia datang for cari bua di pohong itu, mar nyanda ada bua biar cuma satu.

⁷Kong dia bilang pa tu orang yang ja baurus kobong anggor itu, ‘Co lia, so tiga taong kita datang cari bua di pohong ara ini mar kita nyanda dapa. Potong jo tu pohong ini! Jang se biar tu pohong ini ada di tana ini kalu nyanda ja babua!’

⁸Mar tu orang ja baurus kobong anggor itu manyao, ‘Bapak, se biar jo ni pohong ini batumbu satu taong lei. Kita mo pacol tu tana pa de pe sei-sei kong mo kase akang pupuk.

⁹Sapa tau katu taong depan tu pohong ini mo babua, mar kalu nyanda, lebe bae potong jo.’ ”

¹⁰Satu kali pas hari Sabat, Yesus mangajar di satu ruma ibada agama Yahudi.

¹¹Di situ ada satu parampuang yang so dlapan blas taong bongko kong so nimbole badiri tre lantaran setang da kuasai pa dia.

¹²Waktu Yesus lia pa tu parampuang itu, Dia pangge tu parampuang itu kong babilang, “Ibu, Kita se bae pa ibu dari ibu pe panyaki.”

¹³Yesus taru Dia pe tangan pa tu parampuang itu, kong waktu itu jo tu parampuang so bole badiri tre. Trus tu parampuang puji deng hormat pa Tuhan Allah.

¹⁴Mar tu kapala ruma ibada agama Yahudi mara lantaran Yesus da se bae orang di hari Sabat. So itu tu kapala ruma ibada babilang pa orang banya, “Ada anam hari for bakarja. Kalu ngoni suka mo bae, ngoni datang jo di sala satu hari itu, jang datang waktu hari Sabat.”

¹⁵Mar Yesus bilang pa tu orang itu, “Ngoni ini munafik! Ngoni sandiri di hari Sabat da kase lapas ngoni pe sapi ato keledai dari dong pe kandang, kong bawa kaluar for se minum.

¹⁶Ni ibu ini Abraham pe keturunan, kong so dlapan blas taong setang pe bos da kuasai pa dia. Tantu katu di hari Sabat ini Kita bole se lapas pa dia dari tu setang pe bos pe kuasa.”

¹⁷Waktu Yesus bilang bagitu, samua orang tu ja malawang pa Yesus jadi malo, mar tu orang banya snang skali lantaran samua yang Yesus da beking itu luar biasa.

¹⁸Kong Yesus bilang lei, “Kira-kira bagimana kang tu Tuhan Allah berkuasa sbagai Raja pa Dia pe orang-orang? Kong Kita mo se sama deng apa dang itu?

¹⁹Bagini, tu Tuhan Allah pe orang-orang pertama cuma sadiki mar nanti mo jadi banya, itu sama deng tu biji paling kacili yang orang da tanang pa de pe kobong. Lama-lama tu biji kacili itu batumbu jadi pohong, kong burung-burung datang basarang pa de pe cabang-cabang.

²⁰Kong Kita mo se sama deng apa lei kang tu Tuhan Allah Berkuasa sbagai Raja pa Dia pe orang-orang?

²¹Bagini, tu Tuhan Allah pe orang-orang itu bole mo se sama deng ragi sadiki yang satu parampuang da ambe kong kase campur ka ampa pulu liter topong trigu, kong tu ragi itu beking samua tu adonan dari topong itu bareis jadi basar.”

²²Abis itu, Yesus se trus Dia pe perjalanan ka Yerusalem. Dia da lewat di kota-kota deng kampung-kampung, kong Dia mangajar pa orang-orang di tampa-tampa tu Dia da lewat akang itu.

²³Trus ada satu orang yang batanya pa Dia, “Guru, apa cuma sadiki so tu orang-orang yang mo dapa slamat dari hukuman dosa?”

²⁴Yesus bilang pa orang-orang di situ, “Tu orang-orang yang mo slamat, dorang itu bole se sama deng tu orang-orang yang brusaha lewat tu pintu yang sempit! Kita bilang pa ngoni, banya orang yang nanti brusaha mo maso, mar dorang nyanda mo dapa maso.

²⁵Soalnya kalu tu tuang ruma so badiri kong tutu tu pintu, ngoni mo badiri di luar trus batoki-toki pintu. Kong ngoni mo babilang, ‘Bapak, buka akang kwa tu pintu for torang!’ Kong dia mo manyao pa ngoni, ‘Kita nyanda kanal pa ngoni deng nintau ngoni itu dari mana.’

²⁶Trus ngoni mo babilang, ‘Torang ini so makang deng minum sama-sama deng Bapak, kong Bapak da mangajar di jalang-jalang pa torang pe kota.’

²⁷Mar Dia mo babilang pa ngoni, ‘Kita bilang pa ngoni, Kita nyanda kanal pa ngoni deng nintau ngoni itu dari mana. Bajao jo ngoni dari pa Kita, ngoni samua yang ja beking tu jaha.’

²⁸ Kong waktu itu, ngoni mo manangis sampe ngoni pe gigi baku goso sampe babunyi lantaran mendrita. Soalnya ngoni mo lia tu ngoni pe nene moyang Abraham, Ishak, Yakub deng samua nabi yang laeng ada di tampa tu Tuhan Allah Berkuasa sbagai Raja, mar ngoni sandiri dapa user dari situ.

²⁹Trus mo ada orang-orang datang dari timur deng barat, dari utara deng slatan, kong dorang mo dudu makang sama-sama di tampa tu Tuhan Allah Berkuasa sbagai Raja.

³⁰Kong tarukira jo bae-bae, nanti di hari kiamat, tu orang yang orang anggap nyanda penting, dia itu mo dapa hormat, kong tu orang yang orang bilang orang penting, dia itu nyanda mo jadi apa-apa.”

³¹Waktu itu jo, ada bebrapa orang dari golongan Farisi datang pa Yesus. Dorang babilang pa Yesus, “Bapak, pigi jo dari sini lantaran raja Herodes mo bunung pa Bapak.”

³²Yesus manyao pa dorang, “Ngoni pigi jo pa tu bapak Herodes yang licik sama deng rubah itu, kong bilang pa dia bagini, ‘Tarukira jo bae-bae, ni hari deng de pe eso Kita da user setang deng da se bae orang saki, kong di hari katiga Kita mo se klar samua tu Kita pe karja.’

³³Mar biar lei bagitu, ni hari, eso deng lusa, Kita musti bajalang trus ka Yerusalem. Soalnya memang nabi mustinya dapa bunung di Yerusalem, bukang di luar Yerusalem.

³⁴Hei ngoni tu orang-orang Yerusalem! Ngoni yang da bunung tu nabi-nabi, ngoni lempar deng batu tu orang-orang yang Tuhan da utus pa ngoni. Kita so ulang-ulang kase kumpul pa ngoni di dekat pa Kita, sama deng tu ayam mai da se kumpul de pe anak-anak for jaga di bawa de pe sayap, mar ngoni nimau Kita beking bagitu.

³⁵Tarukira jo bae-bae, Tuhan Allah so mo se tinggal tu ngoni pe tampa[9] ini, tu tampa ini mo jadi sunyi skali. Kita bilang pa ngoni, ngoni so nyanda mo lia lei pa Kita, mar nanti pa de pe waktu, ngoni mo lia pa Kita kong mo bilang, ‘Puji jo pa Dia yang da datang dalam nama Tuhan.’ ”