Read Malay, Manado Yohanes 6 Bible Online

Yohanes 6 - Malay, Manado bible

Yohanes 6

¹Satu kali, Yesus nae prao pigi ka sabla danau Galilea, tu ja bilang lei danau Tiberias.

²Pe banya skali orang tu da iko pa Yesus. Dorang da iko pa Dia lantaran dong da lia tu mujisat-mujisat yang Dia so beking pa orang-orang saki sampe dorang jadi bae.

³Kong Yesus deng De pe murit-murit nae ka tampa yang bagunung, trus dorang dudu di situ.

⁴Waktu itu, tu hari raya agama Yahudi tu prayaan Paskah so dekat.

⁵Di situ Yesus lia ka sekliling, Dia lia pe banya skali orang badatang pa Dia. Kong Dia bilang pa Filipus, “Di mana kang torang bole bli makanan, supaya samua orang ini bole mo makang?”

⁶Sebenarnya Yesus so tau apa tu Dia mo beking, mar biar lei bagitu Dia tetap batanya bagitu pa Filipus for mo lia apa Filipus butul percaya pa Dia.

⁷Filipus manyao pa Dia, “Biar lei torang ada 200 doi perak for mo se bli akang makanan, tu doi pe banya itu tetap nyanda cukup for dorang samua, biar lei tiap orang cuma mo dapa sadiki.”

⁸Kong ada tu satu dari Yesus pe murit, tu de pe nama Andreas, dia itu Simon Petrus pe ade. Dia babilang pa Yesus,

⁹“Di sini ada tu anak laki-laki da bawa lima roti deng dua ikang. Mar itu nyanda mungkin mo se makang tu orang banya bagini.”

¹⁰Yesus bilang, “Suru jo tu orang-orang itu dudu.” Di situ ada banya rumpu, kong tu orang banya itu dudu di rumpu-rumpu itu. Dorang samua itu kira-kira ada lima ribu orang laki-laki, blum tarekeng tu parampuang deng anak-anak.

¹¹Yesus ambe tu roti itu, Dia bilang makase pa Tuhan Allah trus Dia se berbage pa dorang yang da dudu di situ. Bagitu lei Dia da beking deng tu ikang-ikang itu, kong dorang makang sampe kanyang.

¹²Waktu dorang samua so jadi kanyang, Yesus bilang pa Dia pe murit-murit, “Kumpul jo tu makanan yang da talebe supaya nyanda ada tu tabuang.”

¹³Kong dorang kumpul yang da talebe dari tu lima roti itu kong isi di loto, kong de pe banya ada dua blas loto.

¹⁴Waktu tu orang-orang lia tu mujisat yang Yesus da beking itu, dorang babilang, “Dia ini memang butul-butul Nabi yang Tuhan Allah da janji mo datang ka dunia ini.”

¹⁵Yesus tau kalu dorang mo paksa pa Dia for jadi dorang pe raja. So itu Dia pi manyingkir ka gunung supaya bole mo basandiri.

¹⁶Waktu so mo malam, Yesus pe murit-murit pigi ka danau.

¹⁷Dorang di situ sampe malam kong Yesus blum datang-datang pa dorang, so itu dorang nae ka prao blayar ka Kapernaum.

¹⁸Kong nyanda lama, tu danau baomba lantaran angin batiop kancang.

¹⁹Waktu dorang so bapanggayung de pe jao kira-kira lima ato anam kilometer, dorang lia Yesus da bajalang di atas aer da pi badekat ka prao, kong dorang jadi tako skali.

²⁰Mar Yesus bilang pa dorang, “Nyanda usa tako! Ini Kita.”

²¹Pe dengar itu, dorang snang se nae pa Dia ka prao. Kong waktu itu jo, dorang pe prao so sampe di tampa yang dorang mo pigi akang.

²²De pe eso, tu orang banya yang masi ada di sabla danau da cari-cari pa Yesus. Dorang cari pa Dia lantaran dorang tau kalu de pe kalamaring cuma ada satu prao di pinggir pante kong Yesus pe murit-murit so nae akang, mar Yesus sandiri nyanda nae di prao itu.

²³Samantara itu, ada orang-orang datang deng dorang pe prao-prao dari Tiberias. Dorang sampe di dekat tampa orang banya da makang roti abis Yesus bilang makase pa Tuhan Allah.

²⁴Jadi, lantaran tu orang banya so lia kalu Yesus nyanda ada di situ deng Dia pe murit-murit lei nyanda ada, tu orang banya nae tu prao-prao yang ada di situ kong pigi ka Kapernaum for cari pa Yesus.

²⁵Waktu tu orang banya sampe di sabla danau di Kapernaum kong baku dapa deng Yesus, dorang bilang pa Dia, “Guru, tempo apa dang Guru sampe di sini?”

²⁶Kong Yesus manyao pa dorang, “Kita bilang pa ngoni, ngoni ini da cari pa Kita bukang lantaran ngoni da lia tu mujisat-mujisat kong mangarti sapa Kita, mar ngoni da cari pa Kita lantaran ngoni so makang tu roti sampe kanyang.

²⁷Ngoni jang cuma bakarja for mo cari makanan yang mo abis deng mo busu, mar ngoni brusaha jo for mo dapa tu makanan yang nyanda mo busu kong bole beking ngoni dapa hidop kekal. Tu makanan itu Anak Manusia mo kase pa ngoni, lantaran Tuhan Allah so kase kuasa pa Dia.”

²⁸Kong dorang batanya pa Yesus, “Apa dang yang torang musti beking supaya iko Tuhan Allah pe mau?”

²⁹Yesus manyao pa dorang, “Ini tu Tuhan Allah pe mau for ngoni mo beking: percaya jo pa Dia yang Tuhan Allah da utus.”

³⁰Pe dengar itu, dorang bilang pa Dia, “Kalu bagitu, apa dang tu mujisat yang Guru bole mo se tunjung pa torang supaya torang bole percaya kalu Guru itu dari pa Tuhan Allah? Kong apa dang yang Guru mo beking?

³¹Soalnya dulu tu torang pe nene moyang, waktu dorang di padang gurun dorang da dapa makanan tu ja bilang manna kong dorang makang itu. Itu sama deng tu da tatulis di Kitab Suci, ‘Dia da kase roti dari sorga for dorang mo makang.’ ”

³²Yesus bilang pa dorang, “Kita bilang pa ngoni, dulu itu bukang Musa tu da kase roti dari sorga pa torang pe nene moyang, mar Kita pe Bapa yang da kase itu. Kong skarang Kita pe Bapa lei yang da kase pa ngoni tu roti yang butul dari sorga.

³³Soalnya tu makanan yang butul itu no tu roti yang Tuhan Allah da kase turung dari sorga, kong tu makanan yang butul itu bole mo beking manusia di dunia ini mo dapa hidop kekal.”

³⁴Kong dorang bilang pa Dia, “Guru, kase akang jo dang slalu tu roti itu pa torang.”

³⁵Yesus bilang pa dorang, “Kita ini no tu roti yang bole beking orang dapa hidop kekal. Sapa jo yang datang pa Kita, dia itu so nyanda mo lapar lei, kong sapa jo yang percaya pa Kita, dia itu so nyanda mo aus lei.

³⁶Mar sama deng tu Kita so bilang pa ngoni, biar lei ngoni so lia pa Kita, ngoni nyanda percaya pa Kita.

³⁷Samua orang yang Bapa so kase pa Kita, dorang itu mo datang pa Kita. Kong sapa jo yang datang pa Kita, Kita nyanda mo tolak pa dia.

³⁸Soalnya, Kita so turung dari sorga bukang for beking Kita pe mau, mar mo beking tu Dia yang da utus pa Kita pe mau.

³⁹Tu Dia yang da utus pa Kita pe mau itu bagini: Dia suka samua orang yang Dia so kase pa Kita nyanda mo mati slama-lamanya, mar di hari Kiamat Kita mo se hidop ulang.

⁴⁰Soalnya ini tu Kita pe Bapa pe mau: Dia suka supaya tiap orang yang lia pa Dia pe Anak trus percaya pa tu Anak, dorang itu mo dapa hidop kekal kong nanti di hari kiamat, Kita mo se hidop ulang pa dorang.”

⁴¹Kong tu orang-orang Yahudi babafeto pa Yesus lantaran Dia da bilang kalu Dia itu tu makanan yang so turung dari sorga.

⁴²Dorang bilang, “Dia itu to Yesus, tu Yusuf pe anak? Torang kanal tu De pe mama deng papa. Kong kiapa dang sampe Dia babilang kalu Dia itu turung dari sorga?”

⁴³Yesus bilang pa dorang, “Ngoni jang babafeto bagitu.

⁴⁴Nyanda ada orang yang bole datang pa Kita kalu Bapa yang da utus pa Kita nyanda bawa tu orang itu pa Kita. Kong Kita mo se hidop ulang tu orang yang Bapa da bawa pa Kita itu di hari Kiamat.

⁴⁵Ada tatulis di kitab nabi-nabi bagini, ‘Tuhan Allah mo mangajar pa samua orang.’ Kong tiap orang yang so dengar deng blajar dari pa Dia mo datang pa Kita.

⁴⁶Mar itu de pe arti bukang ada orang yang so lia pa Bapa, cuma Kita yang so lia pa Tuhan Allah tu Bapa lantaran Kita datang dari pa Tuhan Allah.

⁴⁷Kita bilang pa ngoni, sapa jo yang percaya pa Kita, dia itu mo dapa hidop kekal.

⁴⁸Kita ini tu makanan yang beking orang bole hidop kekal.

⁴⁹Tu ngoni pe nene moyang da makang tu makanan yang ja bilang manna di padang gurun, mar dorang itu tetap mati.

⁵⁰Mar di muka pa ngoni ini ada tu makanan yang turung dari sorga, kong sapa jo yang makang tu makanan itu nyanda mo mati.

⁵¹Kita ini tu makanan yang so turung dari sorga, tu makanan yang bole mo se hidop pa manusia. Sapa jo yang makang tu makanan ini, dia bole mo dapa hidop kekal. Kong tu makanan yang Kita mo kase itu, itu no tu Kita pe badan yang Kita mo kase pa samua orang di dunia ini supaya dorang bole hidop.”

⁵²Pe dengar itu, tu orang-orang Yahudi baku ambe kong babilang, “Bagimana lei kong Dia ini bole mo kase Dia pe badan for torang mo makang?”

⁵³Kong Yesus bilang pa dorang, “Kita bilang pa ngoni, kalu ngoni nyanda makang tu Anak Manusia pe badan deng minum Dia pe dara, ngoni nyanda mo dapa tu hidop kekal.

⁵⁴Tu orang yang makang Kita pe badan deng minum Kita pe dara, tu orang itu mo dapa hidop kekal kong Kita mo se hidop ulang pa dia di hari Kiamat.

⁵⁵Soalnya, Kita pe badan itu makanan yang butul deng Kita pe dara itu minuman yang butul.

⁵⁶Sapa jo yang makang Kita pe badan deng minum Kita pe dara, dia hidop satu deng Kita kong Kita lei hidop satu deng dia.

⁵⁷Bapa yang da utus pa Kita, Dia itu yang kase hidop pa samua, kong Dia lei yang kase hidop lei pa Kita. Bagitu lei deng sapa jo yang makang Kita pe badan, dia mo dapa hidop kekal lantaran Kita.

⁵⁸Kita ini tu makanan yang da turung dari sorga. Tu makanan ini nyanda sama deng tu manna yang ngoni pe nene moyang da makang, lantaran biar dorang makang, dorang tetap mati. Mar sapa jo yang makang ni makanan dari sorga, dia mo dapa tu hidop kekal.”

⁵⁹Samua ini Yesus da bilang di Kapernaum waktu Dia mangajar di ruma ibada agama Yahudi.

⁶⁰Waktu tu banya orang yang ja iko pa Yesus da dengar tu Yesus da bilang itu, dorang baku bilang, “Tu Guru pe ajaran itu brat. Nyanda ada orang yang bole mo trima tu ajaran itu.”

⁶¹Yesus tau kalu tu orang-orang yang ja iko pa Dia itu babafeto, so itu Dia bilang pa dorang, “Kiapa dang, ngoni tersinggung?

⁶²Kalu ngoni tersinggung, bagimana lei kalu nanti ngoni lia tu Anak Manusia taangka ka sorga, bale pa Dia pe tampa dulu?

⁶³Manusia nyanda mungkin mo dapa hidop kekal pake dia pe kekuatan sandiri, cuma tu Roh Kudus yang bole beking manusia hidop kekal. Tu kata-kata yang Kita da bilang ini, ini samua kata-kata dari Roh Kudus kong kata-kata ini lei yang kase hidop kekal.

⁶⁴Mar ada di antara pa ngoni yang nyanda percaya.” (Yesus bilang bagitu lantaran Dia tau dari dulu sapa yang nyanda percaya deng sapa yang mo bahianat pa Dia).

⁶⁵Kong Dia bilang, “So itu Kita so bilang pa ngoni, nyanda ada orang biar lei cuma satu yang bole mo datang pa Kita, kalu Bapa nyanda kase pa dia for datang pa Kita.”

⁶⁶Mulai dari waktu itu, banya dari orang-orang yang ja iko pa Yesus yang se tinggal pa Dia, dorang nimau mo iko pa Dia lei.

⁶⁷Kong Yesus bilang pa Dia pe dua blas murit, “Apa ngoni lei mo se tinggal pa Kita?”

⁶⁸Simon Petrus manyao pa Dia, “Tuhan, torang mo pigi pa sapa lei? Cuma Tuhan pe firman yang bole se tau pa torang bagimana torang mo dapa tu hidop kekal.

⁶⁹Torang ini so percaya deng so tau kalu Guru itu Yang Kudus tu Tuhan Allah da utus.”

⁷⁰Yesus bilang pa dorang, “Kita sandiri yang da pili pa ngoni dua blas murit ini to? Mar ada satu dari pa ngoni yang setang da kuasai.”

⁷¹Tu Yesus pe maksut itu Yudas, tu Simon Iskariot pe anak. Yudas itu satu dari Yesus pe murit, mar dia itu yang nanti mo bahianat pa Yesus.