Read Malay, Manado Yohanes 1 Bible Online

Yohanes 1 - Malay, Manado bible

Yohanes 1

¹Dulu seblum ni dunia ada, Yesus tu ja bilang firman itu so ada. Dia itu da sama-sama deng Tuhan Allah, kong Dia itu no tu Tuhan Allah.

²Tu firman itu so ada sama-sama deng Tuhan Allah seblum ni dunia ada.

³Tuhan Allah yang da beking samua yang ada lewat Yesus tu ja bilang tu firman itu. Kong kalu bukang lewat Dia, nyanda ada yang Tuhan Allah da beking biar cuma satu.

⁴Tu firman itu yang da kase hidop samua yang ada, deng Dia lei tu trang yang se trang tu manusia pe hati supaya bole tau tentang Tuhan Allah.

⁵Yesus tu ja bilang trang itu, beking tu glap jadi trang, kong tu glap nyanda mampu mo se kala tu trang itu.

⁶Satu waktu, ada tu satu orang yang Tuhan Allah da utus, de pe nama Yohanes.

⁷Dia itu datang jadi saksi for kase tau tentang tu trang itu, supaya samua orang yang da dengar tu dia da kase tau itu bole jadi percaya pa tu trang itu.

⁸Yohanes itu bukang tu trang itu, mar dia datang for kase tau tentang tu trang itu pa orang-orang.

⁹Kong tu trang yang sebenarnya, Dia itu no tu Yesus, Dia so datang ka dunia ini. Dia itu yang nanti mo se trang tiap orang pe hati supaya bole tau tentang Tuhan Allah.

¹⁰Tu trang itu so ada di dunia ini, kong lewat Dia no Tuhan Allah da beking ni dunia, mar tu orang-orang di dunia nyanda kanal pa Dia.

¹¹Dia datang pa Dia pe orang-orang sandiri tu orang-orang Yahudi, mar dorang nyanda trima pa Dia.

¹²Mar samua orang yang trima deng percaya pa Dia, Dia mo kase pa dorang itu kuasa for jadi Tuhan Allah pe anak-anak.

¹³Dorang itu da jadi Tuhan Allah pe anak-anak bukang lantaran dorang pe orang tua, bukang lei lantaran hubungan laki-bini, kong bukang lei lantaran suka mo dapa anak. Mar dorang da jadi Tuhan Allah pe anak-anak, itu lantaran Tuhan Allah sandiri yang beking dorang jadi Dia pe anak-anak.

¹⁴Dia yang ja bilang lei firman itu so jadi manusia, kong Dia tinggal di tenga-tenga pa torang manusia. Kong torang so lia tu Dia pe luar biasa, tu luar biasa yang Dia da dapa dari pa Tuhan Allah tu Dia pe Bapa, lantaran Dia itu Tuhan Allah pe Anak satu-satunya. Dia yang beking torang bole tau yang butul tentang Tuhan Allah deng tentang Tuhan Allah pe sayang pa torang.

¹⁵Satu kali, Yohanes Pembaptis kase tau pa orang-orang tentang Dia tu ja bilang firman itu, deng suara kuat dia bilang, “Dia itu yang kita so perna bilang pa ngoni! Kita da bilang kalu nanti ada yang mo datang abis kita, Dia pe kuasa lebe basar dari kita lantaran Dia memang so lebe dulu ada dari lei kita blum lahir.”

¹⁶Dia pe sayang pa torang nyanda perna abis. Kong lantaran Dia pe sayang itu, Dia nyanda brenti-brenti se tunjung tu Dia pe bae pa torang samua.

¹⁷Dulu dari pa nabi Musa, torang so trima tu Tuhan Allah pe atoran-atoran di kitab Taurat. Mar dari pa Yesus Kristus, torang bole tau yang butul tentang Tuhan Allah deng tentang Dia pe sayang pa torang.

¹⁸Nyanda ada orang yang perna lia pa Tuhan Allah, mar tu Tuhan Allah pe Anak satu-satunya yang jadi satu deng Tuhan Allah, Dia itu yang kase tunjung deng jelas pa torang bagimana tu Tuhan Allah tu Dia pe Bapa itu.

¹⁹Satu kali, tu pemimpin-pemimpin agama Yahudi di Yerusalem da utus bebrapa imam deng orang Lewi tu orang yang ja balayani di Ruma Ibada Pusat for pigi pa Yohanes Pembaptis. Dorang dapa utus for batanya bagini pa dia, “Sapa so sebenarnya bapak ini?”

²⁰Dia bilang pa dorang deng trus trang, “Kita ini bukang Kristus, tu Raja yang mo se slamat pa manusia.”

²¹Kong dorang batanya lei pa dia, “No kalu bagitu, bapak ini sapa dang? Apa bapak itu tu nabi Elia yang mo datang seblum Kristus?” Dia manyao pa dorang, “Bukang!” Trus dorang batanya ulang lei, “Apa bapak tu nabi yang torang da tunggu-tunggu mo datang itu?” Dia manyao lei, “Bukang!”

²²Kong dorang batanya lei pa dia, “Sapa dang bapak sebenarnya? Soalnya torang musti kase tau pa orang-orang yang da suru pa torang. Kalu bapak dang, sapa bapak ini?”

²³Trus Yohanes manyao pa dorang, “Kita ini tu orang yang nabi Yesaya da bilang babicara deng suara kuat di padang gurun bagini, ‘Kase tre tu jalang for sambut pa Tuhan!’ ”

²⁴Di antara tu orang-orang yang dapa suru itu, ada bebrapa orang dari golongan Farisi, tu golongan yang pegang kras tu atoran agama Yahudi.

²⁵Dorang itu batanya pa dia, “Kalu bapak itu bukang Kristus tu Raja yang mo se slamat pa torang, bukang lei nabi Elia deng bukang tu nabi yang mo datang itu, no kiapa dang bapak da babaptis?”

²⁶Yohanes manyao pa dorang, “Kita babaptis pa ngoni pake aer, mar so ada satu Orang di tenga-tenga pa ngoni yang ngoni nintau sapa Dia sebenarnya.

²⁷Dia itu yang da datang abis kita, deng Dia lei lebe penting dari kita. Hele mo bantu for buka akang Dia pe tali capatu sama deng tu biasa orang karja ja beking, kita nyanda pantas.”

²⁸Yohanes da babicara deng dorang itu di kampung Betania, di sabla kuala Yordan, tu tampa Yohanes ja babaptis akang orang.

²⁹De pe eso, Yohanes lia Yesus da badatang pa dia. Kong Yohanes bilang pa orang-orang, “Co lia, Dia itu tu Anak Domba Allah. Dia mo jadi korban for hapus manusia pe dosa, sama deng tu domba pe anak yang torang orang Israel ja se korban for hapus dosa.

³⁰Dia itu no tu kita pe maksut waktu kita da bilang, ‘Nanti ada yang mo datang abis kita, Dia pe kuasa lebe basar dari kita lantaran Dia memang so lebe dulu ada dari lei kita blum lahir.’

³¹Dulu, kita lei nintau kalu Dia itu Kristus tu Raja yang se slamat pa manusia. Mar skarang kita datang for babaptis deng aer, supaya bangsa Israel lei bole tau kalu Dia itu Kristus.”

³²Kong Yohanes Pembaptis kase tau yang dia da lia tu da jadi pa Yesus, dia bilang, “Kita so lia tu Tuhan Allah pe Roh rupa burung pombo turung dari langit kong tinggal di atas pa Dia.

³³Kong kita lei dulu nintau kalu Dia itu Kristus, tu Raja yang se slamat pa manusia. Mar Tuhan Allah yang da utus pa kita for babaptis deng aer, Dia so bilang pa kita bagini, ‘Kalu ngana lia tu Kita pe Roh turung ka atas satu Orang kong tinggal di atas pa Dia, so Dia yang mo baptis pa ngoni deng Roh Kudus.’

³⁴Kita so lia deng kita pe mata kapala sandiri, kong kita kase tau pa orang-orang kalu Dia itu tu Anak Allah.”

³⁵De pe eso, Yohanes Pembaptis badiri lei di situ deng dia pe dua murit.

³⁶Waktu Yohanes lia Yesus da balewat, dia bilang, “Co lia, Dia itu tu Anak Domba Allah. Dia mo jadi korban for hapus manusia pe dosa, sama deng tu domba pe anak yang torang orang Israel ja se korban for hapus dosa.”

³⁷Tu Yohanes pe dua murit itu da dengar apa tu Yohanes da bilang, trus dorang pi iko pa Yesus.

³⁸Yesus batengo ka blakang kong Dia lia dorang da baiko pa Dia. Trus Dia batanya pa dorang, “Ngoni da cari apa?” Dorang manyao, “Guru, di mana Guru pe tampa tinggal?”

³⁹Dia manyao pa dorang, “Mari jo kong ngoni mo lia tu Kita pe tampa tinggal.” Kong dorang pigi deng Yesus for lia di mana Dia pe tampa tinggal. Waktu itu kira-kira jam ampa sore kong spanjang hari itu dorang tinggal sama-sama deng Yesus.

⁴⁰Tu satu orang yang da dengar tu Yohanes da bilang kong iko pa Yesus, de pe nama Andreas. Dia itu Simon Petrus pe ade.

⁴¹Kong tu Andreas iko pigi pa de pe sudara Simon kong bilang pa dia, “Torang so baku dapa deng Mesias.” (Tu de pe arti Kristus tu Raja yang mo se slamat pa manusia).

⁴²Kong Andreas bawa tu Simon pa Yesus. Trus Yesus haga pa Simon deng bilang, “Ngana ini Simon, tu Yohanes pe anak. Mar skarang ngana pe nama jadi Kefas.” (Itu sama deng Petrus tu de pe arti batu).

⁴³De pe eso, Yesus mo pigi ka daera Galilea. Seblum Dia pigi, Dia pi baku dapa dulu deng Filipus kong bilang pa dia, “Mari jo iko pa Kita!”

⁴⁴Filipus pe asal dari Betsaida, sama deng Andreas deng Petrus lei dari situ.

⁴⁵Abis Yesus pangge pa Filipus for iko pa Dia, Filipus pi baku dapa deng Natanael trus bilang pa dia, “Torang so baku dapa deng tu Orang yang Tuhan Allah da janji mo se slamat pa torang. Dia itu dulu tu nabi Musa da bilang di kitab Taurat deng tu nabi-nabi laeng lei ja bilang. Dia pe nama Yesus, tu Yusuf pe anak. Kong Yesus itu dari Nazaret.”

⁴⁶Kong Natanael manyao, “Masa komang ada yang bagus yang datang dari kampung Nazaret.” Kong Filipus bilang, “Mari jo kong ngana lia sandiri!”

⁴⁷Trus dorang pigi pa Yesus. Waktu Yesus lia Natanael badatang pa Dia, Yesus bilang, “Co lia, dia ini butul-butul orang Israel, dia nyanda pangbadusta.”

⁴⁸Natanael bilang pa Yesus, “Bagimana kong Bapak bole kanal pa kita dang?” Yesus manyao, “Tu Filipus blum pangge pa ngana, Kita so lia pa ngana di bawa pohong ara.”

⁴⁹Natanael bilang pa Yesus, “Guru, Guru ini memang Anak Allah. Guru ini tu bangsa Israel pe Raja.”

⁵⁰Yesus bilang pa dia, “Ngana percaya pa Kita cuma lantaran Kita bilang ‘Kita lia pa ngana di bawa pohong ara?’ Ngana mo lia tu hal-hal yang jao lebe basar dari itu yang Kita mo beking.”

⁵¹Kong Yesus bilang lei, “Kita bilang pa ngana, nanti satu waktu ngana mo lia tu langit tabuka kong Tuhan Allah pe malaekat-malaekat nae turung pigi pa Anak Manusia.”