Read Malay, Manado Yohanes 16 Bible Online

Yohanes 16 - Malay, Manado bible

Yohanes 16

¹Yesus bilang, “Kita da bilang samua itu pa ngoni, supaya ngoni nyanda brenti percaya pa Kita.

²Soalnya nanti mo ada de pe waktu, ngoni mo dapa user dari ruma-ruma ibada agama Yahudi, malatare ada orang-orang yang mo bunung pa ngoni, kong dorang pikir tu dong da beking itu Tuhan Allah pe mau.

³Dorang mo beking bagitu pa ngoni, lantaran dorang nyanda kanal tu Bapa deng lei nyanda kanal pa Kita.

⁴Kita kase tau samua itu pa ngoni, supaya kalu sampe de pe waktu dorang siksa pa ngoni, ngoni mo inga kalu Kita so perna kase tau itu pa ngoni. Kita nyanda bilang itu dari pertama waktu ngoni jadi Kita pe murit, lantaran Kita masi ada sama-sama deng ngoni.

⁵Skarang, Kita mo pigi pa Bapa yang da utus pa Kita. Kong kiapa dang nyanda ada dari pa ngoni yang batanya kalu Kita mo pigi ka mana?

⁶Mar ngoni pe hati sedi skali skarang lantaran Kita so bilang kalu Kita so mo pigi.

⁷Mar butul, lebe bae memang Kita pigi dari pa ngoni, itu for ngoni pe bae. Soalnya kalu Kita nyanda pigi, tu Roh yang mo batolong pa ngoni itu nyanda mo datang pa ngoni. Mar kalu Kita pigi, Kita mo utus tu Roh itu pa ngoni.

⁸Kong kalu tu Roh itu so ada di dunia ini, Dia mo se sadar pa orang-orang di dunia ini tentang dosa, tentang apa tu butul, deng tentang tu Tuhan Allah pe hukuman.

⁹Tentang tu dosa: tu Roh itu mo se sadar pa orang-orang di dunia kalu dorang itu so beking dosa lantaran dorang nyanda percaya pa Kita.

¹⁰Tentang tu butul: tu Roh mo se sadar pa orang-orang kalu Kita tu butul lantaran Kita pigi pa Bapa. Kong waktu itu ngoni so nyanda dapa lia pa Kita lei.

¹¹Tentang tu Tuhan Allah pe hukuman: tu Roh mo se sadar lei pa orang-orang kalu Tuhan Allah mo hukum pa dorang, lantaran tu setang pe bos yang berkuasa di dunia ini so dapa hukuman.

¹²Masi banya lei yang Kita mo bilang pa ngoni, mar skarang ngoni blum mampu mo mangarti.

¹³Mar nanti kalu tu Roh yang mo batolong itu so datang, Dia mo se ajar pa ngoni sampe ngoni bole mangarti samua tu butul. Soalnya tu Roh itu nyanda babicara iko apa yang ada pa De pe pikiran sandiri, mar Dia babicara iko apa yang Dia da dengar dari pa Tuhan Allah. Dia lei yang mo kase tau pa ngoni apa tu mo jadi nanti.

¹⁴Tu Roh itu mo hormat pa Kita deng cara se tau pa ngoni yang Dia so lebe dulu dengar dari pa Kita.

¹⁵Samua yang Bapa punya, itu Kita punya. So itu Kita bilang pa ngoni, tu Roh mo kase tau pa ngoni samua yang Dia da trima dari pa Kita.”

¹⁶Yesus bilang lei, “So nyanda lama, ngoni so nyanda mo lia pa Kita. Kong so nyanda lama lei, ngoni mo lia ulang pa Kita.”

¹⁷Pe dengar itu, bebrapa orang dari De pe murit baku-baku tanya, “Apa de pe maksut Dia bilang so nyanda lama torang so nyanda mo lia pa Dia, kong so nyanda lama lei, torang mo lia ulang pa Dia? Kong kiapa lei Dia bilang kalu Dia mo pigi pa Bapa?”

¹⁸Yesus pe murit-murit baku-baku tanya trus, “Apa Dia pe maksut da bilang so nyanda lama lei? Torang nyanda mangarti tu Dia pe maksut itu.”

¹⁹Yesus tau kalu dorang mo batanya pa Dia. So itu, Dia bilang pa dorang, “Ngoni ini da baku-baku tanya tentang tu Kita da bilang tadi kang? Tu Kita da bilang, ‘So nyanda lama, ngoni so nyanda mo lia pa Kita. Kong so nyanda lama lei, ngoni mo lia ulang pa Kita.’

²⁰Kita bilang pa ngoni, waktu ngoni so nyanda lia pa Kita, ngoni mo manangis deng bataria, mar tu orang-orang yang nyanda percaya pa Kita mo snang. Ngoni mo sedi, mar ngoni pe sedi itu mo bruba jadi snang.

²¹Itu sama deng parampuang yang da mendrita waktu mo melahirkan, mar abis dia se lahir de pe anak, dia so nyanda inga lei tu de pe pendritaan. Soalnya dia so jadi snang skali lantaran tu de pe anak so lahir.

²²Bagitu lei deng ngoni, skarang ini ngoni pe hati sedi, mar nanti ngoni pe hati mo jadi snang waktu torang baku dapa ulang lei, kong nyanda ada yang bole kase brenti tu ngoni pe snang itu.

²³Waktu torang baku dapa ulang, ngoni so nyanda mo tanya apa-apa lei pa Kita. Kita bilang pa ngoni, waktu itu lei samua yang ngoni minta pa Bapa pake Kita pe nama, Dia mo kase itu pa ngoni.

²⁴Dari dulu sampe skarang ngoni blum baminta pake Kita pe nama. Baminta jo kong ngoni mo dapa itu supaya ngoni mo jadi snang skali.

²⁵Samua ini Kita bilang pa ngoni pake prumpamaan. Mar mo ada de pe waktu Kita mo babicara pa ngoni so nyanda mo pake prumpamaan lei, mar deng trus trang Kita mo bilang tentang Bapa.

²⁶Waktu itu, ngoni mo baminta langsung pa Bapa pake tu kuasa yang dari pa Kita. Kita nyanda bilang kalu Kita mo minta akang pa Bapa for ngoni,

²⁷lantaran Bapa sandiri sayang pa ngoni. Bapa sayang pa ngoni, lantaran ngoni so sayang pa Kita deng percaya kalu Kita ini datang dari pa Dia.

²⁸Kita datang dari pa Bapa, kong Kita datang ka dunia ini. Mar skarang, Kita mo se tinggal ni dunia kong babale pa Bapa.”

²⁹Yesus pe murit-murit bilang pa Dia, “Guru, skarang Guru so babicara deng trus trang, so nyanda pake prumpamaan lei.

³⁰Skarang torang tau kalu Guru tau samua hal, kong so nyanda perlu ada orang mo batanya-tanya lei pa Guru. So lantaran itu torang percaya kalu Guru dari Tuhan Allah.”

³¹Yesus bilang pa dorang, “Apa ngoni so percaya skarang?

³²Inga, mo ada de pe waktu, malatare so de pe waktu kalu ngoni mo se tinggal pa Kita sandiri, kong ngoni mo tafiaro pa ngoni pe kampung masing-masing. Mar Kita nyanda sandiri lantaran Bapa da sama-sama deng Kita.

³³Kita bilang samua itu pa ngoni, supaya ngoni pe hati bole tenang lantaran ngoni percaya pa Kita. Di dunia ini ngoni mo mendrita lantaran dapa siksa, mar ngoni pe hati musti tetap kuat, lantaran Kita so se kala samua kuasa di dunia ini.”