Read Malay, Manado Lukas 22 Bible Online

Lukas 22 - Malay, Manado bible

Lukas 22

¹Tu orang Yahudi pe hari raya Roti Nyanda Baragi so dekat. Hari raya itu ja bilang lei Paskah tu hari for pringati waktu Tuhan Allah se bebas pa dorang pe nene moyang dari Mesir.

²Kong waktu itu, tu imam-imam kapala deng ahli-ahli Taurat cari jalang for bunung pa Yesus deng cara sambunyi-sambunyi, lantaran dorang tako tu orang banya yang suka badengar pa Dia mo bakacau.

³Waktu itu setang pe bos kuasai pa Yudas, tu ja pangge lei Iskariot. Dia itu satu dari Yesus pe dua blas murit.

⁴Kong Yudas pigi pa imam-imam kapala deng pa kapala-kapala penjaga Ruma Ibada Pusat for bicara deng dorang bagimana de pe cara dia bole mo srahkan Yesus pa dorang.

⁵Dorang snang skali da dengar tu Yudas da bilang kong dorang spakat for kase akang doi pa dia.

⁶Yudas stuju, kong dia cari-cari kesempatan mo srahkan Yesus pa dorang deng cara sambunyi-sambunyi, supaya orang banya nyanda dapa tau.

⁷Kong so sampe tu prayaan Roti Nyanda Baragi, di hari itu orang Yahudi ja potong domba for korban persembahan di hari raya Paskah.

⁸So itu Yesus suru pa Petrus deng Yohanes, “Ngoni pigi jo for se sadia tu torang pe makanan for prayaan Paskah.”

⁹Kong dorang dua batanya pa Dia, “Di mana dang Guru suka torang se sadia akang tu makanan itu?”

¹⁰Yesus bilang, “Kalu ngoni maso ka kota, ngoni mo baku dapa deng satu laki-laki yang da pikul tampayang tu da isi akang aer. Ngoni iko jo pa dia sampe di ruma tu dia da maso akang.

¹¹Trus ngoni bilang pa yang punya ruma itu bagini, ‘Torang pe Guru da tanya, di mana tu ruangan for Dia deng Dia pe murit-murit mo makang sama-sama di hari raya Paskah?’

¹²Kong nanti yang punya ruma itu mo kase tunjung pa ngoni tu satu ruangan basar di lante atas yang de pe perlengkapan so tasadia lengkap. Di situ no ngoni musti se sadia akang samua.”

¹³Trus Petrus deng Yohanes pigi kong dorang dapa samua sama persis deng tu Yesus da bilang pa dorang dua. Trus dorang dua kase sadia samua for tu hari raya Paskah.

¹⁴Serta so de pe waktu mo makang di hari raya itu, Yesus dudu makang sama-sama deng Dia pe rasul-rasul.

¹⁵Yesus bilang pa dorang, “Kita so suka skali makang sama-sama deng ngoni di hari raya Paskah ini seblum Kita mendrita.

¹⁶Soalnya Kita bilang pa ngoni, ini yang terakhir kali Kita mo makang makanan tu biasa ja makang di hari raya ini sampe tu maksut dari Paskah ini jadi jelas di waktu Tuhan Allah Berkuasa sbagai Raja pa De pe orang-orang.”

¹⁷Kong Yesus ambe satu cawan yang da isi akang anggor, Dia bilang makase pa Tuhan Allah, trus Dia bilang pa De pe murit-murit, “Ambe jo ni cawan ini, trus ngoni samua minum jo dari ni cawan ini.

¹⁸Kita bilang pa ngoni, mulai skarang Kita so nyanda mo minum ini anggor sampe tu waktu Tuhan Allah so Berkuasa sbagai Raja pa De pe orang-orang.”

¹⁹Abis itu Yesus ambe roti, Dia bilang makase pa Tuhan Allah. Trus Dia se pela-pela tu roti kong Dia kase berbage pa dorang kong babilang, “Roti ini Kita pe badan yang Kita srahkan for ngoni. Ngoni beking jo rupa tu torang da beking skarang ini for inga pa Kita.”

²⁰Bagitu lei waktu so klar makang, Yesus ambe cawan yang da isi akang anggor kong bilang pa dorang, “Tu anggor di cawan ini Kita pe dara yang beking sah tu Perjanjian Baru antara Tuhan Allah deng manusia, tu Kita pe dara ini yang da tacura for ngoni.

²¹Mar inga jo, tu orang yang mo bahianat pa Kita, skarang ini dia da makang sama-sama deng torang di sini.

²²Memang tu Anak Manusia mo mati sama deng Tuhan Allah so tentukan, mar cilaka jo tu orang yang da srahkan tu Anak Manusia.”

²³Pe dengar itu, Yesus pe murit-murit mulai baku-baku tanya kalu sapa dari pa dorang tu mo beking itu.

²⁴Yesus pe murit-murit mulai baku ambe pendapat tentang sapa sebenarnya tu paling basar di antara pa dorang.

²⁵Kong Yesus bilang pa dorang, “Raja-raja dari bangsa-bangsa yang nyanda kanal pa Tuhan Allah, dorang itu da kuasai deng ja beking siksa tu dong pe rakyat, mar dorang itu ja bilang ‘pelindung rakyat’.

²⁶Mar ngoni jang sama deng dorang, kalu sapa jo dari antara pa ngoni yang jadi orang basar, dia musti beking de pe diri sama deng tu orang yang paling muda. Kong sapa jo dari pa ngoni yang jadi pemimpin, dia itu musti beking de pe diri sama deng tu orang yang ja layani samua orang.

²⁷Menurut ngoni kira-kira sapa yang paling basar, tu orang yang dudu makang ato yang ja balayani? Pasti katu tu orang yang da dudu makang. Mar Kita nyanda bagitu, waktu Kita da sama-sama deng ngoni, Kita ja layani pa ngoni.

²⁸Waktu Kita dapa susa, ngoni nyanda perna kase tinggal pa Kita.

²⁹So itu Kita mo kase kuasa pa ngoni for berkuasa sbagai raja sama deng Kita pe Bapa da kase kuasa pa Kita for Berkuasa sbagai Raja.

³⁰Deng bagitu, waktu Kita so Berkuasa sbagai Raja di tampa Kita mo berkuasa akang, ngoni bole mo makang deng minum satu meja deng Kita. Ngoni lei mo dudu di atas tahta for adili tu dua blas suku bangsa Israel.”

³¹Yesus bilang pa Simon Petrus, “Simon, Simon, tarukira jo bae-bae, setang pe bos so dapa isin for goda pa ngoni supaya ngoni tapisa dari pa Kita sampe nyanda percaya lei. Itu bole mo se sama deng tu petani yang da batapis tu gandum for se pisa dari konga.

³²Mar Kita so sombayang akang for ngana Simon, supaya ngana tetap percaya pa Kita. Kong nanti waktu ngana pe percaya pa Kita so kuat ulang, ngana musti bantu tu ngana pe sudara-sudara yang percaya supaya dorang pe percaya jadi kuat lei.”

³³Simon Petrus bilang pa Yesus, “Tuhan, kita siap mo maso bui deng kita lei siap mo mati sama-sama deng Tuhan!”

³⁴Mar Yesus bilang pa dia, “Kita bilang pa ngana, ni hari jo seblum ayam bakuku, ngana so tiga kali manyangkal kalu ngana kanal pa Kita.”

³⁵Yesus bilang lei pa De pe murit-murit, “Tempo hari, waktu Kita da utus pa ngoni, Kita nyanda kase isin pa ngoni for bawa tas, doi deng slop. Kong waktu ngoni pigi itu, apa ngoni ada kekurangan apa-apa?”

³⁶Dorang manyao, “Nyanda, torang nyanda kekurangan apa-apa.” Yesus bilang pa dorang, “Mar skarang ini, sapa yang ada tampa doi, lebe bae dia bawa tu tampa doi itu, bagitu lei deng sapa yang ada tas, lebe bae dia bawa tu tas itu. Kong sapa yang nyanda ada peda, lebe bae dia jual tu dia pe juba for bli peda.

³⁷Kita bilang pa ngoni apa tu da tulis di Kitab Suci tentang Kita memang musti jadi. Ini tu da tulis di Kitab Suci, ‘Dia mo tarekeng di antara orang-orang yang jaha.’ Soalnya apa tu da tulis tentang Kita, skarang samua itu mo jadi.”

³⁸Kong Yesus pe murit-murit bilang pa Dia, “Guru, co lia ini, ada dua peda.” Yesus manyao pa dorang, “Suda, so cukup jo itu.”

³⁹Yesus kaluar dari kota, kong sama deng biasa Dia pigi ka Bukit Zaitun, kong Dia pe murit-murit lei iko pa Dia.

⁴⁰Serta so sampe di tampa itu, Dia babilang pa dorang, “Basombayang jo supaya ngoni nyanda tagoda for beking dosa.”

⁴¹Kong Yesus pi bajao dari pa dorang kira-kira tiga pulu meter de pe jao. Abis itu Dia berlutut kong basombayang,

⁴²“Bapa, kalu Bapa mau, ambe jo tu pendritaan ini dari pa Kita. Mar jang iko Kita pe mau, iko jo tu Bapa pe mau.”

⁴³[Kong ada satu malaekat dari sorga da batunjung pa Yesus for kase kuat pa Dia.

⁴⁴Yesus rasa pe mendrita skali kong Dia lebe sunggu-sunggu basombayang. Dia pe suar itu sama deng dara yang da malele ka tana.]

⁴⁵Pe klar basombayang, Dia badiri kong babale pa De pe murit-murit. Dia lia dorang da tatidor lantaran dorang pe sedi skali sampe lela.

⁴⁶Kong Yesus bilang pa dorang, “Kiapa dang ngoni cuma da tatidor? Bangong jo kong basombayang jo supaya ngoni nyanda tagoda for beking dosa.”

⁴⁷Waktu Yesus masi babicara, datang satu rombongan orang, kong Yudas tu satu dari Yesus pe dua blas murit da bajalang di muka tu orang-orang itu. Trus dia pi badekat pa Yesus for ciong pa Yesus.

⁴⁸Mar Yesus bilang pa Yudas, “Hei Yudas, ngana mo bahianat pa Anak Manusia deng cara ciong pa Dia?”

⁴⁹Waktu Yesus pe murit-murit laeng tu da sama-sama di situ lia apa tu mo jadi, dorang batanya pa Yesus, “Guru, apa torang mo srang pa dorang deng peda?”

⁵⁰Kong satu dari Yesus pe murit-murit srang tu imam basar pe budak sampe tu budak itu pe talinga kanan putus.

⁵¹Mar Yesus bilang, “Brenti jo!” Kong Yesus pegang tu orang itu pe talinga kong se bae tu de pe talinga.

⁵²Abis itu Yesus babilang pa imam-imam kapala, kapala-kapala penjaga Ruma Ibada Pusat deng tua-tua Yahudi yang da datang for tangka pa Dia. Dia bilang, “Kita to bukang prampok, kong kiapa ngoni datang tangka pa Kita pake peda deng kayu?

⁵³Padahal saban hari Kita ada di tenga-tenga pa ngoni di kintal Ruma Ibada Pusat, cuma ngoni nyanda tangka pa Kita di situ. Mar skarang ini no so de pe waktu for ngoni mo tangka pa Kita, deng lei so de pe waktu for setang pe bos se tunjung tu de pe kuasa glap.”

⁵⁴Kong tu orang-orang itu tangka pa Yesus trus bawa pa Dia kaluar dari situ. Dorang bawa pa Dia pigi pa imam basar pe ruma, kong samantara itu, Petrus da iko-iko dari jao.

⁵⁵Di tenga-tenga imam basar pe kintal ruma, orang-orang beking api unggun kong dudu balingkar di situ. Trus Petrus lei pi dudu sama-sama deng dorang kong barao di situ.

⁵⁶Petrus da dudu di dekat tu api unggun itu jadi ada cahaya yang se trang pa dia di situ. Trus ada tu satu pembantu parampuang dapa lia pa dia. Kong tu parampuang itu tarukira bae-bae pa Petrus trus babilang pa tu orang-orang di situ, “Tu orang ini lei ja sama-sama deng Yesus!”

⁵⁷Petrus manyangkal, dia bilang, “Nyanda, Kita nyanda kanal pa Dia itu!”

⁵⁸Kong nyanda brapa lama, ada satu orang laeng da lia pa Petrus. Trus tu orang itu babilang, “Ngana lei to tu satu dari Yesus pe orang-orang!” Mar Petrus bilang, “Nyanda, bukang kita.”

⁵⁹Kong kira-kira satu jam brikut, ada satu orang laeng lei da babilang deng tegas pa Petrus. Dia bilang, “Butul, ni orang lei ja sama-sama deng Yesus, lantaran dia lei orang Galilea.”

⁶⁰Mar Petrus manyangkal, dia bilang, “Kita nintau apa tu bapak pe maksut da bilang itu.” Samantara Petrus babicara, waktu itu jo tu ayam bakuku.

⁶¹Kong Tuhan Yesus bahaga pa Petrus. Trus Petrus tainga tu Tuhan Yesus da bilang pa dia, “Petrus, ni hari seblum ayam bakuku, ngana so tiga kali manyangkal kalu ngana kanal pa Kita.”

⁶²Pe inga itu, Petrus pigi dari tu kintal kong manangis lantaran sedi skali.

⁶³Kong tu orang-orang yang da tahang pa Yesus, dorang hina pa Yesus deng bage pa Dia.

⁶⁴Dorang tutu Dia pe mata deng kaeng kong batanya, “Co tebak, sapa tu da babage pa Ngana?”

⁶⁵Abis itu masi banya lei tu kata-kata yang bahina tu dorang ja bilang pa Dia.

⁶⁶Serta so pagi, tu tua-tua Yahudi, imam-imam kapala deng ahli-ahli Taurat bakumpul for beking sidang mo urus Yesus pe perkara. Trus dorang bawa pa Yesus se mangada pa dorang pe Mahkamah Agama,

⁶⁷kong di situ dorang tanya-tanya akang pa Yesus, “Co kase tau kamari pa torang, butul Ngana itu Kristus tu Raja yang se slamat pa manusia?” Yesus manyao, “Biar lei Kita kase tau pa ngoni, ngoni tetap nyanda mo percaya.

⁶⁸Kong biar lei Kita batanya pa ngoni, ngoni lei pasti nyanda mo bajawab.

⁶⁹Mar mulai dari skarang tu Anak Manusia mo dudu baprenta di tampa terhormat di sabla kanan pa Tuhan Allah Yang Mahakuasa.”

⁷⁰Pe dengar itu, dorang samua babilang, “Kalu bagitu, Ngana ini Anak Allah?” Yesus manyao, “Ngoni sandiri yang bilang kalu Kita ini Anak Allah.”

⁷¹Pe dengar itu, dorang bilang, “For apa lei torang mo tamba saksi? Torang so dengar dari pa Dia pe mulu sandiri kalu Dia anggap Dia sama deng Tuhan Allah.”