Read Malay, Manado Lukas 4 Bible Online

Lukas 4 - Malay, Manado bible

Lukas 4

¹Roh Kudus da kuasai pa Yesus kong Yesus se tinggal tu kuala Yordan, trus Roh Kudus bawa pa Yesus ka padang gurun.

²Di situ Yesus tinggal slama ampa pulu hari, kong tu setang pe bos goda pa Dia. Kong slama ampa pulu hari itu, Dia nyanda makang apa-apa trus Yesus jadi lapar skali.

³Kong setang pe bos bilang pa Yesus, “Ngana ini Anak Allah to? No kalu bagitu, prenta jo tu batu ini jadi roti.”

⁴Kong Yesus manyao pa dia, “Di Kitab Suci ada tulis bagini, ‘Manusia hidop bukang cuma dari roti.’ ”

⁵Trus setang pe bos da bawa lei pa Yesus ka satu tampa yang tinggi. Di sana, dia da se tunjung pa Yesus deng capat skali tu samua krajaan di dunia.

⁶Trus dia bilang pa Yesus, “Samua tu krajaan di dunia pe kekuasaan deng de pe kekayaan itu kita mo kase pa Ngana! Soalnya samua itu kita so trima kong kita bole kase pa sapa jo yang kita suka mo kase akang.

⁷Jadi kalu Ngana berlutut semba pa kita, itu samua mo jadi Ngana punya.”

⁸Mar Yesus cuma da manyao pa dia, “Di Kitab Suci da tulis bagini, ‘Torang musti semba pa Tuhan tu torang pe Allah, deng cuma Dia tu torang ja layani.’ ”

⁹Abis itu setang pe bos bawa pa Yesus ka Yerusalem, dia taru pa Yesus di tampa yang paling tinggi di Ruma Ibada Pusat. Kong setang pe bos bilang pa Yesus, “Ngana ini Anak Allah to? Kalu bagitu, Ngana baciri jo dari sini!

¹⁰Soalnya di Kitab Suci da tulis bagini tentang Ngana, ‘Tuhan Allah mo suru Dia pe malaekat-malaekat for jaga pa Ngana.

¹¹Dorang mo dafo pa Ngana waktu Ngana ciri, supaya Ngana pe kaki nyanda kana di batu.’ ”

¹²Mar Yesus manyao pa dia, “Di Kitab Suci da tulis lei bagini, ‘Ngoni jang coba-coba pa Tuhan, tu Tuhan Allah yang ngoni semba.’ ”

¹³Abis setang pe bos goda pa Yesus deng tu samua itu, dia kase tinggal pa Yesus kong tunggu waktu yang tepat for goda ulang pa Dia.

¹⁴Roh Kudus kuasai pa Yesus kong Yesus babale ka daera Galilea. Kong tu brita tentang Dia tasiar ka samua tampa di daera itu.

¹⁵Dia mangajar di ruma-ruma ibada agama Yahudi kong samua orang puji deng hormat pa Dia.

¹⁶Satu kali Yesus pigi ka Nazaret, tu tampa yang Dia da basar akang. Kong pas hari Sabat, Dia maso ka ruma ibada agama Yahudi sama deng tu biasa Dia ja beking. Dia badiri di sana for baca tu Kitab Suci.

¹⁷Kong ada orang di situ kase pa Yesus tu gulungan kitab dari nabi Yesaya. Trus Dia buka tu gulungan kitab itu, kong Dia dapa tu tulisan bagini,

¹⁸“Tuhan pe Roh ada pa Kita. Soalnya Dia so pili pa Kita for se tau tu Kabar Bae pa orang-orang susa. Kong Dia so utus pa Kita

¹⁹for kase tau pa orang-orang bagini: yang dapa tahang nanti mo bebas, yang buta bole mo balia, yang siksa lantaran orang ja tindas lei nanti mo bebas, kong mo se tau lei kalu tu waktu for Tuhan mo tolong pa orang-orang so sampe.”

²⁰Abis itu Yesus gulung tu Kitab itu trus kase pa tu petugas di situ, kong Dia dudu. Samua orang yang ada di ruma ibada agama Yahudi itu bahaga pa Dia.

²¹Kong Yesus mulai babicara pa dorang, Dia bilang, “Ni hari, waktu ngoni da dengar tu bagean dari Kitab Suci yang Kita da baca tadi, samua itu so jadi.”

²²Kong samua orang di situ bilang kalu tu Dia da bilang itu bagus skali, dorang taheran-heran deng Dia pe kata-kata yang bagus itu. Cuma abis itu dorang bilang bagini, “Dia itu Yusuf pe anak to?”

²³Kong Yesus bilang pa dorang, “Tantu ngoni mo bilang tu pribahasa ini pa Kita, ‘Hei dokter, se bae jo ngana pe diri sandiri.’ Ngoni mo bilang bagitu, lantaran ngoni pikir kalu Kita memang so beking mujisat di kampung Kapernaum sama deng tu ngoni so dengar, paling Kita lei musti beking itu pa Kita pe kampung sandiri.

²⁴Tarukira jo bae-bae tu Kita mo bilang, nyanda ada nabi yang dapa hormat pa de pe kampung sandiri.

²⁵Co ngoni dengar tu Kita mo bilang ini, tu Kita mo bilang ini memang da jadi: dulu waktu jaman nabi Elia, Tuhan se tutu tu langit kong ujang nyanda turung slama tiga taong anam bulan, trus ada kelaparan pe hebat di sluru negri Israel. Kong waktu itu, ada banya janda di Israel.

²⁶Mar Tuhan Allah nyanda utus Elia pigi pa janda yang ada di Israel, Dia cuma utus Elia pigi pa satu janda yang bukang orang Israel tu da tinggal di Sarfat, di daera Sidon.

²⁷Bagitu lei dulu waktu jaman nabi Elisa, ada banya orang yang saki kusta di Israel. Mar nyanda ada satu dari pa orang Israel itu yang Tuhan Allah da se bae, Tuhan Allah cuma da se bae tu satu orang yang bukang orang Israel mar orang Siria. Tu orang itu pe nama Naaman.”

²⁸Pe dengar tu Yesus da bilang, samua orang yang ada di ruma ibada itu iko mara skali.

²⁹Dorang badiri kong user pa Yesus kaluar dari tu kota kong bawa pa Dia ka tebing. Tu kota itu memang dorang da beking di tampa yang loas tu ada di atas gunung. Dorang bawa pa Dia ka tebing for se lego pa Dia dari situ.

³⁰Mar Yesus cuma bajalang lewat di tenga-tenga pa dorang, trus Dia pigi dari situ.

³¹Abis itu Yesus pigi ka Kapernaum, tu satu kota yang ada di daera Galilea. Kong di situ tiap hari Sabat Dia mangajar pa orang-orang di ruma ibada agama Yahudi.

³²Tu orang-orang itu jadi taheran-heran da dengar tu Dia pe ajaran itu, lantaran Dia pe bicara punung deng kuasa.

³³Kong di ruma ibada itu, ada satu orang yang da kemasukan setang, tu orang itu bataria,

³⁴“Hei Yesus orang Nazaret, apa so Ngana pe urusan deng torang? Ngana datang mo kase binasa pa torang kang? Kita tau sapa Ngana, so Ngana Yang Kudus dari Tuhan Allah.”

³⁵Mar Yesus togor deng kras pa tu setang itu, “Badiam, kaluar ngana dari pa dia!” Kong di muka banya orang tu setang banting tu orang yang dia da maso akang, trus dia kaluar dari pa tu orang itu, mar tu orang nyanda rasa saki apa-apa.

³⁶Kong samua orang di situ jadi taheran-heran, trus dorang baku bilang, “Bukang maeng pe hebat tu Dia pe kata-kata itu. Dia pake kuasa deng wibawa for user tu setang-setang kong tu setang-setang itu kaluar.”

³⁷Kong tu cirita tentang Yesus tasiar kamana-mana di sluru daera itu.

³⁸Kong Yesus kaluar dari ruma ibada itu trus pigi pa Simon pe ruma. Di situ Simon pe mama mantu da saki panas kras, kong orang-orang minta tolong pa Yesus for kase bae pa dia.

³⁹Yesus pi badiri di sabla pa Simon pe mama mantu kong se bae pa dia. Waktu itu jo, tu Simon pe mama mantu bae, kong dia iko badiri trus layani pa dorang.

⁴⁰Waktu so mo malam, banya orang bawa pa Yesus tu orang-orang saki yang ada deng dorang. Tu orang-orang saki itu pe panyaki ada macam-macam. Kong Yesus taru Dia pe tangan di atas pa tu orang-orang saki, trus Dia se bae pa dorang.

⁴¹Kong setang-setang lei kaluar dari tu banya orang yang da kemasukan setang. Trus tu setang-setang bataria, “Ngana itu Anak Allah.” Mar Yesus togor pa dorang deng kras kong nyanda kase pa dorang mo babicara lantaran dorang tau kalu Dia itu no Kristus tu Raja yang mo se slamat pa manusia.

⁴²De pe eso waktu matahari so kaluar, Yesus se tinggal tu kota itu kong pigi ka satu tampa yang jao dari kampung. Mar banya orang da pi cari pa Dia. Kong waktu dorang baku dapa deng Dia, dorang brusaha mo tahang pa Dia supaya nyanda kase tinggal pa dorang.

⁴³Mar Yesus bilang pa dorang, “Kita musti pigi ka kota-kota laeng supaya bole se tau tu Kabar Bae tentang Tuhan Allah Berkuasa sbagai Raja, lantaran kita dapa utus for kase tau tu Kabar Bae itu.”

⁴⁴Kong Yesus kase tau tu Kabar Bae di ruma-ruma ibada agama Yahudi di daera Yudea.