Read Malay, Manado Lukas 23 Bible Online

Lukas 23 - Malay, Manado bible

Lukas 23

¹Kong samua orang yang da iko tu sidang itu badiri trus bawa pa Yesus se mangada pa Pilatus.

²Dorang mulai tudu pa Yesus di muka pa Pilatus, dorang bilang, “Torang dapa ni orang da bahasut torang pe orang-orang satu bangsa. Dia da larang orang-orang bayar pajak pa raja yang paling tinggi di krajaan Romawi. Dia bilang lei kalu Dia pe diri itu Kristus, tu Raja yang se slamat pa manusia.”

³Kong Pilatus batanya pa Yesus, “Apa butul Bapak orang Yahudi pe Raja?” Yesus manyao, “Bapak sandiri yang da bilang itu.”

⁴Trus Pilatus bilang pa imam-imam kapala deng samua orang yang ada di situ, “Kita nyanda dapa ni Orang pe sala biar lei cuma satu.”

⁵Mar orang-orang lebe tamba batudu pa Yesus, “Dia tu ja bahasut pa rakyat sampe kacau. Dia ja se tau Dia pe ajaran di sluru Yudea, mulai dari Galilea sampe di Yerusalem ini.”

⁶Kong waktu gubernur Pilatus dengar tu dorang da bilang itu, dia batanya pa dorang, “Jadi, Yesus ini dang orang Galilea?”

⁷Serta dia tau kalu Yesus itu dari daera Galilea tu daera yang raja Herodes da berkuasa akang, dia suru dorang bawa Yesus pa Herodes. Waktu itu, Herodes lei ada di Yerusalem.

⁸Herodes so ja dengar tu brita tentang Yesus, kong so lama dia suka skali mo lia pa Yesus. So itu waktu dia lia pa Yesus, dia snang skali kong baharap kalu dia bole mo lia Yesus beking satu mujisat.

⁹Herodes banya batanya pa Yesus, mar Yesus nyanda manyao apa-apa.

¹⁰Samantara itu, tu imam-imam kapala deng tu ahli-ahli Taurat badiri trus dorang mulai bilang tu tuduhan-tuduhan yang brat pa Yesus.

¹¹Kong Herodes deng de pe tentara-tentara basosere pa Yesus deng beking suka pa Dia. Dorang kase pake akang tu juba bagus yang biasa raja ja pake, trus bawa ulang Dia pa Pilatus.

¹²Seblum itu, tu raja Herodes deng gubernur Pilatus da baku musu, kong itu hari jo dorang dua jadi batamang.

¹³Gubernur Pilatus pangge tu imam-imam kapala, tua-tua Yahudi deng rakyat for bakumpul.

¹⁴Trus Pilatus bilang pa dorang, “Ngoni so bawa Orang ini pa kita, kong ngoni bilang kalu Dia ja bahasut orang for malawang pa pemerenta. Mar co ngoni lia, kita so priksa pa Dia di muka-muka pa ngoni, kong kita nyanda dapa Dia pe kejahatan biar lei cuma satu sama deng tu ngoni da se tudu pa Dia.

¹⁵Herodes lei bapikir sama deng itu, so itu dia da se bale ulang tu Orang ini pa torang. Tarukira jo bae-bae, ni Orang ini nyanda beking sala apa-apa yang pantas beking Dia mo dapa hukuman mati.

¹⁶Jadi kita mo cambok pa Dia, kong abis itu kita mo se lapas pa Dia.” [

¹⁷Pilatus bilang bagitu lantaran tiap kali orang Yahudi pe hari raya for pringati waktu Tuhan Allah se bebas dorang pe nene moyang di Mesir, Pilatus lei musti se lapas satu orang tahanan dari bui iko tu rakyat pe mau.]

¹⁸Mar tu orang banya yang da bakumpul di situ bataria, “Bunung jo pa Dia! Kase bebas jo Barabas for torang!”

¹⁹Tu Barabas itu da se maso ka bui lantaran di kota Yerusalem dia da babrontak pa pemerenta Romawi deng lei da babunung orang.

²⁰Mar Pilatus suka mo se bebas pa Yesus, so itu dia babicara ulang deng kuat pa tu orang banya itu.

²¹Mar tu orang banya tare cuma da babataria trus-trus pa dia, “Se salib jo pa Dia, se salib jo pa Dia!”

²²Kong for katiga kali Pilatus bilang pa dorang, “Mar apa so tu kejahatan yang Dia da beking? Soalnya kita nyanda dapa kejahatan biar lei cuma satu yang pantas for kase hukuman mati pa Dia. Jadi kita mo cambok jo pa Dia kong abis itu kita mo se bebas pa Dia.”

²³Mar dorang trus-trus bapaksa kong batuntut deng suara kras supaya kase salib pa Yesus. De pe laste dorang menang lantaran dorang trus-trus bapaksa deng babataria.

²⁴Gubernur Pilatus ambe keputusan for iko akang tu orang-orang itu pe mau.

²⁵Dia kase bebas pa Barabas tu orang yang da dapa maso bui lantaran da babrontak pa pemerenta Romawi deng lei da babunung orang, gubernur itu cuma iko sama deng tu orang-orang Yahudi da minta, kong dia srahkan Yesus for se salib da iko lei tu dorang pe mau.

²⁶Abis itu tentara-tentara bawa pa Yesus ka luar kota Yerusalem. Di tenga jalang dorang baku dapa deng satu orang dari Kirene tu dia pe nama Simon. Simon ini baru mo maso ka kota. Tu tentara-tentara tahang pa Simon kong paksa pa dia pikul tu salib deng bajalang baiko pa Yesus.

²⁷Banya orang da iko pa Yesus dari blakang. Di antara pa dorang itu ada tu parampuang-parampuang yang ja bamanangis deng babataria kuat lantaran pe sedi skali.

²⁸Mar Yesus haga pa parampuang-parampuang itu kong babilang pa dorang, “Hei ngoni tu parampuang-parampuang Yerusalem! Ngoni jang manangis akang pa Kita. Lebe bae ngoni manangis akang jo tu ngoni pe diri sandiri deng tu ngoni pe anak-anak!

²⁹Soalnya nanti mo ada tu pendritaan yang brat skali sampe ada tu mo babilang bagini, ‘Pe snang skali tu parampuang mandul, tu parampuang yang nyanda perna hamil deng tu parampuang yang nyanda perna se batoto ade.’

³⁰Kong waktu itu mo susa skali sampe orang mo babilang pa gunung-gunung bagini, ‘Rubu jo kong tindis akang pa torang!’ deng babilang pa bukit-bukit bagini, ‘Tatambung jo pa torang!’

³¹Kita bilang bagitu lantaran kalu dorang beking bagini pa Kita yang nyanda beking dosa, nanti dorang beking tu lebe jaha lei pa ngoni yang ja beking dosa. Kita sama deng tu pohong yang blum kring tu nyanda mo tabakar samua, mar ngoni sama jo deng pohong-pohong yang so kring tu kana api mo tabakar samua.”

³²Waktu itu, tu tentara-tentara Romawi da bawa lei dua orang jaha for hukum mati sama-sama deng Yesus.

³³Serta dorang so sampe di satu tampa tu de pe nama Tengkorak, dorang se salib pa Yesus di situ. Tu dua orang jaha itu lei da se salib di sabla pa Yesus, tu satu di sabla kiri kong tu satu lei di sabla kanan. [

³⁴Yesus basombayang, “Bapa, kase ampung akang pa dorang lantaran dorang nintau apa tu dorang da beking.”] Kong dorang cabu lot for dapa tu Yesus pe baju.

³⁵Banya orang tu da badiri di situ kong lia samua tu da jadi, mar tu pemimpin-pemimpin Yahudi bahina pa Yesus. Dorang bilang, “Orang laeng Dia kase slamat. No skarang biar jo Dia kase slamat tu Dia pe diri sandiri kalu Dia itu memang butul-butul Kristus tu Raja yang se slamat pa manusia yang Tuhan Allah da pili.”

³⁶Tu tentara-tentara hina lei pa Dia. Dorang badekat pa Dia kong kase minum anggor asang pa Dia.

³⁷Dorang lei bilang pa Dia, “Kalu Ngana ini memang butul orang Yahudi pe Raja, se slamat jo Ngana pe diri.”

³⁸Di atas Yesus pe kapala, ada satu papang da tulis akang bagini, “Ini tu orang Yahudi pe Raja.”

³⁹Kong satu dari tu dua orang jaha yang da se salib di sabla pa Yesus bahina pa Dia, “Ngana to tu Kristus? No skarang se slamat jo Ngana pe diri deng torang dua ini!”

⁴⁰Mar tu orang jaha yang satu togor pa tu orang itu, “Ngana mustinya tako pa Tuhan Allah, lantaran ngana itu orang jaha yang dapa hukuman sama deng Dia.

⁴¹Torang dua memang musti dapa tu hukuman ini lantaran ini pantas deng tu kejahatan yang torang da beking. Mar Dia nyanda pantas dapa hukuman ini, lantaran Dia nyanda beking sala apa-apa.”

⁴²Trus dia bilang pa Yesus, “Yesus, inga akang dang pa kita kalu nanti datang sbagai Raja.”

⁴³Yesus manyao pa dia, “Kita bilang pa ngana, sebenarnya ni hari jo, ngana mo ada sama-sama deng Kita di dalam sorga.”

⁴⁴Waktu kira-kira so jam dua blas siang, tu sluru daera itu jadi glap sampe jam tiga sore.

⁴⁵Soalnya waktu itu matahari brenti basinar. Kong tu kaeng pampele basar yang da se gantong for pele tu ruang Mahasuci di Ruma Ibada Pusat tarabe jadi dua.

⁴⁶Kong Yesus babicara deng suara kuat, “Bapa, Kita srahkan tu Kita pe nyawa pa Bapa.” Abis bilang bagitu Yesus mati.

⁴⁷Waktu tu perwira Romawi lia apa tu da jadi, dia puji deng hormat pa Tuhan Allah kong dia bilang, “Memang butul, Dia ini Orang yang nyanda beking sala apa-apa!”

⁴⁸Samua orang yang da bakumpul di situ da lia apa tu da jadi, kong dorang pe hati sedi skali. Jadi waktu dorang samantara pulang, dorang pukul-pukul tu dong pe dada sandiri.

⁴⁹Samua orang yang kanal dekat pa Yesus so tamaso deng tu parampuang-parampuang yang da iko-iko pa Dia dari Galilea sampe di Yerusalem, dorang samua da badiri dari jao kong lia samua tu da jadi itu.

⁵⁰Ada satu orang tu de pe nama Yusuf. Dia anggota Mahkamah Agama Yahudi. Dia itu pangbae deng ja beking tu butul di muka pa Tuhan Allah.

⁵¹Dia dari Arimatea, tu satu kota di daera Yudea. Dia itu da tunggu-tunggu tu waktu Tuhan Allah Berkuasa sbagai Raja pa Dia pe orang-orang. Dia nyanda stuju tu keputusan for hukum mati pa Yesus, deng dia lei nyanda suka tu Mahkamah Agama pe tindakan.

⁵²Waktu Yesus so mati, dia pi mangada pa Pilatus kong minta supaya Pilatus kase tu Yesus pe mayat pa dia.

⁵³Serta so dapa isin, dia kase turung tu Yesus pe mayat dari salib kong dia se lingkar akang deng kaeng puti, trus dia taru tu Yesus pe mayat di dalam kubur goa tu da gale di bukit batu. Tu kubur itu blum perna kubur akang.

⁵⁴Yesus da mati pas di hari basadia for hari Sabat. Kong waktu Yusuf pi se kubur pa Yesus, waktu itu so mo malam kong tu hari Sabat so mo mulai.

⁵⁵Parampuang-parampuang yang datang sama-sama deng Yesus dari daera Galilea da iko pi se kubur pa Yesus. Dorang lia tu kubur deng bagimana Yesus pe mayat da taru di kubur goa batu itu.

⁵⁶Abis itu dorang pulang kong kase sadia ramuan-ramuan deng minya wangi for se goso pa Yesus pe mayat. Mar waktu hari Sabat, dorang brenti bakarja for iko tu atoran agama yang nimbole bakarja di hari Sabat.