Read Malay, Manado Yohanes 5 Bible Online

Yohanes 5 - Malay, Manado bible

Yohanes 5

¹Abis itu, Yesus pigi ka Yerusalem lantaran tu orang Yahudi pe hari raya so nyanda lama.

²Di Yerusalem ada pintu gerbang, tu de pe nama ‘Pintu Domba’. Di dekat tu pintu itu ada satu kolam tu dalam bahasa Ibrani de pe nama Betesda. Di sekliling tu kolam itu ada lima place.

³Di place-place itu ada banya skali orang saki yang da batidor: ada orang buta, orang kento deng orang lumpu. [Dorang da batunggu tu aer kolam mo bagoyang.

⁴Soalnya laengkali Tuhan Allah pe malaekat turung ka kolam itu kong se goyang tu aer itu. Trus sapa jo yang lebe dulu maso ka kolam waktu tu aer samantara bagoyang, dia pasti mo bae, apa jo tu de pe panyaki.]

⁵Di situ, ada satu orang yang so tiga pulu dlapan taong da saki lumpu.

⁶Yesus lia tu orang itu da batidor di situ, deng lei Dia tau kalu tu orang itu so lama saki bagitu. So itu Dia bilang pa tu orang itu, “Ngana suka mo bae?”

⁷Tu orang saki itu manyao pa Dia, “Iyo Bapak, kita suka mo bae, mar nyanda ada orang yang bantu angka pa kita for se turung ka kolam itu waktu tu aer so mulai bagoyang. Kong kalu kita coba turung ka kolam itu, orang laeng so lebe dulu turung.”

⁸Yesus bilang pa dia, “Badiri jo, angka ngana pe tikar kong bajalang.”

⁹Waktu itu jo, tu orang itu iko bae kong dia angka de pe tikar trus bajalang. Tu kejadian pas hari Sabat, tu hari orang agama Yahudi nimbole bakarja.

¹⁰So itu, tu pemimpin-pemimpin agama Yahudi bilang pa tu orang yang baru bae itu, “Ini hari, hari Sabat to? Kalu iko torang pe atoran agama, ngana nimbole angka ngana pe tikar.”

¹¹Mar dia manyao pa dorang, “Tu Orang yang so kase bae pa kita, Dia da suru pa kita supaya angka kita pe tikar kong bajalang.”

¹²Kong tu pemimpin-pemimpin agama Yahudi batanya pa tu orang itu, “Sapa tu Orang yang da suru pa ngana angka ngana pe tikar kong bajalang?”

¹³Mar tu orang yang baru bae itu nintau sapa yang da kase bae pa dia, lantaran Yesus so maso di tenga-tenga orang banya.

¹⁴Kong nyanda lama jo, Yesus baku dapa lei deng dia di kompleks Ruma Ibada Pusat kong babilang pa dia, “Inga eh, ngana so bae. Jang beking dosa lei supaya nyanda ada yang lebe soe tu mo jadi pa ngana.”

¹⁵Kong tu orang itu pi kase tau pa tu pemimpin-pemimpin agama Yahudi kalu Yesus itu yang so se bae pa dia.

¹⁶So itu tu pemimpin-pemimpin agama Yahudi mulai beking susa pa Yesus lantaran Dia da kase bae orang pas hari Sabat.

¹⁷Mar Yesus bilang pa dorang, “Hele Kita pe Bapa ja bakarja trus sampe ni hari, so itu Kita musti lei bakarja trus.”

¹⁸Tu Yesus pe kata-kata itu beking tu pemimpin-pemimpin agama Yahudi lebe brusaha mo bunung pa Dia. Dorang mo bunung pa Dia bukang cuma lantaran Dia da langgar tu atoran hari Sabat, mar lantaran Dia lei da bilang kalu Tuhan Allah itu Dia pe Bapa sandiri. Deng Dia bilang kalu Tuhan Allah itu Dia pe Bapa, Dia so beking Dia pe diri sama deng Tuhan Allah.

¹⁹Kong Yesus bilang pa dorang, “Kita bilang pa ngoni: Kita tu Anak Allah, Kita nyanda ada kuasa mo beking apa-apa iko Kita pe mau sandiri kalu Kita nyanda lia apa tu Bapa da beking. Soalnya apa tu Bapa da beking, itu lei no yang Kita da beking.

²⁰Soalnya Bapa sayang pa Dia pe Anak kong Dia se tunjung pa Dia pe Anak samua tu Dia da beking. Dia lei se tunjung tu hal yang lebe basar dari tu hal-hal rupa tu se bae orang saki supaya ngoni mo taheran-heran.

²¹Bapa yang kase hidop ulang orang-orang yang so mati kong beking dorang hidop deng Dia. Bagitu lei deng Dia pe Anak mo kase hidop pa sapa jo yang Dia suka.

²²Bapa nyanda ja adili orang, mar Dia so srahkan tu tugas baadili itu pa Dia pe Anak.

²³Bapa beking bagitu supaya samua orang hormat pa Dia pe Anak sama deng dorang hormat pa Bapa. Sapa jo yang nyanda hormat pa Dia pe Anak itu, dia lei nyanda hormat pa Bapa yang da utus pa tu Anak.

²⁴Kita bilang pa ngoni, sapa jo yang dengar tu Kita da bilang deng percaya pa Tuhan Allah tu da utus pa Kita, dia itu mo dapa hidop kekal. Dia so nyanda mo dapa hukuman tapisa deng Tuhan Allah for slama-lamanya, mar dia so talapas dari hukuman itu kong so dapa hidop kekal.

²⁵Kita bilang pa ngoni, ada de pe waktu malatare so skarang de pe waktu, kalu orang-orang mati[3] mo dengar tu Anak Allah pe suara, kong dorang yang dengar itu mo dapa hidop kekal.

²⁶Soalnya sama deng Bapa ada kuasa kase tu hidop, Dia lei kase kuasa pa Dia pe Anak for kase tu hidop.

²⁷Bapa so kase kuasa pa Dia pe Anak for baadili lantaran Dia pe Anak itu no tu Anak Manusia.

²⁸Ngoni jang heran deng tu Kita da bilang itu, lantaran nanti ada de pe waktu kalu samua orang yang so mati tu ada di kubur mo dengar lei tu Anak Manusia pe suara,

²⁹kong tu orang-orang yang waktu dorang masi hidop ja beking tu bae, dorang mo hidop ulang kong dapa hidop kekal. Mar tu orang-orang yang waktu dorang masi hidop ja beking tu jaha, dorang mo hidop ulang kong dapa hukuman tapisa deng Tuhan Allah for slama-lamanya.”

³⁰“Kita nyanda dapa beking apa-apa iko Kita pe mau sandiri. Kita baadili iko apa yang Kita da dengar dari pa Bapa. Kong Kita baadili deng adil lantaran nyanda iko tu Kita pe mau sandiri mar iko tu Bapa yang da utus pa Kita pe mau.

³¹Kalu Kita basaksi tentang Kita pe diri sandiri bilang Tuhan Allah da utus pa Kita, pasti ada orang yang nyanda mo trima kalu tu Kita da bilang itu butul.

³²Mar Tuhan Allah yang da basaksi tentang Kita, Kita tau kalu apa tu Dia da bilang tentang Kita itu butul.

³³Ngoni so perna suru tu ngoni pe utusan pigi pa Yohanes Pembaptis, kong Yohanes itu da basaksi tentang Kita, trus tu dia da bilang itu butul.

³⁴Mar sebenarnya Kita nyanda perlu sapa-sapa for mo basaksi tentang Kita, Kita cuma da bilang tentang tu Yohanes supaya ngoni bole percaya pa Kita kong ngoni mo slamat dari hukuman dosa.

³⁵Tu Yohanes pe kesaksian tentang Kita itu bole mo se sama deng pelita yang da manyala kong bacahaya trang. Kong tu cahaya itu beking snang pa ngoni mar cuma for samantara waktu.

³⁶Mar samua yang Kita so beking itu se tunjung kalu Bapa yang da utus pa Kita. Kong samua itu, Dia yang da suru pa Kita for beking, trus itu samua lebe basar dari tu Yohanes pe kesaksian tentang Kita. Tu samua yang Kita da beking itu no jadi kesaksian kalu Kita ini memang Bapa yang da utus.

³⁷Kong lebe dari itu lei, Bapa yang da utus pa Kita, Dia da basaksi sapa Kita pa orang-orang. Mar ngoni nyanda perna dengar Dia pe suara deng ngoni nyanda perna lia pa Dia.

³⁸Kong tu Bapa pe firman nyanda tatanang pa ngoni pe hati, lantaran ngoni nyanda percaya pa Kita tu Dia da utus.

³⁹Ngoni ini da teliti bae-bae tu Kitab Suci lantaran ngoni pikir deng cara bagitu ngoni mo dapa hidop kekal. Padahal di Kitab Suci itu lei Tuhan Allah da basaksi tentang Kita.

⁴⁰Mar biar lei bagitu, ngoni nimau datang pa Kita for dapa tu hidop kekal.

⁴¹Kita nyanda perlu manusia mo puji deng hormat.

⁴²Mar Kita tau tentang ngoni, kalu ngoni pe dalam hati nyanda sayang pa Tuhan Allah.

⁴³Kita datang bawa Kita pe Bapa pe nama mar ngoni nyanda trima pa Kita. Mar kalu orang laeng datang pa ngoni bawa dia pe nama sandiri, ngoni mo trima pa dia.

⁴⁴Ngoni suka dapa puji deng hormat dari pa orang-orang, mar ngoni nyanda beking tu Tuhan Allah pe mau supaya dapa puji deng hormat dari pa Tuhan Allah yang cuma satu itu. Jadi bagimana ngoni mo percaya pa Kita?

⁴⁵Jang ngoni pikir nanti Kita yang mo se sala pa ngoni di muka pa Bapa. Yang mo se sala pa ngoni itu nabi Musa sandiri. Padahal dia itu yang ngoni da baharap akang.

⁴⁶Musa tu da tulis tentang Kita yang mo datang ini. Jadi kalu ngoni percaya apa yang Musa da tulis, pasti ngoni lei percaya pa Kita, lantaran dia da tulis tentang Kita.

⁴⁷Mar sebenarnya ngoni nyanda percaya yang Musa da tulis itu, jadi ngoni lei nyanda percaya apa yang Kita bilang.”