Read Malay, Manado Lukas 24 Bible Online

Lukas 24 - Malay, Manado bible

Lukas 24

¹Hari Minggu waktu masi pagi-pagi skali, parampuang-parampuang itu pigi ka kubur bawa ramuan tu dorang so se sadia.

²Pe sampe di kubur, dorang lia tu batu yang da se tutu lobang kubur goa so taguling dari pa de pe tampa.

³Dorang maso ka dalam kubur itu, kong dorang lia tu Tuhan Yesus pe mayat so nyanda ada di situ.

⁴Samantara dorang da badiri tabingo-bingo lantaran itu, kage-kage ada dua laki-laki da pake baju bamangkilat badiri di dekat pa dorang.

⁵Tu parampuang-parampuang itu tako skali kong dorang berlutut sampe dorang pe muka kana di tana. Tu dua laki-laki itu babilang pa dorang, “Ngoni mustinya nyanda cari orang yang hidop di tampa orang mati.

⁶Dia so nyanda ada di sini, Dia so hidop ulang. Co ngoni inga apa tu Dia da bilang pa ngoni waktu Dia masi di Galilea.

⁷Dia da bilang kalu orang mo srahkan tu Anak Manusia pa orang-orang berdosa, kong dorang mo se salib pa Dia. Mar di hari katiga tu Anak Manusia mo hidop ulang.”

⁸Abis itu, dorang tainga apa yang Yesus so perna bilang pa dorang.

⁹So itu, dorang se tinggal tu kubur kong dong pi se tau samua itu pa tu seblas murit deng pa tu samua orang yang ja iko pa Yesus.

¹⁰Tu parampuang-parampuang yang da se tau samua itu pa tu rasul-rasul tu Yesus pe utusan-utusan, dorang itu tu: Maria orang Magdala, Yohana, Maria tu Yakobus pe mama deng lei parampuang laeng yang da sama-sama deng dorang.

¹¹Mar Yesus pe murit-murit itu pikir kalu samua tu parampuang-parampuang itu da bilang nyanda butul, jadi dorang nyanda percaya apa tu parampuang-parampuang itu da bilang.

¹²Mar biar lei bagitu, Petrus badiri trus lari ka kubur. Waktu dia maruku for bahoba di dalam kubur, dia lia di dalam cuma ada tu kaeng puti yang da se lingkar tu Yesus pe mayat. Kong dia pulang deng babatanya dalam hati tentang apa tu da jadi.

¹³Hari itu jo, ada dua orang dari tu orang-orang yang ja iko pa Yesus pigi ka satu kampung tu de pe nama Emaus. Tu kampung itu de pe jao kira-kira seblas kilometer dari Yerusalem.

¹⁴Kong samantara dorang dua bajalang, dorang da bacirita tentang samua tu da jadi pa Yesus.

¹⁵Waktu dorang samantara bacirita deng baku tukar pikiran, Yesus sandiri datang badekat pa dorang kong bajalang sama-sama deng dorang.

¹⁶Dorang da lia pa Yesus mar rupa ada sesuatu yang da pele dorang pe mata sampe dorang nyanda dapa kanal kalu Dia itu Yesus.

¹⁷Yesus bilang pa dorang, “Apa tu ngoni da bacirita samantara da bajalang ini?” Kong deng muka sedi dorang brenti bajalang.

¹⁸Trus satu dari pa dorang tu de pe nama Kleopas babilang pa Dia, “Cuma Bapak stou tu orang yang datang di Yerusalem yang nintau apa tu da jadi baru-baru ini.”

¹⁹Yesus tanya pa dorang, “Apa so tu da jadi di Yerusalem?” Dorang manyao, “Ini tentang tu da jadi pa Yesus tu Orang Nazaret itu. Dia itu Nabi kong Dia ja bamangajar punung deng kuasa deng ja beking mujisat-mujisat deng kuasa Tuhan, Dia beking samua itu di muka pa Tuhan Allah deng pa manusia.

²⁰Mar tu torang pe imam-imam kapala deng tu pemimpin Yahudi so srahkan Dia pa pemerenta Romawi for dapa hukuman mati kong so se salib pa Dia.

²¹Padahal dulu torang baharap kalu Dia itu yang mo se bebas pa torang pe bangsa Israel dari torang pe musu-musu. Kong ini hari so hari katiga dari tu samua da jadi itu.

²²Mar ada bebrapa parampuang dari pa torang pe klompo yang so beking kage pa torang. Soalnya waktu masi amper siang dorang da pigi ka kubur,

²³kong dorang lia tu Yesus pe mayat so nyanda ada di situ. Trus dorang babale pa torang kong kase tau kalu dorang da lia malaekat-malaekat di sana. Tu malaekat-malaekat itu da babilang pa dorang kalu Yesus so hidop ulang.

²⁴Kong abis itu, ada bebrapa dari torang pe tamang pigi ka kubur itu. Di sana dorang lia samua sama persis deng tu parampuang-parampuang itu da bilang, mar dorang lei nyanda lia pa Yesus.”

²⁵Kong Yesus bilang pa dorang, “Ngoni ini orang yang nintau apa-apa. Pe susa skali ngoni mo percaya samua tu nabi-nabi da bilang dulu di Kitab Suci.

²⁶Dorang bilang seblum Kristus dapa puji deng hormat, Dia musti rasa dulu samua tu siksa itu.”

²⁷Kong Yesus se jelaskan pa dorang samua tu da tulis tentang Dia di Kitab Suci, mulai dari tu kitab-kitab yang nabi Musa da tulis sampe tu kitab-kitab yang nabi-nabi laeng da tulis.

²⁸Waktu dorang so dekat deng tu kampung Emaus, tu kampung yang dua orang itu mo pigi akang, Yesus beking rupa jo Dia mo se trus tu Dia pe perjalanan.

²⁹Kong dorang bapaksa supaya Dia tinggal dulu deng dorang. Dorang bilang, “Tinggal jo kwa dulu sama-sama deng torang lantaran skarang so mo malam, matahari so mo maso.” So itu Yesus maso ka dalam ruma for tinggal sama-sama deng dorang dua.

³⁰Waktu Yesus deng dorang dua dudu mo makang, Dia ambe tu roti kong bilang makase pa Tuhan Allah, trus kase pela-pela tu roti kong kase berbage pa dorang dua.

³¹Waktu itu jo dorang dua pe mata sama deng da tabuka kong dapa kanal pa Yesus, mar Dia iko ilang dari tenga-tenga pa dorang.

³²Kong dorang baku bilang, “So itu kang torang pe hati smangat skali waktu Dia da babicara deng torang tadi di jalang, waktu Dia da se trangkan tu Kitab Suci pa torang.”

³³Kong dorang dua badiri trus iko babale ulang ka Yerusalem. Di sana dorang pi baku dapa deng tu seblas murit deng tu orang-orang laeng yang percaya tu samantara da bakumpul di situ.

³⁴Kong dari antara yang da bakumpul itu babilang pa dorang dua, “Memang butul, Tuhan Yesus so hidop ulang, Dia so batunjung De pe diri pa Simon.”

³⁵Abis itu, tu dua orang itu kase cirita apa tu da jadi pa dorang di tenga jalang, deng bagimana dorang bole dapa kanal pa Tuhan Yesus waktu Dia da pela-pela tu roti.

³⁶Samantara dorang bacirita tentang samua tu da jadi itu, kage-kage Yesus badiri di tenga-tenga pa dorang kong babilang pa dorang, “Damai sejahtra for ngoni samua!”

³⁷Dorang takage kong tako, dorang kira dorang da lia hantu.

³⁸So itu, Yesus bilang pa dorang, “Kiapa ngoni tako bagini dang? Kong kiapa lei ngoni masi ragu-ragu kalu Kita so hidop ulang?

³⁹Co ngoni lia tu Kita pe tangan deng kaki. Ini memang Kita sandiri, bukang hantu. Co ngoni lia kong pegang pa Kita, Kita ada daging deng tulang, mar kalu hantu pasti nyanda ada daging deng tulang.”

⁴⁰Samantara babilang itu, Yesus kase lia tu Dia pe tangan deng kaki pa dorang.

⁴¹Mar waktu itu dorang masi blum percaya lantaran dorang masi heran deng lei snang da lia pa Yesus, kong Dia babilang pa dorang, “Apa ada makanan pa ngoni di sini?”

⁴²Kong dorang kase akang ikang bakar pa Dia.

⁴³Yesus ambe tu ikang kong makang di muka pa dorang.

⁴⁴Abis itu Dia bilang pa dorang, “Waktu Kita masi da sama-sama deng ngoni, Kita so perna bilang kalu samua tu da tulis tentang Kita yang ada di kitab Taurat, kitab nabi-nabi deng di kitab Mazmur, samua tu da tatulis tentang Kita itu musti jadi.”

⁴⁵Kong waktu itu Yesus beking tu dorang pe pikiran jadi tabuka sampe dorang bole mangarti tu Kitab Suci.

⁴⁶Trus Dia bilang pa dorang, “Di Kitab Suci ada tulis kalu Kristus tu Raja yang mo se slamat pa manusia musti mendrita, mati kong hidop ulang di hari katiga.

⁴⁷Kong ada orang-orang yang mo dapa kuasa dari Dia pe nama for kase tau kalu orang-orang musti bertobat trus dorang pe dosa-dosa dapa ampung, kong itu samua mo kase tau mulai dari Yerusalem sampe ka samua suku bangsa.

⁴⁸Kong ngoni ini no tu saksi-saksi dari samua itu, jadi ngoni pi kase tau itu pa orang-orang.

⁴⁹Tarukira jo bae-bae, Kita nanti mo kase tu Roh Kudus pa ngoni, tu Roh Kudus yang Kita pe Bapa so janji dari dulu. Mar ngoni tinggal jo di kota ini sampe tu kuasa Roh Kudus yang dari pa Tuhan Allah itu so ada pa ngoni.”

⁵⁰Yesus bawa tu Dia pe murit-murit kaluar kota, kong serta dorang so dekat deng kampung Betania dorang brenti, trus Dia angka Dia pe tangan kong kase berkat pa dorang.

⁵¹Waktu Dia samantara kase berkat pa dorang, Dia mulai taangka ka sorga kong tapisa dari pa dorang.

⁵²Kong dorang berlutut semba pa Dia. Trus dorang pulang ka Yerusalem deng hati snang skali.

⁵³Tiap hari dorang pigi ka kompleks Ruma Ibada Pusat kong dorang puji deng hormat pa Tuhan Allah.