Read Malay, Manado Lukas 17 Bible Online

Lukas 17 - Malay, Manado bible

Lukas 17

¹Satu kali, Yesus bilang pa Dia pe murit-murit, “Pasti ada tu hal-hal yang bole beking orang tagoda beking dosa kong jadi sesat, mar sapa jo yang beking orang jadi sesat, cilaka jo dia.

²Lebe bae tu orang itu pe leher kase ika akang deng batu basar kong pi kase lego ka laut, daripada dia beking sesat tu satu dari tu orang-orang yang dunia ini ja anggap orang yang nyanda penting.

³So itu hati-hati jo ngoni. Kalu ngoni pe sudara yang percaya da beking sala pa ngoni, togor jo pa dia. Kalu dia manyasal deng tu dia da beking itu, ngoni kase ampung jo pa dia.

⁴Kong kalu dalam satu hari dia so beking sala pa ngoni tuju kali, trus dia bale-bale pa ngoni tiap kali dia beking sala kong babilang, ‘Minta maaf dang, kita so beking sala’, ngoni musti tetap kase ampung pa dia.”

⁵Satu kali, rasul-rasul tu Tuhan Yesus pe utusan-utusan babilang pa Dia, “Guru, tolong akang supaya torang pe percaya jadi lebe kuat.”

⁶Tuhan Yesus manyao, “Biar lei ngoni pe percaya itu de pe basar cuma sama deng tu biji yang paling kacili, ngoni bole bilang pa tu pohong ara ini supaya tapinda ka laut kong tatanang di situ. Tu pohong ini pasti mo iko tu ngoni da bilang.”

⁷Yesus bilang lei, “Kalu ngoni pe budak yang da bapajeko tana ato yang da bajaga domba pulang, sapa tu dari pa ngoni yang mo babilang pa tu ngoni pe budak itu, ‘Mari jo makang!’ Pasti nyanda ada to?

⁸Ngoni pasti mo babilang pa tu budak itu bagini, ‘Sadia akang makanan deng minuman for kita. Kong ngana pi baganti jo baju, trus layani pa kita sampe kita klar makang. Kalu kita so klar, baru ngana so bole makang deng minum.’

⁹Kong kalu tu budak itu so beking samua tu ngoni da suru pa dia, apa ngoni mo bilang lei makase pa dia? Paling nyanda.

¹⁰Bagitu lei deng ngoni. Kalu ngoni so beking samua tu Tuhan da suru pa ngoni, ngoni bilang jo bagini, ‘Torang ini kasiang cuma budak-budak yang nyanda pantas mo dapa puji. Torang ja beking apa yang mustinya torang beking.’ ”

¹¹Waktu Yesus pigi ka Yerusalem, Dia iko di perbatasan daera Samaria deng daera Galilea.

¹²Kong waktu Dia mo maso di satu kampung, datang spulu orang yang da saki kusta mo baku dapa deng Dia. Dorang itu da badiri sadiki jao dari pa Dia.

¹³Kong dorang bataria, “Yesus! Guru! Kasiang akang dang pa torang!”

¹⁴Kong Dia lia pa dorang trus babilang, “Pigi jo ngoni pa imam-imam for se lia tu ngoni pe diri pa dorang.” Trus dorang pigi, kong masi di tenga jalang dorang so jadi bae.

¹⁵Kong ada tu satu dari pa dorang, waktu dia lia de pe diri so bae, dia babale ulang pa Yesus kong puji deng hormat pa Tuhan Allah deng suara kuat.

¹⁶Trus dia berlutut di muka pa Yesus kong bilang makase pa Yesus. Tu orang itu orang Samaria.

¹⁷Yesus tanya, “Kita tau spulu orang tu bae tadi, kong mana dang tu sambilan orang?

¹⁸Nyanda ada dang dari pa dorang itu yang da babale for puji-puji pa Tuhan Allah, kacuali bapak tu orang yang bukang Yahudi?”

¹⁹Kong Yesus bilang pa tu orang itu, “Bapak, badiri jo kong pigi. Bapak so bae lantaran bapak percaya pa Kita.”

²⁰Satu hari ada bebrapa orang dari golongan Farisi batanya pa Yesus kalu tempo apa Tuhan Allah mo datang Berkuasa sbagai Raja. Kong Yesus manyao pa dorang, “Kalu Tuhan Allah datang Berkuasa sbagai Raja, nyanda ada tanda-tanda lebe dulu yang bole ngoni mo lia.

²¹So itu nyanda ada yang bole bilang bagini, ‘Co lia dia ada di sini’ ato ‘Co lia, dia ada di sana!’ Soalnya sebenarnya Tuhan Allah so Berkuasa sbagai Raja di tenga-tenga pa ngoni.”

²²Kong Yesus babilang pa Dia pe murit-murit, “Nanti ada de pe waktu ngoni suka skali mo lia pa Anak Manusia biar lei cuma satu hari, mar ngoni nyanda mo dapa lia.

²³Nanti orang mo bilang pa ngoni, ‘Co lia, Dia ada di sana!’ ato, ‘Co lia, Dia ada di sini!’ Mar ngoni jang pi ka situ, ngoni jang iko pa dorang.

²⁴Soalnya waktu Anak Manusia mo datang ulang, samua mo dapa lia pa Dia. Dia mo datang sama deng kilat pe cahaya yang muncul dari ujung langit satu ka ujung langit laeng.

²⁵Mar tu Anak Manusia musti lebe dulu tanggong banya siksa dari tu orang-orang jaman ini yang nyanda trima pa Dia, baru Dia datang ulang.

²⁶Waktu tu Anak Manusia mo datang ulang, tu orang-orang pe cara hidop sama deng dulu waktu jaman nabi Nuh seblum dia maso ka kapal basar.

²⁷Dorang nyanda pikir tentang Tuhan, dorang itu cuma makang, minum, deng kaweng sama deng biasa sampe waktu tu Nuh maso ka kapal. Kong tu banjer basar datang se abis pa dorang samua.

²⁸Bagitu lei deng tu orang-orang pe hidop dulu waktu jaman Lot. Dorang makang, minum, bajual deng babli, batanang deng babangun ruma.

²⁹Mar waktu tu Lot kaluar dari Sodom, turung ujang api deng ujang belerang dari langit kong se abis pa dorang samua.

³⁰Tu cara hidop dari tu orang-orang waktu jaman Nuh deng Lot dulu, itu sama deng tu orang-orang pe cara hidop nanti waktu tu Anak Manusia datang ulang.

³¹Nanti waktu itu, tu orang yang ada di atas ruma jang turung for pi ambe tu dia pe barang-barang pa de pe ruma, mar turung kong lari jo. Bagitu lei deng tu orang yang ada di kobong, jang babale for pi ambe barang-barang pa dia pe ruma.

³²Inga jo apa tu da jadi pa Lot pe bini, dia mati lantaran da inga-inga tu dia pe barang di ruma!

³³Sapa yang mo hidop cuma for de pe diri sandiri, dia itu nyanda mo dapa hidop kekal. Mar komang sapa yang mo kase de pe hidop lantaran iko pa Kita, so dia tu mo dapa hidop kekal.

³⁴Kita bilang pa ngoni, di waktu Anak Manusia datang ulang, kalu ada dua orang yang tidor di atas satu koi, tu satu Tuhan mo angka, kong tu satu mo se tinggal.

³⁵Ada lei dua orang parampuang yang sama-sama da bagiling gandum, tu satu Tuhan mo angka, kong tu satu mo se tinggal.” [

³⁶Trus ada lei dua orang di kobong, tu satu Tuhan mo angka, kong tu satu lei mo se tinggal.]

³⁷Pe dengar itu, Yesus pe murit-murit batanya pa Dia, “Guru, di mana dang itu mo jadi?” Yesus manyao pa dorang, “Kalu torang lia ada burung pangmakang bangkai bakumpul, itu de pe tanda kalu di situ ada bangkai, bagitu lei deng orang-orang mo lia tu tanda-tanda seblum Kita mo datang ulang.”