Read Malay, Manado Yohanes 21 Bible Online

Yohanes 21 - Malay, Manado bible

Yohanes 21

¹Abis itu, Yesus batunjung Dia pe diri lei pa Dia pe murit-murit di pinggir danau Tiberias. Bagini tu cirita Dia da batunjung Dia pe diri:

²Satu kali, da bakumpul tu Simon Petrus, Tomas tu ja pangge lei Kembar, Natanael dari Kana tu ada di daera Galilea, Zebedeus pe anak dua, deng lei Yesus pe dua murit laeng.

³Kong Simon Petrus bilang pa dorang, “Kita mo pi bacari ikang.” Kong dorang bilang pa dia, “Torang lei mo iko deng ngana.” Trus dorang pigi ka pinggir danau kong nae prao for pi bacari ikang. So satu malam dorang da bacari ikang, mar nyanda dapa ikang sama skali.

⁴Kong waktu so mo pagi, Yesus da badiri di pinggir danau, mar Dia pe murit-murit nintau kalu itu Yesus.

⁵Yesus bilang pa dorang, “Hei tamang-tamang! Ngoni da dapa ikang ato nyanda?” Dorang manyao, “Nyanda.”

⁶Kong Yesus bilang pa dorang, “Se lego jo tu ngoni pe jala ka sabla kanan prao, kong ngoni mo dapa ikang.” Kong dorang se lego dorang pe jala trus dorang tarek tu jala mar dorang nyanda mampu mo hela itu lantaran pe banya skali tu ikang yang dorang da dapa.

⁷Kong tu murit yang Yesus paling sayang itu bilang pa Petrus, “Itu Tuhan!” Petrus pe dengar kalu itu Tuhan, dia pake de pe baju luar lantaran tadi dia da buka, kong balumpa ka danau.

⁸Tu murit-murit laeng datang deng prao pa Yesus. Dorang itu nyanda jao dari pinggir danau, de pe jarak kira-kira cuma sratus meter dari pinggir danau, kong waktu dorang datang itu dorang lei hela tu dong pe jala yang so punung deng ikang.

⁹Waktu dorang so sampe di pinggir danau, dorang lia ada bara api kong pa de pe atas so ada ikang deng roti lei.

¹⁰Yesus bilang pa dorang, “Bawa kamari jo bebrapa ikang yang ngoni baru tangka.”

¹¹So itu Simon Petrus nae ka prao kong dia hela tu jala ka pinggir danau, kong tu jala punung deng ikang-ikang basar. Tu ikang pe banya ada sratus lima pulu tiga ekor ikang. Mar biar lei tu ikang pe banya bagitu, tu jala nyanda tarabe.

¹²Yesus bilang pa dorang, “Mari jo torang smokol.” Nyanda ada satu dari tu murit-murit yang brani batanya pa Dia, “Sapa dang Bapak ini?” Soalnya dorang tau kalu Dia itu Tuhan.

¹³Kong Yesus badekat pa dorang, Dia ambe tu roti trus Dia kase pa dorang, bagitu lei deng tu ikang.

¹⁴Itu so katiga kali Yesus da batunjung Dia pe diri pa De pe murit-murit abis Dia mati kong hidop ulang.

¹⁵Waktu dorang so klar smokol, Yesus batanya pa Simon Petrus, “Simon, Yohanes pe anak, apa ngana sayang pa Kita lebe dari dorang ini?” Simon manyao pa Yesus, “Iyo Tuhan, Tuhan tau kalu kita sayang pa Tuhan.” Yesus bilang pa dia, “Kalu bagitu, urus akang bae-bae tu Kita pe orang-orang, sama deng gembala yang urus bae-bae tu dia pe domba-domba.”

¹⁶Yesus batanya pa Simon for kadua kali, “Simon, Yohanes pe anak, apa ngana sayang pa Kita?” Simon manyao pa Yesus, “Iyo Tuhan, Tuhan tau kalu kita sayang pa Tuhan.” Yesus bilang lei pa dia, “Urus akang bae-bae tu Kita pe orang-orang, sama deng gembala yang jaga bae-bae tu dia pe domba-domba.”

¹⁷Yesus batanya pa dia lei for katiga kali, “Simon, Yohanes pe anak, apa ngana sayang pa Kita?” Kong Petrus jadi sedi lantaran Yesus da tanya pa dia sampe katiga kali kalu dia sayang pa Yesus. Kong Petrus jawab pa Yesus, “Tuhan, Tuhan tau samua hal, Tuhan tau kalu kita sayang pa Tuhan.” Yesus bilang pa Petrus lei, “Urus akang bae-bae tu Kita pe orang-orang, sama deng gembala yang urus bae-bae tu de pe domba-domba.

¹⁸Kita bilang pa ngana, waktu ngana masi muda, ngana pake baju sandiri deng ngana bajalang ka mana jo ngana suka. Mar kalu ngana so jadi tua, ngana mo se kamuka ngana pe tangan kong orang mo ika, trus bawa pa ngana ka tampa yang ngana nyanda suka pigi.”

¹⁹Yesus da bilang bagitu for se tau bagimana Petrus nanti mo mati, kong kalu Petrus so mati bagitu, Tuhan Allah mo dapa puji deng hormat. Abis Yesus bilang bagitu, Dia bilang lei pa Petrus, “Iko jo pa Kita.”

²⁰Waktu itu, Petrus balia ka blakang, dia lia kalu tu murit yang Yesus paling sayang da baiko pa dorang. Tu murit itu yang da dudu di dekat pa Yesus waktu dorang da makang sama-sama seblum Yesus mati. Kong dia itu yang da batanya, “Tuhan, sapa so tu mo bahianat pa Tuhan?”

²¹Waktu Petrus lia tu murit itu, dia bilang pa Yesus, “Tuhan, apa dang tu mo jadi pa dia ini?”

²²Yesus manyao pa Petrus, “Kalu Kita suka dia tetap hidop sampe Kita datang ulang, itu bukang ngana pe urusan. Mar ngana, iko jo pa Kita.”

²³Abis Yesus bilang bagitu, dapa dengar kabar dari tu sudara-sudara yang percaya kalu tu satu murit itu nyanda mo mati. Padahal Yesus nyanda bilang kalu tu murit itu nyanda mo mati, mar Yesus cuma da bilang kalu misalnya Yesus suka tu murit itu tetap mo hidop sampe Yesus datang ulang, itu bukang Petrus pe urusan.

²⁴Tu murit yang Yesus sayang itu, so dia tu da kase tau deng yang da tulis samua tu ada di kitab ini. Torang tau yang dia da kase tau itu butul.

²⁵Kong masi banya lei tu hal-hal laeng yang Yesus da beking. Kalu samua yang Yesus da beking itu mo tulis satu-satu, kita rasa ni dunia nyanda cukup mo muat samua tulisan tentang tu Yesus da beking itu.