Read Malay, Manado Yohanes 8 Bible Online

Yohanes 8 - Malay, Manado bible

Yohanes 8

²De pe eso pagi-pagi skali, Yesus pigi ulang ka kompleks Ruma Ibada Pusat. Banya orang datang pa Dia di situ, trus Dia dudu kong mangajar pa dorang di situ.

³Waktu itu, datang tu ahli-ahli Taurat deng orang-orang dari golongan Farisi tu golongan yang pegang kras tu atoran agama Yahudi. Dorang da bawa satu parampuang yang dapa riki da bersina.

⁴Dorang taru tu parampuang itu di tenga-tenga pa dorang, trus dorang bilang pa Yesus, “Guru, ni parampuang ini da dapa riki waktu dia da bersina.

⁵Kalu iko tu atoran-atoran yang nabi Musa da kase, tu parampuang-parampuang yang bagini musti dapa lempar deng batu sampe mati. Kalu Guru pe pendapat dang bagimana?”

⁶Dorang bilang bagitu for tes pa Yesus, supaya dorang bole mo se sala pa Dia lewat tu Dia pe jawaban pa dorang. Mar Dia cuma da maruku kong batulis deng Dia pe jare di tana.

⁷Waktu dorang tanya-tanya trus pa Yesus, Dia badiri kong bilang pa dorang, “Sapa dari pa ngoni yang nyanda berdosa, biar jo dia tu lebe dulu lempar batu pa tu parampuang itu.”

⁸Abis itu Dia maruku ulang kong batulis di tana.

⁹Waktu tu ahli-ahli Taurat deng tu orang-orang dari golongan Farisi dengar tu Dia da bilang itu, dorang pigi dari situ satu-satu, mulai dari yang paling tua. Kong de pe laste, di situ kurang tatinggal Yesus deng tu parampuang.

¹⁰Trus Yesus badiri kong batanya pa tu parampuang, “Ibu, mana jo dorang itu? Apa nyanda ada orang yang da hukum pa ibu?”

¹¹Tu parampuang manyao pa Dia, “Nyanda ada, Bapak.” Kong Yesus bilang pa dia, “Kita lei nyanda mo hukum pa ibu. Pigi jo, kong mulai skarang jang beking lei dosa.”][6]

¹²Abis itu, Yesus babicara ulang pa orang banya, “Kita ini trang dunia yang kase trang manusia pe hati. Sapa jo yang iko pa Kita, dia itu so nyanda lei mo hidop di glap, mar dia hidop di trang yang beking dia bole dapa hidop kekal.”

¹³Kong tu orang-orang Yahudi dari golongan Farisi bilang pa Dia, “Tu Bapak da kase tau itu nyanda butul, lantaran tu Bapak da kase tau itu tentang Bapak pe diri sandiri.”

¹⁴Yesus manyao pa dorang, “Biar lei Kita da kase tau tentang Kita pe diri sandiri, mar tu Kita da se tau itu butul lantaran Kita tau dari mana Kita da datang kong ka mana Kita mo pigi, mar ngoni nintau dari mana Kita datang kong ka mana Kita mo pigi.

¹⁵Ngoni ja hakimi orang iko tu manusia pe pikiran, mar Kita nyanda bahakimi orang.

¹⁶Mar kalu lei Kita mo bahakimi orang, Kita bahakimi orang deng butul lantaran Kita nyanda bahakimi sandiri mar Kita da bahakimi sama-sama deng Bapa yang da utus pa Kita.

¹⁷Pa ngoni pe atoran-atoran di kitab Taurat da tulis bagini: kalu ada dua orang jadi saksi tentang satu hal yang sama, itu de pe arti butul tu kesaksian itu.

¹⁸Tu saksi yang da basaksi tentang Kita, itu Kita pe diri sandiri deng lei Bapa yang da utus pa Kita.”

¹⁹Kong dorang bilang pa Dia, “Di mana so Guru pe Bapa?” Yesus manyao pa dorang, “Ngoni nyanda kanal pa Kita deng lei tu Kita pe Bapa. Kalu ngoni kanal pa Kita, tantu katu ngoni lei kanal tu Kita pe Bapa.”

²⁰Tu kata-kata ini Yesus da bilang waktu Dia da mangajar di dekat tampa ja kase akang doi persembahan di Ruma Ibada Pusat. Mar nyanda ada orang biar lei cuma satu yang da tangka pa Dia lantaran de pe waktu blum sampe.

²¹Yesus bilang ulang lei pa tu pemimpin-pemimpin agama Yahudi, “Kita mo pigi ka tampa laeng kong ngoni mo cari-cari pa Kita, mar ngoni nyanda mo dapa. Ngoni nyanda percaya pa Kita, jadi waktu ngoni mati, ngoni pe dosa-dosa blum dapa ampung. Kong di tampa tu Kita da pigi akang, ngoni nyanda dapa mo pigi ka situ.”

²²Pe dengar itu, tu pemimpin-pemimpin agama Yahudi babilang, “Dia mo bunung diri so? Soalnya kwa Dia bilang kalu di tampa tu Dia mo pigi akang torang nyanda dapa mo pigi ka situ.”

²³Kong Yesus bilang pa dorang, “Ngoni ini orang-orang yang de pe asal dari ni dunia, mar Kita pe asal dari sorga. Ngoni Cuma tau dunia pe pikiran, mar Kita nyanda.

²⁴So itu, tadi Kita bilang pa ngoni kalu ngoni mo mati lantaran ngoni pe dosa-dosa nyanda dapa ampung. Soalnya ngoni nyanda percaya kalu ‘Kita ini’[7] no yang so perna Kita da bilang pa ngoni, so itu ngoni mo mati lantaran ngoni pe dosa-dosa nyanda dapa ampung.”

²⁵Kong dorang bilang pa Dia, “Sapa so Bapak?” Yesus manyao pa dorang, “Sapa Kita sebenarnya, Kita so kase tau pa ngoni dari dulu.

²⁶Masi banya lei tu Kita mo bilang tentang ngoni deng lei masi banya tu Kita mo hakimi tentang ngoni. Mar Kita cuma mo se tau pa orang-orang di dunia ini tu Kita da dengar dari pa Dia yang da utus pa Kita, kong yang Dia da bilang itu butul.”

²⁷Tu orang-orang yang da badengar pa Yesus nyanda mangarti kalu Yesus da babicara pa dorang tentang Dia pe Bapa di sorga.

²⁸So itu, Yesus bilang pa dorang, “Nanti waktu ngoni so angka tu Anak Manusia for se salib, baru ngoni mo tau kalu Dia itu no Kita. Kong ngoni lei mo tau kalu Kita nyanda da beking apa-apa cuma dari Kita pe diri sandiri, mar samua yang Kita da beking, itu samua dari pa Bapa yang da se ajar pa Kita.

²⁹Kong Dia yang da utus pa Kita ada sama-sama deng Kita. Dia nyanda perna mo se biar Kita sandiri lantaran Kita slalu ja beking apa tu Dia snang.”

³⁰Abis Yesus bilang samua itu, banya orang jadi percaya pa Dia.

³¹Yesus bilang pa tu orang-orang Yahudi yang so jadi percaya pa Dia, “Kalu ngoni beking trus tu Kita pe ajaran, ngoni ini butul-butul orang yang ja iko pa Kita.

³²Kalu ngoni bagitu, ngoni mo tau tu ajaran yang butul trus tu ajaran yang butul itu mo beking ngoni jadi bebas dari apa yang da se budak pa ngoni.”

³³Dorang manyao pa Dia, “Torang ini Abraham pe keturunan kong torang nyanda perna jadi sapa-sapa pe budak. Jadi bagimana lei kong Bapak bilang kalu torang ini mo bebas dari apa yang da se budak pa torang?”

³⁴Yesus bilang pa dorang, “Kita bilang pa ngoni, tiap orang tu ja beking dosa, dia itu jadi budak dari dosa.

³⁵Kong kalu orang jadi budak, itu de pe arti dia nyanda tetap tinggal di dalam ruma deng tu kluarga. Mar kalu anak, dia tinggal di dalam ruma deng dia pe kluarga for slama-lamanya.

³⁶Jadi kalu tu Anak Manusia se bebas pa ngoni dari dosa, ngoni ini butul-butul bebas.

³⁷Kita tau kalu ngoni ini Abraham pe keturunan, mar biar lei bagitu ngoni brusaha bunung pa Kita lantaran ngoni nimau trima tu Kita pe ajaran.

³⁸Apa tu Kita dengar dari pa Bapa, itu yang Kita se ajar pa ngoni. Mar ngoni iko apa tu ngoni pe papa da se ajar.”

³⁹Dorang manyao pa Dia, “Torang pe papa itu Abraham.” Yesus bilang pa dorang, “Kalu ngoni ini butul Abraham pe anak-anak, tantu ngoni beking sama deng tu Abraham da beking.

⁴⁰Mar tu ngoni da beking nyanda sama deng Abraham, ngoni tare brusaha mo bunung pa Kita cuma lantaran Kita so bilang pa ngoni tu ajaran yang butul tu Kita da dengar dari Tuhan Allah.

⁴¹Tu ngoni da beking itu sama deng tu ngoni pe papa sandiri da beking.” Dorang manyao, “Torang ini bukang anak haram. Torang pe Bapa cuma satu, Dia itu Tuhan Allah sandiri.”

⁴²Yesus bilang pa dorang, “Kalu Tuhan Allah itu ngoni pe Bapa, ngoni mo sayang pa Kita lantaran Kita ini datang dari Tuhan Allah kong skarang Kita ada di sini. Kong lei Kita ini da datang bukang lantaran Kita pe mau sandiri, mar lantaran Dia yang da utus pa Kita.

⁴³Ngoni nyanda mangarti deng tu Kita da bilang lantaran ngoni nimau mo trima tu Kita pe ajaran.

⁴⁴Ngoni pe papa itu setang pe bos, kong ngoni suka beking tu ngoni pe papa pe mau. Tu setang pe bos itu, dari dulu sampe skarang tukang babunung orang. Dia nyanda ja beking tu butul, lantaran pa dia itu nyanda ada yang butul. Kalu dia badusta, itu dia bilang memang dari pa dia pe diri sandiri lantaran dia itu pangbadusta, kong dia itu papa dari samua tu pangbadusta.

⁴⁵Mar so lantaran Kita ini ja kase tau tu ajaran yang butul, ngoni nyanda percaya pa Kita.

⁴⁶Sapa dari antara pa ngoni yang bole se bukti kalu Kita da beking dosa? Kalu Kita se tau pa ngoni tu ajaran yang butul, no kiapa dang ngoni nyanda percaya pa Kita?

⁴⁷Sapa jo yang de pe asal dari pa Tuhan Allah, dia dengar kong trima tu Tuhan Allah pe ajaran. Mar ngoni nimau badengar tu Tuhan Allah pe ajaran lantaran ngoni pe asal bukang dari pa Tuhan Allah.”

⁴⁸Tu pemimpin-pemimpin agama Yahudi manyao pa Yesus, “Butul tu torang da bilang kalu Bapak ini bukang orang Israel, mar Bapak ini orang Samaria[8] deng lei da kemasukan setang.”

⁴⁹Yesus manyao, “Kita ini nyanda kemasukan setang. Kita hormat pa Kita pe Bapa mar ngoni hina pa Kita.

⁵⁰Kita nyanda cari puji deng hormat for Kita pe diri sandiri. Ada Satu yang suka supaya Kita dapa puji deng hormat, deng Dia itu no yang mo baadili.

⁵¹Kita bilang pa ngoni, sapa jo yang iko tu Kita pe ajaran, dia nyanda mo mati for slama-lamanya.”

⁵²Tu pemimpin-pemimpin agama Yahudi itu babilang pa Dia, “Skarang komang so jelas kalu Bapak memang da kemasukan setang. Tu Abraham deng tu nabi-nabi so mati, mar Bapak bilang kalu orang iko Bapak pe ajaran, tu orang nyanda mo mati for slama-lamanya.

⁵³Abraham deng nabi-nabi so mati, kong apa Bapak lebe hebat dari dorang itu? Bapak ini sapa so?”

⁵⁴Yesus manyao, “Kalu Kita cari puji deng hormat for Kita pe diri sandiri, itu pujian deng hormat yang Kita da dapa itu kasiang nyanda ada de pe arti. Mar tu Kita pe Bapa tu ngoni ja bilang ngoni pe Tuhan Allah lei, Dia itu yang suka supaya Kita dapa puji deng hormat.

⁵⁵Mar sebenarnya ngoni nyanda kanal pa Dia. Kita ini yang kanal pa Dia. Kalu Kita bilang Kita nyanda kanal pa Dia, Kita ini pangbadusta sama deng ngoni. Mar yang sebenarnya Kita kanal pa Dia deng Kita ja beking tu Dia da bilang.

⁵⁶Tu ngoni pe nene moyang Abraham, dia snang skali lantaran dia tau nanti dia mo lia Kita datang. Kong memang dia so lia pa Kita, so lantaran itu dia snang skali.”

⁵⁷Kong tu pemimpin-pemimpin agama Yahudi itu babilang pa Dia, “Bapak pe umur jo blum lima pulu taong. Bagimana lei kong Bapak bilang kalu Bapak so lia pa Abraham?”

⁵⁸Yesus bilang pa dorang, “Kita bilang pa ngoni, seblum lei tu Abraham lahir, Kita ini so ada.”

⁵⁹Waktu orang-orang Yahudi dengar itu, dorang ambe batu for lempar pa Dia, mar Yesus basambunyi kong se tinggal tu Ruma Ibada Pusat.