Read Malay, Manado Lukas 3 Bible Online

Lukas 3 - Malay, Manado bible

Lukas 3

¹Tiberius da jadi raja yang paling tinggi di krajaan Romawi, kong dia so baprenta slama lima blas taong. Kong waktu itu, Pontius Pilatus tu da jadi gubernur di daera Yudea, deng Herodes tu da jadi raja di daera Galilea. Trus tu Herodes pe kaka Filipus tu da jadi raja di daera Iturea deng Trakhonitis, kong tu Lisanias tu da jadi raja di daera Abilene.

²Trus tu Hanas deng Kayafas tu da jadi imam basar. Kong waktu itu, Tuhan Allah da babicara pa Yohanes tu Zakharia pe anak di padang gurun.

³Kong Yohanes pigi ka sluru daera di sekitar kuala Yordan. Di situ Yohanes deng suara kuat se tau pa orang-orang supaya dorang dapa baptis. Trus dorang dapa baptis, itu jadi tanda kalu dorang so bertobat kong Tuhan Allah se ampung pa dorang dari tu dorang pe dosa-dosa.

⁴Tu Yohanes da beking itu sama deng tu da tulis di kitab nabi Yesaya bagini, “Ada orang yang babicara deng suara kuat di padang gurun. Tu orang itu babilang, ‘Buka jalang for trima pa Tuhan, kong kase tre tu jalang for sambut pa Dia.’

⁵Tiap lembah mo dapa tambung. Tiap gunung deng bukit mo se rata. Tu jalang yang babelok-belok mo se tre, trus yang balobang-lobang mo dapa tambung for se rata.

⁶Kong samua orang mo lia bagimana Tuhan Allah se slamat pa orang-orang dari hukuman dosa.”

⁷Banya orang datang pa Yohanes for dapa baptis. Kong Yohanes bilang pa tu orang banya itu, “Hei ngoni orang-orang jaha, ngoni pe jaha itu sama deng ular yang babisa! Jang ngoni kira kalu ngoni dapa baptis trus ngoni bole lolos dari Tuhan pe hukuman.

⁸So itu ngoni musti hidop ja beking tu bae sama deng tu cara hidop yang pantas for orang yang so bertobat. Kalu ngoni beking bagitu, ngoni bole mo se sama deng tu pohong yang babua bagus. Jang ngoni kira kalu ngoni so nyanda mo dapa hukuman lantaran ngoni itu Abraham pe keturunan. Kita bilang pa ngoni, kalu Tuhan Allah suka, Dia bole mo beking tu batu-batu ini jadi Abraham pe keturunan.

⁹Tuhan so siap mo hukum samua orang yang nyanda bertobat, itu sama deng satu orang yang so siap-siap deng de pe tamako di akar pohong for potong tu pohong yang nyanda babua bagus, kong nanti abis potong tu pohong itu, dia mo buang ka api.”

¹⁰Abis itu, tu orang banya batanya pa dia, “No kalu bagitu, apa dang tu torang musti beking?”

¹¹Yohanes manyao pa dorang, “Sapa tu ada dua baju, dia musti kase akang satu pa orang yang nyanda ada baju. Kong sapa yang ada makanan, dia lei musti berbage akang tu makanan pa orang yang nyanda ada makanan.”

¹²Di situ lei da datang tu petugas-petugas pajak supaya Yohanes bole mo baptis. Kong dorang batanya pa dia, “Guru, apa tu torang musti beking?”

¹³Dia manyao, “Waktu batagi pajak, ngoni jang batagi lebe dari tu pemerenta da tentukan.”

¹⁴Di situ lei ada bebrapa tentara kong dorang lei batanya pa Yohanes, “Kong torang dang, apa tu torang musti beking?” Dia bilang pa dorang, “Ngoni jang baperas pa orang laeng, deng jang barampas orang laeng pe doi. Ngoni musti puas deng tu gaji yang ngoni ja trima.”

¹⁵Waktu itu, tu orang-orang Yahudi da tunggu-tunggu deng baharap pa Kristus tu Raja yang se slamat pa manusia mo datang. So itu dorang da batanya-tanya pa dong pe dalam hati kalu Yohanes itu tu Kristus.

¹⁶So itu Yohanes bilang pa dorang samua, “Kita babaptis pa ngoni pake aer, mar nanti ada satu Orang yang mo datang, Dia yang lebe berkuasa dari kita. Hele mo bantu for buka akang Dia pe tali capatu sama deng tu biasa orang karja ja beking, kita nyanda pantas. Dia yang mo baptis pa ngoni pake Roh Kudus deng api.[2]

¹⁷Dia mo kase pisa tu orang yang ja iko pa Dia dari tu orang yang nyanda ja iko pa Dia. Dia itu bole mo se sama deng tu orang yang da batapis pake sosiru for se pisa tu konga dari gandum. Tu gandum dia simpang di lumbung, mar tu konga dapa buang ka api yang nyanda mati-mati.”

¹⁸Kong deng banya nasehat laeng lei Yohanes se tau tu Kabar Bae dari Tuhan pa orang banya.

¹⁹Kong Yohanes lei da togor pa raja Herodes. Tu raja Herodes ini tu da pegang prenta di daera Galilea. Yohanes da togor pa raja Herodes lantaran Herodes da ambe pa Herodias jadi de pe bini, padahal waktu itu Herodias so kaweng deng Filipus tu dia pe sudara sandiri. Yohanes da togor lei pa dia lantaran tu samua kejahatan laeng yang dia da beking.

²⁰Mar Herodes cuma da tamba de pe kejahatan, dia tare se maso tu Yohanes ka bui.

²¹Seblum Yohanes dapa tangka, dia babaptis banya orang kong Yesus lei dia da baptis. Kong waktu Yesus dapa baptis, Yesus basombayang kong tu langit tabuka,

²²trus tu Roh Kudus yang rupa burung pombo turung di atas pa Dia. Kong dapa dengar Tuhan Allah pe suara dari langit, “Ngana ini Kita pe Anak, Kita sayang pa Ngana. Ngana beking Kita pe hati snang.”

²³Waktu Yesus mulai Dia pe playanan, De pe umur kira-kira tiga pulu taong. Kong tu orang-orang tau kalu Yesus itu Yusuf pe anak. Tu Yusuf pe papa, de pe nama Eli.

²⁴Eli pe papa Matat, Matat pe papa Lewi, Lewi pe papa Malkhi, Malkhi pe papa Yanai, Yanai pe papa Yusuf,

²⁵Yusuf pe papa Matica, Matica pe papa Amos, Amos pe papa Nahum, Nahum pe papa Hesli, Hesli pe papa Nagai,

²⁶Nagai pe papa Maat, Maat pe papa Matica, Matica pe papa Simei, Simei pe papa Yosekh, Yosekh pe papa Yoda,

²⁷Yoda pe papa Yohanan, Yohanan pe papa Resa, Resa pe papa Zerubabel, Zerubabel pe papa Sealtiel, Sealtiel pe papa Neri,

²⁸Neri pe papa Malkhi, Malkhi pe papa Adi, Adi pe papa Kosam, Kosam pe papa Elmadam, Elmadam pe papa Er,

²⁹Er pe papa Yesua, Yesua pe papa Eliezer, Eliezer pe papa Yorim, Yorim pe papa Matat, Matat pe papa Lewi,

³⁰Lewi pe papa Simeon, Simeon pe papa Yehuda, Yehuda pe papa Yusuf, Yusuf pe papa Yonam, Yonam pe papa Elyakim,

³¹Elyakim pe papa Melea, Melea pe papa Mina, Mina pe papa Matata, Matata pe papa Natan, kong Natan pe papa Daud,

³²Daud pe papa Isai, Isai pe papa Obed, Obed pe papa Boas, Boas pe papa Salmon, Salmon pe papa Nahason,

³³Nahason pe papa Aminadab, Aminadab pe papa Admin, Admin pe papa Arni, Arni pe papa Hezron, Hezron pe papa Peres, Peres pe papa Yehuda,

³⁴Yehuda pe papa Yakub, Yakub pe papa Ishak, Ishak pe papa Abraham, Abraham pe papa Terah, Terah pe papa Nahor,

³⁵Nahor pe papa Serug, Serug pe papa Rehu, Rehu pe papa Peleg, Peleg pe papa Eber, Eber pe papa Salmon,

³⁶Salmon pe papa Kenan, Kenan pe papa Arpakhsad, Arpakhsad pe papa Sem, Sem pe papa Nuh, Nuh pe papa Lamekh,

³⁷Lamekh pe papa Metusalah, Metusalah pe papa Henokh, Henokh pe papa Yared, Yared pe papa Mahalaleel, Mahalaleel pe papa Kenan,

³⁸Kenan pe papa Enos, Enos pe papa Set, Set pe papa Adam. Kong Adam itu, Tuhan Allah pe anak.