Read Malay, Manado Yohanes 17 Bible Online

Yohanes 17 - Malay, Manado bible

Yohanes 17

¹Abis Yesus bilang bagitu, Dia bahaga ka langit kong basombayang, “Bapa, so de pe waktu Bapa mo se tunjung tu Bapa pe Anak pe luar biasa, supaya Bapa pe Anak bole mo beking Bapa dapa puji deng hormat.

²Bapa so kase kuasa pa Kita tu Bapa pe Anak for ator pa samua manusia, supaya Kita bole kase hidop kekal pa samua orang yang Bapa so kase pa Kita.

³Kong tu hidop kekal itu bagini: dorang itu kanal pa Bapa tu satu-satunya Tuhan Allah yang butul, deng dorang kanal pa Kita tu Yesus Kristus tu Bapa da utus.

⁴Bapa, Kita so kase klar samua yang Bapa da suru Kita beking di dunia ini, kong lewat samua tu Kita da beking itu Bapa bole dapa puji deng hormat.

⁵Bapa, skarang kase tunjung jo tu Kita pe luar biasa di muka pa Bapa, sama deng tu luar biasa yang ada pa Kita deng Bapa seblum ni dunia ada.”

⁶Yesus masi trus basombayang lei, Dia bilang, “Bapa, Kita so kase tunjung sapa Bapa sebenarnya pa orang-orang yang Bapa so kase pa Kita di dunia ini. Dorang itu Bapa punya, Bapa so kase dorang pa Kita, kong dorang so beking tu Bapa pe firman.

⁷Skarang dorang so tau kalu samua tu Kita so bilang deng Kita so beking, itu datang dari pa Bapa.

⁸Soalnya Kita so kase tau pa dorang, samua tu Bapa pe firman yang Bapa so kase tau pa Kita, kong dorang percaya itu. Dorang butul-butul tau kalu Kita ini datang dari Bapa, kong dorang percaya kalu Bapa yang da utus pa Kita.

⁹Bapa, skarang Kita basombayang for dorang itu, bukang for orang-orang dunia yang nyanda percaya pa Kita. Kita basombayang for dorang yang Bapa so kase pa Kita, lantaran dorang itu Bapa punya.

¹⁰Samua tu Bapa punya, dorang itu lei Kita punya. Samua Kita punya, dorang itu lei Bapa punya. Kong lewat dorang itu Kita dapa puji deng hormat.

¹¹So nyanda lama lei Kita ada di dunia ini lantaran Kita mo pigi pa Bapa. Mar dorang mo tetap ada di dunia ini. Ya Bapa yang kudus, jaga akang pa dorang itu pake tu Bapa pe kuasa yang Bapa so kase pa Kita. Deng bagitu dorang bole jadi satu, sama deng Kita deng Bapa lei satu.

¹²Slama Kita ada deng dorang, Kita da jaga pa dorang pake tu kuasa yang Bapa da kase pa Kita. Kita da jaga pa dorang kong nyanda ada biar cuma satu dari pa dorang tu mo binasa, kacuali tu satu yang memang mo binasa supaya tu da bilang di Kitab Suci mo jadi.

¹³Bapa, skarang Kita pigi pa Bapa, kong samantara Kita masi di dunia ini Kita da basombayang bagitu, supaya dorang yang Bapa kase pa Kita bole lei rasa snang yang luar biasa sama deng tu snang yang Kita da rasa.

¹⁴Kita so kase tau pa dorang tu Bapa pe firman kong orang-orang yang nyanda percaya pa Bapa binci pa dorang, lantaran dorang nyanda sama deng tu orang-orang yang nyanda percaya pa Bapa. Itu sama deng Kita lei nyanda sama deng tu orang-orang dunia yang nyanda percaya pa Bapa.

¹⁵Bapa, Kita nyanda minta pa Bapa supaya Bapa kase jao dorang dari pa tu orang-orang duniawi, nyanda mar Kita minta supaya Bapa jaga akang jo pa dorang dari tu setang pe bos.

¹⁶Dorang itu nyanda sama deng tu orang-orang duniawi, sama deng Kita lei nyanda sama deng tu orang-orang duniawi itu.

¹⁷Bapa, tu Bapa pe firman itu butul. Pake jo tu Bapa pe firman yang butul itu for beking dorang pe hati bersi di muka pa Bapa.

¹⁸Bapa so utus pa Kita datang pa orang-orang di dunia ini, bagitu lei Kita so utus pa dorang pigi pa orang-orang yang ada di dunia ini.

¹⁹Bapa, Kita srahkan Kita pe hidop pa Bapa. Kita beking bagitu for dorang pe bae, dorang yang Bapa da kase pa Kita, supaya dorang lei mo srahkan dorang pe hidop pa Bapa iko tu ajaran yang butul itu.”

²⁰Yesus masi trus basombayang, Dia bilang, “Bapa, Kita basombayang bukang cuma for Kita pe murit-murit, mar Kita basombayang lei for dorang yang mo jadi percaya pa Kita lantaran da dengar tu ajaran tentang Kita, yang Kita pe murit-murit da se ajar.

²¹Bapa, Kita minta supaya dorang itu jadi satu hati, sama deng Kita lei jadi satu hati deng Bapa kong Bapa jadi satu hati deng Kita. Kita minta bagitu pa Bapa supaya dorang lei jadi satu hati deng Torang, deng bagitu orang-orang di dunia ini bole jadi percaya kalu Bapa tu da utus pa Kita.

²²Kita so beking dorang itu supaya dapa puji deng hormat sama deng Bapa yang so beking bagitu pa Kita, deng bagitu dorang bole jadi satu hati sama deng Torang dua lei jadi satu hati.

²³Dorang jadi satu hati deng Kita kong Bapa jadi satu hati deng Kita, supaya dorang itu butul-butul jadi satu hati. Deng bagitu, tu orang-orang di dunia yang nyanda percaya pa Bapa bole tau kalu Bapa yang da utus pa Kita, kong kalu Bapa itu sayang pa dorang sama deng Bapa sayang pa Kita.

²⁴Bapa, Kita suka tu Kita pe murit-murit yang Bapa so kase pa Kita mo ada sama-sama deng Kita pa Kita pe tampa tinggal, supaya dorang bole lia tu Kita pe luar biasa yang Bapa so kase pa Kita waktu dunia blum ada. Bapa pe luar biasa itu Bapa da kase pa Kita lantaran Bapa sayang pa Kita.

²⁵Ya Bapa yang adil, tu orang-orang yang ada di dunia ini nyanda kanal pa Bapa, mar Kita kanal pa Bapa. Deng Kita pe murit-murit tau kalu Bapa yang da utus pa Kita.

²⁶Kita so kase tau pa Kita pe murit-murit sapa Bapa sebenarnya, kong Kita mo kase tau trus itu pa dorang, supaya dorang baku sayang sama deng Bapa sayang pa Kita, kong Kita mo jadi satu deng dorang.”