Read Malay, Manado Yohanes 20 Bible Online

Yohanes 20 - Malay, Manado bible

Yohanes 20

¹Serta hari minggu pagi-pagi skali, Maria orang Magdala pigi pa Yesus pe kubur. Pe sampe di kubur, dia lia tu batu yang da se tutu di kubur so taguling dari pa de pe tampa.

²So itu, Maria lari pigi pa Simon Petrus deng pa tu murit yang Yesus paling sayang. Pe sampe pa dorang, Maria bilang pa dorang, “Hei! Orang-orang so ambe tu Tuhan pe mayat dari kubur, kong torang nintau dorang da taru di mana pa Dia.”

³Jadi Petrus deng tu satu murit laeng itu pigi ka kubur.

⁴Dorang dua balari, mar tu murit yang laeng itu balari lebe capat dari Petrus kong sampe lebe dulu di kubur.

⁵Tu murit yang laeng itu nyanda maso ka dalam mar cuma maruku sadiki for bahoba ka dalam, kong dia lia tu kaeng puti yang da se lingkar tu Yesus pe mayat ada di lante.

⁶Simon Petrus lei baku iko deng dia, kong Petrus maso ka dalam kubur itu. Dia da lia lei tu kaeng puti yang ada di lante.

⁷Kong tu kaeng spanggal yang da se lingkar pa Yesus pe kapala nyanda ada di dekat tu kaeng yang da se lingkar pa Yesus pe badan, mar ada di tampa laeng kong da talipa.

⁸Trus tu murit laeng yang lebe dulu sampe di kubur itu lei maso, kong dia lia samua itu kong dia percaya kalu Yesus so hidop ulang.

⁹Soalnya, dulu dorang blum mangarti tu Kitab Suci da bilang, kalu Yesus itu mo mati kong hidop ulang.

¹⁰Kong abis itu, tu dua murit itu pulang ka ruma.

¹¹Mar Maria orang Magdala da badiri di muka pintu kubur deng mamanangis. Samantara dia mamanangis, dia maruku sadiki bahoba di dalam kubur.

¹²Kong dia lia ada dua malaekat da pake baju puti. Dorang dua itu da dudu di tampa orang-orang da taru akang Yesus pe mayat. Tu satu da dudu di tampa dorang da taru akang Yesus pe kapala, kong tu satu da dudu di tampa dorang da taru akang Yesus pe kaki.

¹³Tu dua malaekat itu batanya pa dia, “Ibu, kiapa ibu manangis dang?” Maria manyao pa dorang, “Kita da manangis lantaran dorang so ambe kita pe Tuhan kong kita nintau dorang da taru di mana pa Dia.”

¹⁴Abis Maria bilang bagitu, dia baputar ka blakang kong dia lia ada orang da badiri di blakang pa dia, mar dia nintau kalu itu Yesus.

¹⁵Kong Yesus batanya pa dia, “Ibu, kiapa ibu manangis dang? Sapa so yang ibu da cari?” Maria pikir kalu Yesus itu orang yang ja bajaga tu kobong, kong dia bilang, “Bapak, kalu bapak yang da ambe tu kita pe Tuhan pe mayat, bilang kwa pa kita da taru di mana, supaya kita bole mo pi ambe.”

¹⁶Abis itu, Yesus pangge pa Maria, “Maria!” Maria bahaga pa Yesus trus bilang deng bahasa Ibrani, “Rabuni” tu de pe arti ‘guru’.

¹⁷Yesus bilang pa Maria, “Jang pegang pa Kita, lantaran Kita blum nae pigi pa Bapa. Mar ngana pigi jo pa Kita pe sudara-sudara yang ja iko pa Kita kong bilang pa dorang kalu skarang Kita mo nae pigi pa Kita pe Bapa deng tu ngoni pe Bapa lei. Dia itu lei tu Kita pe Tuhan Allah deng tu ngoni pe Tuhan Allah lei.”

¹⁸Trus Maria orang Magdala pigi pa tu murit-murit kong bilang pa dorang, “Kita so lia pa Tuhan!” Kong Maria bilang tu Yesus pe pesan pa dorang.

¹⁹Waktu so malam di hari minggu itu, Yesus pe murit-murit da bakumpul di satu ruma. Tu pintu-pintu ruma samua dorang da kunci lantaran dorang tako pa tu pemimpin-pemimpin agama Yahudi. Waktu itu, Yesus datang pa dorang kong badiri di tenga-tenga pa dorang, Dia bilang, “Kita minta Tuhan Allah beking ngoni hidop deng hati tenang!”

²⁰Kong abis Dia bilang bagitu, Dia se lia pa dorang De pe dua tangan deng lambung. Tu murit-murit itu snang skali waktu dorang da lia pa Tuhan.

²¹Kong Yesus bilang ulang pa dorang, “Kita minta Tuhan Allah beking ngoni hidop deng hati tenang! Bapa so utus pa Kita, bagitu lei Kita utus pa ngoni.”

²²Abis Yesus bilang bagitu, Dia tiop pa dorang deng Dia pe nafas kong bilang, “Trima jo ni Roh Kudus.

²³Kalu ngoni kase ampung orang pe dosa, de pe dosa mo dapa ampung, kong kalu ngoni nyanda kase ampung orang pe dosa, de pe dosa lei nyanda mo dapa ampung.”

²⁴Tomas tu satu dari Yesus pe dua blas murit, yang orang ja pangge lei Kembar, dia itu nyanda ada sama-sama deng tu murit-murit laeng waktu Yesus batunjung tu Dia pe diri pa dorang.

²⁵Jadi Yesus pe murit-murit laeng bilang pa Tomas, “Tomas, torang so lia pa Tuhan!” Mar Tomas bilang pa dorang, “Kalu kita blum lia tu bekas paku pa Dia pe tangan, deng kalu kita blum cucu kita pe jare di situ, deng lei kalu kita blum se maso kita pe tangan pa Dia pe lambung, kita nyanda mo percaya.”

²⁶Serta so lewat satu minggu, Yesus pe murit-murit bakumpul ulang di ruma yang dorang da bakumpul akang tu hari. Kong ini kali, Tomas lei ada di situ sama-sama deng dorang. Samua tu pintu-pintu lei da takunci. Biar bagitu, Yesus datang trus badiri di tenga-tenga pa dorang, kong Dia bilang, “Kita minta Tuhan Allah beking ngoni hidop deng hati tenang.”

²⁷Kong Dia bilang pa Tomas, “Tomas, lia Kita pe tangan kong ngana se cucu jo tu ngana pe jare pa Kita pe tangan, trus se maso jo tu ngana pe tangan pa Kita pe lambung. Kong, jang bilang ngana nyanda percaya lei kalu Kita so hidop ulang, mar percaya jo.”

²⁸Tomas bilang pa Yesus, “Ini memang kita pe Tuhan deng Tuhan Allah yang kita ja semba.”

²⁹Yesus bilang pa dia, “Apa ngana jadi percaya pa Kita lantaran ngana so lia pa Kita? Pe snang skali tu orang yang nyanda lia pa Kita mar dia jadi percaya pa Kita.”

³⁰Yesus da beking banya lei mujisat di muka pa Dia pe murit-murit, cuma samua itu nyanda tulis di kitab ini.

³¹Mar samua yang so tulis di kitab ini, itu da tulis supaya ngoni percaya kalu Yesus itu Kristus tu Raja yang se slamat pa manusia deng Dia itu Anak Allah. Kalu ngoni so percaya pa Dia, ngoni mo hidop deng Dia yang ngoni so percaya itu for slama-lamanya.