Read Malay, Manado Yohanes 12 Bible Online

Yohanes 12 - Malay, Manado bible

Yohanes 12

¹Anam hari seblum hari raya agama Yahudi tu prayaan Paskah, Yesus datang ka kampung Betania tu Lazarus pe kampung. Tu Lazarus itu yang da mati kong Yesus da se hidop ulang.

²Kong di kampung itu, bebrapa orang beking acara makang-makang for Yesus. Kong Waktu itu, Marta da layani pa dorang, trus tu Lazarus da dudu makang sama-sama deng Yesus deng tu orang-orang yang datang ka situ.

³Waktu dorang samantara bamakang, Maria ambe stenga liter minya wangi asli tu de pe nama narwastu, tu minya yang de pe harga mahal skali. Kong dia se sirang tu minya wangi itu di kaki pa Yesus, trus dia seka Yesus pe kaki deng de pe rambu. Kong tu minya wangi itu pe bobou wangi dapa ciong di sluru ruma itu.

⁴Mar Yudas Iskariot tu satu dari Yesus pe murit-murit yang nanti mo bahianat pa Yesus babilang bagini,

⁵“Kiapa tare tu minya wangi itu nyanda jual jo? Kalu mo jual, de pe harga 300 doi perak, kong tu doi yang pe banya itu bole mo se berbage pa orang-orang miskin.”

⁶Sebenarnya Yudas da babicara bagitu bukang lantaran dia da tarukira tu orang-orang miskin, mar itu lantaran dia papancuri. Dia itu yang da se tanggong jawab ja pegang dorang samua pe doi, kong dia ja pancuri akang tu doi itu.

⁷Mar Yesus bilang, “Kase biar jo Maria beking itu pa Kita, lantaran deng dia beking itu, dia itu so kase siap pa Kita for mo kubur.

⁸Soalnya Kita so nyanda mo ada sama-sama deng ngoni lei, mar tu orang miskin slalu ada di sekitar pa ngoni kong kapan jo ngoni suka, ngoni bole bantu pa dorang.”

⁹Ada banya skali orang Yahudi da dengar kalu Yesus ada di kampung Betania, so itu dorang pigi ka sana. Mar dorang da ka sana bukang cuma mo lia pa Yesus, mar mo lia lei pa Lazarus tu orang yang Yesus da se hidop ulang.

¹⁰So itu imam-imam kapala baku skongkol for mo cari bunung lei pa Lazarus.

¹¹Soalnya deng dia da hidop ulang, banya orang Yahudi yang so jadi percaya pa Yesus kong so nimau iko pa dorang.

¹²De pe eso, banya orang so datang ka Yerusalem for rayakan hari raya agama Yahudi tu prayaan Paskah. Dorang da dengar kalu Yesus samantara badatang lei ka Yerusalem.

¹³Tu orang banya itu ambe daong-daong palem, trus pi sambut pa Yesus kong babilang deng suara kuat, “Hosana! Puji jo pa Dia yang da datang dalam nama Tuhan. Dia itu bangsa Israel pe Raja!”

¹⁴Yesus dapa satu ekor keledai muda, kong Dia da nae tu keledai itu. Tu da jadi itu sama deng tu nabi da tulis di Kitab Suci bagini,

¹⁵“Hei orang-orang Yerusalem tu ja bilang lei orang-orang Sion, ngoni jang tako, lia jo tu ngoni pe Raja so badatang, Dia da dudu di atas satu keledai muda.”

¹⁶Waktu itu, Yesus pe murit-murit blum mangarti deng apa tu orang banya da beking for Yesus. Mar nanti waktu Yesus so mati kong hidop ulang, baru dorang mo mangarti samua yang orang da beking itu pa Yesus, itu samua sama deng tu da tulis di Kitab Suci.

¹⁷Tu orang-orang yang ada waktu Yesus da pangge pa Lazarus kaluar dari kubur kong se hidop ulang pa dia, dorang itu kase tau trus pa orang-orang laeng tentang tu Yesus da beking itu.

¹⁸So itu, banya orang pi sambut pa Yesus lantaran dorang so dengar kalu Dia so beking tu mujisat yang satu itu.

¹⁹Kong tu orang-orang dari golongan Farisi baku bilang, “Co ngoni lia sandiri itu, samua tu torang pe usaha for mo se brenti pa Dia nyanda ada de pe hasil. Samua orang di dunia datang iko pa Dia.”

²⁰Waktu orang banya datang ka Yerusalem for baibada pa dorang pe hari raya itu, dari antara pa dorang, ada lei bebrapa orang Yunani.

²¹Tu bebrapa orang Yunani itu pigi pa Filipus. Tu Filipus itu, orang Betsaida di daera Galilea. Kong dorang bilang pa dia, “Bapak, torang suka mo baku dapa deng Yesus.”

²²Filipus pi kase tau itu pa Andreas, trus dorang dua pi kase tau lei pa Yesus.

²³Kong Yesus bilang pa dorang, “So sampe de pe waktu Tuhan Allah mo se tunjung tu Anak Manusia pe luar biasa.

²⁴Kita bilang pa ngoni, kalu bibit gandum nyanda da se tanang di tana, tu bibit itu cuma satu kong bole mo bilang sama deng so mati. Mar kalu tu bibit itu da se tanang di tana, tu satu bibit itu bole mo batumbu kong babua banya.

²⁵Bagitu lei deng ngoni, sapa tu hidop cuma for de pe diri sandiri, so dia yang nyanda mo dapa hidop kekal. Mar sapa yang kase tu dia pe hidop di dunia ini lantaran iko pa Kita, dia itu mo dapa hidop kekal.

²⁶Sapa jo tu da jadi orang yang ja beking tu Kita da suru, dia itu musti iko pa Kita kong di mana jo Kita ada, di situ lei dia musti ada. Sapa jo yang ja beking tu Kita da suru, dia itu mo dapa hormat dari pa Bapa.”

²⁷Yesus babicara lei, “Kita sedi skali. Kita nintau mo bilang apa. Apa Kita mo bilang, ‘Bapa, se lapas akang Kita dari tu Kita pe pendritaan ini?’ Tantu nyanda bagitu. Soalnya justru Kita da datang ka dunia ini for alami tu pendritaan.”

²⁸Kong Yesus basombayang, “Bapa, se tunjung jo tu Bapa pe luar biasa.” Kong dapa dengar suara dari sorga, “Kita so se tunjung tu Kita pe luar biasa, kong Kita mo se tunjung ulang lei tu Kita pe luar biasa.”

²⁹Tu orang banya yang da badiri di situ da dengar tu suara itu, kong dorang bilang kalu itu suara guntur. Ada lei yang bilang kalu itu malaekat pe suara yang da babicara deng Yesus.

³⁰Kong Yesus bilang, “Tu suara yang ngoni da dengar itu da babicara bukang for Kita, mar for ngoni.

³¹Skarang ini so de pe waktu for Tuhan Allah mo adili orang-orang yang ada di dunia ini, deng lei so de pe waktu for tu setang pe bos yang ada kuasa di dunia ini mo dapa se kala.

³²Kong Kita, kalu Kita dapa se angka tinggi di atas bumi, Kita mo tarek samua orang for iko pa Kita.”

³³Yesus bilang bagitu supaya jelas kalu nanti Dia mo mati deng cara se salib.

³⁴Kong tu orang banya itu babilang, “Torang so baca di atoran-atoran kitab Taurat kalu Kristus tu Raja yang mo se slamat pa manusia itu tetap mo hidop slama-lamanya. Jadi bagimana lei kong Bapak bilang kalu Anak Manusia mo dapa angka tinggi di atas bumi kong mo mati? Sapa dang tu Anak Manusia itu?”

³⁵Kong Yesus bilang pa dorang, “So nyanda lama lei tu trang ada deng ngoni, so itu slama tu trang itu masi ada sama-sama deng ngoni, ngoni musti hidop trus di trang itu. Deng ngoni bagitu, tu glap nyanda mo kuasai pa ngoni. Sapa jo yang hidop di glap, dia itu nintau ka mana dia da pigi.

³⁶Jadi waktu trang masi ada sama-sama deng ngoni, ngoni percaya jo pa tu trang itu supaya tu trang lei beking trang tu ngoni pe hati.” Abis Yesus bilang bagitu, Dia kaluar dari situ kong pigi ka tampa yang dorang nintau.

³⁷Biar lei Yesus beking banya mujisat di muka pa dorang, mar dorang tetap nyanda percaya pa Dia.

³⁸Deng dorang bagitu, so gnap apa tu nabi Yesaya da bilang dulu tu da tulis di Kitab Suci bagini, “Tuhan, nyanda ada orang yang percaya deng tu brita yang torang da kase tau. Biar lei Tuhan so kase tunjung tu Tuhan pe kuasa pa dorang, dorang tetap nyanda percaya.”

³⁹Dorang nimbole mo percaya lantaran dulu lei nabi Yesaya so perna da tulis di Kitab Suci bagini,

⁴⁰“Tuhan so beking dorang nimau mo lia tu butul, itu sama deng Dia so se buta tu dorang pe mata. Tuhan so beking dorang pe hati kras, dorang nyanda mo mangarti tu butul. Kong deng bagitu, dorang nyanda mo bertobat, supaya Tuhan nyanda mo se slamat lei pa dorang.”

⁴¹Nabi Yesaya da kase tau tu samua itu lantaran Tuhan Allah so kase penglihatan pa dia tentang Yesus yang luar biasa deng lei kase tau tentang Dia yang mo datang itu.

⁴²Biar lei ada orang-orang yang nyanda percaya pa Yesus, mar ada banya jo yang jadi percaya pa Dia, malatare dari pa dorang yang percaya itu ada tu pemimpin-pemimpin agama Yahudi. Cuma dorang nimau mo se tunjung pa orang-orang kalu dorang so jadi percaya, lantaran dorang tako kalu tu orang-orang Yahudi dari golongan Farisi mo larang pa dorang maso ka ruma ibada.

⁴³Soalnya tu pemimpin-pemimpin agama Yahudi lebe suka kalu dorang dapa puji deng hormat dari pa manusia daripada dorang dapa puji deng hormat dari pa Tuhan Allah.

⁴⁴Kong Yesus babilang deng suara kuat, “Sapa jo yang percaya pa Kita, dia itu bukang cuma percaya pa Kita, mar dia lei percaya pa Tuhan Allah yang da utus pa Kita.

⁴⁵Kong sapa jo yang so lia pa Kita, dia itu lei so lia pa Tuhan Allah yang da utus pa Kita.

⁴⁶Kita ini datang ka dunia ini sbagai trang, supaya sapa jo yang percaya pa Kita, dia itu so nyanda lei mo hidop di dalam glap.

⁴⁷Kalu orang dengar tu Kita pe ajaran mar dia nyanda beking itu, Kita nyanda mo hakimi pa dia. Soalnya Kita datang bukang for mo hakimi orang-orang yang ada di dunia, mar Kita datang for mo se slamat pa dorang.

⁴⁸Sapa jo yang tolak pa Kita deng nimau mo trima tu Kita pe ajaran, so ada yang mo bahakimi pa dia, itu no tu Kita pe ajaran yang Kita da se tau. Nanti di hari kiamat, tu ajaran itu yang mo bahakimi pa dia.

⁴⁹Soalnya tu Kita pe ajaran bukang dari Kita pe diri sandiri, mar itu dari Bapa yang da utus pa Kita. Dia itu yang da prenta pa Kita for bilang tu ajaran yang musti Kita bilang deng yang musti Kita se tau.

⁵⁰Kong Kita tau kalu lewat Tuhan Allah pe prenta itu, ngoni bole dapa hidop kekal. Jadi apa tu Kita ja se ajar pa ngoni, itu samua sama deng Bapa da kase tau pa Kita.”