Read Malay, Manado Yohanes 14 Bible Online

Yohanes 14 - Malay, Manado bible

Yohanes 14

¹Yesus babicara pa Dia pe murit-murit, “Ngoni nyanda usa sedi. Percaya jo pa Tuhan Allah deng percaya lei pa Kita.

²Pa Kita pe Bapa pe ruma ada banya tampa, kong Kita pigi ka sana for se siap tu tampa itu for ngoni. Kita kase tau itu pa ngoni lantaran itu memang butul-butul ada di sana.

³Kong kalu Kita so kase siap tu tampa-tampa itu, Kita mo bale ulang kamari kong bawa pa ngoni for pigi ka sana. Deng bagitu, di mana Kita ada, di situ lei ngoni bole mo ada.

⁴Kong ngoni lei so tau tu jalang ka tampa Kita mo pigi akang.”

⁵Tomas bilang pa Yesus, “Tuhan, torang nintau Tuhan mo pigi ka mana. Jadi bagimana torang bole mo tau tu jalang mo ka sana dang?”

⁶Kong Yesus bilang, “Kita ini tu jalang mo pigi pa Tuhan Allah, Kita ini yang kase tau tu butul tentang Tuhan Allah, deng Kita ini lei yang kase tu hidop. Jadi cuma lewat Kita, orang bole pigi pa Bapa.

⁷Kalu ngoni so kanal pa Kita, pasti ngoni kanal lei pa Kita pe Bapa. Jadi mulai skarang ini, ngoni so kanal lei pa Dia deng ngoni so lia pa Dia.”

⁸Filipus bilang pa Dia, “Tuhan, se tunjung akang tu Tuhan pe Bapa itu pa torang, biar torang pe hati rasa puas.”

⁹Yesus bilang pa Filipus, “Filipus, so lama Kita da sama-sama deng ngoni, masa komang ngana nyanda kanal pa Kita? Sapa jo yang so lia pa Kita, dia itu so lia pa Bapa. Jadi, kiapa lei ngana minta Kita se tunjung akang tu Bapa pa ngoni?

¹⁰Ngana nyanda percaya dang kalu Kita deng Bapa satu, kong Bapa deng Kita satu? Jadi, apa yang Kita bilang pa ngoni itu bukang dari Kita sandiri mar dari Bapa yang satu deng Kita. Kong apa jo yang Kita beking, itu Bapa yang da beking lewat Kita.

¹¹Percaya jo pa Kita, kalu Kita deng Bapa satu kong Bapa deng Kita satu. Kalu ngoni susa mo percaya tu Kita da bilang ini, percaya jo pa Kita lantaran tu mujisat-mujisat yang Kita da beking.

¹²Kita bilang pa ngoni, sapa jo yang percaya pa Kita, tu orang itu mo beking tu mujisat-mujisat sama deng yang Kita so beking, malatare dia bole mo beking mujisat-mujisat yang lebe basar dari yang Kita so beking. Soalnya Kita pigi pa Bapa,

¹³kong apa jo yang ngoni minta pake Kita pe nama, Kita mo beking itu for ngoni, supaya lewat apa yang Kita da beking itu, orang-orang bole puji deng hormat pa Bapa.

¹⁴Kalu ngoni minta sesuatu pa Kita pake Kita pe nama, Kita mo kase itu pa ngoni.”

¹⁵Yesus bilang lei, “Kalu ngoni sayang pa Kita, ngoni mo beking tu Kita pe prenta-prenta.

¹⁶Kong Kita mo minta pa Bapa, trus Dia mo kase tu Roh yang mo batolong pa ngoni. Tu Roh itu mo ada sama-sama deng ngoni for slama-lamanya.

¹⁷Tu Roh yang mo batolong pa ngoni itu Tuhan Allah pe Roh. Tuhan Allah pe Roh itu mo se ajar pa ngoni apa yang butul tentang Tuhan Allah. Orang-orang yang nyanda percaya pa Tuhan Allah, dorang nyanda trima tu Tuhan Allah pe Roh, lantaran dorang nyanda dapa lia pa Dia deng nyanda kanal pa Dia. Mar ngoni ini kanal pa Dia lantaran Dia ada sama-sama deng ngoni kong mo jadi satu deng ngoni.

¹⁸Waktu Kita se tinggal pa ngoni nanti, ngoni ini nyanda sandiri sama deng yatim piatu. Kita mo bale ulang pa ngoni.

¹⁹So nyanda lama lei, tu orang-orang yang nyanda percaya nyanda mo lia pa Kita lei. Mar ngoni mo lia ulang pa Kita lantaran Kita mo hidop ulang, kong ngoni mo dapa hidop kekal.

²⁰Kong waktu Kita hidop ulang, ngoni mo tau kalu Kita ini satu deng Kita pe Bapa, kong ngoni ini satu deng Kita kong Kita satu deng ngoni.

²¹Sapa jo yang trima Kita pe prenta kong beking itu, dia itu yang sayang pa Kita. Kong sapa jo yang sayang pa Kita, Kita pe Bapa lei mo sayang pa dia, kong Kita lei mo sayang pa dia deng Kita mo datang se tunjung pa dia sapa Kita sebenarnya.”

²²Kong Yudas yang bukang Yudas Iskariot bilang pa Yesus, “Tuhan, kiapa dang cuma pa torang Tuhan mo se tunjung sapa Tuhan sebenarnya, kong pa orang-orang laeng yang ada di dunia ini nyanda?”

²³Yesus manyao pa dia, “Kalu orang sayang pa Kita, dia mo beking tu Kita pe ajaran, kong Kita pe Bapa mo sayang pa dia, trus Kita deng Kita pe Bapa mo datang pa dia kong mo tinggal sama-sama deng dia.

²⁴Mar sapa jo yang nyanda sayang pa Kita, dia itu nyanda beking tu Kita pe ajaran. Tu Kita pe ajaran itu bukang dari Kita pe diri, mar dari pa Bapa yang da utus pa Kita.

²⁵Samua yang Kita da bilang ini, Kita da bilang waktu Kita masi sama-sama deng ngoni.

²⁶Mar Bapa mo kirim tu Roh Kudus yang mo batolong pa ngoni. Tu Roh Kudus itu mo datang kalu Kita so pigi for ganti pa Kita, Dia mo se ajar pa ngoni samua yang ngoni musti tau kong mo se inga pa ngoni samua yang Kita so bilang pa ngoni.

²⁷Kita so mo pigi, mar Kita mo kase pa ngoni tu hidop deng hati tenang. Tu hidop deng hati tenang itu, cuma Kita yang bole mo kase, samua di dunia ini nyanda ada tu bole mo kase itu pa ngoni. Ngoni pe hati nyanda usa kuatir deng tako.

²⁸Ngoni so dengar kalu Kita da bilang bagini pa ngoni: Kita so mo pigi, mar Kita mo datang ulang pa ngoni. Jadi kalu ngoni sayang pa Kita, pasti ngoni pe hati snang lantaran Kita pigi pa Kita pe Bapa. Soalnya Bapa lebe berkuasa dari Kita.

²⁹Kita so kase tau itu pa ngoni seblum samua itu jadi, supaya kalu nanti samua itu jadi, ngoni bole percaya.

³⁰Kita so nyanda mo bicara banya lei deng ngoni, lantaran tu setang pe bos yang da kuasai ni dunia mo datang, cuma dia nyanda ada kuasa mo ator pa Kita.

³¹Mar Kita mo beking tu Bapa da prenta pa Kita supaya samua orang di dunia ini bole tau kalu Kita ini sayang pa Bapa. Skarang badiri jo kong torang pigi dari sini.”