Read Malay, Manado Lukas 8 Bible Online

Lukas 8 - Malay, Manado bible

Lukas 8

¹Abis itu Yesus pigi ka kota-kota deng ka kampung-kampung, kong di tampa-tampa itu Dia kase tau tu Kabar Bae tentang Tuhan Allah Berkuasa sbagai Raja. Tu Dia pe dua blas murit lei da sama-sama deng Dia.

²Kong ada lei tu bebrapa parampuang yang da sama-sama deng Dia. Dari pa dorang itu, ada yang perna Dia da user akang setang deng ada lei yang perna Yesus da se bae dari saki. Di situ ada tu Maria orang Magdala. Yesus da user akang tuju setang dari pa dia itu.

³Kong ada lei Yohana tu Khuza pe bini. Khuza ini Herodes pe kapala urusan ruma tangga. Trus ada lei Susana deng parampuang-parampuang laeng. Tu samua parampuang itu pake dorang pe harta for bantu pa Yesus deng De pe murit-murit.

⁴Satu kali ada orang-orang dari banya kampung datang rame-rame pa Yesus. Kong waktu dorang so takumpul, Yesus kase tau satu prumpamaan,

⁵“Ada tu petani pigi baambor bibit. Samantara dia baambor bibit di kobong, ada bibit yang da taciri di jalang, kong orang tainjang akang tu bibit itu, trus burung-burung datang teto tu bibit sampe abis.

⁶Ada lei bibit tu da taciri di tana yang babatu-batu. Tu bibit di tampa itu batumbu mar jadi kring lantaran tu tana nyanda ada aer.

⁷Kong tu bibit laeng da taciri di tana yang ada rumpu baduri. Tu rumpu baduri batumbu sama-sama deng tu tanaman, kong gepe tu tanaman yang so batumbu sampe mati.

⁸Mar tu bibit laeng komang da taciri di tana subur, tu bibit itu batumbu kong babua. Dia babua sampe sratus kali lipa.” Waktu so klar bicara bagitu, Yesus bilang lei, “Sapa tu ada talinga, badengar jo bae-bae.”

⁹Abis itu Yesus pe murit-murit batanya pa Dia tentang arti dari tu prumpamaan tadi.

¹⁰Kong Dia bilang, “Tuhan Allah beking ngoni bole tau deng jelas tu rahasia tentang bagimana Tuhan Allah berkuasa sbagai Raja, mar pa orang laeng, tu hal itu da se tau pake prumpamaan. Deng bagitu, ‘Biar dorang balia, mar dorang nyanda mangarti apa tu da lia. Biar lei dorang badengar, mar dorang nyanda mangarti.’

¹¹Bagini tu prumpamaan pe arti: tu bibit itu, Tuhan Allah pe firman.

¹²Tu bibit yang da taciri di jalang, itu sama deng orang-orang yang so dengar tu Tuhan Allah pe firman, trus tu setang pe bos datang ambe tu firman itu dari pa dorang pe hati supaya dorang nyanda percaya kong nyanda mo slamat dari hukuman dosa.

¹³Tu bibit yang da taciri di tana babatu-batu, itu sama deng orang-orang yang da dengar tu firman kong trima itu deng hati snang. Mar tu firman nyanda baakar butul pa dorang pe hati. Dorang percaya mar nyanda lama, kong waktu dapa cobaan dorang jadi nyanda percaya lei pa Tuhan.

¹⁴Tu bibit yang da taciri di tana yang ada rumpu baduri, itu sama deng tu orang-orang yang so dengar tu firman mar dorang talalu kuatir deng tu dorang pe hidop, dorang tagila-gila deng dong pe harta, deng lei suka hidop snang-snang. Kong itu samua beking tu dorang pe percaya jadi nyanda kuat sama deng tu bibit yang nyanda babua butul lei.

¹⁵Kong tu bibit yang da taciri di tana subur, itu sama deng orang-orang yang so dengar tu firman, kong dorang simpang tu firman pa dorang pe hati yang bae deng tulus. Kong dorang tetap beking trus tu firman itu.”

¹⁶Yesus bilang lei, “Nyanda ada orang tu da pasang pelita kong tutu deng loto ato taru di kolong koi. Tantu dia mo taru tu pelita itu pa de pe tampa supaya samua orang yang maso ka dalam ruma bole lia tu de pe cahaya.

¹⁷Bagitu lei, apa yang skarang ini tasambunyi, nanti orang mo dapa tau, deng apa yang skarang ini jadi rahasia, nanti mo tabuka sampe orang bole tau.

¹⁸So itu tarukira jo bae-bae apa tu ngoni da dengar. Soalnya kalu ada orang yang mo trima tu Tuhan pe firman, Tuhan mo beking dia lebe mangarti. Mar kalu ada orang yang nimau mo trima tu Tuhan pe firman, apa yang dia so tau Tuhan mo ambe dari pa dia.”

¹⁹Yesus pe mama deng De pe sudara-sudara datang pa Dia, mar dorang nyanda dapa badekat pa Dia lantaran pe banya skali orang.

²⁰Kong ada orang pi kase tau pa Yesus, “Bapak, Bapak pe mama deng sudara-sudara ada di luar kong dorang suka mo baku dapa deng Bapak.”

²¹Mar Yesus manyao pa dorang, “Orang-orang yang badengar deng beking tu Tuhan Allah pe firman, so dorang itu no tu Kita pe mama deng Kita pe sudara-sudara.”

²²Satu kali Yesus deng Dia pe murit-murit nae ka prao, kong Dia bilang pa Dia pe murit-murit, “Mari jo torang pigi ka sabla danau.” Trus dorang pigi.

²³Waktu dorang samantara di tenga danau, Yesus da tasono. Kong kage-kage batiop angin kancang di danau sampe tu prao tamaso akang aer, kong dorang amper-amper mo cilaka.

²⁴Yesus pe murit-murit se bangong pa Dia. Dorang bilang, “Guru, Guru, torang so mo mati!” Kong Yesus badiri trus togor deng kras tu angin deng tu omba yang da mangamu itu. Trus tu angin deng omba brenti mangamu, kong tu danau itu jadi tedo.

²⁵Kong Yesus bilang pa Dia pe murit-murit, “Kiapa ngoni nyanda percaya pa Kita?” Dorang jadi tako deng heran, kong dorang baku bilang, “Sapa so Dia sebenarnya sampe kase prenta pa tu angin deng aer, kong tu angin deng aer iko Dia pe prenta?”

²⁶Kong Yesus deng De pe murit-murit trus blayar kong sampe di sabla danau Galilea, pa orang Gerasa pe daera.

²⁷Di situ, ada tu satu laki-laki dari kota dekat situ, tu da kemasukan setang-setang. Tu laki-laki itu so lama nyanda ja pake baju deng nyanda tinggal di ruma, dia cuma da tinggal di kuburan. Kong waktu Yesus turung dari prao, tu laki-laki itu badatang pa Dia.

²⁸Serta dia lia pa Yesus, dia bataria kong berlutut di muka pa Yesus. Trus dia babilang pa Yesus deng suara kuat, “Hei Yesus, Tuhan Allah Yang Mahatinggi pe Anak! Apa so Ngana pe urusan deng kita? Kita mohon kwa supaya Ngana jang siksa pa kita.”

²⁹Tu setang yang ada pa tu orang itu bilang bagitu pa Yesus lantaran Yesus da prenta pa dia supaya kaluar dari tu orang itu. Soalnya tu setang amper slalu ja kuasai pa tu orang itu, so itu tu orang-orang di situ ika tu orang itu pe tangan deng kaki pake rante for tahang pa dia. Mar tu orang itu cuma da se putus tu rante yang da se ika pa dia kong tu setang bawa pa dia ka tampa-tampa yang jao dari kampung.

³⁰Yesus batanya pa tu setang yang ada pa tu orang itu, “Sapa ngana pe nama?” Kong tu setang manyao, “Legion,” lantaran ada banya setang yang da maso pa tu orang itu.

³¹Trus tu setang-setang itu bamohon pa Yesus supaya Dia jang prenta pa dorang maso ka jurang maut, tu tampa mo hukum akang setang-setang.

³²Di dekat situ, ada banya skali boke da bamakang di lereng bukit. Kong tu setang-setang itu bamohon pa Yesus supaya Dia kase isin pa dorang for maso pa tu boke-boke itu. Trus Yesus iko akang tu dorang da minta.

³³Trus tu setang-setang itu kaluar dari pa tu orang itu, kong maso pa tu boke-boke. Abis itu tu boke-boke balumpa dari pinggir jurang ka danau kong mati malamise di situ.

³⁴Pe lia apa tu da jadi, tu orang-orang yang bajaga boke itu lari kong pi cirita itu di kota deng kampung-kampung dekat situ.

³⁵Kong orang-orang dari kota deng kampung-kampung di dekat situ datang for lia apa tu da jadi. Dorang datang pa Yesus kong dorang lia tu orang yang tadi da kemasukan setang so dudu dekat pa Yesus pe kaki, dia so pake baju kong dia so bae. Pe lia itu, dorang jadi tako.

³⁶Tu orang-orang yang da lia sandiri waktu Yesus da user tu setang-setang, dorang se cirita pa tu orang-orang yang baru datang di situ bagimana sampe tu orang yang da kemasukan itu jadi bae.

³⁷Kong samua orang di daera Gerasa itu bamohon pa Yesus supaya Dia se tinggal tu dorang pe daera itu lantaran dorang samua tako skali. So itu Yesus nae ka prao for bale ulang ka sabla danau.

³⁸Tu orang yang tadi da kemasukan setang bamohon pa Yesus supaya dia bole iko deng Yesus. Mar Yesus suru pigi pa dia, Yesus bilang,

³⁹“Lebe bae ngana pulang jo pa ngana pe ruma, kong se cirita jo pa orang-orang samua tu Tuhan Allah so beking pa ngana.” Tu orang itu pigi ka samua tampa di kota itu trus dia kase tau pa orang-orang samua tu Yesus da beking pa dia.

⁴⁰Waktu Yesus bale dari sabla danau, banya orang sambut pa Dia lantaran dorang samua da tunggu-tunggu pa Dia.

⁴¹Kong datang satu orang kapala ruma ibada agama Yahudi, tu de pe nama Yairus. Dia datang kong berlutut di muka pa Yesus trus dia bamohon supaya Yesus datang pa dia pe ruma.

⁴²Soalnya dia pe anak satu-satunya da saki kong amper-amper mo mati. Dia pe anak itu parampuang, kong de pe umur kira-kira dua blas taong. Kong Yesus pigi pa Yairus pe ruma. Samantara Yesus bajalang pigi pa Yairus pe ruma, ada banya orang yang da baku-baku ruju di dekat pa Dia.

⁴³Kong dari pa orang-orang itu, ada satu parampuang yang so dua blas taong da mendrita saki pendarahan, [Dia so se abis samua tu dia pe harta for brobat pa dokter-dokter], mar nyanda ada yang bole mo se bae pa dia.

⁴⁴Dia badekat pa Yesus dari blakang kong dia sontong tu Yesus pe ujung juba, waktu itu jo dia pe pendarahan iko brenti.

⁴⁵Abis itu, Yesus batanya, “Sapa kang tu da sontong pa Kita?” Mar nyanda ada orang yang mangaku. Kong Petrus bilang pa Dia, “Guru, ada banya orang yang da bakrumun deng da baku-baku ruju di dekat pa Guru.”

⁴⁶Yesus bilang, “Mar ada tu da sontong pa Kita no, lantaran kwa ada kuasa yang da kaluar dari pa Kita.”

⁴⁷Tu parampuang itu lia kalu apa tu dia da beking so dapa tau, jadi deng batotofore dia datang berlutut di muka pa Yesus. Trus di muka pa samua orang di situ, dia se cirita kiapa sampe dia da sontong tu Yesus pe juba. Dia lei bilang kalu waktu itu jo dia iko bae.

⁴⁸Abis itu Yesus bilang pa tu parampuang itu, “Ibu, skarang ibu so bae lantaran percaya pa Kita. Pigi jo deng hati tenang.”

⁴⁹Waktu Yesus masi samantara babicara, datang satu orang dari Yairus pe ruma, kong babilang pa Yairus, “Bapak pe anak so mati. Jadi nyanda usa jo batrosol pa Guru!”

⁵⁰Mar Yesus dapa dengar tu orang itu da bilang, kong Dia bilang pa Yairus, “Jang tako, mar percaya jo! Tu bapak pe anak pasti mo bae.”

⁵¹Serta so sampe pa Yairus pe ruma, Yesus nyanda kase orang-orang maso deng Dia ka ruma, cuma Petrus, Yohanes, Yakobus, deng tu anak itu pe papa deng mama.

⁵²Samua orang ja manangis akang tu anak yang so mati itu. Mar Yesus bilang, “Nyanda usa manangis lei! Tu anak itu nyanda mati, dia cuma da tidor.”

⁵³Mar dorang tare cuma da tatawa akang pa Dia lantaran dorang tau kalu tu anak itu so mati.

⁵⁴Kong Yesus pegang tu anak itu pe tangan, trus Dia bilang, “Hei anak, bangong jo!”

⁵⁵Waktu itu, tu anak itu pe jiwa babale ulang pa dia kong dia hidop ulang, trus dia iko badiri. Abis itu Yesus suru pa dorang kase akang makang pa tu anak itu.

⁵⁶Tu anak itu pe papa deng mama taheran-heran da lia itu. Mar Yesus larang pa dorang for se cirita pa sapa-sapa apa tu da jadi.