Read Malay, Manado Lukas 21 Bible Online

Lukas 21 - Malay, Manado bible

Lukas 21

¹Waktu Yesus ada di Ruma Ibada Pusat, Dia da tarukira tu orang-orang kaya yang da kase maso doi di kotak persembahan.

²Dia da tarukira lei tu satu janda miskin yang da kase maso dua doi logam ka kotak persembahan, tu de pe nilai paling kacili.

³Kong Yesus bilang, “Kita bilang pa ngoni, tu janda miskin da kase lebe banya dari tu dorang samua itu da kase.

⁴Soalnya tu orang-orang kaya itu da bakase persembahan dari dorang pe kepunyaan yang talebe-lebe, mar tu janda ini da bakase persembahan dari de pe kekurangan, malatare dari samua tu doi for de pe hidop.”

⁵Waktu itu ada bebrapa Yesus pe murit da babicara tentang tu Ruma Ibada Pusat yang pe bagus lantaran da se badiri pake batu-batu yang pe bagus, deng da prong deng macam-macam barang for se persembahan pa Tuhan Allah. Kong Yesus babilang pa dorang,

⁶“Apa yang ngoni da lia di Ruma Ibada Pusat itu, nanti satu waktu nyanda ada satu batu lei yang mo tasusung pa de pe tampa, samua itu mo dapa kase rubu.”

⁷Kong tu Yesus pe murit-murit batanya pa Dia, “Guru, tempo apa dang tu Guru da bilang tadi itu mo jadi? Kong apa dang tu de pe tanda-tanda kalu samua itu so mo jadi?”

⁸Yesus bilang pa dorang, “Hati-hati jo ngoni, jang sampe ada orang yang mo beking sesat pa ngoni. Soalnya banya orang mo datang kong mo pake Kita pe nama. Dorang mo bilang bagini, ‘So kita ini tu Kristus, tu Raja yang mo se slamat pa manusia!’ Deng dorang lei mo babilang bagini, ‘Tu hari kiamat so dekat!’ Mar ngoni jang iko pa dorang.

⁹Kong kalu ngoni dengar kabar ada prang deng ada orang yang babrontak pa pemerenta, ngoni jang tako. Soalnya samua itu musti jadi lebe dulu, mar itu blum de pe waktu mo iko kiamat.”

¹⁰Kong Yesus bilang lei pa dorang, “Nanti satu suku bangsa mo baprang deng suku bangsa laeng, satu krajaan baprang deng krajaan laeng.

¹¹Kong nanti lei mo ada tana goyang pe kuat skali, di mana-mana mo ada panyaki yang ja bajangke, deng lei mo ada kelaparan. Kong mo jadi lei tu hal-hal yang pe dapa tako deng tanda-tanda yang hebat di langit.

¹²Mar seblum tu samua itu jadi, lebe dulu orang-orang mo tangka kong siksa pa ngoni. Dorang mo srahkan deng mo adili pa ngoni di ruma-ruma ibada agama Yahudi, kong mo kase maso pa ngoni ka bui. Ngoni lei orang-orang mo bawa pa raja-raja deng pa penguasa-penguasa. Samua itu mo jadi pa ngoni lantaran ngoni da iko pa Kita.

¹³Mar waktu ngoni mo dapa adili, itu justru jadi kesempatan for ngoni kase tau pa orang-orang tu Kabar Bae dari Tuhan Allah.

¹⁴So itu se kuat jo tu ngoni pe hati supaya ngoni nyanda usa pikir-pikir apa tu kata-kata yang ngoni musti bilang nanti for babela tu ngoni pe diri.

¹⁵Soalnya Kita sandiri yang mo kase pa ngoni tu kata-kata supaya ngoni bole babicara deng bijaksana, sampe nyanda ada satu dari ngoni pe musu tu bole mo malawang ato babanta apa tu ngoni da bilang.

¹⁶Kong ngoni pe orang tua, ngoni pe kaka ade, ngoni pe sudara deng ngoni pe tamang-tamang, samua dorang yang nyanda percaya itu mo srahkan ngoni pa tu orang-orang yang nyanda percaya sampe ada bebrapa orang dari pa ngoni yang mo dapa bunung.

¹⁷Samua orang mo binci pa ngoni lantaran ngoni da iko pa Kita.

¹⁸Mar ngoni jang tako lantaran nyanda ada satu dari tu ngoni pe rambu yang mo ciri dari ngoni pe kapala.[11]

¹⁹Kalu ngoni tetap batahang percaya pa Kita, ngoni mo dapa hidop kekal.”

²⁰Yesus bilang lei, “Kalu ngoni lia tentara-tentara so kepung tu Yerusalem, ngoni mo tau kalu so nyanda lama tu kota itu mo ancor.

²¹Waktu itu orang-orang yang ada di daera Yudea musti manyingkir ka pegunungan. Deng orang-orang yang ada di kota musti pi manyingkir ka luar kota, kong orang-orang yang ada di kampung jang maso lei ka dalam kota.

²²Soalnya itu no tu waktu for Tuhan mo kase hukuman, supaya apa tu da tulis di Kitab Suci so mo jadi.

²³Waktu itu yang paling cilaka tu ibu-ibu yang hamil deng tu masi ja se batoto ade. Soalnya mo ada pendritaan yang hebat skali di sluru negri, kong Tuhan Allah mo hukum bangsa ini.

²⁴Tu orang-orang itu ada yang mo mati dapa bunung deng peda, ada lei dari pa tu orang-orang itu yang mo dapa bawa ka samua suku bangsa for jadi tawanan di sana. Kong bangsa-bangsa yang nyanda kanal pa Tuhan Allah itu mo injang-injang tu Yerusalem sampe so klar tu waktu yang Tuhan Allah da tentukan for tu bangsa-bangsa itu.”

²⁵Trus Yesus babilang lei, “Nanti pa de pe waktu, mo dapa lia tanda-tanda tu mo jadi di matahari, bulan deng bintang. Kong di bumi lei orang-orang dari bangsa-bangsa mo rasa tako deng bingo da dengar tu angin basar pe bunyi di laut deng lei omba basar pe bunyi.

²⁶Orang-orang lei mo tako skali sampe mo flao waktu dorang lia samua tu da jadi di bumi, lantaran tu kuasa-kuasa yang ada di langit mo jadi kacau.

²⁷Kong waktu itu no orang-orang mo lia tu Anak Manusia datang di atas awan deng Dia pe kuasa deng Dia pe luar biasa.

²⁸Kalu samua itu so mulai jadi, badiri jo kong angka jo tu ngoni pe kapala lantaran so dekat tu waktu for ngoni mo dapa slamat dari samua tu siksa itu.”

²⁹Abis itu, Yesus se cirita satu prumpamaan pa tu orang-orang itu, “Co ngoni tarukira tu pohong ara ato pohong apa jo.

³⁰Kalu ngoni lia tu pohong-pohong itu so mulai bakaluar de pe daong, ngoni sandiri tau kalu tu oras panas so dekat.

³¹Bagitu lei kalu ngoni lia samua tu tanda-tanda yang Kita da bilang itu so jadi, ngoni so tau kalu so dekat Tuhan Allah Berkuasa sbagai Raja pa De pe orang-orang.

³²Kita bilang pa ngoni, tu orang-orang jaman ini ada yang blum mo mati sampe samua jadi.

³³Langit deng bumi mo ancor, mar tu Kita pe firman mo ada trus.”

³⁴Kong Yesus babilang lei, “Jaga jo tu ngoni pe diri supaya ngoni pe pikiran jang cuma punung deng pikir-pikir tu mo bapesta pora deng tu mo baminum minuman kras sampe mabo, deng lei punung deng tu pikiran yang kuatir tentang tu ngoni pe hidop hari-hari. Kalu ngoni jaga tu ngoni pe diri rupa itu, waktu tu Anak manusia datang ulang ngoni so siap. Tu hari itu mo datang kage-kage pa ngoni, sama deng binatang yang kage-kage takana prangkap.

³⁵Soalnya tu hari itu mo datang kage-kage pa samua orang di dunia.

³⁶So itu ngoni musti slalu bajaga-jaga! Ngoni basombayang jo supaya ngoni dapa kekuatan for batahang mangada samua tu pendritaan yang mo jadi sampe ngoni lolos dari itu. Deng bagitu ngoni bole mampu for mangada di muka pa tu Anak Manusia.”

³⁷Serta so siang Yesus mangajar di kintal kompleks Ruma Ibada Pusat, kong serta so malam Dia kaluar dari tu Yerusalem kong pi tidor di bukit Zaitun.

³⁸Kong pagi-pagi skali, banya orang datang di kompleks Ruma Ibada Pusat for dengar Dia mangajar.