Read Malay, Manado Yohanes 7 Bible Online

Yohanes 7 - Malay, Manado bible

Yohanes 7

¹Abis itu, Yesus pi bakliling di daera Galilea. Dia nimau bakliling di daera Yudea lantaran tu pemimpin-pemimpin agama Yahudi di sana brusaha mo bunung pa Dia.

²Waktu itu, so dekat tu orang Yahudi pe hari raya Pondok Daong.[4]

³So itu Yesus pe saudara-saudara babilang pa Dia, “Lebe bae Ngana se tinggal jo ni tampa kong pigi ka daera Yudea for rayakan tu hari raya, supaya banya orang tu ja iko pa Ngana bole lei lia tu mujisat-mujisat yang Ngana ja beking.

⁴Soalnya nyanda ada orang yang beking sesuatu deng cara babasambunyi kalu dia itu suka mo jadi orang yang top. Jadi kalu Ngana mo beking tu mujisat-mujisat, orang-orang di dunia ini musti lia tu Ngana da beking itu.”

⁵Yesus pe saudara-saudara bilang bagitu lantaran dorang sandiri nyanda percaya pa Dia.

⁶Kong Yesus manyao pa dorang, “Blum de pe waktu for Kita mo ka sana, mar for ngoni slalu ada de pe waktu for pigi ka sana.

⁷Soalnya manusia di dunia ini yang nyanda percaya pa Kita, dorang itu nyanda binci pa ngoni mar dorang binci pa Kita, lantaran Kita da bilang kalu dorang pe kalakuan nyanda butul.

⁸Ngoni jo tu pigi ka prayaan di Yerusalem. Kita skarang nyanda mo pigi ka sana lantaran blum de pe waktu for Kita ka sana.”

⁹Bagitu no tu Yesus da bilang pa Dia pe saudara-saudara, kong Dia da tinggal bebrapa hari lei di daera Galilea.

¹⁰Yesus pe saudara-saudara so pigi ka Yerusalem for rayakan tu hari raya. Kong serta so bebrapa hari, Yesus pigi ka sana nyanda deng trang-trangan mar Dia pigi deng babadiam.

¹¹Di Yerusalem pas hari raya itu, tu pemimpin-pemimpin agama Yahudi da cari-cari pa Yesus di prayaan itu, dorang babatanya, “Di mana tu Yesus kang?”

¹²Kong ada banya orang yang baku-baku bise tentang Yesus. Ada tu da bilang, “Dia itu orang bae-bae.” Mar ada lei yang da bilang, “Nyanda, Dia ja beking sesat banya orang.”

¹³Mar nyanda ada orang biar lei cuma satu yang brani mo babicara trang-trangan tentang Dia, lantaran dorang tako pa tu pemimpin-pemimpin agama Yahudi.

¹⁴Dorang rayakan hari raya Pondok Daong itu slama satu minggu, kong di tenga-tenga minggu itu Yesus maso ka kompleks Ruma Ibada Pusat kong mulai mangajar di situ.

¹⁵Kong tu pemimpin-pemimpin agama Yahudi heran skali da dengar tu Dia pe ajaran, dorang bilang, “Orang ini tau skali tentang atoran-atoran di kitab Taurat, padahal Dia itu nyanda perna blajar sama deng torang.”

¹⁶Yesus manyao pa dorang, “Tu Kita da se ajar ini, bukang dari Kita pe diri sandiri, mar dari Tuhan Allah yang da utus pa Kita.

¹⁷Sapa jo yang suka mo beking tu Tuhan Allah pe mau, dia itu mo tau apa tu Kita da se ajar itu dari Tuhan Allah ato itu cuma dari pa Kita pe diri sandiri.

¹⁸Sapa jo yang mangajar pake de pe pikiran sandiri, dia itu suka kalu de pe diri mo dapa puji deng dapa hormat. Mar sapa jo yang mangajar supaya Tuhan Allah yang da utus pa dia dapa puji deng dapa hormat, pasti tu orang itu ja beking tu butul deng dia nyanda ja badusta.

¹⁹Tu nabi Musa so kase tu atoran-atoran di kitab Taurat for ngoni to? Mar nyanda ada satu dari pa ngoni yang da beking tu atoran-atoran itu. Kalu ngoni iko tu atoran-atoran itu, no kiapa dang ngoni mo bunung pa Kita?”

²⁰Kong tu orang banya itu bilang pa Dia, “Ngana ini so kemasukan setang! Sapa tu mo bunung pa Ngana?”

²¹Trus Yesus manyao pa dorang, “Kita da se bae orang di hari Sabat satu kali, kong ngoni samua so heran deng itu.

²²Padahal ngoni sandiri lei da bakarja di hari Sabat waktu ngoni ja sunat orang iko tu nabi Musa da suru. Mar sebenarnya tu sunat itu bukang Musa pe atoran, mar itu atoran dari torang pe nene moyang tu Abraham, Ishak deng Yakub.

²³No kalu ngoni sunat orang di hari Sabat, supaya tu Musa pe atoran itu ngoni nyanda langgar, no kiapa dang ngoni mara pa Kita lantaran Kita da se bae satu orang di hari Sabat?

²⁴Ngoni jang hakimi orang cuma dari apa yang ngoni bole lia, mar ngoni musti hakimi orang iko apa yang butul.”

²⁵Kong ada bebrapa orang Yerusalem da dengar tu Yesus da bilang, trus dorang babilang, “Dia ini to tu Orang yang torang pe pemimpin-pemimpin agama Yahudi da brusaha mo cari bunung?

²⁶Co lia, Dia da babicara deng bebas di muka banya orang kong tu pemimpin-pemimpin itu nyanda bilang apa-apa pa Dia. Dorang stou so tau kang kalu Dia itu butul-butul Kristus tu Raja yang mo se slamat pa manusia?

²⁷Mar nyanda mungkin kalu ni Orang tu Kristus, lantaran torang tau Dia ini pe asal dari mana. Mar kalu Kristus, nyanda ada orang yang tau Dia itu pe asal dari mana.”

²⁸Waktu Yesus masi samantara mangajar di Ruma Ibada Pusat, Dia babilang deng suara kuat, “Memang ngoni kanal pa Kita deng ngoni tau Kita pe asal dari mana. Mar Kita datang bukang lantaran Kita pe mau sandiri, mar Kita datang lantaran Tuhan Allah tu da utus pa Kita. Dia itu yang butul, tu ngoni nyanda kanal.

²⁹Kita kanal pa Dia lantaran Kita datang dari pa Dia, kong Dia itu yang da utus pa Kita.”

³⁰Pe dengar itu, dorang brusaha tangka pa Yesus, mar nyanda ada orang yang bole tangka pa Dia lantaran blum sampe tu waktu yang Tuhan Allah da tentukan.

³¹Mar di antara tu orang banya itu ada banya yang jadi percaya pa Dia, kong dorang babilang, “Kalu Kristus tu Raja yang mo se slamat pa manusia datang, apa mungkin Dia mo beking lebe banya mujisat dari yang Dia da beking? Pasti nyanda to.”

³²Orang-orang dari golongan Farisi, tu golongan yang pegang kras tu atoran agama Yahudi, dorang da dengar tu orang banya da baku-baku bise tentang Yesus. So itu, tu imam-imam kapala deng orang-orang dari golongan Farisi suru tu penjaga-penjaga Ruma Ibada Pusat for tangka pa Dia.

³³Waktu itu, Yesus babilang pa orang banya, “So kurang sadiki tu waktu for Kita mo ada sama-sama deng ngoni. Kong abis itu Kita mo bale ulang pa Dia yang da utus pa Kita.

³⁴Ngoni mo cari pa Kita mar ngoni nyanda mo dapa pa Kita, lantaran ngoni nimbole pigi ka tampa tu Kita mo pigi akang.”

³⁵So itu, tu pemimpin-pemimpin agama Yahudi itu baku bilang, “Ka mana so Dia mo pigi sampe torang so nyanda mo dapa pa Dia? Apa Dia pe maksut Dia mo pigi pa tu orang-orang Yahudi yang da merantau ka bangsa bukang Yahudi, supaya Dia mo mangajar pa tu orang-orang yang bukang Yahudi di sana?

³⁶Kong apa dang Dia pe maksut waktu Dia bilang torang mo cari pa Dia mar torang nyanda mo dapa pa Dia, trus lei kalu di tampa tu Dia mo pigi akang, torang nimbole mo ka sana?”

³⁷Waktu so hari terakhir dari tu hari raya itu, pas de pe puncak prayaan, Yesus badiri kong babilang deng suara kuat, “Sapa jo yang aus, lebe bae dia datang pa Kita kong Kita mo se minum.

³⁸Sapa jo yang percaya pa Kita, dia itu nanti mo dapa apa tu da tulis di Kitab Suci bagini, ‘Dari dalam pa dia pe hati sama deng ada aer yang da mengalir tu beking dia bole mo hidop kekal.’ ”

³⁹Waktu Yesus bilang aer itu, Dia pe maksut Tuhan pe Roh tu orang percaya mo trima. Soalnya waktu Yesus masi ada di dunia, orang-orang blum trima tu Roh Kudus lantaran Tuhan Allah blum kase tunjung tu Yesus pe luar biasa.[5]

⁴⁰Waktu tu orang banya da dengar tu Yesus pe kata-kata itu, ada bebrapa dari pa dorang yang babilang, “Dia ini butul-butul nabi tu Tuhan Allah da janji mo datang.”

⁴¹Kong tu laeng babilang, “Dia ini Mesias, Tu Raja yang mo se slamat pa torang.” Mar tu laeng lei babilang, “Bukang, Tuhan Allah dulu da janji kalu Mesias itu datang dari Yudea bukang dari Galilea.

⁴²Di Kitab Suci da bilang kalu nanti Mesias mo datang dari pa raja Daud pe keturunan dari kampung Betlehem, tu raja Daud pe kampung.”

⁴³Kong tu orang-orang itu mulai baku ambe tentang Yesus.

⁴⁴Ada bebrapa orang mo tangka pa Dia, mar nyanda ada orang yang brani mo pegang pa Dia.

⁴⁵Tu penjaga-penjaga Ruma Ibada Pusat itu babale pa tu imam-imam kapala deng pa tu orang-orang dari golongan Farisi yang suru pa dorang, kong tu penjaga-penjaga itu dapa tanya, “Kiapa dang ngoni nyanda bawa pa Yesus kamari?”

⁴⁶Dorang manyao, “Blum perna ada orang yang babicara pe bagus sama deng Dia.”

⁴⁷Kong tu orang-orang dari golongan Farisi bilang pa dorang, “Apa Dia so beking sesat lei pa ngoni?

⁴⁸Ada so dari pa torang tu orang-orang dari golongan Farisi ato dari tu pemimpin-pemimpin agama Yahudi yang jadi percaya pa Dia? Nyanda ada to?

⁴⁹Mar tu orang banya itu percaya pa Dia lantaran dorang nintau tu atoran-atoran di kitab Taurat, dorang itu dapa kutuk dari Tuhan Allah.”

⁵⁰Di antara tu orang-orang dari golongan Farisi itu ada tu Nikodemus. Dia itu yang dulu perna da datang pa Yesus. Dia bilang pa dorang,

⁵¹“Kalu iko torang pe atoran-atoran di kitab Taurat, apa torang mo hukum orang seblum torang dengar dari pa dia deng seblum torang tau apa yang dia da beking?”

⁵²Kong dorang manyao pa dia, “Apa bapak lei orang Galilea sama deng Dia? Co bapak priksa bae-bae di Kitab Suci, di situ bapak bole tau kalu nyanda perna ada nabi yang datang dari Galilea.” [

⁵³Abis itu, dorang samua pulang pa dong pe ruma masing-masing.