Read Malay, Manado Lukas 18 Bible Online

Lukas 18 - Malay, Manado bible

Lukas 18

¹Yesus se cirita satu prumpamaan pa Dia pe murit-murit supaya dorang pe smangat nyanda ilang for basombayang trus pa Tuhan Allah.

²Dia bilang, “Ada satu orang hakim di satu kota, dia itu nyanda tako pa Tuhan Allah deng nyanda hormat pa sapa-sapa.

³Trus ada satu janda lei di kota itu. Tu janda itu slalu datang pa tu hakim kong babilang, ‘Bapak hakim, tolong dang urus akang deng adil tu kita pe perkara di muka pa kita pe musu.’

⁴Tu hakim itu tolak trus apa tu janda itu da minta, mar lama-lama jo tu hakim bapikir bagini, ‘Kita memang nyanda tako pa Tuhan Allah deng nyanda hormat pa sapa-sapa.

⁵Mar ni janda ini beking susa trus pa kita, so itu lebe bae kita urus akang deng adil tu dia pe perkara supaya dia nyanda datang-datang trus kong beking susa pa kita.’ ”

⁶Kong Yesus babilang lei, “Co ngoni tarukira apa tu hakim yang nyanda butul itu da bilang.

⁷No bagimana dang deng Tuhan Allah, apa Dia nyanda mo kase keadilan pa tu orang-orang yang Dia so pili, yang siang malam basombayang pa Dia? Kong apa Dia mo lama-lama for tolong pa dorang?

⁸Kita bilang pa ngoni, tantu katu Tuhan Allah mo iko tolong pa dorang for dapa keadilan. Mar kalu tu Anak Manusia datang ulang, apa Dia masi mo dapa orang yang percaya pa Dia di bumi ini?”

⁹Yesus se cirita prumpamaan for orang-orang tu ja anggap dorang pe diri butul deng tu ja pandang enteng pa orang laeng. Yesus bilang,

¹⁰“Ada dua orang pigi ka Ruma Ibada Pusat for basombayang. Tu satu orang dari golongan Farisi kong tu satu lei petugas pajak.

¹¹Tu orang dari golongan Farisi badiri basandiri kong basombayang, ‘Ya Tuhan Allah, kita bilang makase pa Tuhan lantaran kwa kita ini nyanda sama deng tu orang laeng. Kita ini bukang prampok, bukang orang yang nyanda butul, bukang orang yang ja bersina, deng kita lei nyanda sama deng tu petugas pajak itu.

¹²Kita lei ja bapuasa satu minggu dua kali, kong kita ja bakase spulu persen dari samua tu kita pe penghasilan for persembahan pa Tuhan.’

¹³Mar tu petugas pajak itu, dia badiri jao-jao, deng lei dia nyanda brani mangada ka langit. Malatare dia sapu de pe dada tanda manyasal ja beking dosa, kong babilang, ‘Ya Tuhan Allah, kasiang akang dang pa kita ini tu orang yang ja beking dosa.’

¹⁴Kita bilang pa ngoni, tu petugas pajak itu pulang pa de pe ruma sbagai orang yang Tuhan anggap butul di muka pa Dia, mar tu orang yang dari golongan Farisi itu nyanda. Soalnya sapa jo yang angka de pe diri sandiri, Tuhan mo beking tu orang itu nyanda ada arti apa-apa. Kong sapa jo yang nyanda sombong, Tuhan Allah mo angka pa dia jadi orang yang penting.”

¹⁵Satu kali ada orang-orang bawa tu dorang pe anak-anak kacili pa Yesus supaya Dia taru De pe tangan pa tu anak-anak itu for se berkat pa dorang. Mar waktu Yesus pe murit-murit lia, dorang cuma da mara akang pa tu orang-orang yang da bawa anak-anak kacili itu.

¹⁶Mar Yesus pangge pa tu anak-anak itu kong bilang pa De pe murit-murit, “Kase biar jo tu anak-anak itu datang pa Kita! Ngoni jang larang pa dorang lantaran tu orang-orang sama deng ini yang mo jadi orang-orang dari Tuhan Allah yang Berkuasa sbagai Raja.

¹⁷Kita bilang pa ngoni, sapa jo yang nyanda trima pa Tuhan Allah sama deng anak-anak kacili yang dong pe hati polos, so dorang itu yang nyanda mo jadi orang-orang dari Tuhan Allah yang Berkuasa sbagai Raja.”

¹⁸Ada satu orang pemimpin agama Yahudi batanya pa Yesus, “Guru yang pangbae, apa yang kita musti beking supaya kita bole mo dapa tu hidop kekal?”

¹⁹Yesus manyao pa dia, “Kiapa dang bapak bilang kalu Kita ini pangbae? Nyanda ada satu orang yang pangbae, cuma Tuhan Allah yang pangbae.

²⁰Bapak pasti so tau tu Tuhan Allah pe prenta-prenta ini: jang bersina, jang babunung, jang bapancuri, jang basaksi dusta, deng lei musti hormat pa ngana pe papa deng mama.”

²¹Kong tu orang itu bilang, “Samua tu prenta itu kita so beking dari lei kita masi nyong-nyong.”

²²Pe dengar itu, Yesus bilang pa dia, “Mar masi ada satu hal yang ngana blum beking. Ngana jual jo samua tu ngana pe harta, kong tu doi ngana kase berbage pa orang-orang miskin. Deng bagitu Tuhan mo kase pa ngana harta di sorga. Abis itu ngana datang jo kamari kong iko pa Kita.”

²³Waktu tu orang itu dengar tu Yesus da bilang itu, dia jadi sedi lantaran dia itu pe kaya skali.

²⁴Yesus lia kalu tu orang itu sedi, kong Yesus bilang, “Pe susa skali for orang kaya mo trima tu Tuhan Allah mo Berkuasa sbagai Raja pa dia.

²⁵Masi lebe gampang satu ekor onta mo maso ka lobang jarum, daripada orang kaya mo trima tu Tuhan Allah for mo Berkuasa sbagai Raja pa dia.”

²⁶Orang-orang yang da badengar tu Yesus da bilang, dorang bilang, “No kalu bagitu, sapa dang tu bole mo slamat dari hukuman dosa?”

²⁷Yesus manyao, “For manusia nyanda mungkin mo se slamat tu de pe diri sandiri, mar for Tuhan Allah, Tuhan Allah bole se slamat pa manusia lantaran samua Tuhan Allah bole beking.”

²⁸Kong Petrus babilang, “Guru, torang ini so kase tinggal samua tu tong pe kepunyaan for iko pa Guru.”

²⁹Yesus manyao pa dorang, “Kita bilang pa ngoni, sapa jo yang se tinggal tu de pe ruma, ato de pe bini, ato de pe sudara, ato de pe orang tua ato de pe anak-anak lantaran Tuhan Allah Berkuasa sbagai Raja pa dia,

³⁰skarang ini dia mo trima talebe-lebe dari samua tu dia da se tinggal, deng nanti di jaman yang mo datang, dia mo dapa tu hidop kekal.”

³¹Yesus pangge Dia pe dua blas murit, kong bilang pa dorang, “Skarang torang da bapigi ka Yerusalem. Di sana, samua tu nabi-nabi da tulis dulu tentang tu Anak Manusia so mo jadi.

³²Soalnya nanti orang mo srahkan Dia pa orang-orang bukang Yahudi. Kong dorang mo basosere pa Dia, mo hina pa Dia deng mo luda akang pa Dia.

³³Dorang lei mo cambok trus bunung pa Dia. Mar di hari katiga, Dia mo hidop ulang.”

³⁴Mar dorang nyanda mangarti samua tu Yesus da bilang itu. Soalnya samua itu masi rahasia for dorang, so itu dorang nintau apa de pe maksut.

³⁵Waktu Yesus so amper sampe di Yerikho, ada satu orang buta yang da dudu baminta-minta di pinggir jalang.

³⁶Tu orang buta itu da dengar banya orang da balewat di situ, kong dia batanya, “Ada apa kang?”

³⁷Trus orang kase tau pa dia, “Yesus, tu orang Nazaret da balewat.”

³⁸Kong tu orang buta itu babilang deng suara kuat, “Yesus tu raja Daud pe keturunan, kasiang akang dang pa kita!”

³⁹Tu orang-orang yang da bajalang di muka mara, kong togor pa tu orang buta itu supaya badiam. Mar tu orang buta itu cuma tare babilang lebe kuat, “Raja Daud pe keturunan, kasiang akang dang pa kita!”

⁴⁰Kong Yesus brenti, trus suru bawa tu orang buta itu pa Dia. Waktu tu orang buta so dekat pa Dia, Dia batanya pa tu orang buta itu,

⁴¹“Apa dang tu ngana suka Kita mo beking for ngana?” Tu orang buta itu manyao, “Tuhan, kita suka supaya kita bole mo balia!”

⁴²Kong Yesus bilang pa dia, “Skarang ngana so bole balia, ngana so bae lantaran ngana percaya pa Kita.”

⁴³Waktu itu jo, tu orang buta itu so bole balia kong dia iko pa Yesus trus puji deng hormat pa Tuhan Allah. Samua orang yang da lia tu da jadi itu puji deng hormat lei pa Tuhan Allah.