Read Malay, Manado Yohanes 3 Bible Online

Yohanes 3 - Malay, Manado bible

Yohanes 3

¹Ada tu satu orang de pe nama Nikodemus. Dia itu pemimpin agama Yahudi dari golongan Farisi tu golongan yang pegang kras tu atoran agama Yahudi.

²Satu malam, dia datang pa Yesus kong babilang, “Guru, torang tau kalu Guru ini Tuhan Allah da utus. Torang tau itu lantaran orang bole mo beking tu mujisat-mujisat sama deng tu Guru da beking, kalu Tuhan Allah ada sama-sama deng dia.”

³Yesus bilang pa dia, “Kita bilang pa bapak, cuma orang yang da lahir ulang tu bole jadi orang dari Tuhan Allah yang Berkuasa sbagai Raja.”

⁴Nikodemus bilang pa Dia, “Masa komang orang so tua kong bole mo lahir ulang? Nyanda mungkin dia bole mo maso ulang pa de pe mama pe puru kong se lahir ulang.”

⁵Yesus manyao pa dia, “Kita bilang pa bapak, orang musti lahir ulang dari aer deng dari Tuhan Allah pe Roh, baru dia mo jadi orang dari Tuhan Allah yang Berkuasa sbagai Raja.

⁶Soalnya torang lahir di dunia ini lantaran torang pe orang tua, mar torang pe roh lahir dari Tuhan Allah pe Roh.

⁷Bapak jang heran kalu Kita bilang pa bapak, ‘Bapak musti lahir ulang kalu bapak mo jadi orang dari Tuhan Allah yang Berkuasa sbagai Raja.’

⁸Torang ambe conto dari angin: tu angin batiop ka mana jo dia suka, kong torang bole dengar de pe bunyi, cuma torang nintau dari mana tu angin datang deng ka mana dia mo pigi. Itu bole mo se sama deng Tuhan Allah pe Roh yang bakarja pa orang sampe tu orang lahir ulang, torang nintau bagimana tu Roh itu bakarja sampe jadi bagitu.”

⁹Kong Nikodemus bilang pa Yesus, “Bagimana lei tu Guru da bilang itu mo jadi?”

¹⁰Yesus manyao pa dia, “Bapak itu torang orang Israel pe guru yang terhormat, masa komang bapak nyanda mangarti tu hal-hal itu?

¹¹Kita bilang pa bapak, Kita deng orang-orang yang percaya pa Kita, torang kase tau tentang apa yang torang da lia deng yang torang tau butul, mar ngoni nyanda trima tu torang da se tau itu.

¹²Kita da kase tau tentang apa tu da jadi di dunia, mar ngoni nimau percaya pa Kita, no lebe soe lei kalu Kita kase tau pa ngoni tentang apa tu da jadi di sorga, paling ngoni lebe nimau mo percaya.

¹³Nyanda ada satu orang yang so perna nae ka sorga, kacuali tu Anak Manusia yang so turung dari sorga kong se tau pa ngoni tentang apa tu da jadi di sorga.

¹⁴Dulu di padang gurun, nabi Musa beking ular dari tembaga kong kase nae tu ular itu di kayu supaya sapa jo yang ular da gigi kong balia pa tu ular tembaga itu, dia bole tetap hidop. Bagitu lei deng tu Anak Manusia mo dapa angka deng cara paku di kayu salib,[1]

¹⁵supaya sapa jo yang percaya pa Dia bole mo dapa hidop kekal.

¹⁶Soalnya Tuhan Allah sayang skali ni dunia sampe Dia srahkan tu Dia pe Anak satu-satunya, supaya tiap orang yang percaya pa Dia nyanda mo binasa mar mo dapa hidop kekal.

¹⁷Soalnya Tuhan Allah da utus Dia pe Anak datang ka dunia ini bukang for mo bahakimi, mar Dia pe Anak itu mo kase slamat orang-orang di dunia ini dari hukuman dosa.

¹⁸Sapa jo yang percaya pa Dia, tu orang itu nyanda mo dapa hukum. Mar sapa jo yang nyanda percaya, Tuhan Allah so sadia dia pe hukuman, lantaran dia nyanda percaya pa tu Anak Allah satu-satunya.

¹⁹Tuhan Allah so sadia tu hukuman itu lantaran bagini: Dia datang ka dunia ini beking trang tu manusia pe hati, mar manusia lebe suka tu glap daripada tu trang lantaran manusia pe kalakuan jaha.

²⁰Soalnya, sapa jo yang suka ja beking tu jaha, dia binci tu trang kong nimau datang di trang itu, supaya dia pe kalakuan-kalakuan yang jaha itu nyanda dapa lia.

²¹Mar sapa jo yang da beking tu ajaran yang butul, dia datang pa tu trang itu, supaya dapa lia kalu dia pe kalakuan iko Tuhan Allah pe mau.”

²²Abis itu, Yesus pigi deng Dia pe murit-murit ka daera Yudea, kong Dia tinggal sama-sama deng dorang di sana kong babaptis orang.

²³Waktu itu, Yohanes lei da babaptis orang di kampung Ainon, dekat Salim, lantaran di situ banya aer. Banya orang ja datang trus ka situ for dapa baptis.

²⁴(Waktu itu Yohanes blum dapa se maso ka bui).

²⁵Satu kali, bebrapa dari Yohanes pe murit deng tu satu orang Yahudi da baku ambe tentang beking bersi diri[2] iko dong pe atoran agama Yahudi.

²⁶Trus Yohanes pe murit-murit datang pa Yohanes kong babilang tentang Yesus, “Guru, tu Orang yang guru da kase tau pa torang, tu da sama-sama deng guru di sabla kuala Yordan, Dia lei da babaptis orang kong samua orang tare so datang pa Dia.”

²⁷Yohanes manyao pa dorang, “Manusia nimbole mo beking apa-apa kacuali kalu Tuhan kase akang isin pa dia for beking itu.

²⁸Ngoni sandiri so dengar apa tu kita so kase tau dulu. Kita bilang, kita ini bukang Kristus tu Raja yang mo se slamat pa manusia, mar kita datang lebe dulu dari Dia for se siap jalang supaya orang mo trima pa Dia.

²⁹Dia itu sama deng pengantin laki-laki kong kita ini Dia pe tamang. Tu pengantin laki-laki itu yang penting lantaran dia punya tu pengantin parampuang. Mar tu pengantin laki-laki pe tamang nyanda penting, dia cuma badiri jadi pendamping kong badengar pa tu pengantin laki-laki. Dia snang skali badengar tu pengantin laki-laki pe suara. Bagitu lei deng kita, kita snang skali da dengar lebe banya orang tu da iko pa Dia.

³⁰Dia musti jadi lebe penting dari kita, kong kita musti lebe hari jadi nyanda penting.”

³¹Yesus itu datang dari sorga, so itu Dia lebe basar dari samua orang di dunia ini. Manusia itu dari dunia ini, dia itu cuma mo babicara tentang dunia. Mar Yesus, Dia itu datang dari sorga, Dia itu lebe dari samua.

³²Dia kase tau tentang apa tu Dia da lia deng tu Dia da dengar, mar nyanda ada satu orang yang percaya deng apa tu Dia da kase tau itu.

³³Mar sapa yang percaya deng tu Dia da kase ajar itu, tu orang itu mangaku kalu Tuhan Allah da bilang itu lei butul.

³⁴Soalnya Dia yang Tuhan Allah da utus, Dia itu yang da kase tau tu Tuhan Allah pe firman, lantaran tu Tuhan Allah pe Roh da kase kuasa pa Dia talebe-lebe.

³⁵Bapa sayang pa Dia pe Anak kong Dia kase kuasa pa Dia pe Anak itu for kuasai samua.

³⁶Sapa jo yang percaya pa tu Anak, dia dapa tu hidop kekal, kong sapa yang nyanda iko tu Anak pe mau, dia nyanda mo dapa hidop kekal, mar Tuhan Allah pe hukuman ada pa dia slama-lamanya.