Read Malay, Manado Lukas 9 Bible Online

Lukas 9 - Malay, Manado bible

Lukas 9

¹Yesus pangge pa Dia pe dua blas murit, kong Dia kase pa dorang kekuatan deng kuasa supaya dorang bole user setang-setang deng kase bae pa orang dari macam-macam panyaki.

²Abis itu Dia utus pa dorang for kase tau pa orang-orang tentang bagimana Tuhan Allah Berkuasa sbagai Raja pa Dia pe orang-orang, deng lei Dia utus pa dorang for kase bae tu orang-orang saki.

³Dia bilang lei pa dorang, “Ngoni jang bawa apa-apa di perjalanan. Ngoni jang bawa tongkat, tas bekal, makanan, doi ato baju for baganti.

⁴Kalu ngoni dapa trima di satu ruma, tinggal jo di ruma itu sampe ngoni kase tinggal tu kota itu.

⁵Kong kalu ada orang yang nimau mo trima pa ngoni, ngoni kaluar jo dari dorang pe kota, ngoni paka jo tu abu dari pa ngoni pe kaki itu jadi tanda kalu Tuhan mo hukum pa dorang.”

⁶Abis itu, tu Yesus pe murit-murit bajalang pigi ka kampung-kampung for kase tau tu Kabar Bae dari Tuhan Allah deng kase bae orang-orang saki di mana-mana.

⁷Waktu itu raja Herodes yang da pegang prenta di daera Galilea. Dia dapa dengar tentang Yesus. Dia bingo lantaran ada orang yang bilang kalu Yesus itu no tu Yohanes Pembaptis yang dulu so mati kong skarang so hidop ulang.

⁸Kong ada lei yang bilang kalu Yesus itu no tu nabi Elia yang da muncul ulang. Trus ada lei yang bilang kalu Yesus itu no tu satu dari nabi-nabi dulu yang so hidop ulang.

⁹Kong raja Herodes bilang, “Tempo hari to kita so suru orang potong Yohanes pe kapala, no sapa dang tu Orang itu lei? Soalnya kita so dengar tentang tu hal-hal yang Dia da beking.” Kong raja Herodes brusaha supaya dia bole mo lia pa Yesus.

¹⁰Waktu Yesus pe murit-murit yang Dia da utus so babale ulang, dorang se cirita pa Dia samua tu dorang da beking. Kong Dia bawa pa dorang pi basandiri deng Dia ka satu kampung, tu de pe nama Betsaida.

¹¹Mar orang banya dapa tau tu tampa yang Yesus deng De pe murit-murit da pigi akang, kong dorang pi iko pa Dia. Yesus trima pa tu orang-orang itu kong babicara pa dorang tentang bagimana Tuhan Allah Berkuasa sbagai Raja pa Dia pe orang-orang, deng Dia lei kase bae orang-orang yang da saki.

¹²Serta so mo malam, Yesus pe dua blas murit datang pa Dia kong babilang, “Guru, ni tampa so jao dari kampung. Suru jo tu orang banya itu pigi, supaya dorang bole pigi ka kampung-kampung yang paling dekat dari sini for cari makang deng lei cari tampa mo manginap akang.”

¹³Mar Yesus babilang pa De pe murit-murit, “Ngoni yang kase makang pa dorang!” De pe murit-murit manyao, “Guru, yang ada pa torang cuma lima roti deng dua ikang, mar kalu Guru suka, torang mo pi bli akang makanan for dorang samua.”

¹⁴Yesus pe murit-murit da bilang bagitu lantaran ada kira-kira lima ribu orang laki-laki di situ, blum tarekeng tu parampuang deng tu anak-anak. Kong Yesus bilang pa De pe murit-murit, “Suru jo tu orang-orang itu dudu baklompo-klompo, satu klompo kira-kira lima pulu orang.”

¹⁵Kong tu murit-murit beking sama deng apa tu Yesus da suru, trus dorang suru samua orang dudu.

¹⁶Abis itu Yesus ambe tu lima roti deng dua ikang, Dia mangada ka langit kong bilang makase pa Tuhan Allah trus Dia pela-pela tu roti deng ikang itu, kong kase pa De pe murit-murit supaya se berbage pa tu orang banya.

¹⁷Kong dorang samua makang sampe kanyang. Abis itu, Yesus pe murit-murit kase kumpul tu makanan yang da talebe, samua ada dua blas loto.

¹⁸Satu kali Yesus samantara basombayang sandiri. Dia pe murit-murit lei ada di dekat pa Dia. Kong Dia batanya pa dorang, “Kalu menurut banya orang, sapa dang Kita ini?”

¹⁹Kong dorang manyao, “Ada tu ja bilang kalu Guru tu Yohanes Pembaptis, tu laeng ja bilang kalu Guru tu nabi Elia, kong ada lei yang bilang kalu Guru tu satu dari tu nabi-nabi dulu yang so hidop ulang.”

²⁰Trus Yesus batanya pa dorang, “No kalu menurut ngoni, sapa dang Kita ini?” Petrus manyao, “Kristus tu Raja yang se slamat pa manusia, tu Tuhan Allah da utus.”

²¹Kong Yesus larang deng kras pa Dia pe murit-murit supaya dorang jang kase tau tentang itu pa sapa-sapa.

²²Kong Yesus bilang lei, “Tu Anak Manusia musti mo mangada banya siksa, deng lei tu tua-tua Yahudi, imam-imam kapala deng ahli-ahli Taurat mo tolak pa Dia. Kong Dia mo dapa bunung, mar di hari katiga Tuhan Allah mo se hidop ulang pa Dia.”

²³Dia bilang pa dorang samua, “Sapa tu mo iko pa Kita, dia so nimbole iko tu de pe mau. Dia musti pikul de pe salib saban hari, tu de pe arti saban hari dia musti siap mendrita sampe mati kong iko pa Kita.

²⁴Soalnya sapa tu hidop cuma for de pe diri sandiri, so dia itu tu nyanda mo dapa hidop kekal. Mar komang, sapa tu mo kase de pe hidop lantaran iko pa Kita, so dia tu mo dapa hidop kekal.

²⁵Apa so de pe untung kalu satu orang dapa samua tu harta di dunia, mar itu samua beking dia binasa kong nyanda dapa hidop kekal?

²⁶Sapa yang malo mo mangaku kalu dia ja iko pa Kita deng tu Kita pe ajaran, Kita tu Anak Manusia lei mo malo mangaku kalu tu orang itu ja iko pa Kita deng tu Kita pe ajaran waktu Kita mo datang ulang. Waktu itu Kita mo datang deng Kita pe kuasa yang luar biasa deng Bapa pe kuasa yang luar biasa, kong Kita lei mo datang sama-sama deng tu malaekat-malaekat yang kudus.

²⁷Kita bilang pa ngoni, dari antara pa ngoni tu ada di sini, ada yang blum mo mati seblum lia tu Tuhan Allah Berkuasa sbagai Raja pa Dia pe orang-orang.”

²⁸Kira-kira dlapan hari abis Yesus kase tau tu hal-hal itu, Dia pangge pa Petrus, Yohanes deng Yakobus pi nae ka satu gunung for basombayang.

²⁹Kong waktu Yesus samantara basombayang di gunung itu, Dia pe muka dapa lia laeng deng Dia pe baju jadi puti mangkilat.

³⁰Trus kage-kage ada dua orang babicara deng Dia. Dorang dua itu nabi Musa deng nabi Elia.

³¹Waktu dorang dua da batunjung dong pe diri, dorang dua dapa lia bacahaya luar biasa. Dorang da babicara tentang Yesus yang mo mati, yang nanti mo jadi di Yerusalem.

³²Waktu itu, Petrus deng de pe dua tamang da tasono. Kong waktu dorang tabangong, dorang dapa lia Yesus bacahaya luar biasa deng tu dua orang yang da badiri di dekat pa Dia.

³³Kong waktu tu dua orang itu mo se tinggal pa Yesus, Petrus babilang pa Yesus, “Guru, pe snang skali torang ada di sini. Lebe bae torang kase badiri akang tiga sabua. Satu for Guru, satu for Musa, deng satu for Elia.” Mar Petrus nyanda bapikir bae-bae waktu dia da bilang itu.

³⁴Samantara dia bilang bagitu, datang awan kong tutu pa dorang, kong dorang jadi tako skali.

³⁵Trus dari dalam awan itu dapa dengar suara bagini, “Ini tu Kita pe Anak, Kita da pili pa Dia. Badengar jo pa Dia!”

³⁶Serta tu suara itu so nyanda lei dapa dengar, dorang lia Yesus so kurang sandiri. Kong waktu itu, tu Yesus pe tiga murit nyanda se cirita pa sapa-sapa apa tu dorang da lia.

³⁷De pe eso, Yesus deng Dia pe tiga murit itu turung dari gunung, kong orang banya datang pa Yesus.

³⁸Satu dari tu orang banya itu babicara deng suara kuat pa Yesus, dia bilang, “Guru, kita mohon pa Guru supaya tolong lia akang tu kita pe anak laki-laki, dia itu kasiang kita pe anak satu-satunya.

³⁹Dia da kemasukan setang. Kong kalu tu setang srang pa dia, dia kage-kage bataria kong tu setang beking dia kejang-kejang sampe de pe mulu kaluar gabu. Tu setang itu ja siksa trus pa dia kong amper-amper nimau mo se tinggal pa dia.

⁴⁰Kita so minta pa Guru pe murit-murit supaya dorang user akang tu setang itu dari pa kita pe anak, mar dorang nyanda mampu.”

⁴¹Kong Yesus bilang, “Hei ngoni orang-orang yang nyanda percaya deng yang sesat! Mo sampe tempo apa Kita musti tinggal di tenga-tenga pa ngoni, kong mo basabar pa ngoni?” Abis itu Yesus bilang pa tu bapak itu, “Bawa jo kamari tu ngana pe anak itu!”

⁴²Waktu tu anak itu pi badekat pa Yesus, tu setang banting tu anak itu ka tana kong beking de pe badan kejang-kejang. Mar Yesus togor deng kras tu setang itu kong Dia kase bae tu anak itu. Abis itu Yesus srahkan tu anak itu pa de pe papa.

⁴³Samua orang yang ada di situ jadi taheran-heran da lia tu Tuhan Allah pe kuasa yang basar. Waktu orang-orang masi taheran-heran lantaran da lia samua tu Yesus da beking, Yesus babilang pa Dia pe murit-murit,

⁴⁴“Ngoni dengar jo bae-bae samua tu Kita mo bilang ini: nanti ada orang yang mo srahkan tu Anak Manusia pa orang-orang yang ada kuasa.”

⁴⁵Mar Yesus pe murit-murit nyanda mangarti apa tu Dia da bilang. Tu Dia pe kata-kata itu masi rahasia for dorang supaya dorang nyanda mangarti apa tu de pe arti. Mar dorang rasa bagitu mo batanya pa Dia.

⁴⁶Satu kali, Yesus pe murit-murit baku ambe pendapat tentang sapa tu paling basar dari antara pa dorang.

⁴⁷Yesus tau tu dorang pe pikiran itu, so itu Dia ambe satu anak kong kase badiri di sabla pa Dia.

⁴⁸Trus Dia bilang pa De pe murit-murit, “Sapa jo yang trima anak kacili rupa ini lantaran tu orang itu percaya pa Kita, itu sama deng tu orang itu so trima pa Kita. Kong sapa jo yang trima pa Kita, itu sama deng dia so trima pa Tuhan Allah yang da utus pa Kita. Soalnya sapa yang anggap dia pe diri nyanda penting dari antara pa ngoni, so dia itu yang paling basar.”

⁴⁹Yohanes bilang pa Yesus, “Guru, torang lia ada satu orang yang da user setang pake Guru pe nama. Trus torang da larang pa dia supaya jang pake Guru pe nama, lantaran dia itu bukang torang pe tamang.”

⁵⁰Mar Yesus bilang, “Ngoni jang larang pa dia, lantaran sapa jo yang nyanda malawang pa torang, dia itu torang pe orang.”

⁵¹Serta tu waktu for Yesus mo taangka ka sorga so dekat, Dia ambe keputusan musti pigi ka Yerusalem.

⁵²Dia suru bebrapa orang pigi lebe dulu dari Dia. Dorang itu pigi kong maso ka satu kampung di daera Samaria, mo se siap samua for Yesus.

⁵³Mar tu orang-orang di kampung itu nimau mo trima[6] pa Yesus lantaran dorang tau Yesus pe tujuan mo pigi ka Yerusalem.

⁵⁴Waktu Yesus pe dua murit tu Yakobus deng Yohanes tau tentang itu, dorang batanya pa Dia, “Tuhan, apa Tuhan mau, torang minta api turung dari sorga for bakar abis pa dorang?”

⁵⁵Mar Yesus babale haga pa dorang trus togor pa dorang.

⁵⁶Kong dorang pigi ka kampung laeng.

⁵⁷Waktu Yesus deng De pe murit-murit samantara bajalang, ada satu orang babilang pa Dia, “Guru, ka mana jo Guru pigi, kita suka mo iko deng Guru.”

⁵⁸Yesus bilang pa dia, “Rubah[7] ada de pe lobang for tinggal akang, bagitu lei deng burung-burung ada de pe sarang for tinggal akang, mar tu Anak Manusia nyanda ada tampa for mo tinggal akang.”

⁵⁹Kong Yesus babilang pa orang laeng, “Iko jo pa Kita!” Mar tu orang itu manyao, “Bapak, kase isin akang kita pulang dulu for se kubur kita pe papa, abis itu kita iko deng Bapak.”

⁶⁰Yesus bilang pa dia, “Tu orang yang nyanda percaya, dorang itu sama deng orang yang so mati, kong se biar jo dorang urus tu dorang pe penguburan sandiri. Mar ngana, ngana pigi jo kong kase tau tu brita tentang Tuhan Allah Berkuasa sbagai Raja pa Dia pe orang-orang.”

⁶¹Kong ada lei orang laeng yang babilang pa Yesus, “Guru, kita suka mo iko pa Guru, mar kase isin akang kita pulang for babilang dulu pa kita pe kluarga, baru kita datang kong iko pa Guru.”

⁶²Kong Yesus bilang, “Orang yang da bapajeko, dia itu nimbole batengo ka blakang mar musti lia ka muka. Bagitu lei kalu mo jadi orang-orang dari Tuhan Allah yang Berkuasa sbagai Raja, ngoni nimbole pusing deng tu hal-hal laeng.”