Read Malay, Manado Yohanes 11 Bible Online

Yohanes 11 - Malay, Manado bible

Yohanes 11

¹Ada satu laki-laki yang da saki brat. Dia pe nama Lazarus, kong dia da tinggal di kampung Betania, satu kampung deng de pe dua sudara parampuang tu Maria deng Marta.

²Maria itu no tu parampuang yang mo se sirang minya wangi pa Yesus pe kaki deng seka pake dia pe rambu.

³Kong lantaran Lazarus da saki brat, tu de pe dua sudara parampuang itu suru orang pigi pa Yesus, trus kase tau pa Dia, “Tuhan, tu Tuhan pe tamang Lazarus yang Tuhan sayang da saki brat.”

⁴Waktu Yesus dengar tu brita itu, Dia bilang, “Tu Lazarus pe panyaki itu nyanda mo beking dia mati, mar mo se tunjung tu Tuhan Allah pe luar biasa. Deng lei lewat dia pe saki itu, orang-orang mo puji deng hormat pa Anak Allah.”

⁵Yesus memang sayang pa Maria, Marta deng Lazarus.

⁶Mar waktu Yesus dengar Lazarus da saki, Dia sengaja batinggal slama dua hari lei di tampa Dia da tinggal akang itu.

⁷Kong serta so lewat tu dua hari itu, Yesus bilang pa De pe murit-murit, “Mari jo torang pigi ulang ka daera Yudea.”

⁸Mar dorang bilang pa Dia, “Guru, baru-baru ini tu orang-orang Yahudi da coba lempar batu for bunung pa Guru. Kong kiapa dang skarang Guru masi suka mo ka sana?”

⁹Yesus manyao pa dorang pake prumpamaan, “Tu siang hari itu to ada dua blas jam. Jadi sapa jo yang bajalang di siang hari, dia pasti nyanda mo tasontong lantaran ada trang.[10]

¹⁰Mar kalu orang bajalang malam hari, dia pe kaki mo tasontong lantaran nyanda ada trang.”

¹¹Abis Yesus bilang bagitu, Dia bilang lei pa dorang, “Torang pe tamang Lazarus itu so tatidor, mar Kita mo pi ka sana for se bangong pa dia.”

¹²Kong Dia pe murit-murit bilang pa Dia, “Tuhan, kalu memang Lazarus da tidor, dia itu pasti mo bae kong bangong.”

¹³Padahal sebenarnya, waktu Yesus bilang Lazarus da tatidor itu, Yesus pe maksut Lazarus so mati. Mar tu murit-murit pikir kalu tu Lazarus cuma da tidor sama deng biasa.

¹⁴So itu, Yesus bilang pa dorang deng trus trang, “Sebenarnya Lazarus itu so mati.

¹⁵Mar Kita snang Kita nyanda ada di situ waktu dia mati, lantaran itu ada de pe untung for ngoni, itu mo beking ngoni lebe percaya pa Kita. Mari jo torang pigi pa Lazarus skarang.”

¹⁶Kong tu satu murit yang de pe nama Tomas tu ja pangge lei Kembar itu babilang pa tu murit-murit laeng, “Mari jo torang pigi ka sana, biar jo torang mati sama-sama deng Dia.”

¹⁷Waktu Yesus deng Dia pe murit-murit sampe di kampung Betania, ada orang yang se tau pa Yesus kalu Lazarus so mati kong so ampa hari da se kubur.

¹⁸Kampung Betania itu nyanda jao dari Yerusalem, de pe jarak kira-kira tiga kilometer.

¹⁹Jadi banya orang Yahudi dari Yerusalem yang datang for hibur pa Maria deng Marta lantaran Lazarus tu dorang dua pe sudara so mati.

²⁰Kong waktu Marta dapa dengar kalu Yesus so datang, dia pi dola pa Yesus, mar tu Maria tetap tinggal di ruma.

²¹Pe baku dapa deng Yesus, Marta bilang pa Dia, “Tuhan, kalu kwa Tuhan ada di sini, pasti kita pe sudara Lazarus nyanda mati.

²²Mar biar bagitu, skarang lei kita tetap tau kalu Tuhan Allah mo kase apa jo yang Tuhan minta dari pa Dia.”

²³Yesus bilang pa Marta, “Ngana pe ade itu mo hidop ulang.”

²⁴Kong Marta bilang pa Yesus, “Tuhan, kita tau no kalu dia nanti mo hidop ulang di hari kiamat, waktu samua orang yang mati mo hidop ulang.”

²⁵Yesus bilang lei pa Marta, “Kita ini yang se hidop ulang tu orang yang so mati, deng Kita ini lei yang bole kase tu hidop kekal. Jadi, sapa jo yang percaya pa Kita, biar lei nanti dia so mati, dia mo hidop ulang.

²⁶Kong tiap orang yang hidop deng percaya pa Kita, dia itu nyanda mo mati slama-lamanya.” Trus Yesus tanya pa Marta, “Apa ngana percaya deng tu Kita da bilang itu?”

²⁷Marta manyao pa Yesus, “Iyo Tuhan, kita percaya kalu Tuhan itu Kristus tu Raja yang se slamat pa manusia. Tuhan tu Anak Allah yang Tuhan Allah da janji datang ka dunia ini.”

²⁸Abis Marta bilang bagitu pa Yesus, dia babale pa de pe ruma kong pangge pa de pe sudara Maria trus babise pa dia, “Guru so mo datang, kong Dia da pangge pa ngana.”

²⁹Pe dengar itu, Maria iko badiri kong pigi pa Yesus.

³⁰Mar waktu itu, Yesus blum maso ka kampung, Dia masi ada di tampa Dia da baku dapa akang deng Marta.

³¹Kong di ruma, ada tu orang-orang Yahudi yang da sama-sama deng Maria for hibur pa dia. Waktu dorang lia Maria iko da badiri kong pigi kaluar, dorang iko pa dia lantaran dorang pikir kalu dia mo pigi ka kubur for manangis di situ.

³²Pe sampe jo Maria di tampa Yesus ada, dia lia pa Yesus kong berlutut di muka kaki pa Yesus trus babilang, “Tuhan, kalu kwa Tuhan ada di sini, pasti kita pe sudara nyanda mati.”

³³Waktu Yesus lia Maria da manangis, deng tu orang-orang Yahudi yang da sama-sama deng dia da manangis lei, Yesus pe hati jadi susa deng sedi skali. Kong Dia bilang,

³⁴“Di mana dang ngoni da kubur akang pa Lazarus?” Dorang manyao pa Yesus, “Mari jo Tuhan, torang pi lia.”

³⁵Kong Yesus manangis.

³⁶Bebrapa orang Yahudi babilang, “Co lia, Dia sayang skali pa Lazarus.”

³⁷Mar ada tu laeng babilang, “Dia tu da beking orang buta bole balia. Apa Dia nyanda mampu beking sesuatu supaya Lazarus nyanda mati?”

³⁸Yesus pe hati jadi sedi skali lei, kong Dia pigi di goa, tu tampa da kubur akang pa Lazarus. Tu lobang maso ka goa da tutu akang deng batu basar.

³⁹Kong Yesus bilang, “Se guling tu batu itu.” Mar Marta tu Lazarus pe sudara bilang, “Mar Tuhan, dia itu so ampa hari da mati, pasti dia so bobou.”

⁴⁰Yesus bilang, “Kita so bilang pa ngana tadi to? Kalu ngana percaya pa Kita, ngana mo lia tu Tuhan Allah pe luar biasa.”

⁴¹Kong dorang se guling tu batu itu. Trus Yesus bahaga ka atas kong bilang, “Bapa, Kita bilang makase pa Bapa lantaran Bapa so dengar pa Kita.

⁴²Kita tau kalu Bapa slalu dengar pa Kita, mar Kita bilang samua ini supaya orang banya yang ada di sini bole dengar kong dorang bole percaya kalu Bapa yang da utus pa Kita.”

⁴³Abis Dia bilang bagitu, Dia babilang deng suara kuat, “Lazarus, kaluar jo!”

⁴⁴Kong Lazarus yang so mati itu kaluar dari tu kubur. Tu dia pe tangan deng kaki masi da talingkar deng kaeng puti tu biasa ja pake for orang mati, kong de pe muka da tatutu deng kaeng lei. Trus Yesus bilang pa dorang, “Buka akang tu kaeng-kaeng itu supaya dia bole bebas bajalang.”

⁴⁵Waktu tu orang-orang Yahudi yang da datang bahibur pa Maria lia tu Yesus da beking itu, banya dari pa dorang yang jadi percaya pa Yesus.

⁴⁶Mar ada lei tu bebrapa orang dari pa dorang yang pigi pa tu orang-orang dari golongan Farisi trus balapor tentang apa tu Yesus so beking.

⁴⁷So itu, tu orang-orang dari golongan Farisi deng tu imam-imam kapala pangge Mahkamah Agama for bakumpul, kong dorang bilang, “Apa tu torang musti mo beking pa Yesus? Soalnya Dia itu so beking banya mujisat.

⁴⁸Kalu torang se biar pa Dia, samua orang mo jadi percaya pa Dia, kong pemerenta Romawi mo suru tu dong pe tentara-tentara datang kong se ancor tu torang pe Ruma Ibada Pusat deng lei tu torang pe bangsa.”

⁴⁹Mar ada satu orang dari antara pa dorang, tu de pe nama Kayafas. Dia yang da jadi imam basar di taong itu. Tu Kayafas itu bilang pa dorang, “Ngoni ini nintau apa-apa.

⁵⁰Ngoni nyanda mangarti apa yang bae for ngoni. Lebe bae cuma satu orang yang mati for samua orang, daripada tu orang-orang Romawi mo kase binasa samua torang pe bangsa Yahudi.”

⁵¹Kayafas itu yang da jadi imam basar di taong itu, kong dia da se tau kalu Yesus itu mo mati jadi korban for bangsa Yahudi. Waktu itu Kayafas da se tau tentang itu bukang dari dia pe pikiran sandiri, mar dia da kase tau tu pesan yang Tuhan Allah da bilang pa dia.

⁵²Mar Yesus mati bukang cuma for torang pe bangsa Yahudi, Dia mati supaya lei Dia bole mo kumpul jadi satu tu orang-orang yang so jadi Tuhan Allah pe orang-orang yang so tafiaro kamana-mana.

⁵³Mulai waktu itu, tu pemimpin-pemimpin agama Yahudi baku skongkol mo bunung pa Yesus.

⁵⁴So itu Yesus so nyanda lei muncul di muka umum di antara orang-orang Yahudi di situ, mar Dia pigi ka satu kota tu de pe nama Efraim, tu kota yang ada di daera dekat padang gurun. Trus Dia tinggal di situ sama-sama deng Dia pe murit-murit.

⁵⁵Waktu itu so dekat tu hari raya agama Yahudi tu prayaan Paskah, so itu banya orang Yahudi dari daera-daera laeng datang ka Yerusalem for iko dorang pe atoran agama beking bersi diri.[11]

⁵⁶Kong waktu dorang bakumpul di kompleks Ruma Ibada Pusat, dorang da cari-cari pa Yesus, kong dorang baku bilang, “Menurut ngoni, apa Yesus mo datang di hari raya ini?”

⁵⁷Dorang baku bilang bagitu lantaran tu imam-imam kapala deng orang-orang Yahudi dari golongan Farisi so kase prenta supaya tiap orang yang tau kalu Yesus ada di mana, tu orang itu musti balapor supaya dorang bole mo tangka pa Yesus.