Read Malay, Manado Yohanes 13 Bible Online

Yohanes 13 - Malay, Manado bible

Yohanes 13

¹So dekat tu hari raya agama Yahudi tu prayaan Paskah, kong Yesus tau kalu so sampe tu de pe waktu for Dia mo kase tinggal ni dunia for babale pa Dia pe Bapa. Dia sayang pa Dia pe orang-orang yang ada di dunia ini, kong Dia mo se tunjung kalu Dia slalu sayang pa dorang biar lei sampe pa Dia pe akhir hidop.

²Kong waktu Yesus deng Dia pe murit-murit da makang malam, setang pe bos so taru pikiran jaha di hati pa Yudas tu Simon Iskariot pe anak, supaya dia bahianat pa Yesus.

³Yesus tau kalu Dia pe Bapa so kase samua kuasa pa Dia. Dia lei tau kalu Dia itu datang dari Tuhan Allah kong Dia nanti mo babale ulang pa Tuhan Allah.

⁴Jadi waktu dorang da makang sama-sama itu, Yesus badiri trus buka tu Dia pe juba. Abis itu, Dia ambe handuk kong se ika pa Dia pe pinggang.

⁵Dia saleng aer di loyang, kong Dia mulai cuci tu Dia pe murit-murit pe kaki, trus Dia lap tu dorang pe kaki deng handuk yang Dia da se ika pa Dia pe pinggang.

⁶Kong waktu Dia sampe pa Simon Petrus for cuci tu Petrus pe kaki, Petrus bilang pa Dia, “Tuhan, masa komang Tuhan mo cuci tu kita pe kaki?”

⁷Yesus manyao pa Petrus, “Apa tu Kita da beking ini, ngana blum mo mangarti skarang, mar nanti komang ngana mo mangarti ini.”

⁸Petrus bilang lei, “Tuhan, kita sama skali nyanda perna mo kase Tuhan mo cuci tu kita pe kaki.” Mar Yesus bilang pa Petrus, “Kalu Kita nyanda cuci tu ngana pe kaki, ngana nyanda ada hubungan deng Kita.”

⁹Kong Simon Petrus bilang, “Tuhan, kalu bagitu dang, jang cuma kita pe kaki, mar kita pe tangan deng kapala lei.”

¹⁰Yesus bilang lei pa Petrus, “Sapa jo yang so mandi, dia pe badan itu so bersi samua, so itu dia cuma perlu se bersi ulang tu dia pe kaki. Bagitu lei ngoni, ngoni lei so bersi, mar memang nyanda samua dari pa ngoni yang so bersi.”

¹¹Yesus bilang bagitu lantaran Dia tau sapa yang mo bahianat pa Dia, so itu Dia bilang kalu nyanda samua dari pa dorang yang so bersi.

¹²Serta Yesus so klar cuci tu dorang pe kaki, Dia pake ulang tu Dia pe juba trus babale ka tampa yang dia da dudu akang. Trus Dia batanya pa dorang, “Apa ngoni mangarti deng tu Kita da beking tadi?

¹³Ngoni pangge pa Kita ‘Guru’ deng ‘Tuhan’ kong memang itu butul. Kita ini ngoni pe Guru deng ngoni pe Tuhan tu ngoni ja iko akang.

¹⁴Jadi kalu Kita tu ngoni pe Guru deng Tuhan da cuci tu ngoni pe kaki sama deng budak ja beking, ngoni deng ngoni lei musti cuci ngoni pe kaki satu deng laeng.

¹⁵Kita so kase conto pa ngoni beking bagitu, jadi ngoni lei musti beking pa orang laeng sama deng tu Kita da beking pa ngoni.

¹⁶Kita bilang pa ngoni, tu budak nyanda lebe penting dari de pe tuang, tu orang yang dapa utus lei nyanda lebe penting dari tu orang yang da bautus.

¹⁷Kalu ngoni mangarti tu Kita da se ajar pa ngoni skarang ini, ngoni lei musti beking itu supaya ngoni snang.

¹⁸Mar bukang for ngoni samua tu Kita da bilang itu. Soalnya Kita tau sapa yang Kita so pili. Mar apa tu da tulis di Kitab Suci musti mo jadi, bagini tu da tatulis, ‘Sapa yang da makang roti sama-sama deng Kita, dia itu nanti yang mo bahianat pa Kita.’

¹⁹Kita se tau itu skarang pa ngoni seblum itu jadi, supaya kalu itu so jadi, ngoni bole percaya kalu ‘Kita ini’ Dia yang Kita so perna bilang pa ngoni.

²⁰Kita bilang pa ngoni, sapa jo yang trima orang-orang yang Kita da utus, dia itu lei so trima pa Kita. Kong sapa jo yang trima pa Kita, dia lei trima pa Bapa yang da utus pa Kita.”

²¹Abis Yesus bilang bagitu, Dia jadi sedi kong babilang lei, “Kita bilang pa ngoni, ada satu dari pa ngoni yang mo bahianat pa Kita.”

²²Kong Dia pe murit-murit baku haga, dorang jadi bingo tentang sapa tu Yesus pe maksut itu.

²³Waktu itu ada satu dari Yesus pe murit, tu murit yang Dia paling sayang, dia da dudu dekat skali deng Yesus.

²⁴Simon Petrus basein pa tu murit itu kong babilang pa dia, “Tanya akang dang, sapa tu Guru pe maksut itu!”

²⁵Trus tu murit yang da dudu di dekat skali deng Yesus itu batanya pa Dia, “Tuhan, sapa dang dia itu?”

²⁶Yesus manyao, “Dia itu yang nanti Kita mo kase akang roti abis Kita se colo tu roti di baskom.” Abis bilang bagitu, Yesus ambe roti spanggal trus se colo, kong Dia kase pa Yudas, tu Simon Iskariot pe anak.

²⁷Abis Yudas trima tu roti itu, setang pe bos iko kuasai pa dia. Kong Yesus bilang pa dia, “Apa tu ngana mo beking, iko beking jo itu.”

²⁸Mar nyanda ada satu dari pa dorang tu dudu makang yang mangarti apa tu Yesus pe maksut bilang bagitu pa Yudas.

²⁹Kong lantaran Yudas yang ja pegang doi, ada yang pikir kalu Yesus da suru pa Yudas for pi babli apa-apa yang dorang perlu for tu prayaan itu ato for kase akang sesuatu pa orang miskin.

³⁰Waktu Yudas so trima tu roti dari pa Yesus, dia iko pigi. Kong waktu itu so malam.

³¹Serta Yudas so pigi, Yesus bilang, “Skarang so de pe waktu for Anak Manusia dapa puji deng hormat, deng lei Tuhan Allah dapa puji deng hormat lewat apa yang Anak Manusia mo beking.

³²Kong kalu Tuhan Allah dapa puji deng hormat lewat apa tu Anak Manusia da beking, Tuhan Allah lei mo beking tu Anak Manusia dapa puji deng hormat, kong samua itu so nyanda lama lei mo jadi.

³³Kita pe anak-anak, so nyanda lama lei Kita so nyanda mo ada sama-sama deng ngoni. Ngoni ini mo cari pa Kita, mar sama deng yang Kita so bilang tu hari pa pemimpin-pemimpin Yahudi, Kita mo bilang itu lei pa ngoni, ‘Di tampa tu Kita mo pigi akang, ngoni nimbole mo pigi ka situ.’

³⁴Skarang, Kita mo kase prenta baru pa ngoni bagini: Ngoni musti baku sayang. Ngoni musti baku sayang sama deng Kita so sayang pa ngoni.

³⁵Deng ngoni baku sayang, samua orang bole tau kalu ngoni itu orang-orang yang iko tu Kita pe ajaran.”

³⁶Simon Petrus bilang pa Yesus, “Tuhan, Tuhan mo pigi ka mana dang?” Yesus manyao pa dia, “Tu tampa yang Kita mo pigi akang skarang, itu blum bole ngana mo pigi akang. Mar nanti ngana mo menyusul pa Kita ka sana.”

³⁷Petrus bilang pa Yesus, “Tuhan, kiapa dang skarang kita blum bole mo iko pa Tuhan? Kita siap mo mati for Tuhan.”

³⁸Yesus bilang, “Ngana bilang, ngana siap mati for Kita? Kita bilang pa ngana, seblum ayam bakuku, ngana so tiga kali manyangkal kalu ngana kanal pa Kita.”